Read Guarayu LUCAS 15 Bible Online

LUCAS 15 - Guarayu bible

LUCAS 15

¹Opakatu ava sui gwarepochi rerokwasar iyavei ava eta yangaipa gwasu va'e oyemboya Jesús rese, iñe'ë rendu agwä yuvɨreko.

²Fariseo eta iyavei Moisés porokwaita rese oporombo'e va'e vɨroɨrö tëi yuvɨreko, aipo e'i: — Ko mbɨa omborɨ potarai ava yangaipa gwasu va'e, okaru avei ipa'üve.

³Evokoiyase Jesús omombe'u ko yembo'esa:

⁴“¿Uma pi'ä pe pa'ü pendar, vɨrekose cien ovesa gweimba viña okañɨse ñepëi ipa'ü pendar ichui, evokoiyase oseya ranera noventa y nueve tuprɨ oso yuvɨ pɨpe seko agwä, ipare oso ranera ovesa okañɨ va'e reka, oyosɨ rane itera rumo?

⁵Oyosɨse rumo, sorɨvetera omondora oachi'ɨ arɨve,

⁶oyepotase gwëtäve, omonu'ära omborɨpareta okotɨndareta aveino, aipo e'ira chupe: ‘Yayembovɨ'ara che pɨri, esepia ni'ä ayosɨ ite ovesa okañɨ va'ekwer.’

⁷Supiete egwë e'ira iyavei oimerä torɨvetesa gwasu katu ɨvave akoi ñepëi ava yangaipa gwasu va'e osekuñaröse gwekokwerai noventa y nueve yuvɨrekoi tuprɨ va'e sui.”

⁸“Akoi, ¿kuña vɨrekose gwarepochi opayandepo yovaive tuprɨ omokañɨse ñepëi ipa'ü sui, nomboendɨ chira pi'ä tataendɨ ipare osa'uvara oɨ pɨpe oseka mbegwera oyosɨ rane itera?

⁹Evokoiyase oyosɨse, omonu'ära omborɨpareta okotɨndareta avei, chupe aipo e'ira: ‘Yayembovɨ'ara che pɨri. Esepia ni'ä ayosɨ gwarepochi che sui okañɨ va'ekwer.’

¹⁰Amombe'u aipo supiete iyavei oime avei torɨvetesa Tüpä rembigwai ɨva pendar re'ɨi upe ñepëi ava yangaipa gwasu va'e osekuñaröse gwekokwerai.”

¹¹Jesús omombe'u ko yembo'esa: “Ñepëi mbɨa vɨreko va'e ñuvɨrïo gwa'ɨrɨ,

¹²chi'ïvä'e katu va'e aipo e'i oyesupa upe: ‘Cheru, embou mba'e che momba'esa cheu.’ Iyesupa evokoiyase omboya'o omba'e imondo chupe.

¹³Ipare koiye katumi, ta'ɨrɨ chi'ïvä'e katu va'e opa omondo oipɨsɨ va'ekwer oyesui, a'e gwarepochi pɨpe oso amombrɨ, ambuae tekwave, a'eve ogwarepochi oiporupa tëi omba'e pota raisa pɨpe.

¹⁴Opase ite rumo oiporu gwarepochi, a'ese oime tɨavor a'e ɨvɨ rupi, a'e evokoiyase ndasɨepoi tëi oiko.

¹⁵Evokoiyase oso mboravɨkɨ reka ñepëi mbɨa a'e pendar pɨri, a'e mbɨa evokoiyase omondo okove gweimba kuchi rärö agwä.

¹⁶A'eve oyemo'ɨ̇tarö pota tëi kuchi rembi'u pɨpe oiko viña, ndipoi ete rumo omondo va'e chupe.

¹⁷Ichui ramo oyemoma'endu'a tëi: ‘¡Mbovɨ tuprɨ oporavɨkɨ va'e yuvɨrekoi cheru rëtäve a'eve evokoiyase sumbɨre tëi sembi'u yuvɨreko, che evokoiyase ndache rɨepoi tëi ko'ave vichiko!

¹⁸Sese ayevɨra cheru rëtäve, aipo a'era chupe; che Ru, ayemboangaipa Tüpä rese nde rese aveino;

¹⁹nda'e iri chira nde raɨrɨ nungar aiko; iyakatu revo ndeu oporavɨkɨ va'e nungar tëi che rerekoñora eve.’

²⁰Evokoiyase oyevɨ iri oso vu rëtäve.” “Amombrɨ vɨtemi sekoise rumo, iyesupa osepia voi ete iparaisuse. Oñavoi ete sovaichï, oipɨsɨ oyako osovaupɨte avei.

²¹Ta'ɨrɨ aipo e'i chupe: ‘Che ru, ayemboangaipa Tüpä rese nde rese avei; ndiya iri nde ra'ɨrɨ che reko agwä.’

²²Tu rumo aipo e'i gwembigwai upe: ‘Peso, taperu avɨye katu va'e turukwar pemboyemonde; pemonde avei kwäpenda ïkwä rese, pɨtaki avei ipɨ rese.

²³Taperu gwaka ikɨra katu va'e peyuka. ¡Yayapora pieta gwasu iyevɨsa resendar!

²⁴Esepia ko che ra'ɨrɨ omano va'e nungar sekoi kurïtëi rumo oyevɨ iri ete ou; okañi ete oiko viña kurïtëi rumo yayosɨ iri.’ Ipare omboɨpɨ pieta apo yuvɨreko.”

²⁵“Ta'ɨrɨ kwakwa katu va'e rumo okove vɨte sekoi. Oyevɨse ou gwëtä rerovɨkave, osendu voi ipieta gwasu va'e yuvɨreko.

²⁶Evokoiyase oñe'ë ñepëi mbigwai upe oporandu mba'evo oime ko'ave.

²⁷Mbigwai aipo e'i chupe: ‘Nde rɨvrɨ moko oyevɨ iri ou; sese nde ru oyuka uka gwaka ikɨra va'e, esepia ni'ä oyevɨ tuprɨ nimaräi ete ou.’

²⁸Evokoiyase oñemoɨrö tëi tɨke'ɨrɨ kwakwa katu va'e, a'e rumo ndoike potai ete oɨ pɨpe, sese tu osëño ite okarve eike oyapave chupe.

²⁹Aipo e'i vu upe: ‘Nde ereikwa ite mbovɨ aravɨter oropɨtɨ̇vɨï vichiko, nde mboyeroyasave viña, nderembouimi ete rumo mba'e mɨmbami cheu oro'umi va'erä che mborɨpar rese.

³⁰Kurïtëi oyepota nde ra'ɨrɨ ou ndeu, omokañɨ tëi va'e nde gwarepochi kuña oyemondo-mondo tëi va'e rese, ereyuka uka rutei gwaka ikɨra va'e chupe.’ ”

³¹“Evokoiyase tu omboyevɨ chupe: ‘Che ra'ɨrɨ, nde ni'ä ereikoño va'e ite che rese, opakatu areko va'e mba'e a'e nde mba'e ite.

³²Iyakatu ñoite yamboeteira yayapora pieta, esepia ko nde rɨvrɨ, sekoi omano va'ekwer nungar, oyevɨ iri tekovesa pɨpe; esepia okañɨ oiko kurïtëi rumo yayosɨ iri.’ ”