Read Guarayu LUCAS 22 Bible Online

LUCAS 22 - Guarayu bible

LUCAS 22

¹Vɨrovɨse Pascua pieta a'ese i'usa mboyape ndayapepoi va'e yepi.

²Pa'i eta rerekwar iyavei Moisés porokwaita rese oporombo'e va'e, osɨkɨye tëi ava sui, esepia ni'ä oseka tëi marä e'ira Jesús yuka agwä yuvɨreko.

³Evokoiyase Karugwar oike Judas pɨ'a pɨpe, akoi opayandepo yovaive ñuvɨrïo tuprɨ semimbo'e pa'ü pendar Iscariote serer va'e.

⁴A'e oso pa'i eta rerekwar yuvɨrekoi upe tüpäro rärösar yuvɨrekoi va'e upe aveino oñe'ë sese mba'e rupi omondora Jesús.

⁵A'e evokoiyase oyembovɨ'arete omondo va'erä gwarepochi Judas yuvɨreko.

⁶A'e avɨye e'i ipare oseka tëi kokotɨ rupi, ava pore'ɨ̇save Jesús mondo agwä.

⁷Oyepota arɨ pieta resendar a'ese i'usa mboyape ndayapepoi va'e, a'ese avei seropove'ësa ovesa Pascua pɨpe yepi.

⁸Jesús oyokwai Pedro iyavei Juan, aipo e'i chupe: — Peso tapemoigätu yande karu agwä Pascua pieta resendar.

⁹A'e rumo oporandu yuvɨreko chupe: — ¿Kevo ereipota oromoigätura?

¹⁰Jesús omboyevɨ chupe: — Peikese tekwa pɨpe, a'eve pesepiara ñepëi mbɨa vɨreko va'e kambuchi pɨpe ɨ. Pesora sakɨkwei sëtäve supi,

¹¹aipo peyera peñe'ë oɨ yar upe: ‘Porombo'esar oporandu: ¿Uma oɨ pɨpe vo akarura Pascua pieta pɨpe che remimbo'e rese?’

¹²A'e omboyekwara oɨ tuvicha va'e ɨvatendar peü iyavei imoigätusa tuprɨ va'e karusa agwä. A'eve pemoigätura yande karu agwä.

¹³A'e yuvɨraso iyavei oyosɨ opakatu mba'e Jesús remimombe'u rupi tuprɨ ite, a'eve omoigätu karusa Pascua pieta resendar yuvɨreko.

¹⁴Osupitɨse arɨ ipapaprɨ ikaru agwä, a'ese Jesús gwemimbo'e eta reseve yuvɨrogwapɨpa karusa rendave.

¹⁵A'ese Jesús aipo e'i gwemimbo'e upe: — ¡Kweseve tëiete ni'ä aipota akaru va'erä pe rese ko Pascua pieta resendar rese che mano agwä renonde!

¹⁶Amombe'u aipo peü ndayapo iri chietera pieta yavɨyerane itera Tüpä porokwaita imomborerekwasa resendar.

¹⁷Evokoiyase oipɨsɨ ɨgwa rɨru, avɨye ndeu e'i Vu Tüpä upe, aipo e'i: — Peipɨsɨ ko iyavei pemboya'o-ya'o peyakatu;

¹⁸esepia ko pɨpe suive ndaɨ'u iri chira uva rɨkwer, akoi ouse voi ete Tüpä mborerekwasa cheu.

¹⁹Ipare oipɨsɨ mboyape, avɨye ndeu e'i Vu Tüpä upe, ichui ombo'i-mbo'i imondo gwemimbo'e upe, aipo e'i: — Ko che rete, imondoprɨ manosa pɨpe perekokwer rese narä. Peyapo ko pe ma'endu'asa pɨpe che rese yepi.

²⁰Egwë e'i avei karusa pare yapo ɨgwa rɨru rese, aipo e'i: — Ko ɨgwa rɨru pɨpendar omboyekwa che Ru remimbotar ipɨasu va'e peü narä, a'e che ruvɨ ipɨyerepɨrä pe rekokwer rese narä.

²¹Kurïtëi rumo oime mbɨa, karusa rendave yande pɨri, che mondo va'erä che amotare'ɨ̇mbar upe.

²²Supiete imboavɨyesa itera che ava ɨvate katu Ra'ɨrɨ rese ñe'ësa yɨpɨve imombe'uprɨ rese, ¡iparaɨsu katura rumo akoi mbɨa che mondosar!

²³Evokoiyase oporandu-randu tëi oyeupe ava pi'ä omondora e'i tëi yuvɨreko.

²⁴Semimbo'e eta oyeaka gwasu yuvɨreko uma pi'ä ɨvate katura yande pa'ü pendar sekoira yandesui e'i yuvɨreko.

²⁵Jesús aipo e'i: “Ava ndiporeroyai va'e, mborerekwar ɨvate katu va'e oporokwai mba'e-mba'e tëi pɨpe vɨreko ava opovrɨve yuvɨreko, iyavei serekwar yuvɨrekoi va'e upe oso tuprɨ tëi anga'u mba'e avɨye va'e.

²⁶Pe rumo egwë ndapeyei chira. Akoi oyemboɨvate pota va'e toyemochi'ïvä'eño gweko mbegwesa pɨpe, oporokwai va'e ti'añeko katu ambuae ava rese.

²⁷¿Uma pi'ä ɨvate katu va'e, ogwapɨ va'e karusa rendave okaru, anise i'añeko va'e tie? ¿Nda'ei vo evokoi ogwapɨ va'e karusa rendave? Che rumo aiko pe pa'üve inungar i'añeko va'e pe rese.”

²⁸“Pe rumo peiko va'e che rupi opakatu che rekoa'äsa pɨpe yepi.

²⁹Sese, che amondo peü mborerekwasa, inungar che Ru ombou cheu che mborerekwa agwä,

³⁰esepia pekarura iyavei peɨ'ura che mborerekwasave che pɨri, iyavei pegwapɨra gwapɨsa yemboeteisave porandu agwä opayandepo yovaive ñuvɨrïo tuprɨ Israel rekokwer rese.”

³¹Aipo e'i avei yande Yar: — Simón, Simón, esepia Karugwar oporandu pe reko agwä rese inungar trigo ra'ɨira viña;

³²che rumo ayerure nde rese, ipane e'ɨ̇ agwä nde pɨ'a ñemoñetasa. Iyavei nde, ereyevɨse cheu, eipɨtɨ̇vɨï katu nde rɨvrɨ eta imovɨräkwä agwä yuvɨreko oyese.

³³Simón aipo e'i chupe: — Che Yar, che ayemoigätu voi ete nde rupi aso va'erä nde rokendasave, amano pota avei nde rupive.

³⁴Jesús omboyevɨ chupe: — Pedro, supiete amombe'u ndeu, ko pɨpe takura ñe'ë renondeve, nde ndaikwai ete evokoi mbɨa erera mbosapɨ yupagwer rupi cheu.

³⁵Ipare Jesús oporandu: — Opomondose akoi gwarepochi pore'ɨ̇ tembi'u pore'ɨ̇ pɨtaki pore'ɨ̇, ¿ipane vo mba'e a'ese peü? Semimbo'e omboyevɨ yuvɨreko chupe: — Ani ete.

³⁶Evokoiyase aipo e'i: — Kurïtëi rumo, akoi vɨreko va'e gwarepochi, togweruño yuvɨreko, iyavei tembi'u vɨreko va'e; iyavei ndovɨrekoi va'e kɨse puku, tomondo oyeaosa ñepëi kɨse puku repɨrä.

³⁷Supiete amombe'u peü yavɨyerane itera ko che rese Ikwachiaprɨ pɨpe: ‘Iyavei ipapasa ava naporäi va'e pa'üve.’ Opakatu ikwachiaprɨ che resendar, yavɨyerane itera.

³⁸Evokoiyase semimbo'e aipo e'i yuvɨreko: — Ore Yar, ko'ave oime ñuvɨrïo kɨse puku. A'e evokoiyase omboyevɨ: — Avɨye ite revo peñe'ë.

³⁹Ipare Jesús osë oso ɨvɨtrɨ Olivos ve, a'eve oso yepi; iyavei semimbo'e yuvɨraso supi.

⁴⁰Oyepotase a'eve yuvɨraso, aipo e'i: — Peyerure, pe vɨapi e'ɨ̇ agwä mba'e tëi pɨpe.

⁴¹Ipare oyepepɨ gwemimbo'e sui, inungar ita imombosa amombrɨ va'ekwer rupi, a'eve oñenopɨ'ä oyerure agwä.

⁴²Aipo e'i: “Che Ru, ereipotase che renose eve ko mba'e tëi sui; tayapo eme che remimbotar tëi, tayaposa katu nde remimbotar rupi.”

⁴³A'ese oyemboyekwa ñepëi mbigwai ɨva pendar chupe, seko momirätä agwä.

⁴⁴Mba'e-mba'e tëi porarasa pɨpe oyerure katu, a'ese sakuvo inungar tuvɨ osë ichui otɨkɨ ɨvɨve.

⁴⁵Oñarapü'ase oyeruresa sui, oyevɨ oso gwemimbo'e rekosave, osepia iker tëi oso, esepia ikwerai ete ovɨ'are'ɨ̇sa pɨpe yuvɨreko.

⁴⁶Aipo e'i: — ¿Ma'erä vo opaño peke? Peñarapü'a, peyerure katu pe vɨapi e'ɨ̇ agwä mba'e tëi pɨpe.

⁴⁷Jesús ñe'ë vɨteseve, oyepota atɨ ava yuvɨreko. Judas serer va'e, opayandepo yovaive ñuvɨrïo semimbo'e pa'ü pendar tenonde sekoi. A'e oyemboya oso sese sovaupɨte agwä,

⁴⁸evokoiyase aipo e'i Jesús chupe: — Judas, ¿ko tovaupɨtesa pɨpe eremondo Tüpä Ra'ɨrɨ?

⁴⁹Yuvɨrekoi va'e Jesús rupi, osepiase mba'e-mba'e tëi, oporandu aipo e'i yuvɨreko chupe: — Ore Yar, ¿orovavara vo kɨse puku pɨpe?

⁵⁰Ñepëi ipa'ü pendar, pa'i rerekwar ɨvate katu va'e rembigwai nambi oyasɨa yasu kotɨndar.

⁵¹Jesús aipo e'i: — Te'eni; evokoi nungar. Ichui opoko mbigwai nambi rese, ombogwera voi ete.

⁵²Ipare aipo e'i pa'i eta rerekwar upe, tüpäro rärösar upe avei, mborerekwar tekwa pɨpendar upe avei, yugweru va'e seka yuvɨreko: — ¿Ma'erä vo peyu kɨse puku rese iyavei ɨvɨra reseve-seve rutei, inungar imondarai va'e che rereko peye?

⁵³Arɨ yakatu rupi tüpäro pɨpe aiko pe pa'üve, ndapeyapoi ete ko nungar che pɨsɨ agwä. Avɨyeño rumo, oyepota ni'ä peü imombe'uprɨ Karugwar pirätäsa pɨpe mba'e-mba'e tëi apo agwä.

⁵⁴Evokoiyase Jesús oipɨsɨ ovɨraso pa'i eta rerekwar ɨvate katu va'e rëtäve yuvɨreko. Pedro rumo amombrɨ rupive tëi osakɨkwei moñaño oiko.

⁵⁵A'eve ñachimbrɨ pɨpe, oyatapɨ yuvɨreko, oyere tuprɨ tata rese oyepe'e yuvɨnoi; a'eve avei Pedro ipa'üve chini.

⁵⁶A'ese aipo ñepëi kuña mbigwai, osepiase tataɨpɨve ogwapɨse, oma'egätu o'ä sese aipo e'i: — Ko avei ni'ä sekoi supi.

⁵⁷Pedro ndaikwai va'e aipo e'iño chupe: — Kuña, ndaikwai va'e ite aipo mbɨa.

⁵⁸Iparemi tëi koiye katu ambuae osepiase aipo e'i chupe no: — Nde avei akoi ereiko supindar. Pedro omboyevɨ chupe: — Ani mbɨa, nda'ei ete che supindar aiko.

⁵⁹Ipare koiye katumi tëi, ambuae aipo e'i chupe: — Ko avei revo akoi supindar. Iyavei ko Galilea ɨgwar no.

⁶⁰Pedro aipo e'i: — Mbɨa, ndaikwai mba'e rese vo katu aipo peñe'ë. Pedro ñe'ë vɨte seve, ñepëi takura oñe'ë.

⁶¹Evokoiyase yande Yar oyemboyere oma'e Pedro rese, Pedro rumo oyemoma'endu'a yande Yar ñe'ë aipo e'i va'e agwer rese: “Ko pɨpe, takura ñe'ë renondeve, ndaikwai va'e erera mbosapɨ yupagwer rupi cheu.”

⁶²Pedro osë oso ichui oyase'o iteanga.

⁶³Evokoiyase ava Jesús rärösar igwayɨ tëi yuvɨrokwa-rokwa yuvɨreko sese.

⁶⁴Osesakwa, ipare oporandu yuvɨreko chupe: — ¡Eikwa ite ru ava evokoi okwa nde rese!

⁶⁵Iyavei seta mba'e rese oñe'ë-ñe'ë tëi yuvɨreko chupe.

⁶⁶Ko'ë ramöseve aipo, oñemonu'ä ava judío rerekwar, pa'i eta rerekwar iyavei Moisés porokwaita rese oporombo'e va'e, vɨraso Jesús Ñemonu'äsa Ɨvate katu va'e rovai. A'eve oporandu mba'e rese yuvɨreko chupe:

⁶⁷— Emombe'u oreu, ¿supiete vo nde Poropɨsɨrösar ereiko? A'e omboyevɨ chupe: — Amombe'use rumo peü, ndache reroyai chietera peye.

⁶⁸Inungar che aporanduse mba'e rese peü, pe avei ndapemboyevɨi chietera cheu.

⁶⁹Ko pɨpe suive ite rumo, ava ɨvate katu va'e Ra'ɨrɨ, ogwapɨra Tüpä mba'e mboavaisare'ɨ̇ akato kotɨ.

⁷⁰Ichui opakatu tuprɨ ava oporandu yuvɨreko chupe: — ¿Evokoiyase, nde ite vo ereiko Tüpä Ra'ɨrɨ? Jesús omboyevɨ chupe: — Pe ñi'ä aipo a'e sekoi peye cheu.

⁷¹Evokoiyase a'e aipo e'i yuvɨreko: — ¿Ava iri vo evokoiyase mba'e omombe'ura yandeu? Yande teiete ni'ä yasendu iñe'ë yaiko.