Read Guarayu MARCOS 1 Bible Online

MARCOS 1 - Guarayu bible

MARCOS 1

¹Yɨpɨndar va'e ñe'ësa ko Jesús a'e Poropɨsɨrösar sekoi, Tüpä Ra'ɨrɨ.

²Ikwachiaprɨ Tüpä ñe'ëngagwer Isaías kwachiar pɨpe aipo e'i: “Amondora che ñe'ë mombe'usar nde renonderä ndeu, perɨ moigätu agwä.

³Oyeendu ñe'ësa ipirätä va'e ava pore'ɨ̇save: ‘Pemoigätu yande Yar raperä; pemo'ɨ̇vɨi tuprɨ perɨ.’ ”

⁴Egwë e'i Juan Oporoapirämo ou ava apirämo ɨvɨ iporupɨre'ɨ̇sa rupi oiko; aipo e'i opakatu upe peyevɨ Tüpä upe peñeapirämo uka, Tüpä iñeröi agwä peü peangaipa rese.

⁵Opakatu ava yugweru iñe'ë rendu agwä, ɨvɨ Judea rupindar iyavei tekwa Jerusalén pendar oangaipagwer mombe'u agwä. A'ese Juan oñapirämo ɨai Jordán pɨpe.

⁶Juan turukwar camello ragwer apoprɨ, sumbɨkwasa mba'e pirer; o'u tukru iyavei eirɨ ka'a pɨpendar.

⁷A'e aipo e'i oñe'ë ava upe: “Che rakɨkwei oura seko pirätä katu va'e che sui, sese cheu ndiyai chira ayeaɨvɨ ipɨtakisä yora agwä.

⁸Che supi ete opoapirämo ɨ pɨpe tëi; a'e rumo pe apirämora Espíritu Maräne'ɨ̇ pɨpe.”

⁹Ipare Jesús osë, tekwa Nazaret sui oso, Galilea rupi, a'eve Juan oñapirämo ɨai Jordán pɨpe.

¹⁰Osë ramoseve ɨ sui, Jesús osepia ɨva oyemboi tuprɨ a'ese Espíritu ogweyɨ i'arɨve apɨkasu nungar.

¹¹A'ese oyeendu ñe'ësa ɨva sui, aipo e'i: “Nde che Ra'ɨrɨ ereiko che rembiaɨsu, avɨ'a eteprɨ nde rese.”

¹²Ipare voi, Espíritu vɨrogwata Jesús ava pore'ɨ̇sa rupi.

¹³A'eve Jesús sekoi cuarenta arɨ, mba'e mɨmba vai pa'üve, a'eve avei Karugwar osekoa'ä; mbigwai eta ɨva pendar rumo i'añekoño yuvɨreko sese.

¹⁴Juan rokenda pare, Jesús oso ɨvɨ Galilea rupi, omombe'u ñe'ësa avɨye va'e Tüpä rekokwer resendar ava upe oiko.

¹⁵Aipo e'i: “Oyepota arɨ ipapaprɨ, Tüpä mborerekwasa köimi ete sekoi yandeu. Peyevɨ Tüpä upe iyavei peroya ko ñe'ësa avɨye va'e.”

¹⁶Ñepëi arɨ Jesús ogwata ɨpa Galilea ɨvɨi, a'ese osepia Simón tɨvrɨ Andrés avei. A'e yuvɨrekoi pira mbo'asar, pira mbo'a vɨteseve.

¹⁷Aipo e'i Jesús chupe: — Perio che rupi, napeye aveira ava reka agwä cheu narä.

¹⁸Aipo e'i ramoseve voi, opoi opira mbo'asa sui yuvɨreko, ipare yuvɨraso supi.

¹⁹Ipare chi'ï ogwata irimise, osepia Santiago Zebedeo Ra'ɨrɨ, tɨvrɨ Juan reseve ɨarusu pɨpe omoigätu opira mbo'asa yuvɨnoi.

²⁰A'e chupe avei oñe'ë, evokoiyase oseya vu Zebedeo ɨarusu pɨpe ipɨtɨ̇vɨïsar reseve, ipare yuvɨraso Jesús rupi.

²¹Oyepotase Cafarnaúm ve yuvɨreko, mbɨtu'usa arɨ pɨpe Jesús oike oɨ judío ñemonu'äsave omboɨpɨ oporombo'e.

²²Evokoiyase ava iporombo'esa renduse ndoyembovɨ'ai tëi yuvɨreko, esepia oporombo'e gweko pirätäsa pɨpe, nda'ei Moisés porokwaita rese oporombo'e va'e nungar.

²³A'eve mbɨa oɨ judío ñemonu'äsa pendar vɨreko va'e karugwar oyese, säse pirätä chupe aipo e'i:

²⁴— ¿Ma'erä vo ereyuño tëi ko'ave oreu, Jesús Nazaret pendar? ¿Ereyu vo ore mokañɨ agwä tëi? che orokwa ite, nde Tüpä suindar ndaseko maräi va'e ereiko.

²⁵Jesús oñe'ëgäta karugwar upe aipo e'i: — ¡Kiriri epoi ko mbɨa sui!

²⁶Evokoiyase karugwar mbɨa rese sekoi va'e omoeo'ä seitɨ ɨvɨve, säse pirätä osë oso ichui.

²⁷Opakatu ava oyembosɨkɨye, ichui oporandu-randu oyeupe yuvɨreko: — ¿Mba'e pi'ä ko? ¡Esepia ko mbɨa porombo'esa ipɨasu va'e ite vɨreko avei omborerekwasa! ¡Karugwar avei ete omboyeroya oyeupe iñe'ëse yuvɨreko!

²⁸Kurïtëimi voi yandusa Jesús reräkwä opakatu ɨvɨ Galilea rupi.

²⁹Yuvɨnosëse Jesús oɨ judío ñemonu'äsa sui, yuvɨraso Santiago iyavei Juan rese Simón Andrés rëtäve.

³⁰A'eve Simón rembireko sɨ so'ɨ iteanga vupave ou. Evokoiyase omombe'u Jesús upe imba'erasɨsa yuvɨreko,

³¹a'ese oso chupe oipɨsɨ ipo rese imopü'a a'e ramoseve, so'ɨ opɨtu'u ichui. Ipare voi a'e kuña i'añeko semi'urä rese.

³²Pɨ̇tü ramomise, opakatu imba'easɨ va'e iyavei karugwar vɨreko va'e vɨraso Jesús upe,

³³opakatu ava a'e tekwa pendar oñemonu'ä okendɨpɨve yuvɨreko.

³⁴Jesús seta ombogwera ava opakatu imba'erasɨsa sui, iyavei omboyepepɨ seta karugwar ava sui; ndoipotai rumo karugwar ñe'ë, esepia a'e oikwa ite sekokwer yuvɨreko.

³⁵Ko'ë ramomise, Jesús opü'a oso tekwa sui oyerure agwä ava pore'ɨ̇save.

³⁶Simón ondugwer reseve yuvɨraso Jesús reka,

³⁷osepiase rumo aipo e'i yuvɨreko chupe: — Opakatu ava nde reka tëi.

³⁸A'e rumo omboyevɨ chupe: — Yaso ambuae tekwa namombrɨi va'esa rupi; a'eve avei amombe'ura ñe'ësa avɨye va'e, esepia a'egwä ni'ä ayu ko ɨvɨ pɨpe.

³⁹Egwë e'i Jesús ogwata opakatu Galilea ɨvɨ rupi, omombe'u ñe'ësa oɨ judío ñemonu'äsa yakatu rupi iyavei seta omose karugwar oiko.

⁴⁰Ñepëi mbɨa mba'erasɨ vai rerekosar oyemboya Jesús rese, oñenopɨ'ä sovai aipo e'i chupe: — Ereipotase, che mbogwerami tëi eve.

⁴¹Iparaɨsu rekosave Jesús opoko sese, aipo e'i chupe: — Aipota. ¡Erekwerara kurïtëi!

⁴²Aipo e'i ramoseve voi okwera mba'erasɨ vai rerekosar.

⁴³Jesús omboyevɨ voi ete imondo, aipo e'i yokwai:

⁴⁴— Eremombe'u ambuae ava upe; esoño ipavoi pa'i upe nde kwerasa mombe'u, iyavei eraso nde porerekosa, Moisés porokwaita rupi, oikwa va'erä opakatu pa'i eta yuvɨreko.

⁴⁵A'e mbɨa oso omombe'u-mbe'u opakatu ava upe mba'e osepia va'ekwer. Sese Jesús ndoikatu iri gweike agwä gwekokwer mombe'use tekwa rupi, opɨtaño tekwa popɨ rupi ava pore'ɨ̇save; ava rumo opakatu tekwa rupindar yuvɨrasoño ite sepia.