Read Guarayu LUCAS 16 Bible Online

LUCAS 16 - Guarayu bible

LUCAS 16

¹Jesús omombe'u avei ko gwemimbo'e eta upe: “Oime ñepëi mbɨa mba'e yar vɨreko va'e ñepëi mbɨa omba'e rärösar; yuvɨraso imombe'u ko oiporu tëi nde mba'e oya yuvɨreko chupe.

²Serekwar oñe'ë aipo e'i chupe: ‘¿Mba'e vo aipo omombe'u nderesendar yuvɨreko cheu? Emboupa opakatu kwachiar ndeporavɨkɨ resendar, esepia ni'ä ndereiko iri chira ko'ave che mba'e rese añeko agwä.’

³Mba'e rärösar ipɨ'a ñemoñeta tëi: ‘¿Marä a'era pi'ä vichiko kurïtëi che rerekwar che mombose mboravɨkɨsa sui? Esepia ndareko iri pirätäsa cheyese ɨvɨ rese che poravɨkɨ agwä, achï eteangara mba'e rese porandu agwä.

⁴Aikwa mba'e ayapora, akoi ndarekoise mboravɨkɨ che pɨsɨ agwä gwëtä rupi yuvɨreko.’

⁵Evokoiyase oñe'ë ñepëi-pëi gwerekwar sui mba'e vɨnose va'ekwer upe. Yɨpɨndar va'e upe oporandu: ‘¿Mbovɨ erenose mba'e che rerekwar sui?’

⁶Omboyevɨ chupe: ‘Che anose cien rupindar tuprɨ mba'ekɨra rɨru.’ Mba'e rärösar aipo e'i chupe: ‘Ko oime nde kwachiar; egwapɨ ambuae voi ete esa'ä cincuenta rupindar gweraño.’

⁷Ipare ambuae upe oporandu: ‘Nde no, ¿mbovɨ vo mba'e erenose ichui?’ A'e omboyevɨ chupe: ‘Cien trigo ra'äsa rupindar.’ Aipo e'i chupe: ‘Ko nde kwachiar; eyapo ambuae ochenta rupindar gweraño.’

⁸Serekwar oikwa ite mba'e sembiapokwer avɨyese, esepia mba'e rärösar yɨpɨve ite oyemoigätu oiko opɨ'a ñemoñetarai pɨpe tëi mba'e apo agwä. Ñe'ësase rumo pe mba'e eta pereko va'e rese, ko yuvɨrekoi va'e ɨvɨ pɨpe opa ite oyemoigätu poroesapesa pɨpe yuvɨrekoi va'e sui.”

⁹Amombe'u tuprɨ aipo peü peiporu evokoi pe gwarepochi pereko va'e ko ɨvɨ pɨpe pe mborɨpar reime agwä, ichui opase pe gwarepochi, a'ese Tüpä pe pɨsɨra teko apɨre'ɨ̇save kuri.

¹⁰“Akoi seko mbegwe tuprɨ va'e mba'e apose, a'e oyapo tuprɨ katura mba'e tuvicha va'e; akoi ndovɨrekoi va'e gweko yemominisa pɨpe oyapo va'e mba'e, ndovɨreko iri ete mba'e vɨreko va'ekwer.

¹¹Iyavei pereko va'e mba'e eta ko ɨvɨ pɨpe pe evokoiyase ndapeikoise poroaɨsusa pɨpe, ¿ava irira pi'ä oma'e pe mba'e eta rese?

¹²Akoi ndapeiko tuprɨise rumo ko mba'e iya va'e rese, ¿ava vo evokoiyase omboura mba'e imbouprɨ peü?”

¹³“Ndipoi chira mbigwai omboyeroya va'e ñuvɨrïo gwerekwar; esepia ndoyambotai chira ñepëi, ambuae evokoiyase osaɨsu katura, ambuae saɨsuprɨ katura sekoi, ambuae evokoiyase ndosaɨsui chira. A'ese ndapeikatui chietera Tüpä pɨsɨ agwä pe mba'e eta rese.”

¹⁴Esepia fariseo eta, aipo gwarepochi potaraisa yuvɨrekoi va'e, osenduse opakatu mba'e vɨroɨrö tëi Jesús yuvɨreko.

¹⁵Jesús aipo e'i chupe: “Pemboyekwa tuprɨ tëi va'e ava rovake perekokwer, Tüpä rumo oikwa pe pɨ'a ñemoñetasa; iyavei ava vɨreko mba'e ɨvate katu eteprɨ va'e, Tüpä rumo ndoipotai ete.”

¹⁶“Porokwaita iyavei Tüpä ñe'ë mombe'usar Juan rupive ite opa. Ichuive tuprɨ rumo imombe'usa ñe'ësa avɨye va'e Tüpä mborerekwasa resendar, opakatu upe ite oso pirätäsa yuvɨroike va'erä.

¹⁷Ndayavai katu chira ɨva, ɨvɨ opa va'erä, porokwaita rumo opa rane itera imboavɨyesa.”

¹⁸“Akoi ñepëi kuimba'e opoise gwembireko sui omendase ambuae rese, a'e oyemboagwasa tëi va'e; omenda iri va'e omenda va'ekwer rese tëi, a'e oyemboagwasa tëi va'e avei.”

¹⁹“Oime aipo ñepëi mbɨa mba'e yar, oyemonde turukwar avɨye va'e pɨpe oyemboetei eteanga, iyavei arɨ yakatu oyapo pieta opakatu mba'e rese oyemboetei aisa pɨpe.

²⁰Oime avei aipo ñepëi mbɨa iparaɨsu va'e Lázaro serer va'e, a'e aipo ipirer tuyupa va'e ogwapɨ öi ɨvɨ arɨve mba'e yar rokendɨpɨve.

²¹Ko iparaɨsu va'e oipotami tëi o'umi va'erä mba'e ovɨapi va'e mba'e yar karusa renda sui viña; kave avei oyemboya yuvɨreko sese osere va'erä ipirer mba'erasɨsa ichui.

²²Ñepëi arɨ pɨpe iparaɨsu va'e omano, a'ese mbigwai eta ɨva pendar vɨraso yuvɨreko imbogwapɨ imbokaru Abraham pɨri. Mba'e yar avei omano, ipare oñotɨ̇ yuvɨreko.”

²³“Evokoiyase mba'e yar iparaɨsu katu a'eve yuvɨraso omano va'e yuvɨreko yepi, oma'e ɨvate kotɨ osepia amombrɨ Abraham, Lázaro ogwapɨse yɨpɨve öi.

²⁴Evokoiyase säse: ‘¡Cheru Abraham, che paraɨsuerekomi tëi eve! Emboumi Lázaro tomoakɨ̇ okwä aprɨ ɨ pɨpe tou tomoroɨ̇sami tëi che apëku, esepia che paraɨsu eteprɨ ko tata pirätägwer pɨpe vitu.’

²⁵Evokoiyase Abraham omboyevɨ chupe: ‘Che ra'ɨrɨ, nde ma'endu'a eipeve nde reko agwer rese nipaneise mba'e ndeu rekove pɨpe, Lázaro rumo iparaɨsumi tëi oiko. Kurïtëi rumo Lázaro ovɨ'arete ko'ave, nde evokoiyase nde paraɨsu eipeve eiko.

²⁶Ko ipare oime avei, ñepëi ɨvɨkwar ipɨkuku va'e yandeu peü narä reseve; evokoiyase oipota va'e sasa ko'ave sui ipeve, ndoikatui chietera peve sui ndoikatui chira yugweru sasa ko'ave.’ ”

²⁷“Mba'e yar aipo e'i: ‘Amombe'ura evokoiyase ndeu cheru Abraham, emondomi tëi Lázaro che yesupa rëtäve,

²⁸a'eve areko poyandepo tuprɨ che rɨvrɨ, tomombe'u mba'e naporäi va'e chupe, yugweru e'ɨ̇ agwä ko'ave iyavei ko tekokwer mba'e tëisave.’

²⁹Abraham aipo e'i: ‘A'e vɨreko ite ikwachiaprɨ Moisés porokwaita iyavei Tüpä ñe'ë mombe'usar rembikwachiagwer: ¡A'e tovɨroya yuvɨreko!’

³⁰Mba'e yar omboyevɨ chupe: ‘Cheru Abraham, evokoi ndovɨroyai chietera yuvɨreko; omano va'ekwer okwerayevɨse oyemboyekwara chupe, a'ese oyevɨra Tüpä upe yuvɨreko.’

³¹Abraham rumo aipo e'i chupe: ‘Akoi ndoyapɨsaka potaise Moisés porokwaita rese iyavei ambuae Tüpä ñe'ë mombe'usar rese, ndovɨroyai chira ava omano va'ekwer okwerayevɨse yuvɨreko.’ ”