Read Guarayu LUCAS 11 Bible Online

LUCAS 11 - Guarayu bible

LUCAS 11

¹Ñepëi arɨ Jesús oyerure a'e ae öi; iyerure pare ñepëi semimbo'e aipo e'i chupe: — Ore Yar, ore mbo'emi tëi ore yerure agwä eve, inungar Juan ombo'e gwemimbo'e eta sereko yepi.

²Jesús aipo e'i chupe: — Peyerurese aipo peyera: ‘Ore Ru Tüpä, imboeteiprɨ nderer tasekoi. Tou nde mburuvicha etesa oreu.

³Embou oreu arɨ yakatu rupi tembi'u oroipota va'e.

⁴Nde ñeröi ore angaipa rese oreu, esepia ore avei ni'ä oreñerö ambuae upe opakatu oreu mba'e-mba'e tëi aposar upe. Ore mbo'a ukai rene eve, angaipa pɨpe.’

⁵Iyavei aipo e'i Jesús chupe: — Inungar ñepëi pepa'ü pendar vɨrekora omborɨpar viña, ipare pesora a'e sëtäve pɨ̇tü mbɨter rupi aipo peyera chupe: ‘Che mborɨpar, emboumi tëi mbosapɨ mboyape cheu,

⁶esepia ñepëi che mborɨpar oyepota ou ogwatatëisa sui che rëtäve, ndarekoi ete rumo mba'e amondomi va'erä chupe.’

⁷Ambuae rumo omboyevɨra oɨpɨpe suive chupe: ‘Che mañeko tëi rene eve; okenda oromboya ite, iyavei ko che ra'ɨrɨ opa aropɨtu'u seru; sese ndiyai ete apü'a mba'e mondo agwä ndeu.’

⁸Amombe'u aipo peü, yepe nopü'ai chietera mba'e mondo peü pe mborɨpar gwekose viña, oyapoño itera rumo tache mañeko iri eme oyapave, ipare omondoño itera opakatu mba'e pe porandusa peü.

⁹Sese ko che aipo a'era peü: Peporanduse mba'e rese, Tüpä omboura peü; peseka tëise mba'e, iyavei peyosɨ itera; pemotäse okenda oyemboi aveira peü.

¹⁰Esepia akoi oporandu va'e mba'e rese, oipɨsɨitera; iyavei akoi mba'e oseka va'e, oyosɨño itera; akoi oñe'ë va'e okendɨpɨve, chupe oyemboi aveira.

¹¹“¿Oimese pepa'ü pendar ta'ɨ va'e, omondora pi'ä gwa'ɨrɨ upe mboi tëi pira rese oporanduse chupe viña,

¹²anise omondora pi'ä mba'e rumbɨkɨäpe tëi oporanduse mba'e rupi'a rese chupe viña?

¹³Esepia pe, yepe ava ndasekoporäi va'e peiko viña, pe ra'ɨrɨ upe rumo pemondoño ite mba'e avɨye va'e, ¡ta'etru pe Ru ɨva pendar omondo katura Espíritu Maräne'ɨ̇ akoi ava oyeupe porandusar upe!”

¹⁴Jesús omboyepepɨ karugwar ñepëi mbɨa sui nomoñe'ëgätui va'e seya oso; ipare omosëse karugwar ichui. A'e seve voi niñe'egätui va'e omboɨpɨ oñe'ë. Ipare ava re'ɨi sepiase ndoyembovɨ'ai tëi yuvɨreko,

¹⁵oime aipo e'i va'e: “Beelzebú, karugwar rerekwar pirätäsa pɨpe revo omboyepepɨ karugwar oiko.”

¹⁶Ambuae sekoa'ä pɨpe, oporandu ñepëi poromondɨisa ɨva pendar rese yuvɨreko chupe.

¹⁷Jesús rumo oikwase ipɨ'a ñemoñetasa, aipo e'i: “Opakatu tekwa gwasu oyemboya'opase yeamotare'ɨ̇sa pɨpe, oyemokañɨra a'e ae tëi yuvɨreko iyavei opakatu sëtä oyea rɨve-rɨve va'e ondurupara.

¹⁸Egwë e'i aveira ni'ä, Karugwar oyemboya'ose a'e ae tëi oyapose mba'e oyeupe ¿marä e'ira pi'ä opirätäsa omovɨräkwä oiko? Ko aipo a'e peü esepia pe aipo peye cheu omose karugwar Beelzebú pirätäsa pɨpe tëi;

¹⁹egwë e'ise, ¿ava vo omondo pirätäsa perupindar upe omombo va'erä? Evokoiyase, a'e avei pemondora mba'e tëi pɨpe yuvɨreko.

²⁰Che rumo Tüpä pirätäsa pɨpe karugwar amboyepepɨ ava sui, sese kurïtëi Tüpä mborerekwasa oyepota ite peü.”

²¹“Oime ñepëi ava ipirätä eteprɨ va'e vɨreko oyeroyasa iyavei ipɨpe osärö gwëtä, opakatu mba'e ipɨpendar avei ikañɨ e'ɨ̇ agwä.

²²Akoi ouse rumo ambuae ipirätä katu va'e chupe, a'e osekoreroyɨse opara vɨrokwa iyeroyasa ichui, evokoiyase sembierokwa opara vɨraso oyeupe narä.”

²³“Akoi ava ndache mboyoyai va'e, a'e che amotare'ɨ̇mbar sekoi; iyavei akoi ndosekai va'e ava cheu, a'e omosai tëi yuvɨreko che sui.”

²⁴“Akoi osëse karugwar ñepëi ava sui, ogwata tëi ɨvɨ ipiru va'e rupi opɨtu'u agwä reka; ipare rumo ndoyosɨise, ipɨ'a ñemoñeta: ‘Ayevɨ irira che rëtäve vicho ichui ni'ä äse vitu.’

²⁵A'eve oyevɨse, osepia iri a'e mbɨa rekokwer inungar oɨ sa'uvaprɨ imoigätusa tuprɨ va'e öi.

²⁶Evokoiyase sepiase, oso ñuvɨrïo ova karugwar naporäi katu va'e reka. Ichui gweruse, oyoya gwasu yuvɨroike ko mbɨa pɨ'a pɨpe. Sese mba'e tëi katu ite sekokwer yɨpɨndar gweko agwer sui.”

²⁷Jesús oñe'ë vɨteseve mba'e rese, a'ese ñepëi kuña ava re'ɨi pa'ü pendar säse pirätä aipo e'i: — ¡Sovasaprɨ tasekoi evokoi kuña sui ere'a va'e iyavei nde mboakwa va'e!

²⁸A'e omboyevɨ chupe: — ¡Sovasaprɨra akoi osendu va'e che Ru Tüpä ñe'ëngagwer iyavei vɨroya va'e sereko!

²⁹Ava re'ɨi rumo oñemonu'ä atɨ katu ñoite Jesús rese yuvɨreko, a'e omboɨpɨ aipo oya: “Kurïtëindar ava ndasekoporäi va'e; oporandu tëi poromondɨisa rese yuvɨreko, che rumo namboyekwai chira ambuae poromondɨisa peü. Jonás rekokwer rese gweraño opomoma'endu'ara.

³⁰Inungar Jonás poromondɨisa sekoi ava Nínive pendar upe, egwë e'i aveira ni'ä yande Yar Ra'ɨrɨ reko pɨpe oimerä poromondɨisa ava kurïtëindar upe.

³¹Akoi arɨ kañɨ pɨpe, porandusase ko ava kurïtëindar upe, a'ese kuña mborerekwar oñarapü'ara iro'ɨ kotɨ sui ou marä-marä tëi ava rereko agwä; esepia ni'ä a'e ou ɨvɨ amombrɨ katu va'e sui Salomón mba'ekwasa rendu agwä, kurïtëi rumo oime ɨvate katu va'e ko'ave Salomón sui.

³²Iyavei Nínive pendar oñarapü'ara yuvɨreko arɨ kañɨ pɨpe, porandusase ava kurïtëindar upe, iyavei marä-marä tëi vɨrekora. Esepia ni'ä, Nínive pendar oyevɨpa Tüpä upe yuvɨreko osenduse Jonás ñe'ë Tüpä ñe'ëngagwer ombombe'use; kurïtëi rumo oime ɨvate katu va'e Jonás sui pe pa'üve.”

³³“Ndayañomi chira tataendɨ imoendɨ imoi, ndayamondoi chira mba'e vrɨve, iyakatu rumo yamondora ɨvate, oɨ pɨpe yuvɨroike va'e resape agwä.

³⁴Nde resa inungar tataendɨ nde retekwer upe; nde resa avɨyese, opakatu nde retekwer vɨrekora gwesapesa oyese; akoi naporäise rumo, nde retekwer pɨ̇tümimbi va'e nungar tëi sekoira.

³⁵Sese peikwa katu ko poroesapesa pereko va'e, tape rereko eme pɨ̇tümimbi va'e nungar.

³⁶Egwë e'i ni'ä opakatu nde retekwer vɨreko gwesapesa, ndipoi ete pɨ̇tümimbi va'e sese, evokoiyase eresepiara, inungar tataendɨ nde resape va'e gwendɨgwer pɨpe.”

³⁷Opase Jesús oñe'ë, ñepëi fariseo vɨraso gwëtäve imbokaru, Jesús oikese sëtäve oso ogwapɨ karusa rendave öi.

³⁸A'e fariseo rumo ndoyembovɨ'ai tëi nomboavɨyeise judío porokwaita oyepoi e'ɨ̇se okaru agwä renonde.

³⁹Yande Yar rumo aipo e'i chupe: — Pe fariseo peiko va'e pemoatɨrö ɨgwa rɨru iyavei tembi'u rɨru ikupe rupi tëi, ipɨpe rupi rumo pe egwë e'i tuprɨ avei pe rekokwer pe monda raisave mba'e-mba'e tëi pe reko pɨpe.

⁴⁰¡Pe ndayarakwai va'e peiko! ¿Ndapeikwai vo pe rete aposar, pe pɨ'a aposar avei?

⁴¹Pemondo pe porerekosa rekate'ɨ̇ e'ɨ̇sa pɨpe. Evokoiyase ipɨpe sui opakatu imoatɨröprɨ peikora.

⁴²“¡Peparaɨsu pe, fariseo!, esepia yepe pe remitɨ̇ sui pemondo peyakatu ñepëi-pëi imboopayandepo yovaivesa sui Tüpä upe viña, pe rumo ndaperoyai teko ɨ̇vɨisa iyavei peseyaño tëi Tüpä poroaɨsusa ko rumo peyapora peiko, pe poie'ɨ̇sa pɨpe ambuae mba'e apo agwä.”

⁴³“¡Peparaɨsu pe, fariseo! esepia peipota pe renda porañete katu va'e pe gwapɨ agwä oɨ judío ñemonu'äsave, iyavei peipota peü opakatu avɨrave oyapora ava pe mboeteisave okar rupi yuvɨreko.

⁴⁴¡Peparaɨsu peiko, esepia pe rekokwerai inungar te'ögwer ruvɨpa ikwa e'ɨ̇se ava ogwata i'arɨ rupi yuvɨreko!”

⁴⁵Evokoiyase ñepëi Moisés porokwaita rese oporombo'e va'e aipo e'i chupe: — Porombo'esar, aipo eremombe'u va'e pɨpe ore avei oreamotare'ɨ̇ eve.

⁴⁶Jesús rumo aipo e'i chupe: — ¡Peparaɨsu avei pe, Moisés porokwaita rese oporombo'e va'e!, pemondo rutei porokwaita ambuae porokwaita arɨve yavai va'e ava upe; pe rumo evokoiyase ndapeipɨtɨ̇vɨïmi ete a'e ava imboavɨye agwä rese yuvɨreko.

⁴⁷“¡Peparaɨsu peiko!, Tüpä ñe'ë mombe'usar ruvɨpa aposarer evokoi ni'ä pe ramoi teiete oyukapa va'e yuvɨreko.

⁴⁸Ko rese oyekwa ite pe ramoi rembiapokwer, avɨyeai ete revo peü a'e ni'ä oyukapa yuvɨreko pe evokoiyase peyapo suvɨpagwä.”

⁴⁹“Sese, Tüpä omba'ekwasa pɨpe aipo e'i: ‘Amondora che ñe'ë mombe'usar Jesús ñe'ë mombe'usar avei, a'e ipa'ü pendar rumo yukasara ambuae evokoiyase osekatëira yuvɨreko.’

⁵⁰Evokoiyase kurïtëindar ava upe Tüpä oporandura tuvɨ opakatu oñe'ëngagwer mombe'usar sui, tɨapɨisa va'ekwer araka'e ɨvɨ apo ramo suive yuvɨrekoi va'e rese,

⁵¹Abel yuka agwer suive oyepotara Zacarías yuka agwerve oso, a'e oyuka va'e mba'e reropove'ësa rovai yuvɨreko tüpäro pɨpe. Supiete, aipo a'era peü Tüpä oporandura evokoi imano agwer rese ava kurïtëindar upe.”

⁵²“¡Peparaɨsu pe, Moisés porokwaita rese oporombo'e va'e!, peae tëi pe mba'ekwasa pesokenda tuprɨño sereko; esepia ni'ä pe avei ndape mboavɨyei porokwaita ndapeipotai avei ambuae ava upe imboavɨye uka agwä.”

⁵³Öse pare Jesús ichui, a'ese Moisés porokwaita rese oporombo'e va'e iyavei fariseo eta oñemoɨrö iteanga yuvɨreko, ipare rumo omboɨpɨ imañeko tëi mba'e rese porandu-randu tëi yuvɨreko chupe,

⁵⁴osekoa'ä-a'ä tëi mba'e pɨpe toyavɨ anga'u oñe'ë yandeu oesa pɨpe.