Read Guarayu MARCOS 12 Bible Online

MARCOS 12 - Guarayu bible

MARCOS 12

¹Jesús omboɨpɨ oñe'ë tekokwer mboyoyasa rese. Aipo e'i: “Ñepëi mbɨa oñotɨ̇ va'e uva oɨvɨ pɨpe, a'e oñachi tuprɨ sereko; a'e omoigätu ñepëi save uva rɨkwer renose agwä ipare omopü'a ñepëi oɨ ɨvate va'e opakatu mba'e rärö agwä. Ipare oseya oɨvɨ ava oporavɨkɨ va'e upe iporu agwä. Ichui osë oso amombrɨ va'esa rupi.

²Oyepotase arɨ uva po'osa, a'ese omondo gwembigwai oporavɨkɨ va'e upe imboporandu tomboumi uva po'oprɨ cheu oyapave viña.

³A'e rumo oipɨsɨño, inupa-nupa imboyevɨ tuprɨ tëi yuvɨreko.

⁴Evokoiyase a'e ɨvɨ yar omondo iri ambuae gwembigwai, a'e oyapicha-pichaño ñakä rupi iñe'ë marä-marä tëiño avei yuvɨreko chupe.

⁵Ipare omondo iri ambuae. A'e oyukaño yuvɨreko; ichui omondo atɨ iri tëi a'e ipa'ü pendar rese yuvɨrokwa-rokwaño oyukaño avei ambuae yuvɨreko.”

⁶“Iyavei ñepëi opɨta vɨte: a'e ta'ɨrɨ ite, sembiaɨsu. A'e omondo ipa: ‘Ko che ra'ɨrɨ omboyeroyara yuvɨreko oyapave viña.’

⁷Oporavɨkɨ va'e rumo aipo e'i oyeupe yuvɨreko: ‘Ko aipo oipɨsɨra vu mba'e; yayukaño ipare yandeu narä päve topɨta ko ɨvɨ.’

⁸Ichui oipɨsɨ oyukaño, ipare ovɨnose se'ögwer uvatɨ sui kokotɨ yuvɨreko.”

⁹“¿Mba'e vo evokoiyase peikwa oyapora uvatɨ yar? Osora chupe opara oyuka oporavɨkɨ va'e, iyavei omondopara o'uva tɨ ambuae ava upe.”

¹⁰“¿Ndapeyerokɨi vo ko Ikwachiaprɨ pɨpe? Aipo e'i va'e: ‘Ko ita oɨ aposar opaño omombo yuvɨreko a'e ita rumo oyeapo ovɨräkwä tuprɨ katu va'e.

¹¹Egwë e'i ni'ä ko yande Yar yapo, iyavei kurïtëi yavɨ'arete ite yaiko.’ ”

¹²A'e evokoiyase ovɨraso pota voi Jesús sokenda agwä yuvɨreko, esepia osendukwa ite oyesendar iporombo'esa. Ava sui osɨkɨyepave rumo, opoiño yuvɨreko ichui.

¹³Omondo Jesús upe yuvɨreko fariseo suindar iyavei mborerekwar Herodes rupindar, toyavɨ anga'u oñe'ë oyapave yuvɨreko viña.

¹⁴A'e yuvɨraso aipo e'i yuvɨreko chupe: — Porombo'esar, ore oroikwa nde eremombe'use mba'e supi va'e ite, nde ni'ä ndereroyai va'e ava ñe'ësa tëi, esepia nderesekai ava upe mba'e semimbotar. Nde ereporombo'e tuprɨ supi va'e ite Tüpä rekokwer rese. ¿Avɨyera pi'ä oromboepɨse gwarepochi mborerekwar Roma pendar ɨvate katu va'e upe, ani tie? ¿Oromboepɨravo anichira tie?

¹⁵Jesús rumo oikwa ite ipɨ'a e'ɨ̇sa, sese aipo e'i chupe: — ¿Ma'erä che moinge pota mba'e tëi pɨpe peye? Peru evokoiyase ñepëi gwarepochi cheu, asepia va'erä.

¹⁶Ipare vɨraso yuvɨreko, ichui Jesús aipo e'i chupe: — ¿Ava ra'anga vo vɨreko ava rer vo ikwachiaprɨ sese? A'e omboyevɨ yuvɨreko chupe: — Mborerekwar Roma pendar.

¹⁷Evokoiyase Jesús aipo e'i: — Pemondora mborerekwar upe mba'e chupendar, Tüpä upendar mba'e evokoiyase pemondora Tüpä upe avei. Ipare iporandusa oipɨ'amondɨi tëi aipo oyeupe ese yuvɨreko.

¹⁸Evokoiyase oime Jesús upe yuvɨraso va'e saduceo. Ko aipo ndovɨroyai omano va'e kwerayevɨsa yuvɨreko; sese omboyekwa ko mba'e yuvɨreko chupe:

¹⁹— Porombo'esar, Moisés oseya oreu gwembikwachiagwer ñepëi kuimba'e omenda va'e omanose gwa'ɨ e'ɨ̇seve gwembireko rese, omano va'e rɨvrɨ evokoiyase omendara sembirekokwer rese a'e vɨke'ɨrɨ omano va'ekwer upe narä ta'ɨra oiko.

²⁰Oime ñuvɨrïo ova tuprɨ oyesuindar päve yuvɨrekoi va'e, yɨpɨndar va'e omenda, ichui omano gwa'ɨ e'ɨ̇seve.

²¹Evokoiyase imoñuvɨrïosa omenda vɨke'ɨrɨ rembirekokwer rese, ipare a'e avei omano gwa'ɨ e'ɨ̇seve. Egwë e'i tuprɨ avei imombosapɨsa rese,

²²iyavei ñuvɨrïo ova tuprɨ yuvɨrekoi va'e; a'e ndata'ɨi ete rumo yuvɨreko. Koiye kuña omano aveino.

²³Oimese kwerayevɨsa koiye, ¿uma rembirekorä pi'ä opɨtara evokoi kuña, ñuvɨrïo ova tuprɨ omendapa va'e yuvɨreko sese?

²⁴Jesús omboyevɨ chupe: — Pe pɨ'a ñemoñetasa kokotɨ tëiete, esepia ndapeikwai ete Tüpä ñe'ë Ikwachiaprɨ araka'endar ndapeikwai avei Tüpä pirätäsa.

²⁵Opase omano va'e okwerayevɨ, a'ese kuimba'e iyavei kuña nomenda iri chietera yuvɨreko, a'e rumo yuvɨrekoira inungar mbigwai ɨva pendar.

²⁶Iyavei amombe'ura ko omano va'e kwerayevɨsa resendar peü, ¿ndapeyerokɨi ete vo Moisés rembikwachiagwer pɨpe akoi ka'a rese sendɨ gwasu va'e avɨterve? Tüpä aipo e'i Moisés upe: ‘Che aiko Abraham, Isaac, iyavei Jacob Tüpä.’

²⁷¡Iyavei a'e nda'ei omano va'ekwer Tüpä, a'e rumo oikove va'e Tüpä sekoi! Sese pe pɨ'a ñemoñetasa kokotɨ tëiete.

²⁸Ñepëi Moisés porokwaita rese oporombo'e va'e, osendu iñe'ë pirätäse oyeupe yuvɨreko, oikwa avei Jesús omboyevɨ tuprɨse iñe'ë yuvɨreko chupe, evokoiyase oyemboya oso sese oporandu agwä: — ¿Uma pi'ä porokwaita avɨye katu va'e opakatu sui?

²⁹Jesús omboyevɨ chupe: — Yɨpɨndar porokwaita avɨye katu va'e opakatu sui: ‘Pesendu Israel: yande Yar Tüpä a'eño ite ñepëi yande Yar sekoi.

³⁰Eresaɨsura nde Yar Tüpä opakatu nde pɨ'a pɨpe, opakatu nde rekokwer pɨpe, opakatu nde yapɨsakasa pɨpe iyavei opakatu nde pirätäsa pɨpe.’

³¹Oime imoñuvɨrïosa: ‘Eresaɨsura ambuae ava nde yeaɨsu nungar.’ Ndipo iri ambuae porokwaita avɨye katu va'e ko sui.

³²Porokwaita rese oporombo'e va'e aipo e'i chupe: — Avɨye tuprɨai ete aipo nde ñe'ë Porombo'esar. Supi ete aipo ere: oime ñepëi Tüpä, iyavei ndipoi ete ambuae.

³³Iyavei yasaɨsura Tüpä opakatu yande pɨ'a pɨpe, opakatu yande yapɨsakasa pɨpe iyavei opakatu yande pirätäsa pɨpe, iyavei yasaɨsura ava yande yeaɨsu nungar, a'e ite avɨye katu mba'e seropove'ëprɨ sui iyavei opakatu porerekosa sapɨprɨ tëi sui.

³⁴Jesús oikwase ko Moisés porokwaita rese oporombo'e va'e pɨ'a ñemoñetasa tuprɨsa, aipo e'i chupe: — Namombrɨi ereiko Tüpä mborerekwasa sui. Ipare ndipo iri oyemongere'ɨ̇ va'e oporandu va'erä mba'e rese yuvɨreko chupe.

³⁵Jesús oporombo'ese tüpäro pɨpe, aipo e'i oporandu: — ¿Ma'erä ru Moisés porokwaita rese oporombo'e va'e Poropɨsɨrösar oura David sui e'i yuvɨreko?

³⁶Esepia, David ete aipo e'i Espíritu Maräne'ɨ̇ pirätäsa pɨpe: ‘Yar aipo e'i che Yar upe: Egwapɨ che akato kotɨ, akoi che amondose voi ete nde amotare'ɨ̇mbar nde povrɨve yuvɨreko.’

³⁷¿Ma'erä ru Poropɨsɨrösar David suindar sekoira peye, David teiete ni'ä, che Yar e'i chupe? Ava re'ɨi okere'ɨ̇save ite osendu Jesús ñe'ë yuvɨreko.

³⁸Jesús aipo e'i oporombo'esave: “Peikwa katu Moisés porokwaita rese oporombo'e va'e sui, esepia a'e oturukwar ipuku va'e rese ogwata potarai yuvɨreko yepi, iyavei oipota oyeupe avɨrave apo agwä okarusu rupi omboeteisa pɨpe yuvɨreko.

³⁹Oseka avei tenda porañete katu va'e gwenarä judío ñemonu'äsave, iyavei karusave tenda avɨye katu va'e ogwapɨ agwä yuvɨreko yepi;

⁴⁰iyavei kuña imer mano va'ekwer rëtä vɨrokwa-rokwa tëi ichui, oarondagwä tëi avei oyerure puku-puku. A'e rumo oipɨsɨra ñemoɨrösa ipirätä katu va'e yuvɨreko kuri.”

⁴¹Ñepëi arɨ Jesús ogwapɨ öi porerekosa rɨru rovai ava repia agwä marä e'i oporerekosa imondo ipɨpe yuvɨreko. A'eve seta mba'e yar omondoño ite gwarepochi yuvɨreko.

⁴²A'e pɨpeve oyepota ñepëi kuña imer mano va'ekwer iparaɨsu va'e, iyavei a'e omondo ñuvɨrïomi gwarepochi oporerekosa ipɨpe, ndasepɨimi va'e.

⁴³Evokoiyase Jesús oñe'ë gwemimbo'e eta upe aipo e'i: — Supi ete che aipo a'e peü ko kuña imer mano va'ekwer iparaɨsu va'e seta katu gwarepochi oporerekosa omondo ambuae ava eta sui ko gwarepochi rɨru pɨpe;

⁴⁴ambuae ava eta rumo ogwarepochi rumbɨrermi tëi omondo oporereko agwä yuvɨreko, ko kuña rumo oparaɨsusa pɨpe, opa ite omondo ogwarepochi vɨreko va'e.