Read Guarayu MARCOS 10 Bible Online

MARCOS 10 - Guarayu bible

MARCOS 10

¹Ipare Jesús osë tekwa Cafarnaúm sui, oso Judea ɨvɨ rupi ɨai Jordán rovai arɨ sësa kotɨ. A'eve ava re'ɨi oñemonu'ä iri yuvɨreko sese. Iyavei ombo'e iri ava gwekokwer rupi tuprɨ.

²Evokoiyase fariseo oyemboya Jesús rese seko'ä agwä tëi, avɨye pi'ä kuimba'e omenda va'e opoi gwembireko sui e'i yuvɨreko chupe.

³A'e rumo omboyevɨ aipo e'i: — ¿Marä e'i vo akoi Moisés porokwaita pɨpe?

⁴A'e evokoiyase omboyevɨ yuvɨreko aipo e'i chupe: — Moisés remimombe'u aipo e'i pemondora pe rembireko upe kwachiar poisa resendar pe poi agwä perembireko sui.

⁵Evokoiyase Jesús aipo e'i: — Moisés omondo ko porokwaita pe poreroya e'ɨ̇sa pɨpe sui peü.

⁶Yɨpɨsuive ni'ä, ‘Tüpä oyapo opakatu mba'e, oyapo avei kuimba'e kuña reseve.

⁷Sese ni'ä kuimba'e omendase, oyepepɨra oyesupa sui gwembireko rese ite yuvɨrekoi agwä,

⁸evokoiyase ñuvɨrïo yuvɨrekoira ñepëi ava nungar.’ Sese nda'e iri ñuvɨrïo, ñepëi nungar ite yuvɨrekoira.

⁹Evokoiyase ava Tüpä omomenda va'e oyese, ndiyai ava tëi omboyepepɨ yuvɨreko oyesui.

¹⁰Oɨve yuvɨrekoi vɨtese, semimbo'e oporandu iri ko mba'e rese yuvɨreko chupe.

¹¹Jesús aipo e'i: — Akoi opoi va'e gwembireko sui omendase ambuae kuña rese, oyemboagwasa tëi va'e gwembireko sui;

¹²akoi kuña opoise omer sui omendase ambuae kuimba'e rese, a'e oyemboagwasa tëi va'e avei.

¹³Ipare gweru chi'ïvä'e Jesús upe yuvɨreko sese ipoko agwä; semimbo'e eta rumo oñemoɨrö serusar upe yuvɨreko.

¹⁴Evokoiyase Jesús osepiase, ndasorɨi gwemimbo'e eta upe aipo e'i: — Ma'erä ndapeipotai iyu agwä, toyugweruño chi'ïvä'e cheu, esepia ko chi'ïvä'e nungar ava yuvɨroikera Tüpä mborerekwasave.

¹⁵Supi ete, akoi ndoipɨsɨi va'e Tüpä mborerekwasa chi'ïvä'e nungar yuvɨreko, a'e evokoiyase ndoyuvɨroikei chietera ipɨpe.

¹⁶Evokoiyase Jesús oipɨsɨ chi'ïvä'e omondo opo i'arɨve sovasa agwä.

¹⁷Ogwata vɨtese Jesús, a'eseve mbɨa chi'ïvä'e oña oso sovai, oñenopɨ'ä, oporandu chupe: — Porombo'esar avɨye va'e, ¿mba'e vo ayapora tekovesa apɨre'ɨ̇ va'e rereko agwä?

¹⁸Jesús evokoiyase omboyevɨ chupe: — ¿Ma'erä vo, avɨye va'e ere cheu? Oime rumo ñepëi avɨye va'e ite, a'e Tüpä sekoi.

¹⁹Ereikwa ni'ä Tüpä porokwaita: ‘Ndereporoyukai chira, nandeagwasai chira, nandemondai chira, nanderemiräi chira ambuae ava rese, ndereporombopai chira, eremboyeroyara nde ru, nde sɨ avei.’

²⁰A'e mbɨa rumo aipo e'i chupe: — Porombo'esar, che aipo nungar opakatu amboavɨye ite che chi'ïvä'e suive.

²¹Evokoiyase Jesús oma'e saɨsupave sese, aipo e'i chupe: — Ñepëi mba'e rumo ipane vɨte ndeu: eso emondopa rane nde mba'e seprɨ evokoiyase emondo ava iparaɨsu va'e upe. Ichui ererekora mba'e avɨye va'e ɨvave. Ipare eregwatara che rupi.

²²Aipo oyeupe ese rumo, a'e mbɨa oyepepɨño ichui ovɨ'are'ɨ̇save oso, esepia a'e mba'e yar ite sekoi.

²³Evokoiyase Jesús oma'ese oɨvɨrindar rese, aipo e'i gwemimbo'e eta upe: — ¡Yavai ete rumo ava mba'e yar reike agwä Tüpä mborerekwasave!

²⁴Ko ñe'ësa nombovɨ'ai tëi semimbo'e eta, evokoiyase Jesús aipo e'i iri: — Che ra'ɨreta, ¡yavai ete Tüpä mborerekwasave mba'e yar reike agwä!

²⁵Ndayavai katu camello upe yukwar rupi seike agwä, ava imba'e eta va'e upe rumo yavai katu itera Tüpä mborerekwasave seike agwä.

²⁶Aipo nungar renduse, oyepɨ'amondɨi katu yuvɨreko, ipare oporandu-randu oyeupe: — ¿Ava pi'ä oñepɨsɨröra evokoiyase?

²⁷Jesús oma'e sese aipo e'i imboyevɨ chupe: — Ava upe rumo yavai aipo nungar mba'e apo agwä; Tüpä upe rumo ndayavaimi ete, esepia a'e opakatu mba'e mboavaisare'ɨ̇ sekoi.

²⁸Pedro omboɨpɨ imombe'u chupe: — Ore rumo oroseyapa ite opakatu ore mba'e orovɨreko va'e, nde rupi ore gwata agwä.

²⁹Jesús omboyevɨ chupe: — Supi ete ko aipo a'e peü akoi che raɨsusa pɨpe iyavei ñe'ësa ñepɨsɨrösa raɨsusa pɨpe oseyapa va'e gwëtä, anise vɨke'ɨrɨ, vɨvrɨ, gweindrɨ, vu, osɨ, gwa'ɨrɨ iyavei oɨvɨ,

³⁰a'e oipɨsɨra oma'erä ko ɨvɨ pɨpe cien yupagwer rupi avei oɨ, vɨvrɨ, gweindrɨ, osɨ, gwa'ɨrɨ iyavei ɨvɨ, yepe oiporarara mba'e-mba'e tëi viña; ipare rumo tekwa ambuaeve oipɨsɨ aveira tekovesa apɨre'ɨ̇ va'e kuri.

³¹Setavai rumo kurïtëi yɨpɨndar va'e; a'e yuvɨrekoira ipa tëi; iyavei seta avei kurïtëi ipa tëi yuvɨrekoi va'e, a'e rumo yuvɨrekoira tenonde ite kuri.

³²Yuvɨrasose Jerusalén ve, iyavei Jesús tenonde sekoi gwemimbo'e eta upe. Semimbo'e rumo ndoyembovɨ'ai tëi iyavei sakɨkwerindar osɨkɨye yuvɨreko. A'eve Jesús oñe'ë iri kokotɨmi gwemimbo'e opayandepo yovaive ñuvɨrïo yuvɨrekoi va'e upe, ichui omboɨpɨ imombe'u ko mba'e-mba'e tëi reime agwä aipo e'i:

³³“Peikwa ni'ä, yasora tekwa Jerusalén ve, a'eve rumo che, ava ɨvate katu va'e Ra'ɨrɨ, che pɨsɨra che mondo pa'i eta rerekwar iyavei Moisés porokwaita rese oporombo'e va'e povrɨve, a'e tomano e'ira yuvɨreko cheu ipare che mondo aveira ava nda'ei va'e yande mu upe yuvɨreko.

³⁴Marä e'i-e'i tëira yuvɨreko cheu, ondɨvɨ-ndɨvɨra, oyuvɨrokwa-rokwara che rese, che yuka aveira yuvɨreko; mbosapɨ arɨ pare rumo akwerayevɨra.”

³⁵Ipare oyemboya Santiago iyavei Juan Jesús rese aipo e'i yuvɨreko chupe: — Porombo'esar, oroipota ereyapo mba'e avɨye va'e oreu.

³⁶A'e rumo oporandu chupe: — ¿Mba'e vo peipota ayapo va'erä peü?

³⁷A'e aipo e'i yuvɨreko: — Ore oroipota nde mborerekwa porañetesave ore mbogwapɨra ndeyepɨri eve, ñepëi nde mba'e rese pokosa kotɨ, ambuae nde mba'e rese pokoe'ɨ̇sa kotɨ.

³⁸Jesús omboyevɨ aipo e'i chupe: — Pe ndapeikwai mba'e rese pe porandu. ¿Peiporara katura pi'ä che rupive mba'e-mba'e tëi aiporara va'erä, inungar ɨgwa iro va'e aɨ'u va'erä viña iyavei peikatura pi'ä che apirämosa aipɨsɨ va'erä pɨsɨ agwä?

³⁹A'e omboyevɨ yuvɨreko: — Taa oroikatuño itera ipɨsɨ agwä. Jesús aipo e'i chupe: — Supi ete peɨ'ura ko mba'e iro va'e, peipɨsɨ aveira apirämosa che aipɨsɨ va'erä nungar;

⁴⁰ko rumo ndiyai cheu che pɨri pe gwapɨ agwä, che mba'e rese pokosa kotɨ, ambuae che mba'e rese poko e'ɨ̇sa kotɨ, a'e oñemoigätu va'e upe gweraño ite osora.

⁴¹Evokoiyase ambuae semimbo'e opayandepo yovaive va'e iñe'ë renduse, oñemoɨrö Santiago iyavei Juan upe yuvɨreko.

⁴²Jesús rumo oñe'ë opakatu upe aipo e'i: — Peikwa ni'ä akoi ava oporokwai tëi va'e oyeroyarai va'e omborerekwasa rese oporokwai mba'e-mba'e tëi pɨpe, iyavei mborerekwar ɨvate katu va'e omboyekwa ite omborerekwasa ava rese yuvɨreko.

⁴³Pe rumo egwë ndapeyei chira pe yeereko. Iyakatu rumo akoi ava oipota va'e ɨvate katu gweko agwä pe pa'üve, i'añeko rane itera opakatu ambuae ava rese,

⁴⁴iyavei akoi pe pa'ü pendar oipota va'e tenonde katu gweko agwä, i'añeko tuprɨ ranera opakatu pe pa'ü pendar rese.

⁴⁵Esepia ni'ä che, ava ɨvate katu va'e Ra'ɨrɨ, ayu nda'ei ava che rese i'añeko agwä; che rumo ayu ava rese che añeko agwä, iyavei amondo va'erä che rekokwer manosave opakatu ava repɨrä.

⁴⁶Ipare oyepota tekwa Jericó ve yuvɨreko. Ichui Jesús osëse tekwa sui gwemimbo'e reseve, ava re'ɨi avei, a'eve perɨ popɨve mbɨa ndasesapɨsoi va'e Bartimeo serer va'e Timoteo ra'ɨrɨ, ogwapɨ öi.

⁴⁷Osenduse Jesús Nazaret pendar oñokwase oso, a'ese ndasesapɨsoi va'e säse pirätä chupe aipo e'i: — ¡Jesús, David suindar che paraɨsuerekomi tëi eve!

⁴⁸Ava rumo oñe'ëgätaño yuvɨreko chupe ikiriri agwä, a'e evokoiyase säse pirätä katuño ite: — ¡David suindar, che paraɨsuerekomi tëi eve!

⁴⁹Evokoiyase Jesús iñe'ë renduse opɨta aipo e'i: — Peñe'ë chupe. Ichui oñe'ë ndasesapɨsoi va'e upe, aipo e'i yuvɨreko: — Eyemongere'ɨ̇, epü'a esepia oñe'ë aipo ndeu.

⁵⁰Ndasesapɨsoi va'e omombo oturukwar, ovɨ'aretesa pɨpe oyemboya Jesús rese oso,

⁵¹a'e evokoiyase oporandu chupe: — ¿Mba'e vo ereipota ayapo va'erä ndeu? Ndasesapɨsoi va'e omboyevɨ chupe: — Porombo'esar, che mboesarekomi tëira eve viña.

⁵²Jesús aipo e'i chupe: — Eso tuprɨño eiko; erekwera ni'ä Tüpä reroyasa pɨpe. A'e ramoseve ndasesapɨsoi va'e osareko tuprɨ ite, ipare osoño Jesús rakɨkwei perɨ rupi.