Read Guarayu MARCOS 16 Bible Online

MARCOS 16 - Guarayu bible

MARCOS 16

¹Mbɨtu'usa arɨ pare, María Magdalena, María Santiago sɨ, Salomé vɨrokwa mba'e sɨäkwä va'e Jesús re'ögwer rese narä yuvɨreko.

²Iyavei añi'ïvëive domingo pɨpe, yuvɨraso Jesús ruvɨpave, arɨ osë ramomiseve,

³a'eve aipo e'i oyeupe yuvɨreko: — ¿Ava pi'ä ko te'ögwer rovapɨsa vɨrokwara yuvɨreko yandeu?

⁴Osepiase rumo, ita gwasu nda'e irise gwendave i'äi. A'e ita tuvicha iteanga va'e.

⁵Yuvɨroikese te'ögwer ruvɨpave a'eve osepia, omba'e rese pokosa kotɨ, mbɨa chi'ïvä'e iturukwar puku morochi va'e ogwapɨse öi. A'ese kuña oyembosɨkɨye yuvɨreko,

⁶a'e rumo aipo e'i chupe: — Pesɨkɨyei rene. Pe peseka Jesús Nazaret pendar, a'e akoi yatɨkaprɨ. A'e rumo okwerayevɨ; ndipoi ete ko'ave. Pesepia ru supagwer.

⁷Peso tapemombe'u semimbo'e eta upe, Pedro upe avei: ‘Esepia osora pemonu'ä agwä Galilea ve; a'eve pesepiara, inungar omombe'u va'e rupi tuprɨ peü.’

⁸Evokoiyase a'e kuña yuvɨnosëse tuvɨpa sui, yuvɨnoña yuvɨraso, orɨrɨi avei osɨkɨyepave. Iyavei nomombe'ui ete ambuae ava upe osɨkɨyepave yuvɨreko. [

⁹Jesús okwerayevɨre añi'ïvëive domingo pɨpe, oyemboyekwa yɨpɨndar María Magdalena upe, a'e ichui akoi ñuvɨrïo ova tuprɨ karugwar opa va'e omboyepepɨ.

¹⁰A'e oso imombe'u Jesús rupindar upe, a'e rumo oyase'o vɨte ovɨ'are'ɨ̇save yuvɨreko.

¹¹Ko osenduse ñe'ësa Jesús kwerayevɨsa resendar iyavei a'e kuña osepia ite, a'e ndovɨroyai ete yuvɨreko.

¹²Ipare Jesús oyemboyekwa iri ñuvɨrïo gwemimbo'e upe ambuae gwepiaka pɨpe perɨ rupi.

¹³A'e yuvɨraso omboetasa upe imombe'u; ndovɨroyai avei rumo a'e yuvɨreko.

¹⁴Koiye katu rumo, Jesús oyemboyekwa gwemimbo'e opayandepo yovaive ñepëi tuprɨ yuvɨrekoi va'e upe, a'e ogwapɨ vɨteseve karusa rendave yuvɨnoi. Oñe'ëgäta a'e oyese yeroya e'ɨ̇sa rese chupe, okwerayevɨsa mombe'usar reroya e'ɨ̇ rese avei.

¹⁵Ipare aipo e'i gwemimbo'e upe: “Peso opakatu ɨvɨ rupi iyavei pemombe'u ko ñe'ësa pɨsɨrösa resendar peiko.

¹⁶Akoi vɨroya va'e, iyavei oñeapirämo va'e, a'e oñepɨsɨröra; akoi ndovɨroyai va'e rumo, a'e imokañɨpɨ̇ra tëi yuvɨrekoira.

¹⁷Iyavei ko poromondɨisa amondora peü oipɨtɨ̇vɨï va'erä che reroyasar: che rer pɨpe pe mboyepepɨra karugwar ava sui; peñe'ë aveira ñe'ësa ipɨasu va'e pɨpe;

¹⁸peipɨsɨ aveira mboi; iyavei peɨ'use mosa oporoyuka va'e, ndoyapoi chietera mba'e peü; iyavei pemondose pepo ava imba'easɨ va'e arɨve, a'e okwera itera yuvɨreko.”

¹⁹Oñe'ë pare, yande Yar Jesús oso ɨvave a'eve ogwapɨ Vu Tüpä akato kotɨ öi.

²⁰Semimbo'e eta evokoiyase opa yuvɨraso opakatu ɨvɨ rupi; iyavei yande Yar oipɨtɨ̇vɨï, ichui omombe'u ñe'ësa omboyekwa avei poromondɨisa yuvɨreko.]