Read Guarayu LUCAS 17 Bible Online

LUCAS 17 - Guarayu bible

LUCAS 17

¹Jesús aipo e'i gwemimbo'e eta upe: “Ndapei katui chietera angaipa pɨpe pevɨapi e'ɨ̇ agwä; ¡iparaɨsura rumo ava moangaipa tëisar yuvɨreko!

²Iyakatu evokoi nungar imombosa voi paragwasu pɨpe ñepëi ita mba'e mboku'isa pɨpe ñapɨ̇chisara iyesɨ'o rese, omoangaipa uka tëi va'e ñepëi ipa'ü pendar chi'ïvä'emi nungar.

³¡Sese peñearö tuprɨ!” “Akoi nde rɨvrɨ oyemboangaipase, emboarakwa; oyevɨse gwekokwer tuprɨ pɨpe, a'ese ndeñeröira chupe.

⁴Akoi oyemoangaipa va'e nde rese ñuvɨrïo ova yupagwer ñepëi arɨ pɨpe, ñuvɨrïo ova yupagwer oyevɨ irise imombe'u ndeu: ‘Ndayapo iri chira ko nungar mba'e’, a'ese ndeñeröira chupe.”

⁵Ko Jesús ñe'ë mombe'usar oporandu yande Yar upe yuvɨreko: — Embou oreu Tüpä rese yeroya katu agwä.

⁶Evokoiyase yande Yar omboyevɨ chupe: — Perekose yeroyasa Tüpä rese viña, yepe ndoyavɨi chira mostaza rä'ɨi ta'ɨmi va'e viña, aipo peyera ko ɨvɨra tuvicha va'e upe: ‘Eyeapo'o ave sui eñeñetɨ paragwasu pɨpe’, a'ese pe mboyeroya itera.

⁷“Akoi ñepëi pe pa'ü pendar vɨreko va'e gwembigwai oyevɨse kove sui ou ɨvɨ mboyere pare, anise gwaka rärö sui, ¿aipo e'ira pi'ä chupe: ‘Eike egwapɨ terekaru’?

⁸Ani ete, a'e rumo aipo e'iñora chupe: ‘Emoigätu voi mba'e che to'u, nde añeko tuprɨ rane che rese esepia che akaru ranera, aɨ'u rane aveira. Ipare ramo nde erekarura ereɨ'u aveira.’

⁹Avɨye ndeu nde'i chietera gwembigwai upe yokwai pare.

¹⁰Egwë peye aveira pe no, akoi pe mboavɨye tuprɨse ite opakatu Tüpä porokwaita ombou va'e rese peü, a'ese aipo peye ñoitera: ‘Yande mbigwai yaiko naporäi va'e, esepia ni'ä yande mborokwaita mboavɨyesarño tëi yaiko.’ ”

¹¹Oso va'e perɨ Jerusalén ve, supi Jesús ogwata ɨvɨ Samaria iyavei Galilea rupi.

¹²Oyepota oso tekwamive, a'eve yuvɨnosë sepiase opayandepo yovaive kuimba'e mba'erasɨ vai ndokwerai va'e rerekosar, amombrɨve rumo opɨtaño yuvɨreko ichui

¹³säse tëi yuvɨreko: — ¡Jesús, Porombo'esar, ore paraɨsuerekomi tëi eve!

¹⁴Osepiase Jesús, aipo e'i mba'erasɨ vai rerekosar upe: — Peso, tapeyemboyekwa pa'i eta upe. Oyevɨse yuvɨraso, opa okwera tuprɨ omba'erasɨsa sui yuvɨreko.

¹⁵Ñepëi ipa'ü pendar, okwera tuprɨse, oyevɨ chupe osapukai pirätä Tüpä upe imboeteisave,

¹⁶oñenopɨ'ä oso Jesús rovai, oyaɨvɨ ɨvɨ rese oso avɨye ndeu oyapave. A'e mbia Samaria ɨgwar.

¹⁷Jesús aipo e'i chupe: — ¿Nda'ei vo akoi opayandepo yovaive tuprɨ opa okwera omba'erasɨsa sui yuvɨreko? ¿Aike keru ambuae irugätu ova yuvɨrekoi va'e?

¹⁸¿Ko gweraño ite ambuae ɨvɨ pendar oyevɨ ou avɨye ndeu oya Tüpä upe?

¹⁹Aipo e'i mbɨa upe: — Eñarapü'a eso tuprɨño; esepia nde che rese yeroyasa pɨpe erekwera kurïtëi.

²⁰Fariseo eta oporandu Jesús upe yuvɨreko maräse vo aipo oyepotara Tüpä mborerekwasa, a'e evokoiyase omboyevɨ chupe: — Tüpä mborerekwasa oyepotase nda'ei chira opakatu ava osepiara yuvɨreko.

²¹Nimombe'usa chietera peü: ‘Ko sekoi’, anise ‘A'eve sekoi’; esepia Tüpä mborerekwasa oikove ite pe pa'üve.

²²Aipo e'i gwemimbo'e eta upe: — Oyepotara arɨ peipota tëira aiko va'erä pe pɨri ñepëi arɨ rupi yande Yar ra'ɨrɨ che rekosa pɨpe, ndache repia iri chira rumo peye.

²³Aipo e'i tëira yuvɨreko: ‘Ko sekoi’, anise ‘A'eve sekoi’; Ndapesakɨkwe moñai chira rumo.

²⁴Esepia inungar overa-vera va'e osesapese, ɨva opakatu rupi, egwë e'i etera yande Yar Ra'ɨrɨ oyevɨse ou agwä kuri.

²⁵Yɨpɨndar rumo peparaɨsu rane itera, ava perepia potae'ɨ̇sa pɨpe kurïtëindar yuvɨrekoi va'e upe.

²⁶Inungar ava Noé rekose yuvɨreko araka'e, egwë e'i tuprɨ aveira ni'ä yande Yar Ra'ɨrɨ, yevɨ agwä renonde kuri.

²⁷Ava okaru, oɨ'u omendaño avei yuvɨreko, oyepotase rumo arɨ ipapaprɨ Noé reike agwä arca pɨpe, a'ese oyepota amarusu ou opakatu tuprɨ ava omano yuvɨreko.

²⁸Egwë e'i avei araka'e Lot rekose: ava okaru oɨ'u tëi, vɨrokwa mba'e opaño omondo, oma'etɨ̇ iyavei oyapo oɨ yuvɨreko;

²⁹osëse rumo Lot tekwa Sodoma sui, avɨyeteramo tëi ovɨapi tata amar nungar ɨva sui a'ese opakatu tuprɨ omano yuvɨreko.

³⁰Egwë e'i aveira kuri ava ɨvate katu va'e Ra'ɨrɨ oyemboyekwase.

³¹“A'e arɨ pɨpe, akoi ava gwëtä arɨve sekoi va'e vɨreko va'e mba'e gwëtä pɨpe, togweyɨ eme senöse; iyavei yuvɨrekoi va'e ka'a pɨpe, toyevɨ eme gwëtäve.

³²Peyemoma'endu'a ko araka'endar Lot rembireko rese.

³³Akoi gwekokwer osaɨsu va'e, a'e omokañɨrä; akoi omokañɨ tëi va'e rumo, a'e oñepɨsɨröra.”

³⁴“A'e pɨ̇tü pɨpe oimerä ñuvɨrïo yugweruve va'e ñepëi vupave, ñepëi serasosara ambuae seyasara.

³⁵Akoi ñuvɨrïo kuña o'ɨchora yuvɨreko, ñepëi serasosara, ambuae seyasara.”

³⁶Ñuvɨrïo ava yuvɨrekoi va'e ka'a pɨpe, ñepëi serasora ambuae seyasara.

³⁷Evokoiyase oporandu yuvɨreko chupe: — ¿Ore Yar, kevo aipo egwë e'ira mba'e kuri? A'e rumo omboyevɨ: — Oimesave omano va'e, a'eve oyemonu'ära uruvu yuvɨreko.