Read Guarayu LUCAS 2 Bible Online

LUCAS 2 - Guarayu bible

LUCAS 2

¹Yɨpɨndar mborerekwar gwasu Augusto oporokwai oiko, oime va'erä yekwachiasa opakatu tekwa rupi.

²Ko oime va'e yɨpɨndar yekwachiasa Quirinio mborerekwar sekoise Siria ve.

³Opakatu ava yuvɨraso gwekwa yakatu rupi oyekwachia agwä yuvɨreko.

⁴Sese José osë tekwa Nazaret sui Galilea ɨvɨ rupi, ichui oso Belén ve ɨvɨ Judea ve, esepia ni'ä a'eve mborerekwar ɨvate katu va'e David o'a va'ekwer, José ichuindar avei sekoi.

⁵Egwë e'i oyoya yuvɨraso oyekwachia gwembireko María rese, a'e rumo imembɨra pota ite oiko.

⁶Iyavei yuvɨrekoi vɨteseve Belén ve, osupitɨ ite María upe arɨ imembɨra agwä.

⁷A'eve o'a yɨpɨndar va'e imembrɨ kuimba'emi, iyavei oya'o turukwar pɨpe ichui omoñeno imondo mba'e mɨmba rembi'u rɨru pɨpe, esepia ni'ä ndoyosɨi ete oke agwä a'eve yuvɨreko.

⁸Belén rerovɨkave oime ovesa rärösar, osärö va'e gweimba ovesa pɨ̇tü pɨpe yuvɨreko.

⁹Avɨyeteramo tëi oyemboyekwa ñepëi mbigwai ɨva pendar Yar suindar, Tüpä porañetesa avei sendɨ yɨvɨi chupe yuvɨreko; ichui a'e sepiase oyembosɨkɨye iteanga tëi yuvɨreko.

¹⁰A'e mbigwai ɨva pendar rumo aipo e'i chupe: “Pesɨkɨyei rene, esepia che ayu mba'e ikatuprɨ va'e mombe'u peü, pe mbovɨ'arete agwä opakatu ava mbovɨ'arete agwä aveino:

¹¹Ko pɨpe o'a David rekwa Belén ve Poropɨsɨrösar peü narä, a'e ni'ä Tüpä Rembiporavo, pe Yargwä sekoi.

¹²Ikwa agwä, peyosɨra pitani yaoprɨ tuprɨmi va'e tui, mba'e mɨmba rembi'u rɨru pɨpe.”

¹³Avɨyeteramo tëi ñepëi mbigwai ɨva pendar ɨvɨi, oyemboyekwa ambuae mbigwai ɨva pendar re'ɨi, Tüpä upe osapukai va'e aipo e'i yuvɨreko:

¹⁴“¡Imboeteiprɨ tasekoi Tüpä ɨvave! ¡Ɨvɨve ava Tüpä rembiaɨsu toyuvɨrekoi tuprɨ oyeaɨsusa pɨpe!”

¹⁵Opase oyevɨ mbigwai ɨva pendar re'ɨi ɨvave yuvɨraso, a'ese ovesa rärösar aipo e'i oyeupe yuvɨreko: — Yaso ru Belén ve, yasepiara aipo mba'e akoi oikwa uka va'e Yar oiko yandeu.

¹⁶Evokoiyase ipoyava yuvɨraso, ipare osepia María, José, Jesús pitani avei omoñeno mba'e mɨmba rembi'u rɨru pɨpe yuvɨreko.

¹⁷Osepia pare omombe'u-mbe'u ambuae ava upe mbigwai ɨva pendar remimombe'ugwer pitani resendar ñe'ësa yuvɨreko,

¹⁸iyavei opakatu ava oyepɨ'amondɨi ovesa rärösar ñe'ësa renduse yuvɨreko.

¹⁹María rumo oyapokatuño ite ko mba'e opɨ'a pɨpe sereko, iyavei a'e e'iño ite ipɨ'a ñemoñetasa.

²⁰Oyevɨse ovesa rärösar yuvɨraso, omboetei iyavei osapukai Tüpä upe yuvɨreko, esepia ni'ä opakatu mba'e osendu va'e, osepia va'ekwer yuvɨreko imombe'uprɨ rupi tuprɨ ite.

²¹Mbosapɨ ova arɨ pɨpe pitani ombocircuncida yuvɨreko, omondo serergwä Jesús, a'e terer tuprɨ avei akoi mbigwai ɨva pendar omombe'u va'e María upe imembɨ e'ɨ̇ vɨteseve.

²²Ipare omboavɨyese o'arɨ gwëtäve oñemoatɨrö agwä, a'e aipo egwë e'i Moisés porokwaita rupi yuvɨreko yepi, a'ese vɨnose pitani seraso tekwa gwasu Jerusalén tüpäro pɨpe seropove'ë agwä yande Yar upe yuvɨreko.

²³Egwë e'i yapo yuvɨreko esepia yande Yar porokwaita aipo e'i ikwachiaprɨ pɨpe araka'e: “Opakatu yɨpɨndar pitani kuimba'emi yuvɨro'a va'e ipe'asara Tüpä upe narä yepi.”

²⁴Ipare yuvɨraso oporerekosa reropove'ë agwä yuvɨreko yande Yar porokwaita aipo e'i va'e rupi: peropove'ëra ñepëi oyovaichor reseve pɨku'i anise ñuvɨrïo apɨkasu.

²⁵A'e arɨ pɨpe araka'e ñepëi mbɨa sekoi va'e Jerusalén ve Simeón serer va'e. A'e mbɨa avɨye eteprɨ va'e sekokwer, osärö va'e avei Pɨsɨrösar imombe'uprɨ. Espíritu Maräne'ɨ̇ rumo sekoi va'e ite Simeón rese,

²⁶iyavei oikwa uka avei chupe imano vɨte e'ɨ̇ agwä eresepia rane itera Poropɨsɨrösar yande Yar remimbou kuri e'i va'e.

²⁷Espíritu Maräne'ɨ̇ reroyasa pɨpe, Simeón oso tüpärove; ipare iyesupa vɨraso Jesús pitani yuvɨreko chupe, porokwaita mboavɨye agwä,

²⁸Simeón osupi vɨroyerokɨ Tüpä upe seno'ä aipo e'i:

²⁹“Che Yar kurïtëi nderemimombe'u yavɨye ite: esepia ni'ä, nde remimombe'ugwer eremboavɨye ite cheu.

³⁰Iyavei asepia ite ko Poropɨsɨrösar vichiko

³¹a'e omboɨpɨ ite mba'e apo oiko opakatu tekwa rembiepiave,

³²a'e ni'ä poroesapesa sekoi opakatu tekwa upe narä iyavei omboyekwara poromboeteisa supiete va'e nde rekwa Israel pendar upe.”

³³Jesús yesupa iyavei ichɨ ndoyembovɨ'ai tëi yuvɨreko pitani rese Simeón ñe'ë renduse.

³⁴Evokoiyase Simeón osovasa pitani iyesupa reseve, aipo e'i Jesús sɨ María upe: — Esepia ko pitani reroya e'ɨ̇sa pɨpe seta ovɨapira mba'e tëi pɨpe Israel ɨgwar yuvɨreko ambuae rumo seroya pɨpe sovasaprɨ yuvɨrekoira. A'e avei omboyekwara mba'e ava upe amove rumo vɨroɨröñora yuvɨreko,

³⁵ipɨpe sui ava pɨ'a ñemoñetasa ikwasara kuri. Iyavei ko opakatu mba'e tasɨra nde pɨ'a pɨpe inungar kɨse puku osasara nde pɨ'a viña.

³⁶A'eve avei kuña kwakwami yarakwa va'e sekoi, Ana serer va'e, Penuel rayrɨ, Aser suindar. Okuñatäimiseve rumo omenda, iyavei sekoi raimi tëi omer rese ñuvɨrïo ova aravɨter rupive;

³⁷kurïtëi sekoi omer mano pare ochenta y cuatro aravɨter. Nosëi ete tüpäro pɨpe sui oiko, egwë e'i yande Yar mboetei pɨ̇tü arɨ rupi, oyekwakusa pɨpe oyeruresa pɨpe aveino.

³⁸A'ese Ana oyemboyekwa a'e arɨ pɨpe ve, ipare omboɨpɨ avɨye ndeu oya Tüpä upe, ichui oñe'ë Jesús pitani rese opakatu ava Jerusalén pendar osärö va'e gwekwa pɨsɨrö agwä yuvɨreko va'e upe.

³⁹Evokoiyase opakatu yande Yar porokwaita mboavɨyere, opa oyevɨ Galilea ve, gwekwa Nazaret ve yuvɨreko.

⁴⁰A'ese pitani okwakwa katumi imba'ekwa-ekwa iri ete, iyavei ipirätä katu iri ete no esepia Tüpä osovasa ite sereko.

⁴¹Jesús yesupa yuvɨraso aravɨter yakatu Jerusalén ve Pascua pieta repia yepi.

⁴²Iyavei omboavɨyese Jesús opayandepo yovaive ñuvɨrïo aravɨter, vɨraso iyesupa a'eve yuvɨreko, esepia egwë e'i ete tekokwer pieta yakatu rupi yepi.

⁴³A'e arɨ pieta pare voi, oyevɨse yuvɨreko gwëtäve, Jesús chi'ïvä'e opɨtaño Jerusalén ve, iyesupa rumo ndoikwai ete ipɨtase yuvɨreko.

⁴⁴Ouño revo ava pa'ü rupi e'i yuvɨreko chupe viña, a'e rumo ñepëi arɨ ogwata yuvɨreko; koiye oseka tëi omu pa'ü rupi omborɨpar pa'ü rupi aveino,

⁴⁵ndoyosɨi ete yuvɨreko. A'ese oyevɨ iri tëi Jerusalén ve seka agwä yuvɨreko.

⁴⁶Imombosapɨsa arɨ pɨpe oyosɨ ramo tüpäro pɨpe yuvɨreko, a'eve ogwapɨ ava Moisés porokwaita rese oporombo'e va'e pa'üve öi, oyapɨsaka iñe'ë rese iyavei oporandu-randu mba'e rese yuvɨreko chupe.

⁴⁷Iyavei opakatu ava iñe'ë rendusar ndoyembovɨ'ai tëi imba'ekwasa rese, esepia oyapose porandusa yuvɨreko chupe, omboyevɨ tuprɨ voiño ite.

⁴⁸Oyosɨse iyesupa oyepɨ'amondɨi tëi yuvɨreko; a'ese ichɨ aipo e'i chupe: — Che membrɨ, ¿ma'erä vo ereyapo ko nungar eiko oreu? Nde ru iyavei che nde sɨ nde rekasa tëi opakatu rupi vɨ'are'ɨ̇sa pɨpe.

⁴⁹Jesús omboyevɨ chupe: — ¿Ma'erä vo che reka teï peye? ¿Ndapeikwai vo che Ru rëtä pɨpe aiko va'erä?

⁵⁰Iyesupa rumo ndosendukwai ete aipo oyeupe'esa yuvɨreko.

⁵¹Evokoiyase oyevɨ oyesupa rupi Nazaret ve, a'ese omboyeroyaño ite oyesupa opakatu mba'e rese oiko. Ichɨ evokoiyase opɨ'a pɨpe oyapokatuño ite ko mba'e opakatu sereko.

⁵²A'ese Jesús okwakwa-kwakwa iri ete imba'ekwa katu-katu iri iyetei katu aveino, seko katuprɨ Tüpä rovai iyavei opakatu ava rovai.