Read Guarayu LUCAS 23 Bible Online

LUCAS 23 - Guarayu bible

LUCAS 23

¹Opakatu ava opü'a yuvɨreko, Jesús reraso agwä Pilato rovai.

²Sovai evokoiyase oiñe'ëngapo tuprɨ tëi, aipo e'i yuvɨreko: — Orosepia ko mbɨa oipɨ'a ñemoñeta rerova atɨ uka ava yande rekwa rupindar. Aipo e'i pemondoi rene gwarepochi mborerekwar ɨvate katu va'e upe, iyavei supiete aipo e'i che Poropɨsɨrösar, mborerekwar ɨvate katu va'e aiko.

³Pilato oporandu chupe: — ¿Nde ite vo judío rerekwar ɨvate katu va'e ereiko? — Nde ni'ä aipo, a'e ereiko ere cheu — e'i Jesús imboyevɨ chupe.

⁴Evokoiyase Pilato aipo e'i pa'i eta rerekwar upe opakatu ava upe avei: — Che rumo namo'äi ete ko mbɨa mba'e oyapo va'erä.

⁵A'e ava eta rumo oporandu katu-katu ñoite yuvɨreko: — Oporombo'esa pɨpe ava oipɨ'a ñemoñeta mboyeavɨratɨ uka opakatu tekwa rupindar. Omboɨpɨ Galilea rupi oiko, iyavei kurïtëi oyapo, ko Judea pɨpe.

⁶Pilato osenduse aipo ñe'ësa, oporandu supiete pi'ä ko mbɨa Galilea ɨgwar e'i.

⁷Oikwase aipo Jesús Herodes rekwa pendarse yuvɨreko, sese omboyevɨ imondo chupe, esepia a'e arɨ pɨpeve avei sekoi Jerusalén ve.

⁸Herodes sorɨvete Jesús repiase, esepia seta yupagwer osepia pota tëi sereko yepi, osendu avei aipo ñe'ësa sesendar iyavei oipota ite poromondɨisa oyapo va'erä sovake viña.

⁹Evokoiyase oporandu-randu tëi mba'e rese chupe, Jesús rumo nomboyevɨi ete iñe'ë.

¹⁰A'eve avei yuvɨrekoi pa'i eta rerekwar iyavei Moisés porokwaita rese oporombo'e va'e, seroɨrösave oñemoñeta-ñeta tëi sese yuvɨreko.

¹¹Evokoiyase Herodes isundao eta iñe'ë marä-marä tëi, iyavei ogwayɨ tëisa pɨpe yuvɨreko sese omboyemonde avei turukwar iporañete va'e pɨpe yuvɨreko, inungar mborerekwar ɨvate katu va'e. Egwë e'i imboyevɨ Herodes Pilato upe.

¹²A'e arɨ pɨpe suive oyemborɨ Pilato Herodes rese, yɨpɨndar rumo oyeamotare'ɨ̇ yuvɨreko viña.

¹³Pilato opa uka omonu'ä pa'i eta rerekwar, mborerekwareta tekwa pɨpendar avei,

¹⁴ipare aipo e'i chupe: — Pe ni'ä peru ko mbɨa ko'ave cheu, omañeko tëi ava sekwa rupi peye; che rumo aporandu tëi pe rovake mba'e rese chupe ndipoi ete rumo mba'e sembiapo naporäi va'e pe remimombe'u rupi.

¹⁵Herodes avei ndoyosɨi mba'e sembiapo naporäi va'e, sese omboyevɨño yuvɨreko oreu. Pesepia ndipoi ete mba'e sembiapo imondosa va'erä manosa pɨpe.

¹⁶Ainupa ukara rumo ipare amoseñorä imondo.

¹⁷Pascua pieta pɨpe iya ite Pilato ava upe ñepëi sokendaprɨ mose agwä.

¹⁸Opakatu rumo ava säse pirätäño aipo e'i yuvɨreko: — ¡Evokoi topɨta! ¡Barrabás emoseño oreu!

¹⁹Ko mbɨa Barrabás osokenda yuvɨreko tekwa pɨpe mba'e tëi mopü'asa sui, iporapichisa sui avei.

²⁰Pilato rumo, omose pota Jesús viña, sese oporandu iri ava upe;

²¹a'e rumo säse pirätä katu ñoite aipo e'i yuvɨreko: — ¡Tayatɨkasa! ¡Tayatɨkasa!

²²Imombosapɨsa rese Pilato aipo e'i iri: — ¿Mba'e ite vo oyapo naporäi va'e? Ndipoi ete ni'ä mba'e sembiapo yuka agwä. Ainupa uka tëira rumo, ipare amoseñora imondo.

²³Ava re'ɨi rumo säse pirätä, oporandu yuvɨreko tayatɨkasa ite oyapave; iyavei seta säse mba'e gwemimbotar rese tëi yuvɨreko.

²⁴Pilato evokoiyase oyapo ñoite ava remimbotar;

²⁵egwë e'i imose ko mbɨa iporavoprɨ, akoi sokendaprɨ mba'e-mba'e tëi mopü'asa sui iporapichisa sui avei, ava remimbotar rupi, ipare omondo Jesús särösar upe mba'e gwemimbotar oyapo va'erä yuvɨreko sese.

²⁶Ovɨrasose Jesús yatɨka agwä yuvɨreko, oipɨtɨ̇vɨï ñepëi mbɨa Simón serer va'e Cirene ɨgwar, a'e ou va'e kove rupi sui, osupi uka kurusu yuvɨreko chupe Jesús rakɨkwei.

²⁷Ava re'ɨi kuña re'ɨi avei oyase'o ovɨ'are'ɨ̇save säse tëi yuvɨreko sese, yuvɨraso ñoite rumo sakɨkwei.

²⁸A'ese Jesús oma'e sese aipo e'i chupe: — Kuña Jerusalén ɨgwar, peyase'oi rene che rese, peyese ae peyase'o pe membrɨ rese avei.

²⁹Esepia oura arɨ naporäi va'e, a'ese aipo peye tëira: ‘Avɨye katu ndovɨrekoi va'e omembrɨ, akoi kuña nimembɨrai va'e ndovɨrekoi va'e omembrɨ imboakwa pɨrä.’

³⁰A'ese avei ava aipo e'ira ka'a upe yuvɨreko: ‘¡Evɨapi ore arɨve!’, ɨvɨtrɨ upe avei: ¡Oreñomipa tuprɨ eve e'ira yuvɨreko!

³¹Esepia ko ɨvɨra ɨvɨve rese yaposase opakatu mba'e, ¿mba'e vo katu oyapora ɨvɨra ipiru va'e rese?

³²Iyavei vɨraso ñuvɨrïo oporapichi va'e yuvɨreko yatɨkapɨrä oyoya Jesús rese.

³³Oyepotase Ava akä kangwer serer va'esave, a'eve oyatɨka Jesús kurusu rese yuvɨreko iyavei ñuvɨrïo mbɨa oporapichi va'e, ñepëi mba'e rese ipokosa kotɨ ambuae evokoiyase mba'e rese ipokoe'ɨ̇sa kotɨ.

³⁴Jesús aipo e'i: “Che Ru, ndeñerö ko opakatu ava upe, esepia ndoikwai mba'e gwembiapo yuvɨreko.” Sundao eta rumo igwayɨño Jesús turukwar rese oyeupe imboya'o-ya'o agwä yuvɨreko.

³⁵Ava a'eve yuvɨrekoi va'e osepia katu; iyavei mborerekwareta seroɨrösave, aipo e'i yuvɨreko: — Oipɨsɨrö ambuae ava, toñepɨsɨrö ru a'e ae, supiete pi'ä Tüpä rembiporavo Poropɨsɨrösar sekoi.

³⁶Sundao eta avei vɨroɨrö Jesús. Oyemboya avei sese omondo va'erä itoɨ'u uva rɨkwer sai va'e yuvɨreko,

³⁷aipo e'i yuvɨreko chupe: — ¡Nde ereikose ava judío eta Rerekwar ɨvate katu va'e, eñepɨsɨrö ru nde ae ite!

³⁸Oime ikwachiaprɨ ñakä arɨve, aipo e'i öi: “Ko judío Rerekwar ɨvate katu va'e.”

³⁹Ñepëi oporapichi va'e ñapɨ̇chimbrɨ kurusu rese, iñe'ë marä-marä tëi chupe: — ¡Nde Poropɨsɨrösar ereikose, eñepɨsɨrö ru nde ae, ore avei ru ore pɨsɨrö eve!

⁴⁰Ambuae evokoiyase oñe'ëgäta voi ondugwer uve, aipo e'i: — ¿Nderesɨkɨyeimi rutei vo Tüpä sui, nde avei ni'ä ereiko mba'e-mba'e tëi pɨpe?

⁴¹Yande rumo ko yande rembiapo sui tëi marä-marä tëi yande rereko yuvɨreko, esepia ni'ä yande yambo'epɨ ko mba'e yayapo va'e; ko mbɨa rumo ndoyapoi ete mba'e naporäi va'e oiko.

⁴²Ipare aipo e'i iri: — Jesús, nde ma'endu'ami tëi che rese akoi eremboɨpɨse nde mborerekwasa.

⁴³Jesús omboyevɨ chupe: — Supiete ko pɨpe ereikora tekwa apɨre'ɨ̇ va'esave che rupi.

⁴⁴Osupitɨse rumo mbɨter arɨ, iyavei ka'aruopakatu ite ɨvɨ rupi pɨ̇tü.

⁴⁵Arɨ avei ogwe tuprɨ, a'e pɨpeve avei turukwar tüpäro asɨasa mbɨter rupi tuprɨ ovo.

⁴⁶Jesús säse pirätä aipo e'i: — ¡Che Ru, amondo che espíritu ndeu! Aipo o'e pare voi omano.

⁴⁷Evokoiyase Roma ɨgwar sundao rerekwar osepiase ko mba'e poromondɨisa, Tüpä mboeteisa pɨpe, aipo e'i: — Supiete ko mbɨa ndaseko maräi va'e.

⁴⁸Iyavei opakatu ava supindar yuvɨrekoi va'e osepiase ko nungar mba'e, oyepochi'a nupa-nupa tëi oyepɨ'amondɨisa pɨpe yuvɨreko.

⁴⁹Opakatu oikwa va'e Jesús yuvɨreko amombrɨ rupive tëi yuvɨno'äi ichui; kuña yugweru va'e Galilea sui osepiaño tëi avei yuvɨreko.

⁵⁰Oime mbɨa avɨye eteprɨ va'e a'e serer José, tekwa Arimatea pendar, a'e tekwa ɨvɨ Judea pɨpendar. Judío rerekwar ñemonu'äsa ɨvate katu va'e pendar sekoi. A'e José, vɨroya va'e ite Tüpä ombou va'erä omborerekwasa pɨpe mba'e moigätu agwä, sese nda'ei ipɨ'a ñemoñeta rupi ko mborerekwar oyapo va'e mba'e yuvɨreko,

⁵¹

⁵²evokoiyase oso Pilato upe oporandu agwä Jesús re'ögwer rese.

⁵³Kurusu sui seroyɨ pare voi, oimama turukwar sekose va'e pɨpe, ipare omondo tuvɨpa ita gwasu yo'oprɨ pɨpe, ndiporusa vɨtei va'esave.

⁵⁴Esepia a'e arɨ pɨpe yemoigätusa mbɨtu'usa arɨ upe narä, osupitɨ pota ite rumo omboɨpɨ agwä.

⁵⁵Kuña yugweru va'e Jesús rupi Galilea sui, yuvɨrasoño ite suvɨpave, osepia se'ögwer apokatuse yuvɨreko.

⁵⁶Oyevɨse gwëtäve yuvɨreko, omoigätu mba'e sɨäkwä va'e te'ögwer resendar ipichi agwä. A'ese kuña opɨtu'u arɨ mbɨtu'usa pɨpe yuvɨreko mborokwaita rupi tuprɨ ite.