Read Guarayu MARCOS 6 Bible Online

MARCOS 6 - Guarayu bible

MARCOS 6

¹Jesús osë ko tekwa sui oso gwekwave, semimbo'e avei yuvɨraso supi.

²Oyepotase mbɨtu'usa arɨ, a'ese oporombo'e oɨ judío ñemonu'äsa pɨpe. Seta Jesús ñe'ë rendusar, oyepɨ'amondɨisave oporandu-randu yuvɨreko: — ¿Kesui vo ko ava oikwapa opakatu mba'e? ¿Kesui pi'ä vɨnose ko mba'ekwasa iyavei poromondɨisa apo agwä?

³¿Nda'ei vo akoi ko mba'e aposar ɨvɨra rese oporavɨkɨ va'e, María membrɨ Santiago, José, Judas iyavei Simón rɨke'ɨrɨ? ¿Nda'ei vo seindrɨ avei yuvɨrekove yande pa'üve? Sese ndovɨroyai ete yuvɨreko.

⁴Jesús rumo aipo e'i ava re'ɨi upe: — Tüpä ñe'ë mombe'usar avei ni'ä ava omboetei opakatu rupi yepi, sekwa pɨpe ndovɨroyai ete, opakatu imu sëtä pendar avei ndovɨroyai ete yuvɨreko.

⁵Ndoikatui mba'e poromondɨisa apo agwä a'eve, sese movɨrö tëi imba'easɨ va'e arɨve omondo opo imbogwera agwä.

⁶Ndoyembovɨ'ai tëi ava vɨroyae'ɨ̇sa pɨpe. Ipare Jesús oso ogwata tekwa-tekwami namombrɨi va'e rupi, oporombo'e oiko.

⁷Oñe'ë gwemimbo'e opayandepo yovaive ñuvɨrïo tuprɨ va'e upe, ipare oyokwai ñuvɨrïo-rïo, iyavei omondo gweko pirätäsa karugwar mboyepepɨ agwä chupe.

⁸Ndaperasoi chira rumo mba'e pegwatasa rupi, pe pokoka gweraño ite perasora. Ndiyai avei peraso tembi'u mboyape gwarepochi avei.

⁹Iyavei pemondera pɨtaki gweraño. Ndapemondugwei chira pe turukwar seraso.

¹⁰Aipo e'i chupe: — Peikese oɨ pɨpe ava rëtäve pepɨtaño a'e peve, ichuive tuprɨ pesëra pekwa.

¹¹Akoi ambuae tekwa pendar ndape pɨsɨ potaise ndosendu potaise avei peñe'ë yuvɨreko, peyepepɨñorä ichui peipɨpeteño aveira pe pɨ ɨvɨ rätächigwer sui, ipɨpe sui pemboyekwara sɨkɨyesa yuvɨreko chupe.

¹²Evokoiyase semimbo'e eta yuvɨnosë yuvɨraso imombe'u ava upe peyevɨ katu Tüpä upe oya.

¹³Iyavei seta omboyepepɨ karugwar ava sui, seta avei ombogwera imba'easɨ va'e mba'e kɨra pɨpe yuvɨreko.

¹⁴Mborerekwar ɨvate katu va'e Herodes oyandu ñe'ësa Jesús resendar, iyavei opakatu rupi oikwa yuvɨreko. Ambuae aipo e'i: “Juan Oporoapirämo va'e revo okwerayevɨ, sese ko poromondɨisa vɨreko oyese.”

¹⁵Ambuae rumo aipo e'i yuvɨreko: “Ko ni'ä Tüpä ñe'ë mombe'usar Elías.” Iyavei ambuae aipo e'i: “Ko ni'ä Tüpä ñe'ë mombe'usar yɨpɨndar va'e, Tüpä ñe'ë mombe'usar araka'endar.”

¹⁶Osenduse Herodes ko nungar ñe'ësa, aipo e'i: — Juan ni'ä evokoi. Che añakä asɨa uka va'ekwer a'e kurïtëi okwerayevɨ.

¹⁷Herodías, rekokwer sui tëi ni'ä, Herodes Juan vɨraso uka sokenda agwä, oñapɨ̇chi uka karena pɨpe sokenda. Esepia Herodías yɨpɨndar Filipo rembireko, a'e Herodes rɨvrɨ, Herodes rumo omendaño vɨvrɨ rembireko rese.

¹⁸Juan aipo e'i Herodes upe: “Ndiyai ete ererekora nde rɨvrɨ rembireko.”

¹⁹Herodías ndoyambotai ete sese tëi Juan, iyavei oyuka pota ite; ndoikatui rumo,

²⁰esepia Herodes osɨkɨyeño ichui, oikwase ko mbɨa reko tuprɨaisa iyavei seko maräne'ɨ̇se, sese osepɨño ite. Yepe ndoyembo'e katui osenduse iñe'ë viña, Herodes rumo osendu pota raiño ite Juan ñe'ë.

²¹Herodías upe oyepotase arɨ mba'e sembɨapo agwä, a'ese Herodes oaragwer pɨpe, oyapo karusa gwasu mborerekwareta rese ava Galilea pendar ikwaprɨ ɨvate katu yuvɨrekoi va'e rese avei.

²²Herodías membrɨ kuñatäi oike karusave a'eve opɨvoi, ava rovake ipɨvoisa avɨyeai Herodes upe ambuae ava okaru va'e upe avei, ichui aipo e'i mborerekwar kuñatäi upe: — Eporandu mba'e nde remimbotar rese cheu, che evokoiyase amondora ndeu.

²³Ipare aipo e'i iri chupe eporanduño mba'e nderemimbotar rese, anise amboya'ora ɨvɨ pɨpendar areko va'e che mborerekwasa ndeu.

²⁴A'e kuñatäi osë oso, osɨ upe oporandu aipo e'i: — ¿Mba'e rese pi'ä aporandura? Ichɨ omboyevɨ chupe: — Eporandu Juan Oporoapirämo va'e akä rese.

²⁵Ipare kuñatäi oña oike oso mborerekwar gwapɨsave, aipo e'i chupe: — Che aipota ko pɨpeve voi eremboura Juan Oporoapirämo va'e akä tembi'u rɨru pɨpe cheu.

²⁶Mborerekwar rumo ndoyembovɨ'ai tëi, esepia ava icho'oprɨ rovake ite yɨpɨndar oñe'ë, sese ndoikatui, ani o'e agwä.

²⁷Evokoiyase oyokwai sundao Juan akä reru agwä. Oso sundao sokendasave, oyasɨa Juan akä seru

²⁸ipare vɨraso ñepëi tembi'u rɨru pɨpe. Omondo kuñatäi upe, a'e evokoiyase omondo osɨ upe.

²⁹Oyanduse Juan remimbo'e eta, yuvɨraso setekwer reka ipare vɨraso tuvɨpave yapokatu yuvɨreko.

³⁰Ko ipare, Jesús ñe'ë mombe'usar oñemonu'ä Jesús pɨri omombe'u mba'e gwembiapokwer oporombo'e agwer avei yuvɨreko chupe.

³¹Jesús rumo aipo e'i chupe: — Perio ko'ave, yaso yapɨtu'umi rane kokotɨ mba'e ndipoi va'e save. Esepia oyepɨndekwaño ite ava yugweru chupe, sese ndiyai ikaru agwä yuvɨreko.

³²Evokoiyase a'e gweraño Jesús ñe'ë mombe'usar reseve yuvɨraso ɨarusu pɨpe kokotɨ ava sui.

³³Seta rumo ava osepia ichose, ipare oikwa voiño ite sepiaka yuvɨreko; evokoiyase opakatu tekwa rupindar yuvɨnoña yuvɨraso a'eve, a'e ranegätu oyepotapa yuvɨreko ichui.

³⁴Ogweyɨse rumo Jesús ɨarusu pɨpe sui, osepia ava re'ɨi, a'ese iparaɨsu ava eta chupe, inungar ovesa ndovɨrekoi va'e gwarösar; ipare ombo'e opakatu mba'e rese.

³⁵Ka'aruse rumo, semimbo'e oyemboya sese aipo e'i yuvɨreko chupe: — Ka'aru eteprɨ moko, iyavei ndipoi oɨ ko rupivemi va'e.

³⁶Emondopa ava, tekwa-tekwami köi va'esa rupi a'eve tovɨrokwa gwemi'urä e'i semimbo'e yuvɨreko chupe.

³⁷Jesús rumo omboyevɨ gwemimbo'e upe: — Pemondo pe mba'e semi'urä. A'e rumo omboyevɨ yuvɨreko chupe: — ¿Iyakatura pi'ä oreu doscientos arɨ rupindar mboyape repɨrä, ava mbokaru agwä?

³⁸Jesús aipo e'i gwemimbo'e upe: — ¿Mbovɨ vo pereko mboyape? Peso tapesepia. Sepia pare, omombe'u yuvɨreko chupe: — Poyandepo mboyape, iyavei ñuvɨrïo pira.

³⁹Evokoiyase oyokwai imbogwapɨ agwä imboya'o-ya'o ava kapi'i arɨ rupi;

⁴⁰ichui ogwapɨpa cien cincuenta rupi-rupi oyemboya'o yuvɨreko.

⁴¹Ichui Jesús oipɨsɨ poyandepo mboyape ñuvɨrïo pira, ipare oma'e ɨva rese, avɨye ndeu che Ru e'i, ipare ombo'i-mbo'i mboyape opa omondo gwemimbo'e upe ava re'ɨi upe imondo agwä yuvɨreko. Pira ñuvɨrïo va'e avei omboya'o-ya'o opakatu upe.

⁴²Evokoiyase opakatu ava okaru va'e i'ɨ̇taröpa ite yuvɨreko;

⁴³omonu'äpa mboyape iyavei pira rumbɨrer, opayandepo yovaive ñuvɨrïo ɨruova tuprɨ omboapɨpopa yuvɨreko.

⁴⁴Kuimba'e okaru va'e retakwer cinco mil tuprɨ.

⁴⁵Ko ipare aipo, Jesús ombo'apa voi gwemimbo'e ɨarusu pɨpe osasa voi va'erä ɨpa senonerä yuvɨreko, Betsaida rovai tuprɨ, a'e evokoiyase avɨye e'i vɨte ava upe.

⁴⁶Opase ava omondo oyesui, oyeupi oso ɨvɨtrɨ rese oyerure agwä.

⁴⁷Pɨ̇tü potase, ɨarusu ɨpa mbɨterve ite sekoi. Jesús rumo a'e ae opɨtaño ɨvɨve o'ä,

⁴⁸a'ese oma'e gwemimbo'e rese iyeapɨkui katue'ɨ̇se, esepia ɨvɨtu ipirätä va'e osovaïchi yuvɨreko. Ko'ë potase, ogwata ɨ arɨ rupi gwemimbo'e kotɨ oso, avɨye ite akoi oñokwaño va'erä oso.

⁴⁹Osepiase rumo ogwatase ɨ arɨ rupi, nda'ei voko ägwer tëi e'i yuvɨreko chupe, ipare säse puku-puku yuvɨreko ichui;

⁵⁰esepia opakatu osepiase osɨkɨye yuvɨreko ichui. A'e rumo oñe'ë voi ete, aipo e'i chupe: — ¡Peyemovɨräkwäño! ¡Che tëi: pesɨkɨyei rene che sui!

⁵¹O'ase ɨarusu pɨpe, opɨtu'u ɨvɨtu; a'e evokoiyase ndoyembovɨ'ai tëi yuvɨreko,

⁵²esepia ndoikwa vɨtei ete mboyape apo atɨ agwer, yavai vɨte seroya agwä yuvɨreko chupe.

⁵³Osasase ɨpa oyepota Genesaret ɨvɨ rese yuvɨraso, a'e ɨmbe'ɨve oñapɨ̇chiño ɨarusu yuvɨreko.

⁵⁴Ogweyɨ ramoseve ɨarusu pɨpe sui, ava oikwa voi ete Jesús yuvɨreko.

⁵⁵Opa voi ete omombe'u iyepotasa opakatu ɨvɨ rupi, ichui gweru voi ete imba'easɨ va'e sɨru pɨpe Jesús rekosave yuvɨreko chupe.

⁵⁶Oyepotase akoi Jesús ñepëi tekwave oso, inungar-ra tekwami popɨve, tekwa gwasuve, anise ka'a pɨpe, a'e supi imba'easɨ va'e okar rupi vɨnosepa voi yuvɨreko topokomi tëi nde turukwar popɨ rese e'i yuvɨreko chupe; evokoiyase opakatu sese opoko va'e, okwerapa voi ete.