Read Guarayu MATEO 9 Bible Online

MATEO 9 - Guarayu bible

MATEO 9

¹Ko ipare, Jesús o'a ɨarusu pɨpe, osasa ambuae ɨpa rovai ichui oyepota oso gwekwave.

²A'eve vɨraso ndogwatai va'e yuvɨreko chupe, imba'easɨ va'e rɨru pɨpe; Jesús rumo oikwase oyese yeroya vɨreko va'e, a'ese aipo e'i imba'easɨ va'e upe: — Che ra'ɨrɨ, eyemopoäse; che ñeröi nde angaipa rese ndeu.

³Oime aipo Moisés porokwaita rese oporombo'e va'e ipɨ'a ñemoñeta yuvɨreko: “Ko aipo e'i va'e oñe'ë tëi Tüpä rer maräne'ɨ̇ rese.”

⁴Jesús rumo oikwa voi ete ipɨ'a ñemoñetasa, sese oporandu chupe: — ¿Ma'erä vo pe pɨ'a ñemoñetasa mba'e tëi pɨpe pereko?

⁵¿Mba'e pi'ä ndayavai katu, aipo ya'e va'erä: ‘Nde angaipa rese che ñeröi ndeu’, anise aipo esara tie: ‘Epü'a ipare egwata’?

⁶Che amboyekwara ava ɨvate katu va'e Ra'ɨrɨ cherekosa, vɨreko avei omborerekwasa ko ɨvɨ pɨpe ñeröi agwä angaipa upe. Evokoiyase aipo e'i ndogwatai va'e upe: — Epü'a, esupi nde rupa eso nde rëtäve.

⁷Ndogwatai va'e opü'a ipare oso gwëtäve.

⁸Osepiase rumo ava Jesús rembiapo, a'ese osɨkɨye tëi ipare omboetei Tüpä yuvɨreko esepia ni'ä omondo pirätäsa ava upe

⁹Jesús osose a'e ichui osepia ñepëi ava serer va'e Mateo, ogwapɨ a'eve öi gwarepochi rerokwasar Roma pendar uve ñarä. A'ese Jesús aipo e'i chupe: — Erio che rupi. Evokoiyase Mateo opü'a oso supi.

¹⁰A'e arɨ pɨpeve Jesús okaru sëtäve öi, seta iteanga avei gwarepochi rerokwasar Roma pendar upe narä, iyavei ambuae ava angaipa viyar, oyepota yugweru ogwapɨ avei karusa rendave Jesús ɨpɨve iyavei semimbo'e eta reseve yuvɨreko.

¹¹Ko nungar repiase, fariseo eta oporandu semimbo'e eta upe yuvɨreko: — ¿Ma'erä ru pe mbo'esar okaru evokoi gwarepochi rerokwasar iyavei angaipa viyar pa'üve tëi?

¹²Jesús osenduse omboyevɨ chupe aipo e'i: — Akoi nimaräi va'e iyavei nimba'easɨi va'e ndosekai ete oporoposano va'e, imba'easɨ va'e gweraño ite oseka.

¹³Peso iyavei peyembo'e ikwa agwä ko ñe'ësa resendar: ‘Aipota che peikora poroparaɨsu rekosa pɨpe, anichira mba'e peropove'ë tuprɨ tëi.’ Esepia che ndayui ava seko katuprɨ va'e reka, ayu angaipa viyar reka.

¹⁴Juan Oporoapirämo va'e rupindar oyemboya Jesús rese ipare oporandu yuvɨreko chupe: — Ore oroiko va'e iyavei fariseo eta oroyekwaku yepi, ¿ma'erä ru evokoiyase nde remimbo'e eta ndoyekwakui yuvɨreko?

¹⁵Jesús omboyevɨ chupe: — ¿Avɨyera vo aipo ndovɨ'ai chira yuvɨnöi icho'oprɨ mendasave, imer oikove vɨteseve ipa'üve yuvɨreko? Oimerä rumo arɨ imer reraso agwä ichui kuri; a'ese ramo oyekwakura yuvɨreko.

¹⁶“Ndipoi chietera omoigätu va'e ñepëi turukwar kwakwa oyapete va'e turukwar ipɨasu va'e pɨpe, esepia ni'ä, yapetesa ipɨasu va'e oicho'oño turukwar kwakwa imondoropa, ichorosa evokoiyase tuvicha katu-katuño itera.

¹⁷Iyavei ndosoi chietera uva rɨkwer pɨasu mba'e pirer kwakwa va'e pɨpe, esepia mba'e pirer opara opu, inungar uva rɨkwer iyavei mba'e pirer okañɨ tëira. Evokoiyase pemondora uva rɨkwer pɨasu mba'e pirer pɨasu va'e pɨpe, egwë e'ise oyoya voi ete nokañɨi chietera.”

¹⁸Jesús oñe'ë vɨteseve, ñepëi judío rerekwar oyepota ou, oñenopɨ'ä sovai aipo e'i chupe: — Che rayrɨ kurïtëi omano ou; nde ereyuse rumo eremondora ndepo i'arɨve, a'ese oyevɨra tekovesa pɨpe.

¹⁹Jesús opü'a, yuvɨraso gwemimbo'e eta reseve supi.

²⁰Evokoiyase ñepëi kuña opayandepo yovaive ñuvɨrïo aravɨter rupi imba'easɨ va'e, suvɨ yepɨyere-yere va'e, oyemboya oso Jesús rese sakɨkwei kotɨ ipare opoko iturukwar popɨ rese.

²¹Esepia a'e aipo e'i opɨ'a pɨpe: “Yepe iturukwar popɨ resemi tëi apokora, akwerara rumo.”

²²Jesús rumo oyemboyere kuña rese, aipo e'i chupe: — Che rayrɨ, eñemopoäse, erekwera kurïtëi Tüpä reroyasa erereko va'e pɨpe. Aipo i'e ramoseve okwera voi ete a'e kuña.

²³Oyepotase Jesús oso judío rerekwar rëtäve, osepia omimbɨ va'e oyemoigätupase omano va'e tɨ̇ agwä iyavei ava oyase'o atɨ yugweru,

²⁴aipo e'i chupe: — Pesëpa ko'ave sui, ko kuñatäi nomanoi, oke tëi ou. Ava rumo opukaete-eteño Jesús rese yuvɨreko,

²⁵a'e rumo opa omosë ava; ipare oike oɨ pɨpe oipopɨsɨ kuñatäi, a'ese oñarapü'a voi ete.

²⁶Ko sembiapo evokoiyase oyandupa voi opakatu tekwa rupi yuvɨreko.

²⁷Osëse Jesús a'e ichui, ñuvɨrïo ndasesapɨsoi va'e osakɨkwei moña, säse yuvɨreko chupe: — ¡Jesús David suindar, ore paraɨsuerekomi tëi eve!

²⁸Oikese Jesús oso oɨ pɨpe, ndasesapɨsoi va'e oyemboya yuvɨraso sese, a'ese Jesús oporandu chupe: — ¿Che reroya ite vo pe mbogwera agwä rese peye? — Taa, nde reroyasa ite ore Yar — e'i imboyevɨ yuvɨreko chupe.

²⁹Evokoiyase Jesús opoko sesa rese, aipo e'i chupe: — Tayaposa mba'e pe che reroya agwer rupi peü.

³⁰Aipo i'e ramoseve osareko tuprɨ voi yuvɨreko. Ipare Jesús aipo e'i pemombe'ui rene katu: — Peikwa ukai rene ambuae ava upe.

³¹A'e yuvɨnosë ramo suive ite, omombe'u opakatu tekwa rupi Jesús rembiapo yuvɨreko.

³²Ndasesapɨsoi va'e yuvɨnosë yuvɨnoi, a'ese ambuae ava vɨroyepota ñepëi ava niñe'ëgätui va'e karugwar vɨreko va'e oyese Jesús upe yuvɨreko.

³³Jesús omosëse karugwar ichui, a'ese niñe'ëgätui va'e omboɨpɨ oñe'ë. Ava rumo ndoyembovɨ'ai tëi, aipo e'i yuvɨreko: — ¡Ndasepiasai va'e ite ko nungar tekwa Israel pɨpe yepi!

³⁴Fariseo eta rumo aipo e'iño yuvɨreko: — A'e karugwar rerekwar ite omondo pirätäsa ko upe omosë va'erä karugwar.

³⁵Jesús ogwatapa opakatu tekwa-tekwami rupi iyavei oporombo'e oɨ judío ñemonu'äsa yakatu rupi. Omombe'u tekovesa avɨye va'e Vu mborerekwasa resendar, iyavei oporombogwera opakatu-katu tëi mba'erasɨsa sui aveino.

³⁶Osepiase ava re'ɨi, iparaɨsu tëi chupe, esepia ikwerai tëi yuvɨreko, inungar ovesa ndovɨrekoi va'e gwarösar.

³⁷Evokoiyase Jesús aipo e'i gwemimbo'e eta upe: — Supiete mba'e mitɨ̇ imonu'ä pɨrä seta iteanga, oporavɨkɨ va'e rumo movɨrömi tëi.

³⁸Sese peporandu, mba'e mitɨ̇ Yar upe a'e tomondo ava imonu'ä agwä.