Read Guarayu LUCAS 21 Bible Online

LUCAS 21 - Guarayu bible

LUCAS 21

¹Jesús oma'egätu ava imba'e eta va'e rese omondose oporerekosa gwarepochi rɨru pɨpe yuvɨreko,

²a'eve avei kuña imer mano va'ekwer iparaɨsu va'e omondo ñuvɨrïomi gwarepochi oporerekosa.

³Evokoiyase aipo e'i: — Supiete ko kuña iparaɨsu va'e omondo katu oporerekosa opakatu sui;

⁴opakatu omondo oporerekosa omba'e rumbɨrer tëi yuvɨreko, ko kuña rumo, oparaɨsusa pɨpe vɨrekomi va'e omondopa ite oporereko agwä.

⁵Oime ava oñe'ë va'e tüpäro rekokwer rese, ita katuprɨsa rese porerekosa ipɨpendar rese avei omoigätu tuprɨai ete yuvɨreko. Jesús aipo e'i:

⁶— Oimerä arɨ opakatu ko mba'e kurïtëi pesepia va'e pɨpe ndipoi chietera ñepëi ita oye'a vɨte va'e. Opakatu ite imondurusara kuri.

⁷Evokoiyase oporandu yuvɨreko chupe: — Porombo'esar, ¿mba'ese vo oimerä aipo nungar? ¿Mba'e rese pi'ä ikwasara poromondɨisa ou va'erä kuri?

⁸Jesús omboyevɨ chupe: “Peikwa katu peyembopa ukai rene. Esepia ni'ä seta ava yugwerura cherer pɨpe. Aipo e'ira yuvɨreko: ‘Che aiko Poropɨsɨrösar’, iyavei ‘Kurïtëi osupitɨ arɨ imombe'uprɨ.’ Pe rumo ndapegwatai chira supi yuvɨreko.

⁹Akoi peyanduse vavasa iyavei ovava va'e oyeupe yuvɨreko, ndapeyembosɨkɨyei chira, evokoi nungar rane ite ni'ä oimerä; nde'i vɨtei chira rumo arɨ kañɨ agwä.”

¹⁰Evokoiyase aipo e'i iri: “Ñepëi ɨvɨ pɨpendar ovavara ambuae upe iyavei ñepëi tekwa ovavara ambuae tekwa upe no.

¹¹Oimerä ɨvɨ rɨrɨi tuvicha va'e, iyavei tɨavor, mba'erasɨsa opakatu-katu tëi tekwa rupi, oyekwa aveira ɨva rese mba'e poromondɨisa tuvicha va'e.”

¹²“Ko mba'e-mba'e tëi renonde, pe pɨsɨra yuvɨreko che rekokwer sui. Pe reraso aveira mba'e porandu agwä rese oɨ judío ñemonu'äsave, pe rokenda aveira pe rerasora mborerekwar rovai iyavei mborerekwar ɨvate katu va'e rovai yuvɨreko che rekokwer sui tëi.

¹³Ipɨpe sui pemombe'ura che rekokwer chupe yuvɨreko.

¹⁴Aipo a'era añe'ë ndapeyei chira pepɨ'añemoñeta rereko pe yeepɨ agwä,

¹⁵esepia che amondora che mba'ekwasa peñe'ë agwä, ndoikatui chietera evokoiyase pe amotare'ɨ̇mbar imboyevɨ yuvɨreko peü.

¹⁶Pe amotare'ɨ̇ra rumo pe yesupa, pe rɨvrɨ eta, pe mu pe mborɨpa eta avei. Oyuka aveira pe pa'ü pendar yuvɨreko,

¹⁷iyavei opakatu rupi ndape ambotai chira che rekokwer sui tëi yuvɨreko;

¹⁸nokañɨi chietera rumo ñepëi pe'a peakä sui.

¹⁹¡Peyemovɨräkwä katu, a'ese pe ñepɨsɨröra!”

²⁰“Iyavei pesepiase Jerusalén rese sundao oyere tuprɨse, peikwara evokoiyase mba'e-mba'e tëi reime agwä.

²¹Evokoiyase, Judea ve yuvɨrekoi va'e, toñemipa ɨvɨtrɨ rese; yuvɨrekoi va'e Jerusalén pɨpe, toyuvɨnosepa tekwa sui, iyavei yuvɨrekoi va'e ka'a pɨpe, toyevɨ iri eme yuvɨreko.

²²Esepia a'e arɨ pɨpe oimerä ñemoɨrösa, a'e yavɨye rane itera opakatu Ikwachiaprɨ araka'endar pɨpe imombe'uprɨ.

²³¡Iparaɨsu itera a'e arɨ pɨpe kuña ipuru'a va'e, imembɨ pitani va'e aveino! Esepia oimerä tekoasɨsa ko ɨvɨ pɨpendar upe, iyavei ñemoɨrösa tuvicha va'e tekwa uve narä.

²⁴Oimerä omano va'e kɨse puku pɨpe iyavei ambuae evokoiyase vɨrasora ipɨsɨprɨ opakatu tekwa gwasu rupi yuvɨreko; iyavei ava nda'ei va'e judío yuvɨroikera Jerusalén poru agwä osupitɨse voi ete akoi arɨ imombe'uprɨ yuvɨreko chupe.”

²⁵“Oimerä poromondɨisa arɨ rese, yasɨ rese iyavei yasɨtata rese; opakatu ɨvɨ tekwa rupi ava ndayarakwa iri chira yuvɨreko oyembosɨkɨye gwasu-gwasu tëi aveira yuvɨreko paragwasu rɨapugwer renduse.

²⁶Ava seta yarakwa kañɨ tëira osɨkɨyepave yuvɨreko opɨ'añemoñeta gwasuaise ko ɨvɨ pɨpe mba'e oime va'erä sui; a'ese avei ɨva resendar opakatu mba'e orɨrɨira.

²⁷A'ese che ava ɨvate katu va'e Ra'ɨrɨ ayekwara ayuse ɨva kɨ'a rese pirätäsa rendɨgwer porañetesa pɨpe.

²⁸Akoi omboɨpɨse evokoi nungar mba'e, peyemongere'ɨ̇ katura iyavei perovaɨva ɨvate kotɨ, esepia a'ese opara pëse mba'e naporäi va'e povrɨ sui.”

²⁹Iyavei omboyoya ko porombo'esa rese: “Peikwa tuprɨ higuera rekokwer, anise ambuae ɨvɨra avei.

³⁰Akoi pesepiase ɨvɨra sokɨ ramose, peikwa voi etera arɨ saku iteanga yepota agwä.

³¹Egwë e'i tuprɨ aveira, pesepiase mba'e ko nungar, peikwañorä Tüpä mborerekwasa vɨrovɨse ou kuri.”

³²“Supiete opakatu ava kurïtëindar osepia rane itera ko mba'e yuvɨreko omano e'ɨ̇ seve.

³³Ɨva iyavei ɨvɨ opara okañɨ, che ñe'ëngagwer rumo imboavɨyesa rane itera.”

³⁴“Peikwa katu iyavei pepoirene pepɨ'ayemoñetasa avɨye va'e sui mba'e tëi apo agwä, anichira kagwar tëi peiko iyavei pɨ'a ñemoñetasa ko tekokwer rese. A'e arɨ pɨpe katu tovɨapi eme pe arɨve

³⁵inungar mba'e mombɨtasar. Esepia yugwerura opakatu ava arɨ rupi ko ɨvɨ pɨpendar upe narä.

³⁶Sese peyemoigätura, peyerurera arɨ yakatu rupi, pesë va'erä opakatu ko mba'e-mba'e tëi oime va'e sui peyemboyekwa va'erä Tüpä Ra'ɨrɨ rovai.”

³⁷Jesús oporombo'e arɨ pɨpe tüpäro ve, pɨ̇tü pɨpe evokoiyase opɨta ka'a Olivos ve serer va'esave.

³⁸Iyavei opakatu ava yuvɨraso añi'ïvëive tüpäro ve iñe'ë rendu agwä yuvɨreko yepi.