Read Guarayu LUCAS 4 Bible Online

LUCAS 4 - Guarayu bible

LUCAS 4

¹Jesús Espíritu Maräne'ɨ̇ rese ite sekoi, oyevɨ ou ɨai Jordán sui, ipare Espíritu vɨraso ɨvɨ iporupɨre'ɨ̇sa rupi.

²A'eve sekoi cuarenta arɨ, ipare karugwar osekoa'ä sereko. Ndokarui avei a'e arɨ rupi oiko, ipare rumo oyandu ite vɨepore'ɨ̇.

³Karugwar evokoiyase aipo e'i chupe: — Supiete Tüpä ra'ɨrɨ ite nde rekose, ko ita sui eyapo mboyape kurïtëi.

⁴Jesús omboyevɨ chupe: — Ikwachiaprɨ pɨpe aipo e'i: ‘Nda'ei chira mboyape suiño ava yuvɨrekovera.’

⁵Ichui karugwar vɨraso omboyekwa va'erä opakatu tekwa ɨvɨ pɨpendar chupe,

⁶aipo e'i: — Che amondora che pirätäsa ndeu, iyavei opakatu mba'e ko ɨvɨ pɨpendar porañete va'e. Esepia ni'ä ko opakatu cheu imbouprɨ, iya ite amondo va'erä ava upe che remimbotar rupi.

⁷Ereñenopɨ'äse che mboeteisave eve, a'ese opakatu ko mba'e ereipɨsɨra nde ma'erä.

⁸Jesús omboyevɨ chupe: — Ikwachiaprɨ pɨpe aipo e'i: ‘Emboetei nde Yar Tüpä, iyavei a'e gweraño tuprɨ eremboyeroyara.’

⁹Ipare karugwar vɨraso oyeupi tekwa gwasu Jerusalén ve, a'eve ovɨroyeupi tüpäro apɨterve aipo e'i chupe: — Supiete Tüpä Ra'ɨrɨ nde rekose, evɨapi ko'ave sui eso;

¹⁰esepia Ikwachiaprɨ pɨpe aipo e'i: ‘Tüpä oyokwaira gwembigwai eta nde rärö agwä.

¹¹A'e nde mopu'ärä yuvɨreko, ñepëi ita nde momarä rägwer sui e'i karugwar chupe.’

¹²Jesús omboyevɨ chupe: — Aipo e'i avei Ikwachiaprɨ pɨpe: ‘Nderesekoa'äi chira nde Yar Tüpä.’

¹³A'ese karugwar ndoikatu iri ete Jesús rekoa'äsa agwä, ipare oyepepɨño raimi tëi oso ichui.

¹⁴Jesús oyevɨ Galilea ve oso Espíritu Maräne'ɨ̇ pirätäsa pɨpe, iyavei oyandu opakatu tekwa-tekwami rupi seräkwä yuvɨreko.

¹⁵Oporombo'e oɨ judío ñemonu'äsa rupi oiko, a'ese opakatu ava omboetei sereko yuvɨreko.

¹⁶Jesús oyevɨ Nazaret ve, okwakwa agwerve. A'eve mbɨtu'usa arɨ pɨpe oike oɨ judío ñemonu'äsa pɨpe inungar oyapo va'e yepi, ipare opü'a oyerokɨ Ikwachiaprɨ maräne'ɨ̇ pɨpe o'ä.

¹⁷Evokoiyase omondo Tüpä ñe'ë mombe'usar Isaías rembikwachia yuvɨreko chupe oipɨpirase kwachiar, osepia ikwachiaprɨ aipo e'i va'e:

¹⁸“Yande Yar Espíritu sekoi che rese, esepia ni'ä a'e ombou chekwaitarä ko ñe'ësa avɨye va'e mombe'u agwä ava iparaɨsu va'e upe; chekwaita avei amombe'u va'erä ava sokendaprɨ renose agwä iyavei ava ndasesapɨsoi va'e ambosarekora; iyavei ava mba'e-mba'e tëi rasɨkwer oiporara va'e sui senose agwä;

¹⁹iyavei amombe'u va'erä yande Yar suindar aravɨter pɨpe mba'e avɨye va'e peü.”

²⁰Ipare Jesús omboya kwachiar imondo oɨ judío ñemonu'äsa ñangarekwar pɨtɨ̇vɨïsar upe ipare ogwapɨ öi. Opakatu yuvɨnoi va'e a'eve oma'egätu yuvɨreko sese.

²¹A'e omboɨpɨ oñe'ë aipo e'i: — Kurïtëi yavɨye ite ko Ikwachiaprɨ pɨpendar pesendu va'e.

²²Opakatu ava oñe'ë tuprɨño ite Jesús rese iyavei ndoyembovɨ'ai tëi iñe'ë tuprɨai renduse. Oporandu-randu yuvɨreko oyeupe: — ¿Nda'ei vo akoi ko José ra'ɨrɨ tëi?

²³Jesús rumo omboyevɨ aipo e'i chupe: — Avɨyeteramo pe aipo peyera cheu: ‘Oporoposano va'e, eñeposano nde ae eiko.’ Iyavei aipo peyera cheu no: ‘Akoi orosendu va'e nde rembiapokwer Cafarnaún ve, egwë ere avei eyapo ko'ave nde rekwa pɨpe.’

²⁴Ipare omombe'u vɨteño ite: Supiete ndipoi chietera ñepëi yepe Tüpä ñe'ë mombe'usar oipɨsɨ tuprɨ va'e gwekwa pɨpe yuvɨreko yepi.

²⁵Supiete, seta kuña imer mano va'ekwer yuvɨrekoi va'e tekwa Israel ve Tüpä ñe'ë mombe'usar Elías rekose, a'ese ndokɨi ete mbosapɨ aravɨter yemombɨtesa rupi, iyavei oime tɨavor opakatu ɨvɨ rupi araka'e;

²⁶a'e Elías nda'ei ete imondoprɨ kuña imer mano va'ekwer tekwa Israel pendar upe ipɨtɨ̇vɨï agwä, a'e omondo ñepëi kuña Sarepta pendar upe, esepia ni'ä namombrɨi tekwa Sidón sui.

²⁷Iyavei seta ava oime Israel rekwa pɨpendar imba'easɨ va'e mba'erasɨ vai rerekosar yuvɨreko a'e Tüpä ñe'ë mombe'usar Eliseo rekose, ndipoi ete ñepëi okwera va'e, Naamán gweraño ite okwera tekwa Siria pendar.

²⁸Osenduse ko ñe'ësa, opakatu ava oɨ judío ñemonu'äsa pendar oñemoɨrö iteanga yuvɨreko.

²⁹Sese opa voi ete opü'a Jesús renose agwä tekwa sui yuvɨreko, ichui vɨraso ɨvɨtrɨ ka'a ɨvate va'e rese a'e sese tekwa yaposa, ichui oitɨ pota yuvɨreko viña.

³⁰Jesús rumo ipa'ü sui osë tuprɨño oso.

³¹Jesús oso Cafarnaúm ve, tekwa Galilea rupindar, iyavei a'eve ombo'e ava oiko mbɨtu'usa arɨ pɨpe.

³²Ipare opakatu ava ndoyembovɨ'ai tëi iporombo'esa renduse yuvɨreko, esepia ni'ä a'e oñe'ë gweko pirätäsa pɨpe.

³³A'e oɨ judío ñemonu'äsave oime ñepëi mbɨa vɨreko va'e karugwar oyese anise espíritu naporäi va'e, a'ese oñe'ë pirätä aipo e'i:

³⁴— ¡Ema'e ñotëi ore rese! ¿Ma'erä vo ereyu ko'ave oreu, nde Jesús Nazaret pendar? ¿Nde ereyu ore mokañɨ agwä tëi? Che orokwa va'e ite, iyavei nde ni'ä seko Maräne'ɨ̇ va'e ereiko Tüpä suindar.

³⁵Jesús evokoiyase oñe'ëgäta karugwar upe aipo e'i: — ¡Kiriri, epoi ko mbɨa sui! A'ese karugwar ombovɨapi a'e mbɨa opakatu ava rovai imondo ɨvɨve, ipare osë okwa ichui nomomaräi ete rumo.

³⁶Opakatu ava oyembosɨkɨye, iyavei oporandu-randu tëi mba'e rese oyeupe yuvɨreko: — ¿Marä e'i vo aipo ko oñe'ë oiko? Opakatu opirätäsa pɨpe ko mbɨa oyokwai karugwar ava sui imose agwä, ¡ipare yuvɨnosepa yuvɨraso!

³⁷Iyavei ñe'ësa Jesús rese opakatu ɨvɨ tekwa-tekwami rupi.

³⁸Jesús osë oɨ judío ñemonu'äsa pɨpe sui oso ipare oike Simón rëtäve. Simón rovayar imba'easɨ so'ɨ iteanga ou, ipare oñe'ë Jesús upe yuvɨreko tombogwerami tëi oyapave.

³⁹Jesús oyeaɨvɨ oso chupe so'ɨ sui imbogwera agwä, ipare opa so'ɨ ichui. A'e ramoseve, a'e kuña oñarapü'a ichui omboɨpɨ o'añeko yuvɨrekoi va'e rese.

⁴⁰Arɨso ramomise, opakatu ava mba'erasɨsa vɨreko va'e ambuae a'e ae tëi gweru Jesús upe yuvɨreko; a'e evokoiyase omondo opo i'arɨve ñepëi-pëi yakatu imbogwera agwä.

⁴¹Imba'easɨ va'e sui seta yuvɨnosë karugwar, säse tëi aipo e'i yuvɨreko: — ¡Nde Tüpä Ra'ɨrɨ ite ereiko! Jesús rumo oñe'ëgäta karugwar upe iyavei ndoipota iri iñe'ë agwä, esepia a'e oikwa ite Poropɨsɨrösar sekoise yuvɨreko.

⁴²Ko'ë potase, Jesús osë tekwa pɨpe sui oso, ɨvɨ iporupɨre'ɨ̇sa rupi. Ava rumo osekaño ite yuvɨreko, osupitɨño avei sekosave yuvɨraso. Oipota a'e oyesui ichoe'ɨ̇ agwä ite yuvɨreko viña,

⁴³Jesús aipo e'i ava re'ɨi upe: — Iyavei amombe'u ranera ñe'ësa avɨye va'e Tüpä mborerekwasa resendar opakatu ambuae tekwa rupi, esepia a'egwä ni'ä che imbouprɨ aiko.

⁴⁴Egwë e'i Jesús omombe'u ñe'ësa avɨye va'e oɨ judío ñemonu'äsave oiko judío ɨvɨ rupi.