Read Guarayu MARCOS 14 Bible Online

MARCOS 14 - Guarayu bible

MARCOS 14

¹Ipanese ñuvɨrïo arɨ Pascua pieta agwä, a'e pieta pɨpe yuvɨro'u mboyape ndayapepoi va'e. Pa'i rerekwareta Moisés porokwaita rese oporombo'e va'e avei oseka tëi Jesús pɨsɨ agwä, ichui yuka uka agwä yuvɨreko.

²Ambuae rumo aipo e'i: — Ndiyai pieta pɨpe yaipɨsɨ, avɨyeteramo ava re'ɨi oyemondɨira yandeu yuvɨreko.

³Jesús sekoi Betania ve, Simón rëtäve, a'e serer va'e mba'erasɨ vai rerekosarer. A'eve igwapɨ seve karusa rendave, oyepota ñepëi kuña ou mba'e sɨäkwä va'e sɨru reseve sepɨ iteanga va'e. A'e osovapɨsa rerokwa, ipare oipɨyere Jesús akä rese.

⁴Ambuae ava a'eve yuvɨnoi va'e rumo oñemoɨrö tëi, aipo e'i oyeupe yuvɨreko: — ¿Ma'erä pi'ä ko omokañɨ tëi mba'e sɨäkwä va'e?

⁵Omondo va'e ite tie ko trescientos arɨ rupindar mboravɨkɨ reprɨ rupi ava iparaɨsu va'e pɨtɨ̇vɨï agwä viña. Ipare omañeko tëi a'e kuña yuvɨreko.

⁶Evokoiyase Jesús aipo e'i: — Egwë te'iño; ¿ma'ërä vo pemañeko tëi? Esepia ni'ä oyapo ite mba'e avɨye va'e cheu.

⁷Ava iparaɨsu va'e ni'ä yuvɨrekoiño itera pe pa'üve yepi, iyavei peyapoño itera mba'e avɨye va'e peyapo potase chupe; che rumo egwë nda'e vɨteñoi chira vichiko pe pa'üve.

⁸Ko kuña oyapo mba'e okatugwer rupi; opa voi omoɨäkwä che rete che mano e'ɨ̇ vɨteseve.

⁹Supi ete aipo a'e peü ñe'ësa pɨsɨrösa resendar mombe'use opakatu tekwa rupi, imombe'usa aveira ko kuña rembiapo agwer sese ma'endu'a agwä.

¹⁰Judas Iscariote, semimbo'e opayandepo yovaive ñuvɨrïo va'e pa'ü pendar, oso pa'i eta rerekwar upe imoñeta Jesús mondo agwä.

¹¹A'e osenduse, oyembovɨ'arete yuvɨreko iyavei omondo pota voi gwarepochi Judas upe yuvɨreko, evokoiyase oseka voi ete Jesús mondo agwä yambotare'ɨ̇mbar upe.

¹²Yɨpɨndar arɨ pieta mboyape ndayapepoi va'e usa pɨpe, a'ese avei ovesa Pascua resendar yukaprɨ seropove'ësa yepi, a'e arɨ pɨpe semimbo'e oporandu Jesús upe yuvɨreko: — ¿Kevo ereipota oromoigätura karusa Pascua resendar yandeu?

¹³Evokoiyase omondo ñuvɨrïo gwemimbo'e, aipo e'i chupe: — Peso tekwave. A'eve pesepiara ñepëi mbɨa vɨreko va'e ɨ kambuchi pɨpe; supi pesora,

¹⁴ipare seikesave aipo peyera sëtä va'e upe: ‘Orembo'esar oporandu: ¿Uma oɨ pɨpe vo oro'ura che remimbo'e rese Pascua pieta resendar?’

¹⁵A'e omboyekwara oɨ ɨvatendar, imoigätuprɨ voi peü. A'eve pemoigätu tuprɨra mba'e ya'u va'erä.

¹⁶Evokoiyase semimbo'e yuvɨnosë yuvɨraso tekwave. A'eve osepia mba'e Jesús semimombe'u rupi tuprɨ, ichui omoigätu karusa Pascua pieta resendar yuvɨreko.

¹⁷Pɨ̇tü ramomise Jesús opayandepo yovaive ñuvɨrïo gwemimbo'e rese a'eve oyepota yuvɨraso.

¹⁸Okaru vɨte seve yuvɨnoi karusa rendave, Jesús aipo e'i gwemimbo'e eta upe: — Supi ete aipo a'e peü, ñepëi pe pa'ü pendar yande pɨri okaru va'e, che mondora che amotare'ɨ̇mbar upe.

¹⁹A'e ndoyembovɨ'ai tëi yuvɨreko, iyavei omboɨpɨ oporandu-randu ñepëi-pëi chupe: — ¿Che pi'ä?

²⁰Jesús rumo omboyevɨ chupe: — Ñepëi ete opayandepo yovaive ñuvɨrïo va'e, pe pa'ü pendar a'e ko omoakɨ̇ mboyape tembi'u rɨru pɨpe.

²¹Supi ete che, ava ɨvate katu va'e Ra'ɨrɨ, amboavɨyera Ikwachiaprɨ pɨpendar; ¡iparaɨsu katura rumo akoi mbɨa che mondosar! Avɨye katura a'e ndoyesuise viña.

²²Yuvɨrokaru vɨteseve, Jesús oipɨsɨ mboyape, ipare Avɨye ndeu e'i Tüpä upe, ombo'i-mbo'i imondo gwemimbo'e upe aipo e'i: — Peipɨsɨ, ko che retekwer.

²³Ipare oipɨsɨ ɨgwa rɨru, iyavei avɨye ndeu e'i Tüpä upe, aipo o'e pare omondo gwemimbo'e upe, ichui opakatu yuvɨroɨ'u.

²⁴A'ese aipo e'i: — Ko che ruvɨ, a'e che Ru remimbotar ipɨasu va'e peü narä, a'e oyepɨyerera ava re'ɨi rekokwer rese narä.

²⁵Supi ete aipo a'e peü ndaɨ'u iri chietera uva rɨkwer, cheu arɨ oyepotase voi che Ru Tüpä mborerekwasave aɨ'ura uva rɨkwer ipɨasu va'e.

²⁶Osapukaire sapukaisa, opa yuvɨraso ka'a ɨvɨtrɨ Olivos ve.

²⁷A'ese Jesús aipo e'i: — Opara pemokañɨ che rese yeroyasa peyesui. Esepia Ikwachiaprɨ pɨpe aipo e'i: ‘Ayukara ovesa rärösar, iyavei oñemosaï tëira ovesa opakatu ɨvɨ rupi yuvɨreko.’

²⁸Koiye che kwerayevɨre rumo, opa irira opomonu'ä Galilea ve.

²⁹Pedro aipo e'i chupe: — Yepe ambuae opakatu nande reroya iri chira yuvɨreko, che rumo egwë nda'ei chietera.

³⁰Jesús omboyevɨ chupe: — Supi ete aipo a'e ndeu ko pɨ̇tü pɨpeve voi, takura ñe'ë ñuvɨrïo yupagwer renondeve, ndaikwai va'e evokoi mbɨa erera mbosapɨ yupagwer rupi cheu.

³¹A'e rumo ani chietera e'iño chupe: — Yepe che amano tëira nde rupi viña, che rumo ndaikwai va'e nda'ei chietera ndeu. Ambuae opakatu aipo e'i tuprɨ avei yuvɨreko chupe.

³²Ipare yuvɨraso Getsemaní serer va'esave yuvɨreko. Jesús aipo e'i gwemimbo'e eta upe: — Pegwapɨpa ko'ave, che aso ranera ayerure.

³³Ipare vɨraso Pedro, Santiago iyavei Juan oyeupi, ichui omboɨpɨ ndoyepɨ'a mbovɨ'aiete oiko.

³⁴A'e aipo e'i gwemimbo'e upe: — Che ayandu ite kurïtëi vɨ'are'ɨ̇sa manosa resendar. Pepɨta rane ko'ave, iyavei pema'emo'ära yeruresa pɨpe.

³⁵Koiye Jesús oso tenonde katumi, a'eve oyaɨvɨ ɨvɨ rese oso, ipare oporandu Tüpä upe, mba'e tasɨ va'e reime e'ɨ̇ agwä oyeupe.

³⁶Oyerurese aipo e'i: “Che Ru, ndeu ni'ä opakatu mba'e ndayavai va'e ite: che renose ko mba'e-mba'e tëi sui eve; tayapo eme che remimbotar tëi, nde remimbotar rupi katu tayapo.”

³⁷Ipare oyevɨ gwemimbo'e upe, ichui a'e opaño yuvɨroke yuvɨrokwa. A'ese aipo e'i Pedro upe: — Simón, ¿ereke vo eyu? ¿Ndereikatui ete vo ereñemosa va'erä topesɨi upe?

³⁸Pema'emo'ä pekeirene, peyerure mba'e tëi pɨpe pe vɨapi e'ɨ̇ agwä. Pe ni'ä pekere'ɨ̇ tëi viña, pe retekwer rumo nipirätäi peü.

³⁹Oso iri oyerure, aipo e'i tuprɨ avei oñe'ë.

⁴⁰Koiye oyevɨse, osesapɨ'a iri ikeseve tëi avei, esepia sopesɨi nomboyeroyai ete yuvɨreko. Iyavei ndoikatui ete iñe'ë mboyevɨ yuvɨreko.

⁴¹Imombosapɨsa rupi oso irise, aipo e'i chupe: — ¿Pekeño vɨte vo peyu? Avɨye revo peke, osupitɨ ite che, ava ɨvate katu va'e Ra'ɨrɨ, mondo agwä ava angaipa viyar povrɨve.

⁴²Pepü'a, yaso; esepia köimi ete sekoi che amotare'ɨ̇sar upe che mondo va'erä.

⁴³Jesús oñe'ë vɨteseve o'ä, Judas oyepota oso chupe, a'e opayandepo yovaive ñuvɨrïo semimbo'e pa'ü pendar, a'eve seta ava yugweru kɨse puku, ɨvɨra reseve-seve supi. A'e pa'i eta rerekwar, Moisés porokwaita rese oporombo'e va'e, judío rerekwareta porokwaita rupi oyapo yuvɨreko.

⁴⁴Yɨpɨndar rumo imondosar Judas aipo e'i: “Asovaupɨte va'e rese peikwara, ipare peipɨsɨ tuprɨra seraso.”

⁴⁵Oyemboyase Jesús rese oso aipo e'i chupe: — ¡Porombo'esar! Ichui osovaupɨte.

⁴⁶Evokoiyase a'e ramoseve oipɨsɨ Jesús yuvɨreko.

⁴⁷Ñepëi sekoi va'e supi vɨnose voi okɨse puku ipare oyasɨa pa'i rerekwar ɨvate katu va'e rembigwai nambi.

⁴⁸Ipare Jesús oporandu ava upe: — ¿Ma'erä vo peyu kɨse puku iyavei ɨvɨra reseve-seve che pɨsɨ agwä. Inungar imondarai va'e che rereko peye?

⁴⁹Arɨ yakatu rupi ni'ä pe pa'üve aporombo'ese tüpärove vichiko, ichui ndache pɨsɨi ete peye. Ko rumo egwë peye Ikwachiaprɨ mboavɨye agwä ite.

⁵⁰Opakatu semimbo'e eta oseya Jesús a'e ae tuprɨ imo'ä ichui oñemipa yuvɨreko.

⁵¹Ñepëi mbɨa chi'ïvä'e sakɨkwerive sekoi va'e, oñemama ñepëi turukwar pɨpe oiko. A'e rumo oipɨsɨ yuvɨreko,

⁵²evokoiyase a'e opoi oturukwar sui ipare oñemi nani tuprɨ oso.

⁵³Evokoiyase Jesús vɨraso pa'i rerekwar ɨvate katu va'e rovai yuvɨreko, ipare opakatu oñemonu'ä pa'i eta rerekwar, judío rerekwar, Moisés porokwaita rese oporombo'e va'e aveino.

⁵⁴Pedro sekoi sakɨkwei amombrɨ rupive tëi pa'i rerekwar ɨvate katu va'e rëtäve, ipare ogwapɨño sundao tüpäro rärösar pa'üve, tata ɨpɨve oyepe'e öi.

⁵⁵Pa'i eta rerekwar rumo iyavei opakatu Porandusa Ɨvate katu va'e pendar oseka-seka tëi ava oñe'ë-ñe'ë tëi va'erä Jesús rese yamotare'ɨ̇save yuka uka agwä; ndoikatui ete rumo yuvɨreko.

⁵⁶Esepia seta iteanga tëi semirä yuvɨreko sese, oyeekopɨ-kopɨ tëi rumo gwemirä pɨpe.

⁵⁷Oime rumo yuvɨropü'a gwemirä tëi agwä, aipo e'i yuvɨreko:

⁵⁸— Ore ni'ä orosendu ite iñe'ë aipo e'ise: ‘Che opara amonduru ko tüpäro ava tëi rembiapo, ipare rumo mbosapɨ arɨ rupi opara amopü'a ambuae nda'e iri chira ava rembiapo nungar.’

⁵⁹A'e nda'oyoyai ambuae imombe'usa rese.

⁶⁰Evokoiyase pa'i rerekwar ɨvate katu va'e opü'a opakatu pa'üve, oporandu Jesús upe: — ¿Nderemboyevɨi chira vo iñe'ë yuvɨreko chupe? ¿Mba'e vo aipo nde amotare'ɨ̇mbar oñe'ë nde rese?

⁶¹Jesús rumo noñe'ëiño ite o'ä, nomboyevɨi ete chupe. Pa'i rerekwar ɨvate katu va'e oporandu iri chupe: — ¿Nde ite vo ereiko Poropɨsɨrösar, Tüpä imboeteiprɨ Ra'ɨrɨ?

⁶²Jesús aipo e'i chupe: — Supi ete, che ni'ä a'e ite aiko. Iyavei pesepiara, ava ɨvate katu va'e Ra'ɨrɨ, ogwapɨse mba'e Mboavaisare'ɨ̇ akato kotɨ, ipare oura ɨva kɨ'a rese kuri.

⁶³Evokoiyase pa'i rerekwar ɨvate katu va'e omondoro oturukwar oñemoɨrösave, aipo e'i: — ¿Mba'e iri vo yande yaipota vɨte yaiko?

⁶⁴Yasendupa ni'ä aipo Tüpä upe iñe'ë-ñe'ë tëisa, ¿Marä e'i aipo evokoiyase pe pɨ'ave? Opakatu ava pɨ'ave avɨye ite esepia ni'ä oyavɨ ite mba'e sese tomano e'i yuvɨreko chupe.

⁶⁵A'ese oime ava ondɨvɨ-ndɨvɨ va'e sese iyavei osesakwa va'e yuvɨrokwa-rokwa avei sese aipo e'i yuvɨreko chupe: — ¡Eikwa ite ru, ava evokoi okwa nde rese! Sundao tüpäro rärösar avei osovapete-pete yuvɨreko.

⁶⁶Pedro ɨvɨve ñachimbrɨ pɨpe sekoi. A'eve ñepëi kuña oyepota ou pa'i mborerekwar ɨvate katu va'e rembigwai chupe;

⁶⁷osepiase Pedro, iyepe'ese tata ɨpɨve, oma'egätu o'ä sese aipo e'i chupe: — Nde avei akoi Jesús Nazaret pendar rupindar ereiko.

⁶⁸Pedro rumo aipo e'iño chupe: — Ndaikwai va'e ite aipo mbɨa, ndaikwai avei aipo mba'e rese ereñe'ë eiko. Ichui osëse okendɨpɨve o'ä. Evokoiyase oñe'ë ñepëi takura.

⁶⁹Oma'e irise ko kuña mbigwai Pedro rese aipo e'i a'e pendar yuvɨrekoi va'e upe: — Ko ava ni'ä supindar ite.

⁷⁰A'e rumo ndaikwai e'iño ite. Ipare koiye katu, a'eve yuvɨrekoi va'e aipo iri Pedro upe: — Nde ite ni'ä supindar ereiko, esepia nde Galilea ɨgwar ereiko.

⁷¹Evokoiyase Pedro aipo e'i imombe'u: — ¡Ndaikwai va'e aipo mbɨa sese peñe'ë va'e!

⁷²Aipo i'eseve takura oñe'ë imoñuvɨrïosa rupi, ipare Pedro oyemoma'endu'a Jesús ñe'ë agwer rese: ‘Takura ñe'ë yupagwesa renondeve, mbosapɨ yupagwer rupi, ndaikwai va'e evokoi mbɨa erera cheu’. Ichui oyase'o iteanga.