Read Guarayu MATEO 7 Bible Online

MATEO 7 - Guarayu bible

MATEO 7

¹“Ndape ñemoñetai chira ambuae ava rese, evokoiyase Tüpä avei noñemoɨröi chira peü.

²Esepia Tüpä avei oma'erä perese inungar pe ambuae ava upe peyapo va'e peiko; inungar avei mba'e perembiapokwer pemondo va'e ambuae upe, egwë e'i tuprɨ aveira Tüpä imondo peü.

³¿Ma'erä erema'e eiko nde rɨvrɨ rembiavɨ kwer rese tëi, nderema'ei ete mba'e nderembiapokwer erereko va'e rese?

⁴Nde ereyavɨse mba'e tuvicha va'e nde rekokwer pɨpe, ¿marä erera vo evokoiyase nde rɨvrɨ upe: ‘Eseya cheu amoigätu va'erä mba'e nderembiapokwer erereko va'e erera pi'ä chupe’?

⁵¡Pe inungar ava oñe'ë ñotëi va'e tekokwer rese yuvɨreko yepi!, pemoigätu uka rane mba'e pe rembiavɨ tuvicha katu va'e peyesui, a'ese ramo ambuae perɨvrɨ rembiavɨ peikatura imoigätu.

⁶Pemondoi rene mba'e avɨye va'e kave upe, avɨyeteramo oyemboyerera peü opara pembo'i-mbo'ira yuvɨreko. Iyavei ndapemondoi chira mba'e porañete va'e kuchi upe, avɨyeteramo oyemboyerera mba'e-mba'e tëi apo yuvɨreko peü.”

⁷“Peporandu mba'e rese, a'ese Tüpä omondora peü; peseka, a'ese avei peyosɨra; peñe'ë okendɨpɨve, a'ese oyemboira peü.

⁸Esepia akoi oporandu va'e mba'e rese, a'e oipɨsɨra; iyavei oseka va'e, a'e oyosɨra; akoi oñe'ë va'e okendɨpɨve chupe oyemboira.

⁹¿Oimerä pi'ä ñepëi pe pa'ü pendar omondo va'erä ita tëi gwa'ɨrɨ upe mboyape rese oyeupe poranduse?

¹⁰¿Anise oyeupe poranduse omondora pi'ä mboi tëi chupe?

¹¹Yepe ndaperekoporäi va'e peiko viña, pe ra'ɨrɨ upe rumo pemondoño ite mba'e avɨye va'e, ¡ta'etru pe Ru ɨva pendar oipota katu mba'e avɨye va'e mondo agwä akoi ava mba'e rese oporandu va'e upe!

¹²Egwë e'i ete, peyapo pe ambuae ava eta rese mba'e peremimbotar ambuae oyapo va'erä avei ambuae yuvɨreko perese; esepia evokoi imboyoyasa mborokwaita rese Moisés porombo'esa rese aveino.”

¹³“Peike okendɨpɨ ikä'imi va'e rupi. Evokoi okendɨpɨ iyavei perɨ gwasu vɨraso kañɨ tëi va'e save, iyavei seta yuvɨroike katu ava supi;

¹⁴teko apɨre'ɨ̇save oso va'e rumo okendɨpɨ perɨ reseve ikä'imi supi gwata agwä yavai ete, movɨrömi tëi ava oseka yuvɨreko.”

¹⁵“Peñearö ava semirañeteai va'e sui oñe'ë tuprɨ tëi va'e Tüpä rese. A'e yugwerura peü ndoyavɨi chira ovesa ndaseko maräi va'e yuvɨreko, ipɨ'a pɨpe rumo sekokwer avɨye ma'embiar oñaröai va'e.

¹⁶Peikwara ava rekokwer mba'e sembiapo rese, esepia ndipo'osai chira uva yu pa'ü sui higo ɨvɨra sächi atɨ va'e sui aveino.

¹⁷Egwë e'i ete, opakatu ɨvɨra avɨye va'e i'a avɨye avei, ɨvɨra naporäi va'e i'a naporäi avei.

¹⁸Ɨvɨra avɨye va'e ndovɨrekoi chietera o'a naporäi va'e, iyavei ɨvɨra naporäi va'e ndovɨrekoi chietera o'a avɨye va'e.

¹⁹Opakatu ɨvɨra i'a naporäi va'e, yasɨasa ipare imondosa tatave.

²⁰Egwë peyera peikwa ava rekokwer sembiapo rese.”

²¹“Nda'ei opakatu aipo e'i yuvɨreko cheu: ‘Che Yar, Che Yar’, yuvɨroikera Tüpä mborerekwasave, oyapo va'eño tuprɨ Che Ru ɨva pendar remimbotar yuvɨroikera a'eve.

²²Arɨ kañɨ pɨpe seta tëi ava aipo e'ira yuvɨreko cheu: ‘Ore Yar, Ore Yar, ore ni'ä oromombe'u mba'e avɨye va'e nderer pɨpe yepi, iyavei nderer pɨpe orovɨnose karugwar, nderer pɨpe avei oroyapo poromondɨisa oroiko.’

²³Evokoiyase amboyevɨra chupe: ‘Ndopokwai va'e ite; ¡peyepepɨ che sui, mba'e-mba'e tëi aposar!’ ”

²⁴“Akoi, osendu va'e che ñe'ë oyapo va'e avei mba'e che remimbotar, inungar ava ipɨ'a ñemoñeta tuprɨai va'e omopü'a ita arɨve gwëtära.

²⁵Oyepota amar ou, oyeupi ɨai öi ipare ɨvɨtuai omombaraɨsu oɨ imoi; ndovɨapi ete rumo, esepia ni'ä vɨreko ite ovɨräkwäsa ita arɨve.

²⁶Akoi osendu va'e che ñe'ë ndoyapoi va'e mba'e che remimbotar, a'e inungar ndipɨ'a ñemoñeta tuprɨi va'e omopü'a gwëtära ɨvɨ ku'i arɨve tëi.

²⁷Oyepota amar ou, oyeupi ɨai öi, ɨvɨtuai omombaraɨsu oɨ imoi, ipare oɨ ovɨapi oso. ¡Opa ite mba'e okañɨ!”

²⁸Opase Jesús oñe'ë, opakatu ava re'ɨi ndoyembovɨ'ai tëi marä e'i rutei iporombo'esa e'i tëi yuvɨreko chupe,

²⁹esepia, nda'ei Moisés porokwaita rese oporombo'e va'e nungar; a'e rumo oporombo'e gweko pirätäsa pɨpe ite.