Read Guarayu LUCAS 14 Bible Online

LUCAS 14 - Guarayu bible

LUCAS 14

¹Egwë e'i aipo ñepëi mbɨtu'usa arɨ pɨpe Jesús oso okaru mborerekwar fariseo rëtäve, a'eve ambuae fariseo eta oivɨro yuvɨreko.

²A'eve avei ñepëi mbɨa imba'easɨ va'e i'äi ruru rerekosar.

³Evokoiyase Jesús oporandu Moisés porokwaita rese oporombo'e va'e upe fariseo eta upe avei: — ¿Ipotasa vo mbɨtu'usa arɨ pɨpe imba'easɨ va'e mbogwera agwä, ani tie?

⁴A'e rumo noñe'ëiño yuvɨreko chupe. Evokoiyase a'e opoko imba'easɨ va'e rese, ombogwera ipare eso tuprɨño e'i chupe.

⁵Fariseo eta upe evokoiyase aipo e'i: — ¿Ava pi'ä pe pa'ü pendar, ta'ɨrɨ iyavei seimba tɨvi ovɨapise ɨvɨkwar pɨpe, novɨnosëi voi chira, mbɨtu'usa arɨ pɨpe viña?

⁶A'ese nomboyevɨ katui ete iñe'ë yuvɨreko chupe.

⁷Osepiase Jesús ava icho'oprɨ oiporavo-ravose gwenarä imboyeroyaprɨ katu va'e karusa rendave yuvɨreko, a'ese Jesús aipo e'i imboarakwa:

⁸— Akoi nde so'o ukase yuvɨreko mendasave, nderegwapɨi chira ava imboeteiprɨ katu va'e renda arɨve, avɨyeteramo oyepotara ambuae ava icho'oprɨ imboeteiprɨ katu va'e ndesui;

⁹evokoi peso'o ukasar ñuvɨrïo peiko va'e aipo e'ira ou ndeu: ‘Emondo nderenda evokoi ambuae upe.’ Evokoiyase erechï tëira eso gwapɨsa ipami tëi va'e arɨve.

¹⁰Akoi nde so'ose pietasave yuvɨreko, a'eve eregwapɨra tenda ipami va'e arɨve, oyevɨirise ou akoi nde so'o ukasar, aipo e'ira ndeu: ‘Che mborɨpar, erio ko'ave tenda imboeteiprɨ katu va'esave.’ A'ese ereipɨsɨra poromboeteisa opakatu ogwapɨ va'e karusa renda rovai yuvɨreko.

¹¹Esepia ni'ä akoi ava oyemboɨvateai va'e, a'e evokoiyase seko reroyɨsara; akoi ava seko mbegwe va'e rumo, a'e seko mboɨvate katusara.

¹²Aipo e'i avei mbɨa icho'osar upe: — Ereyapo potase pieta, ndereicho'o ukai chira nde mborɨpar, nde rɨvrɨ, nemu iyavei nde rëtä kotɨndar imba'e eta va'e; esepia ni'ä a'e omboyevɨra ndeu, nde so'o ukara oyepɨri; egwë e'ira evokoiyase mba'e imboyevɨpa yuvɨreko ndeu.

¹³Ko nungar ereyapose rumo pieta, ereicho'o ukara ava iparaɨsu va'e, ava ndogwatai va'e, anise iparï-parï va'e, ndasesapɨsoi va'e avei,

¹⁴a'ese erevɨ'aretera. Esepia a'e ndoikatui chietera imboyevɨ yuvɨreko ndeu, nde rumo ereipɨsɨra mba'e ikatuprɨ va'e Tüpä suindar.

¹⁵Osenduse aipo, ñepëi mbɨa icho'oprɨ ipa'ü pendar ogwapɨ va'e karusa rendave öi, aipo e'i Jesús upe: — ¡Sovasaprɨ katu ava Tüpä pɨri okaru va'e imborerekwasave!

¹⁶Jesús aipo e'i chupe: — Ñepëi mbɨa omondo va'e karusa gwasu, a'e oicho'o uka ava seta oyepɨri.

¹⁷Ipare oyepotase arɨ karu agwä a'ese aipo e'i gwembigwai mondo icho'oprɨ upe: ‘Toyugwerupa, esepia ni'ä opa ite tembi'u oigätu.’

¹⁸Ipare rumo opakatu aipo e'i yuvɨreko chupe eñemosañomi tëi oreu. Yɨpɨndar mbɨa aipo e'i: ‘Arokwa ete ramo ite ɨvɨ, asoranera sepia. Sese eñemosañomi tëi cheu.’

¹⁹Ambuae aipo e'i: ‘Che arokwa opayandepo yovaive tuprɨ tɨvi, a'e asä'a ranera. Sese eñemosañomi tëi cheu.’

²⁰Ambuae aipo e'i no: ‘Che amenda ramomi vichiko. Sese tëi ndasoi chira.’

²¹Oyevɨse mbigwai, opa tuprɨ omombe'u mba'e gwerekwar upe. Evokoiyase serekwar oñemoɨrö, aipo e'i gwembigwai upe; ‘Eso voi evokoiyase opakatu okar rupi. Eru ko'ave ava iparaɨsu va'e, ava ndogwatai va'e, anise ndasesapɨsoi va'e, iparï-parï va'e aveino.’

²²Koiye rumo, aipo e'i mbigwai: ‘Che rerekwar, amboavɨye ite nde porokwaita, oime vɨte ambuae reike agwa.’

²³Evokoiyase serekwar aipo e'i gwembigwai upe: ‘Eso perɨ rupi ambuae perɨ tekwa ɨvɨrindar rupi avei, peso che rerekwar rëtäve erera ambuae upe, esepia aipota omboapɨpopa ite che rëtä yuvɨreko.

²⁴Esepia ni'ä ndipoi chietera ava yipɨndar icho'oprɨ okaru va'erä che pɨri.’

²⁵Ava re'ɨi Jesús rakɨkwei ogwata yuvɨreko; a'ese oyemboyere aipo e'i:

²⁶“Akoi ava yugweru va'e cheu ndacheraisu tuprɨi ete oyesupa sui yuvɨreko osɨ, gwa'ɨreta, vɨvɨreta iyavei gweindɨreta, oyesui katu aveino, nda'ei chietera evokoiyase che remimbo'e nungar yuvɨrekoira.”

²⁷Iyavei akoi ava noñemosaï va'e mba'e-mba'e tëi upe, a'e ndasekoi chietera che rupi.

²⁸“Akoi ava pe pa'ü pendar omopü'a pota va'e ñepëi oɨ ɨvate va'e, ¿nda'ei chira pi'ä ogwapɨranera seprɨkwa agwä viña, osepia ranera yipɨndar vɨreko pi'ä imboavɨye agwä?

²⁹Ichui rumo, omondo tëira oɨ renarä, ndoikatui chietera imboavɨye opakatu osepia va'e vɨroɨröra yuvɨreko,

³⁰aipo e'ira yuvɨreko: ‘Aye evokoi mbɨa omopü'a pota tëi oɨ viña, ndoikatui ete rumo imboavɨye agwä.’

³¹Akoi mborerekwar ɨvate katu va'e osose vavasave oñemoigätu rane itera ambuae mborerekwar ɨvate katu va'e rese ovava agwä, ¿nda'ei chira pi'ä ogwapɨ ranera yɨpɨndar iyavei oikwa tuprɨra osundao retakwer diez mil sundao vɨreko va'e rese ovava va'erä ambuae vɨreko va'e veinte mil rese?

³²Iyavei ndoikatuise ovava agwä chupe, a'ese ambuae omondora mborerekwar ɨvate katu va'e upe ñe'ësa amombrɨ vɨte sekoise, omondora ñe'ë mombe'usar mba'e tuprɨ rese porandu agwä chupe.

³³Supiete, pepa'ü pendar ndoseya potaise omba'e opakatu, nda'ei chietera che remimbo'e sekoi.”

³⁴“Yukrɨ avɨye va'e ite; nase'ë irise rumo, ¿evokoiyase marä ya'era irira vo imoe'ë iporu agwä viña?

³⁵Naporäi ete ɨvɨ upe narä; ndiyai avei ɨvɨ mba'e repochi rese oyese'a va'erä. Evokoiyase a'e imomboprɨ va'erä tëi. Vɨreko va'e oapɨsa tosendu tuprɨ yuvɨreko.”