Read Guarayu MARCOS 7 Bible Online

MARCOS 7 - Guarayu bible

MARCOS 7

¹Oyemboya fariseo eta Jesús rese yuvɨreko, Moisés porokwaita rese oporombo'e va'e avei yugweru Jerusalén sui.

²A'ese osepia Jesús remimbo'e okaruse opokɨ'a reseve, egwë e'i ete nomboavɨyeise porokwaita yepoisa resendar, sese oñemoɨrö yuvɨreko chupe.

³(Esepia fariseo eta iyavei opakatu judío eta araka'endar rekokwer sui ndipoisai ete yuvɨreko, sese oyepoi e'ɨ̇se ndokarui ete yuvɨreko yepi.

⁴Mba'e rerokwasa sui oyevɨse, ndokarui oyepoi e'ɨ̇ vɨteseve yuvɨreko. Iyavei tekokwer araka'endar tëi oyapo vɨte yuvɨreko, inungar ɨgwa rɨru pɨisa, mba'e rɨru gwarepochi apoprɨ iyavei vupa moatɨrö tuprɨsa rese.)

⁵Sese, fariseo eta iyavei Moisés porokwaita rese oporombo'e va'e oporandu chupe: — ¿Ma'erä vo nde remimbo'e yande ramoi araka'endar rekokwer ndovɨroya iri, esepia ru okaruño opo kɨ'a reseve yuvɨreko?

⁶Jesús rumo omboyevɨ chupe: — Pe inungar ava oñe'ë ñotëi va'e tekokwer rese yuvɨreko yepi, supi tuprɨ ite Tüpä ñe'ë mombe'usar Isaías rembikwachia araka'endar aipo e'i: ‘Ko tekwa pendar oyuru pɨpe tëi che mboetei yuvɨreko, ipɨ'a ñemoñetasa rumo amombrɨ ite che sui.

⁷Oyerure tuprɨ tëi yuvɨreko cheu: Iporombo'esa evokoiyase ava porokwaita nungar tëi.’

⁸Egwë peye pepoipa Tüpä porokwaita sui ava rekokwer araka'endar rupi tëi pe gwata agwä.

⁹Iyavei aipo e'i chupe: — Pe ramoi rekokwer araka'endar pɨpe tëi, peseyaño kokotɨ tëi Tüpä porokwaita.

¹⁰Evokoiyase Moisés aipo e'i: ‘Pemboyeroyara peyesupa pe sɨ avei’, ‘Akoi iñe'ë marä va'e oyesupa osɨ upe, a'e chupe osora manosa apɨre'ɨ̇ va'e.’

¹¹Pe rumo aipo peye tëi akoi ava aipo e'i va'e vu upe osɨ upe aveino: ‘Ndiyai chira mba'e mondo agwä peü, esepia che opakatu mba'e areko va'e Tüpä upe imondoprɨ corbán’ (a'e serer: “Tüpä upe seropove'ëprɨ”);

¹²pe evokoiyase aipo e'i va'e upe ndiyai ete vu iyavei osɨ pɨtɨ̇vɨï agwä peye.

¹³Ko nungar apo pɨpe Tüpä porokwaita ndaperoyai esepia ndapepoi potai ava rekokwer araka'endar sui. Seta mba'e ko nungar peyapo vɨte.

¹⁴Ipare Jesús oñe'ë ava re'ɨi upe, aipo e'i: — Pesendu iyavei peyapɨsaka tuprɨ opakatu che ñe'ësa rese:

¹⁵Nda'ei okar sui tëi ou ava rekokwer mongɨ'a agwä. A'e rumo osë ava pɨ'a sui ete imbongɨ'a agwä.

¹⁶Akoi osendu pota va'e che ñe'ë, toyapɨsakaño sese.

¹⁷Jesús oseyapa ava oso oike oɨ pɨpe, a'eve semimbo'e eta oporandu yuvɨreko ko porombo'esa omombe'u va'e rese chupe.

¹⁸A'e aipo e'i: — ¿Evokoiyase pe avei ndapesendukwai? ¿Ndapeikwai vo akoi okar sui oike va'e ava avɨterve nomboangaipai ete,

¹⁹esepia ni'ä, nda'ei ipɨ'ave oso, a'e rumo oso yavɨterve, ipare osë setekwer sui? Ko rese oikwa uka pota opakatu tembi'u avɨyese.

²⁰Aipo e'i avei: — Ava pɨ'a ñemoñeta sui osë va'e rumo mba'e, a'e omongɨ'a sekokwer.

²¹Esepia ava pɨ'a ñemoñetasa sui osë, pɨ'a ñemoñeta raisa, yemboagwasasa, mondasa, porapichisa resendar,

²²mendasa sui yemboagwasasa, mba'e pota raisa, teko raisa, porombopasa, mba'e tëi pota raisa, mba'e rese ñemoɨrösa, ava rese ñemoñeta tëisa, teko ɨvateaisa, pɨ'a ñemoñetasa ni'ɨ̇vi va'e avei.

²³Ko mba'e opakatu naporäi va'e yuvɨnosë ava sui imboangaipa uka agwä.

²⁴Ichui Jesús osë oso tekwa Tiro kotɨ. A'eve oike oɨ pɨpe, ndoyekwa uka potai ava upe viña; ndoikatui rumo ava sui oñemi.

²⁵Oime kuña vɨreko va'e omembrɨ kuñatäi a'e vɨreko karugwar oyese, a'e oikwase Jesús rekosa, oso voi sovai oñenopɨ'ä.

²⁶A'e kuña rumo nda'ei judía, esepia a'e Sirofenicia ɨgwar sekoi. Oso aipo e'i Jesús upe enosë che membrɨ sui karugwar.

²⁷Jesús aipo e'i chupe: — To'u rane ta'ɨrɨ yɨpɨndar mba'e yuvɨreko, esepia naporäi yarokwa mboyape ta'ɨrɨ sui kave to'u imondo agwä.

²⁸A'e kuña aipo e'i chupe: — Supi ete che Yar, kave avei rumo o'uño ite mboyape ra'ɨkwer ovɨapi va'e karusa renda vrɨve oitɨ va'e ta'ɨrɨ yuvɨreko.

²⁹Jesús aipo e'i kuña upe: — Avɨye ite nde ñe'ë, eyevɨ tuprɨ eso. Karugwar osë ite nde membrɨ sui.

³⁰Ko kuña oyepotase oso gwëtäve, osepia omembrɨ supave; yɨpɨve rumo osë karugwar ichui.

³¹Jesús oyevɨ oso Tiro ɨvɨ sui, ipare osasa Sidón rupi oso, ichui oyepota ɨpa Galilea ve, ambuae tekwa eta Decápolis ɨvɨ rupi avei.

³²A'eve vɨraso yuvɨreko ndayapɨsai iñe'ë ɨpɨtɨ-pɨtɨ va'e, emondomi tëi ndepo i'arɨve e'i yuvɨreko.

³³Ichui Jesús vɨraso kokotɨ, ava pore'ɨ̇save, okwä omoinge yapɨsa pɨpe ipare omondo gwendɨ ñapëku rese.

³⁴Ipare oma'e ɨva rese, ipɨtü'ë puku aipo e'i ava upe: “¡Efatá!” (aipo o'esave aipo e'i: “¡Eyemboi!”)

³⁵A'e pɨpeve voi ete, ndayapɨsai va'e yapɨsa tuprɨ voi ete, ipare oñe'ë tuprɨ aveino.

³⁶Jesús oyokwai imondo imombe'ui e'ɨ̇ agwä ambuae eta upe; a'e rumo oikwa ukaño ite ambuae ava upe yuvɨreko.

³⁷Evokoiyase ava oyembovɨ'a gwasusave, aipo e'i yuvɨreko: “Avɨye ite rumo mba'e sembiapo. ¡Esepia ndayapɨsai va'e omboapɨsa iñe'ë ɨpɨtɨ-pɨtɨ va'e avei omoñe'ëgätu tuprɨ!”