Read Guarayu LUCAS 10 Bible Online

LUCAS 10 - Guarayu bible

LUCAS 10

¹Ko ipare, yande Yar egwë e'i tuprɨ avei iporavo ambuae setenta y dos tuprɨ, ipare omondo ñuvɨrïo-rïo gwenonerä, opakatu tekwa yakatu rupi iyepota agwä yuvɨreko.

²A'e rumo aipo e'i chupe: “Supiete mba'e imonu'äpɨrä seta iteanga; oporavɨkɨ va'e rumo movɨrömi tëi. Sese peporandu mba'e mitɨ̇ Yar upe, tombou ava imonu'ä agwä peü.

³Peso kurïtëi; pesepia ko opomondora inungar ovesa sekoi va'e mba'e mɨmba oñaröai va'e pa'üve.

⁴Perasoi rene gwarepochi, tembi'u iyavei pepɨtaki; ani avei pepɨtara avɨrave apo agwä perɨ rupi.

⁵Akoi peikese ñepëi oɨ pɨpe, yɨpɨndar aipo peyera ‘Avɨrave ko oɨ pɨpendar upe.’

⁶Iyavei akoi a'eve oimese ava avɨye va'e, chupe imondosara porovasasa; pe rumo ndapekañɨ tëi chietera.

⁷Pepɨtañorä a'e oɨ pɨpe, iyavei pekarura peɨ'ura a'e sembiereko yuvɨreko, esepia a'e ava upe sepɨ itera iporavɨkɨ. Ndapegwatai chira ambuae oɨ rupi-rupi tëi peiko.

⁸Peyepotase ñepëi tekwave peso a'eve pepɨsɨ tuprɨse yuvɨreko, pe'uñora, mba'e ombou va'e yuvɨreko peü;

⁹pembogwerara a'e pendar imba'easɨ va'e, iyavei aipo peyera chupe: ‘Tüpä mborerekwasa vɨrovɨ ite iyepota agwa peü narä.’

¹⁰Akoi peyepotase peso ñepëi tekwave, iyavei ndape pɨsɨ potaise a'eve yuvɨreko, peseñorä okar rupi ichui aipo peyera:

¹¹‘¡Ko ɨvɨ rätächigwer perekwa pɨpendar, orovɨreko va'e ore pɨ rese, a'e oroipɨpetera ñemoɨrösa pɨpe peü narä! Peikwara rumo ko mba'e, esepia Tüpä mborerekwasa vɨrovɨ ite ou peü narä.’

¹²Supiete amombe'u peü akoi arɨ kañɨ oyepotase, oimerä ñemoɨrösa a'e tekwa pendar upe ɨvate katu va'e ava tekwa Sodoma pendar sui.”

¹³“¡Peparaɨsu ava tekwa Corazín pendar! ¡Pe avei peparaɨsu tekwa Betsaida pendar! Esepia yaposase Tiro ve iyavei Sidón ve poromondɨisa viña ko yaposa va'e pepa'üve, opara a'e oyevɨ araka'eve Tüpä upe viña, iyavei omondera revo oturukwar vɨ'are'ɨ̇sa resendar saimbe gwasu va'e tanimbu avei omondora oyese yuvɨreko viña ipɨpe ite omboyekwa oporeroyasa yuvɨreko.

¹⁴Kuri arɨ kañɨ pɨpe ɨvate katura ñemoɨrösa peü narä ava Tiro iyavei Sidón pendar sui koiye.

¹⁵Iyavei nde tekwa Cafarnaúm, ¿peroya revo peso va'erä ɨvave viña? ¡Eresora rumo ɨvɨkwar ipɨkuku katu va'esave kuri!”

¹⁶“Akoi oyapɨsaka va'e peñe'ë rese, a'e oyapɨsaka avei che ñe'ë rese; iyavei akoi ndosendu potai va'e peñe'ë, che ñe'ë avei ndosendu potai, iyavei akoi ndosendu potai va'e che ñe'ë; che mbousar ñe'ë avei ndosendupotai yuvɨreko.”

¹⁷Oyevɨpase ava setenta y dos va'e ovɨ'aretesave, aipo e'i yuvɨreko: — ¡Ore Yar, karugwar avei ete ni'ä ore mboyeroya eteprɨ nderer pɨpe yuvɨreko!

¹⁸Jesús aipo e'i chupe: Taa, asepia ni'ä Karugwar ovɨapise ɨva sui overa va'e nungar.

¹⁹Che ni'ä amondo pirätäsa peü pegwata va'erä mboi arɨ rupi mba'e rumbɨkɨäpe arɨ rupi avei, opakatu pe amotare'ɨ̇sar pirätäsa reroyɨ agwä, mba'e pe momarä e'ɨ̇ agwä avei.

²⁰Peyembovɨ'aretei rene karugwareta pe mboyeroyase, iya rumo peyembovɨ'a pe rer ɨva pendar ikwachiaprɨ rese.

²¹A'e pɨpeve voi, Jesús ovɨ'aretesa pɨpe Espíritu Maräne'ɨ̇ rese aipo e'i: “Oromboetei, nde rereko che Ru, Yar ɨva pendar ɨvɨ pendar aveino, esepia eremboyekwa ite ñe'ësa ava seko mbegwemi va'e upe a'e akoi ereñomi va'e ava opakatu oikwa va'e sui ava mba'e osendukwa tuprɨ va'e sui avei. Supiete che Ru, esepia evokoi nungar ite ereipota eiko yepi.”

²²“Che Ru opakatu ite mba'e ombou cheu. Iyavei ndipoi ete oikwa va'e yuvɨreko che Ta'ɨrɨ aikose; che Ru gweraño ite oikwa; ndipoi avei oikwa va'e che Ru yuvɨreko, che gweraño ite aikwa iyavei che Ta'ɨrɨ aikwa uka potase ambuae upe aikwa uka ñoitera.”

²³Oyemboyere oma'e gwemimbo'e eta rese, aipo e'i a'e ae yuvɨrekoise chupe: “Perorɨvete katu ko mba'e pesepia va'e rese;

²⁴supiete aipo amombe'u peü oime seta Tüpä ñe'ë mombe'usar iyavei mborerekwar ɨvate katu va'e araka'endar osepia pota tëi mba'e pesepia va'e, ichui rumo ndosepiai ete yuvɨreko; osendu pota tëi ko mba'e pesendu va'e, a'e rumo ndosendui ete yuvɨreko.”

²⁵Ñepëi mbɨa Moisés porokwaita rese oporombo'e va'e oso oñe'ë Jesús rese sekoa'ä agwä, aipo e'i oporandu chupe: — Porombo'esar, ¿marä a'era vo vichiko teko apɨre'ɨ̇ va'e rereko agwä?

²⁶Jesús omboyevɨ chupe: — ¿Marä e'i vo Moisés porokwaita ikwachiaprɨ pɨpe? ¿Marä e'i vo ereyerokɨse ipɨpe?

²⁷Moisés porokwaita rese oporombo'e va'e omboyevɨ chupe: — ‘Eresaɨsura nde Yar Tüpä opakatu nde pɨ'a pɨpe, opakatu nde rekokwer pɨpe, opakatu nde pirätäsa pɨpe, opakatu nde yapɨsakasa pɨpe avei; eresaɨsu aveira ava nde kotɨndar nde yeaɨsu nungar.’

²⁸Jesús aipo e'i chupe: — Supiete eremboyevɨ tuprɨ ndeyeupe porandusa cheu eremboavɨyese evokoi, a'ese ererekora tekovesa apɨre'ɨ̇.

²⁹Moisés porokwaita rese oporombo'e va'e rumo, oikwa pota ite mba'e oyeupe imombe'uprɨ, aipo e'i Jesús upe: — ¿Ava vo aipo che kotɨndar sekoi?

³⁰Jesús evokoiyase omboyevɨ chupe: — Ñepëi mbɨa oso Jerusalén raper rupi Jericó ve, a'e perɨ rupi yuvɨnosë ava ndipɨ'ai va'e chupe vɨrokwapa imba'e yuvɨreko ichui iturukwar opakatu reseve; iyavei yuvɨrokwa-rokwa yuvɨraso sese, oyuka seni seya yuvɨreko.

³¹A'e pɨpe tuprɨ ñepëi pa'i ou a'e perɨ rupi; osepiase rumo, kokotɨ rupi tëi oñakwäsaño oso.

³²Egwë e'i tuprɨ avei ñepëi mbɨa levita oyepota ou a'eve, osepiase rumo, oñakwäsa tuprɨño avei oso ichui.

³³Ñepëi mbɨa rumo Samaria ɨgwar oso a'e perɨ rupi avei, osepiase oiparaɨsuereko.

³⁴Oyemboya oso sese, oiposano yapichasa mba'e kɨra pɨpe uva rɨkwer sai va'e pɨpe avei, oiku'akwa avei turukwar pɨpe chupe. Ipare osupi gweimba arɨve oaprɨve, vɨraso ava kesave a'eve i'añeko sese.

³⁵A'ere arayi'ive, Samaria ɨgwar vɨnose ñuvɨrïo arɨ rupindar gwarepochi, omondo a'e pendar oɨ yar upe aipo e'i chupe: ‘Esärö tuprɨmi tëi ko mbɨa cheu, akoi nde'añeko katuse sese, amboepɨ katu irira che yevɨse ndeu.’

³⁶Supiete, ¿uma vo nde eresepia ko mbosapɨ yuvɨrekoi va'e sui oyemboava akoi ava ndipɨ'ai va'e remimombaraɨsu agwer upe?

³⁷Moisés porokwaita rese oporombo'e va'e omboyevɨ chupe: — Akoi mbɨa oiparaɨsuereko va'e. Jesús aipo e'i chupe: — Egwë ere tuprɨ aveira nde evokoi nungar mba'e apo.

³⁸Jesús yuvɨraso gwemimbo'e reseve ñepëi tekwamive, a'eve ñepëi kuña Marta serer va'e omoinge gwëtä pɨpe.

³⁹Marta evokoiyase vɨreko ñepëi okupɨ'ɨrɨ María serer va'e, a'e ogwapɨ Jesús ɨpɨve iñe'ë rendu öi.

⁴⁰Marta rumo oyembopɨ'avɨräkwä opakatu mba'e rese oiko, oyemboya oso Jesús rese aipo e'i chupe: — Che Yar, ¿avɨyeai vo evokoi che kupɨ'ɨrɨ chini tëi nde pɨri che poravɨkɨ vɨteseve? Emombe'u chupe, tache pɨtɨ̇vɨïmi tëi katu.

⁴¹Jesús omboyevɨ chupe: — Marta, Marta, ma'erä vo ereyemañeko eteprɨ tëi seta mba'e apo agwä eiko,

⁴²ñepëi mba'e rumo oime avɨyekatu va'e. A'e María oiporavo oyeupe narä mba'e avɨye katu va'e, iyavei ndipoi chietera ava vɨrokwa va'e ichui.