Read Guarayu LUCAS 24 Bible Online

LUCAS 24 - Guarayu bible

LUCAS 24

¹Domingo pɨpe ko'ëramomiseve yuvɨraso Jesús ruvɨpave mba'e gwembiapo sɨäkwä va'e reseve yuvɨreko.

²Oyepotase yuvɨreko tuvɨpave, osepia sokendasa ita gwasu ndipo irise gwendagwerve;

³yuvɨroike voi tuvɨpa pɨpe, ndoyosɨi rumo yande Yar Jesús re'ögwer yuvɨreko.

⁴Ndoikatui ete marä e'ira sepiase, avɨyeteramo tëi osepia ñuvɨrïo mbɨa, iturukwar sendɨyai va'e oɨpɨve yuvɨreko.

⁵Opaño ñakä ɨvɨso, ɨvɨ kotɨ yuvɨreko osɨkɨyepave; a'e ava aipo e'i yuvɨreko chupe: — ¿Ma'erä peseka tuvɨpa pa'ü rupi ava oikove va'e?

⁶Ndipoi ko'ave, a'e rumo okwerayevɨ. Peyemoma'endu'a iñe'ëngagwer ɨvɨ Galilea rupi omombe'u va'ekwer rese aipo e'i va'e:

⁷ko ava ɨvate katu va'e Ra'ɨrɨ, imondoprɨra sekoi ava angaipa viyar povrɨve, oyatɨkara yuvɨreko ipare mbosapɨ arɨ pare rumo okwerayevɨra.

⁸Evokoiyase kuña oyemoma'endu'a voi Jesús ñe'ëngagwer rese,

⁹oyevɨse tuvɨpa sui yuvɨreko omombe'u opakatu ko opayandepo yovaive ñepëi Jesús ñe'ë mombe'usar yuvɨrekoi va'e upe opakatu ambuae upe avei.

¹⁰Vɨraso va'e akoi ñe'ësa yuvɨreko Jesús ñe'ë mombe'usar eta upe, a'e María Magdalena, Juana, Santiago sɨ María, iyavei ambuae kuña eta no.

¹¹Jesús ñe'ë mombe'usar oyeupe mombe'use avɨye aipo e'i tëi va'e, iyavei ndovɨroyai ñoite yuvɨreko no.

¹²Pedro rumo oña voi oso tuvɨpave; oma'ese rumo ipɨpe, turukwar gweraño tëi osepia. Evokoiyase oyevɨ gwëtäve ndoyembovɨ'ai tëi sepia pare.

¹³A'e arɨ pɨpeve ka'aruse, ñuvɨrïo semimbo'e yuvɨraso tekwa Emaús ve, a'e opayandepo yovaive ñepëi kilómetros i'amombrɨgwer tekwa Jerusalén sui.

¹⁴A'e oñemoñeta yuvɨraso opakatu ko mba'e oime va'ekwer rese.

¹⁵Iñemoñeta vɨteseve, Jesús teiete oyemboya sese, ichui ogwata oso supi.

¹⁶Yepe osepia tëi, a'e rumo ndoyekwa ukai ete.

¹⁷Jesús oporandu chupe: — ¿Mba'e rese vo peñe'ë eteprɨ pe gwatasa rupi peiko? Aipo ese, ndovɨ'ai opɨta yuvɨno'ä,

¹⁸ipa'ü pendar, Cleofas serer va'e omboyevɨ chupe: — ¿Nde gweraño ite ereiko erepɨtu'u va'e Jerusalén ve ndereikwai ete vo mba'e oime va'e a'eve ko arɨ pɨpe?

¹⁹A'e evokoiyase oporandu: — ¿Mba'e vo oime ko'ave? Aipo e'i yuvɨreko chupe: — Jesús Nazaret pendar, a'e Tüpä ñe'ë mombe'usar seko pirätä va'e opakatu mba'e apo agwä mba'e mombe'u agwä avei Tüpä rovake iyavei opakatu tekwa rupindar rovake;

²⁰omondo pa'i rerekwar iyavei yande rerekwareta yamotare'ɨ̇save yuka uka agwä kurusu rese yuvɨreko.

²¹Ore rumo oroyeroya ite sese a'e oipɨsɨröra tekwa gwasu Israel oro'e chupe viña. Kurïtëi rumo opa mbosapɨ arɨ yukare.

²²Kuña yuvɨrekoi va'e ore pa'ü ve ndorembovɨ'ai ete yuvɨreko, yuvɨraso añi'ïvëive tuvɨpave,

²³ichui rumo ndoyosɨi ete se'ögwer yuvɨreko, oyevɨpa tëi gwëtäve, a'ese aipo osepia mbigwai ɨva pendar aipo e'i va'e yuvɨreko chupe Jesús mo oikove kurïtëi.

²⁴Iyavei ambuae ore ndugwer yuvɨrasose tuvɨpave inungar kuña remimombe'u rupi tuprɨ avei, ndosepiai ete rumo Jesús yuvɨreko.

²⁵Evokoiyase Jesús aipo e'i chupe: — ¡Ndapeikwai ete rumo pe pɨ'a pɨpe seroya tuprɨ agwä opakatu Tüpä ñe'ë mombe'usar remimombe'ugwer!

²⁶¿Ndapeikwai vo Poropɨsɨrösar iparaɨsu rane itera mba'e-mba'e tëi vɨrekosa pɨpe gweike agwä renondeve teko porañetesave?

²⁷Ipare opa omombe'u opakatu tuprɨ ite Ikwachiaprɨ oyese ñe'ësa resendar, omboɨpɨ Moisés kwachiar rese opakatu Tüpä ñe'ë mombe'usar kwachiar pɨpendar avei.

²⁸Oyepotase a'e tekwave yuvɨraso, Jesús rumo avɨye ogwataño vɨte va'erä oso senonde.

²⁹A'e rumo omombɨta potaño oyepɨri yuvɨreko, aipo e'i: — Epɨtaño ore pɨri, esepia ka'aru eteprɨ kurïtëi. Pɨ̇türa moko ndeu. Evokoiyase Jesús oike oɨpɨpe, opɨta va'erä ipɨri yuvɨreko.

³⁰Ogwapɨse yuvɨnoi karusa rendave, oipɨsɨ mboyape, avɨye ndeu e'i Tüpä upe, ipare rumo ombo'i-mbo'i imondo nuvɨrïo upe.

³¹A'ese ramo ite semimbo'e oma'ekwa Jesús rese yuvɨreko; a'e rumo okañɨ tuprɨño voi ete.

³²Evokoiyase aipo e'i oyeupe yuvɨreko: — ¿Yande mbopɨ'añemoñeta pirätä ite akoi perɨ rupi oñe'ëse yandeu ko tekokwer Ikwachiaprɨ rese?

³³Ipare ndopɨta puku iri, oyevɨño voi yuvɨraso tekwa Jerusalén ve, a'eve osepia Jesús ñe'ë mombe'usar opayandepo yovaive ñepëi tuprɨ va'e iyavei omboetasa eta,

³⁴aipo e'i yuvɨreko chupe: — Supiete rumo yande Yar okwerayevɨ, esepia oyemboyekwa ite Simón upe.

³⁵Evokoi ñuvɨrïo yuvɨrekoi va'e omombe'u osepia va'e perɨ rupi, a'e evokoiyase mboyape mbo'i-mbo'ise voi ete oikwa Jesús yuvɨreko.

³⁶A'e oñe'ë vɨteseve yuvɨreko ko tekokwer rese, a'ese Jesús oyemboyekwa ipa'üve aipo e'i avɨrave apo: — Avɨrave mba'e tuprɨ pɨpe tapeiko.

³⁷A'e rumo oyembosɨkɨye katu yuvɨreko, ägwer revo oyapave viña.

³⁸Jesús rumo aipo e'i: — ¿Ma'erä pesɨkɨye? ¿Ma'erä pereko vɨte pe poreroya e'ɨ̇sa pe pɨ'a pɨpe?

³⁹Pema'e chepo rese iyavei che pɨ rese. Che ite ni'ä ko aiko. Pepoko ru che rese tache reroya ru peye: esepia ava ä ndovɨrekoi vo'o iyavei okangwer; inungar che areko.

⁴⁰Aipo o'e vɨteseve, omboyekwapa opo opɨ avei chupe.

⁴¹A'e rumo ndovɨroya vɨtei ñoite yuvɨreko, ovɨ'asa pɨpe rumo oyepɨ'ambosɨkɨyepa, a'ese Jesús oporandu chupe: — ¿Perekomi vo ko'ave mba'e yande karu agwä?

⁴²Evokoiyase omondo pira apɨrer oyɨ va'e yuvɨreko chupe,

⁴³ipare a'e oipɨsɨ o'u opakatu gwemimbo'e rovake.

⁴⁴Ipare aipo e'i: — Ko rese akoi añe'ë vichiko kwese pe rese aiko vɨtese: yavɨye ranera opakatu ñe'ësa che resendar Moisés porokwaita kwachiaprɨ pɨpe, iyavei Tüpä ñe'ë mombe'usar yuvɨrekoi va'e rembikwachiagwer sapukaisa pɨpe avei.

⁴⁵Evokoiyase osendukwa uka Ikwachiaprɨ pɨpendar gwemimbo'e upe,

⁴⁶iyavei aipo e'i: — Ikwachiaprɨ pɨpe Poropɨsɨrösar omano itera kuri, mbosapɨ arɨ pare rumo okwerayevɨra,

⁴⁷iyavei serer pɨpe opakatu ɨvɨ yakatu rupi imombe'usara ava yevɨ agwä Tüpä upe, iñeröi agwä avei peangaipagwer rese peü. Omboɨpɨra rumo Jerusalén sui tuprɨ,

⁴⁸pe ni'ä peiko opakatu ko nungar mba'e repiasar imombe'u agwä.

⁴⁹Che amboura che Ru remimombe'u pe arɨve. Pe pɨtañora ko'ave, ko tekwa pɨpe Jerusalén ve, akoi peipɨsɨ rane itera pirätäsa ou va'e ɨva suindar.

⁵⁰Evokoiyase Jesús vɨnosepa tekwa sui seraso tekwami Betania popɨve, a'eve opo omopü'a, osovasa mba'e tuprɨ reime agwä.

⁵¹Oporovasa vɨte seve, oyepepɨ gwemimbo'e sui a'e ramoseve serasosa ɨvave.

⁵²Semimbo'e evokoiyase, osapukai pare, oyevɨ Jerusalén ve vorɨvetesa pɨpe yuvɨreko.

⁵³Iyavei yuvɨrekoi ñoite tüpäro pɨpe, osapukai Tüpä mboeteisave yuvɨreko yepi.