Read Guarayu LUCAS 18 Bible Online

LUCAS 18 - Guarayu bible

LUCAS 18

¹Jesús omombe'u porombo'esa ava yerure agwä arɨ yakatu rupi, kere'ɨ̇sa pɨpe.

²Aipo e'i: “Oime ñepëi tekwave ñepëi mbɨa mborerekwar mba'e moigätusar ndosɨkɨyei va'e Tüpä sui, ambuae ava sui avei.

³A'e tekwa pɨpe avei oime ñepëi kuña imer mano va'ekwer vɨreko va'e vavasa ambuae ava rese ipɨpe sui oso mborerekwar upe mba'e moigätu agwä rese.

⁴Yɨpɨve ite rumo mborerekwar noipɨtɨ̇vɨï potai, koiye katu rumo ipɨ'a ñemoñeta: ‘Yepe che ndasɨkɨyei va'e Tüpä sui, ava sui avei ndasɨkɨyei va'e ite,

⁵amoigätuñora, rumo mba'e ko imer mano va'ekwer upe, ayapoñora semimbotar cheu iyu pɨ'i e'ɨ̇ agwä e'i opɨ'a ñemoñetasave.’ ”

⁶Yande Yar aipo e'i iri imombe'u: “Ko aipo e'i mborerekwar ndasekoporäi va'e.

⁷Supiete, ¿nda'ei chira pi'ä Tüpä avei oipɨsɨröra gwembiporavo, oyeupe yeruresar arɨ, pɨ̇tü rupi yepi? ¿Osärö uka tëira pi'ä?

⁸Aipo a'e peü oipɨtɨ̇vɨï voira mba'e avɨye va'e rese. Akoi ouse rumo ava ɨvate katu va'e Ra'ɨrɨ, ¿osepia vɨtera pi'ä che rese oyeroya va'e yuvɨreko ko ɨvɨ pɨpe?”

⁹Jesús omombe'u ko ambuae yembo'esa ambuae rekokwer rese, inungar oime amove ava avɨyeai anga'u sekoi oyeupe viña, i'arɨve rumo vɨroɨrö ambuae ava:

¹⁰“Ñuvɨrïo ava yuvɨraso tüpärove oyerure: ñepëi aipo fariseo, ambuae evokoiyase gwarepochi rerokwasar Roma pendar upe narä.

¹¹Evokoiyase fariseo, opü'a o'ä oyerure aipo e'i: ‘Tüpä, avɨye ndeu che nda'ei ambuae ava nungar che rekokwer; imondarai va'e, ndacherekorai va'e, ndacheagwasai tëi va'e, nda'ei avei inungar gwarepochi rerokwasar tëi aiko.

¹²Che ayekwaku ñuvɨrïo yupagwer ñepëi semana pɨpe amondo ndeu che poravɨkɨ rumbɨrer opakatu che poravɨkɨ sui.’

¹³Ava gwarepochi rerokwasar rumo opɨtaño amombrɨ ichui, a'e evokoiyase noma'ei ete ɨva rese, oyepochi'a nupa-nupaño aipo e'i: ‘¡Tüpä, che paraɨsuerekomi eve, che angaipa viyar aiko!’

¹⁴Sese aipo a'e peü ko gwarepochi rerokwasar oyevɨ tuprɨ gwëtäve oso, fariseo rumo ani ete. Esepia ni'ä, opakatu akoi oyemboɨvateai va'e, opara seko reroyɨsa; akoi seko mbegwe va'e, a'e rumo seko mboɨvate katusara.”

¹⁵Iyavei chi'ïvä'e gweru Jesús uve yuvɨreko, opoko va'erä sese; evokoiyase semimbo'e osepiase, opaño ombosɨrɨ chi'ïvä'e rerasosar yuvɨreko ichui.

¹⁶Evokoiyase Jesús oñe'ë aipo e'i chupe: — Toyugweruño chi'ïvä'e cheu, anichira ndapeipotai, esepia ni'ä Tüpä mborerekwasa inungar a'e yuvɨrekoi va'e.

¹⁷Supiete amombe'u ndoipɨsɨpotai va'e che Ru Tüpä mborerekwasa chi'ïvä'emi nungar yuvɨreko, a'e ndoyuvɨroikei chietera ipɨpe.

¹⁸Ñepëi mbɨa mborerekwar oporandu Jesús upe: — Porombo'esar avɨye va'e, ¿mba'e vo ayapora tekovesa apɨre'ɨ̇ va'e rereko agwä?

¹⁹Jesús omboyevɨ chupe: — ¿Ma'erä vo avɨye va'e ere cheu? Oime rumo ñepëi avɨye va'e ite: a'e Tüpä.

²⁰Ereikwa ni'ä ko porokwaita aipo e'i va'e: ‘Nandeagwasai chira, ndereporoyukai chira, nandemondai chira, nanderemiräi chira ambuae ava rese, eremboyeroyara nde ru nde sɨ avei.’

²¹A'e mbɨa aipo e'i chupe: — Che aipo nungar opakatu amboavɨye ite che chi'ïvä'emi suive.

²²Aipo i'ese rumo, Jesús omboyevɨ chupe: — Ipane vɨte ñepëi mba'e ndeu: emondopa opakatu mba'e erereko va'e iparaɨsu va'e upe. Ichui ererekora mba'e avɨye va'e ɨvave. Ipare eregwatara che rupi.

²³Aipo oyeupe ese rumo, ndoyembovɨ'ai tëi, esepia ni'ä mba'e yar ite sekoi.

²⁴Osepiase rumo, Jesús aipo e'i: — ¡Yavai ete rumo ava mba'e yar reike agwä che Ru Tüpä mborerekwasave!

²⁵Ndayavaimi katu camello upe yukwar rupi seike agwä, ava imba'e eta va'e upe rumo yavai katu che Ru mborerekwasave seike agwä.

²⁶Sendusar oporandu yuvɨreko: — ¿Ava pi'ä evokoiyase oñepɨsɨröra yuvɨreko?

²⁷Jesús omboyevɨ chupe: — Ava tëi upe mba'e yavai ete Tüpä upe rumo ndayavaimi ete.

²⁸Pedro aipo e'i chupe: — Che Yar, ore rumo opa oroseya ore mba'e nde rupi ore gwata agwä.

²⁹A'e omboyevɨ chupe: — Supiete akoi oseya va'e gwëtä, gwembireko, vɨke'ɨrɨ, vɨvrɨ, oyesupa, gwa'ɨrɨ Tüpä mborerekwasa sui tëi,

³⁰oipɨsɨ katu itera seta mba'e gwekovesa pɨpe, oipɨsɨ aveira tekovesa apɨre'ɨ̇ ndopai va'e.

³¹Jesús oñe'ë kokotɨ opayandepo yovaive ñuvɨrïo yuvɨrekoi va'e gwemimbo'e upe, aipo e'i: “Kurïtëi yasora Jerusalén ve, a'eve yavɨyera ko Tüpä ñe'ë mombe'usar rembikwachiagwer ko che ava ɨvate katu va'e Ra'ɨrɨ resendar ñe'ësa.

³²Omondora ambuae tekwa pendar upe tëi yuvɨreko, vɨroɨröra, marä-marä tëi iyavei ondɨvɨ-ndɨvɨra yuvɨreko sese.

³³Oinupa-nuparä ipare oyukara yuvɨreko; imombosapɨsa arɨ pɨpe rumo okwerayevɨra.”

³⁴A'e rumo ndosendukwai ete iñe'ë yuvɨreko, ndoikwai ete mba'e rese oñe'ë chupe, a'e evokoiyase ndoikatui ete sendukwa agwä yuvɨreko.

³⁵Jesús ovɨrovɨse tekwa Jericó oso, a'eve ñepëi ndasesapɨsoi va'e ogwapɨ öi perɨ popɨve porerekosa oyeupe mondo agwä rese,

³⁶osenduse rumo ava re'ɨi pɨambu, a'ese oporandu mba'e oime va'e rese ava upe.

³⁷A'e evokoiyase aipo e'i yuvɨreko chupe Jesús Nazaret pendar okwara ko rupi,

³⁸evokoiyase a'e säse pirätä: — ¡Jesús, David Suindar, che paraɨsuerekomi tëi eve!

³⁹Tenonde yuvɨraso va'e ndoipotai ete iñe'ë yuvɨreko, a'e rumo säse pirätäño ite: — ¡David Suindar, che paraɨsuerekomi tëi eve!

⁴⁰Evokoiyase Jesús opɨta a'eve, ipare oyokwai ava seru agwä. Vɨroyepotase seru yuvɨreko, aipo e'i oporandu chupe:

⁴¹— ¿Mba'e vo ereipota ayapo va'erä ndeu? Ndasesapɨsoi va'e omboyevɨ chupe: — Che Yar, aipota che mbosarekomi tëira eve.

⁴²Jesús aipo e'i chupe: — ¡Erekwerara! Esepia che rese nde yeroyasa pɨpe erekwera kurïtëi.

⁴³A'e ramoseve ndasesapɨsoi va'e osareko tuprɨ ite, osoño Jesús rupi Tüpä mboeteisave. Opakatu ava osepia va'e omboetei Tüpä yuvɨreko.