Read Guarayu LUCAS 5 Bible Online

LUCAS 5 - Guarayu bible

LUCAS 5

¹Ñepëi arɨ, Jesús sekoi ɨpa Genesaret popɨ rupi, a'eve ava re'ɨi oyembotɨ tuprɨ sese, a'e osendu pota ite Tüpä ñe'ëngagwer yuvɨreko.

²Jesús osepia ñuvɨrïo ɨarusu ɨmbe'ɨ popɨve. Ichui ava pira mbo'asar opa yuvɨnosë evokoi ɨarusu pɨpe sui ipare opira mbo'asa oyosei yuvɨreko.

³Jesús o'a ñepëi ɨarusu Simón vɨreko va'e pɨpe, aipo e'i chupe embosɨrɨ katumi tëi chi'ï ɨmbe'ɨ popɨ sui. Ipare ogwapɨ öi ɨarusu pɨpe, ichuive tuprɨ omboɨpɨ ava mbo'e öi.

⁴Opase oñe'ë, aipo e'i Simón upe: — Eraso ɨpa tɨpɨ katu va'esave ɨarusu, a'eve pemombo pe pira mbo'asa, pira mbo'a agwä.

⁵Simón omboyevɨ aipo e'i chupe: — Porombo'esar, orosa'ä tëi ni'ä pɨ̇tü momba pira mbo'a oroiko ndorombo'ai ete rumo, nde porokwaita rupi, amondo irira pira mbo'asa ɨpɨve.

⁶Koiye omondo irise rumo, ombo'a iteanga pira yuvɨreko iposɨigwer omondoro-ndoro ñoite imbo'asa chupe.

⁷Evokoiyase oyepoeru omboetasa ambuae ɨarusu pɨpe yuvɨrekoi va'e upe, yuvɨraso va'erä ipɨtɨ̇vɨï. A'e yuvɨraso chupe, ipare opa ñuvɨrïo ɨarusu omboapɨpo tuprɨ yuvɨreko seni iri rumo omondo ɨpɨve.

⁸Ko mba'e repiase, Simón Pedro oñenopɨ'ä Jesús rovai oso aipo e'i chupe: — ¡Eyepepɨ che sui che Yar, esepia che angaipa viyar tëi aiko!

⁹Esepia Simón iyavei opakatu ava yuvɨrekoi va'e supi osɨkɨye iteanga ko pira re'ɨi repiase yuvɨreko.

¹⁰A'eve Santiago iyavei Juan, Zebedeo ra'ɨrɨ, yuvɨrekoi Simón mboetasa. A'ese Jesús aipo e'i Simón upe: — Eresɨkɨyei rene; ko pɨpe suive tuprɨ ereikora ava reka agwä cheu narä.

¹¹Evokoiyase opa vɨnose ɨarusu sui ɨvɨ ätäsave yuvɨreko, oseyapaño opakatu mba'e ichui yuvɨraso Jesús rupi.

¹²Ñepëi arɨ, Jesús sekoise tekwa pɨpe, oyepota ñepëi mbɨa mba'erasɨ vai ndokwerai va'e rerekosar; Jesús repiase oñenopɨ'ä oso ɨvɨ rese chupe oporandu aipo e'i: — Che Yar, ereipotase, iya nde che mbogwerami tëi eve che mba'erasɨsa sui.

¹³Jesús opoko opo pɨpe sese, aipo e'i chupe: — Aipota. ¡Erekwera kurïtëi! Aipo i'e ramoseve opa okwa mba'erasɨ vai imba'easɨ va'e sui,

¹⁴ipare Jesús aipo e'i chupe: — Eremombe'ui rene nde kwerasa ambuae ava upe; esoño eyemboyekwa pa'i upe, ipare eikwave'ë nde porerekosa nde kwerasa resendar Moisés porokwaita rupi, ipɨpe sui toikwa opakatu pa'i eta nde kwerasa yuvɨreko.

¹⁵Jesús reräkwä rumo oyembouvicha katu-katu iri ete, iyavei seta ava oyemboya yuvɨreko sese iñe'ë rendu agwä iyavei tayande mbogwerami tëi yande mba'erasɨsa sui oyapave yuvɨreko.

¹⁶Jesús rumo oyepepɨ ñoite oyerure agwä oso ava pore'ɨ̇save.

¹⁷Ñepëi arɨ Jesús oporombo'e oiko, a'eve avei aipo ogwapɨ yuvɨnoi fariseo iyavei Moisés porokwaita rese oporombo'e va'e ipɨri yuvɨreko a'e yugweru opakatu Galilea tekwa-tekwami rupi sui, ɨvɨ Judea rupi sui, tekwa Jerusalén sui avei yugweru no. Yande Yar pirätäsa oyemboyekwa ite Jesús rese ava imba'easɨ va'e ombogwerase.

¹⁸A'ese oyepota ava yugweru chupe ñepëi ndogwatai va'e gweru supa pɨpe. Vɨroike pota oɨ pɨpe Jesús rovai ete seroyɨ agwä yuvɨreko viña,

¹⁹ndoikatui ete rumo kerupi omoingera yuvɨreko, esepia ava re'ɨi eteanga a'eve; egwë e'i vɨroyeupi oɨ arɨve a'eve ombopu teka rupa, imba'easɨ va'e reroyɨ agwä supa reseve opakatu ava rembiepiave Jesús rovai yuvɨreko.

²⁰Jesús oikwase ko mbɨa yuvɨrekoi yeroyasa oyese, a'ese aipo e'i imba'easɨ va'e upe: — Che mborɨpar, nde angaipa rese oime ñeröisa ndeu.

²¹Evokoiyase oporombo'e va'e Moisés porokwaita rese iyavei fariseo eta ipɨ'a ñemoñeta atɨ tëi aipo e'i yuvɨreko: “¿Ava vo ko mbɨa sekoi oñe'ë tëi va'e Tüpä rer pɨpe? Tüpä ni'ä oikatu ava angaipa upe oñeröi agwä.”

²²Jesús rumo oikwaño ite ava pɨ'a ñemoñetasa, evokoiyase oporandu chupe: — ¿Ma'erä vo pepɨ'a ñemoñetarai tëi che rese?

²³¿Uma rupi vo ñe'ësa ndayavaimi katu, aipo esa va'erä: ‘Nde angaipa rese oime ñeröisa ndeu’, anise aipo esara tie: ‘Epü'a, egwata’?

²⁴Supiete amboyekwara ava ɨvate katu va'e Ra'ɨrɨ che rekosa, esepia areko ite mborerekwasa ko ɨvɨ pɨpe ava angaipa upe che ñeröi agwä. Evokoiyase aipo e'i ava ndogwatai va'e upe: — Ndeu aipo a'e, epü'a, esupi nde rupa eso nde rëtäve.

²⁵A'e ramoseve ndogwatai va'e oñarapü'a opakatu ava rovake osupi vupagwer ipare omboetei Tüpä oso gwëtäve.

²⁶A'ese opakatu tuprɨ ite ava ndoyembovɨ'ai tëi, ipare rumo omboetei Tüpä iyavei osɨkɨyepave aipo e'i yuvɨreko: — Ko pɨpe yasepia mba'e ndayasepiai va'e ite.

²⁷Ko ipare, Jesús osë oso ichui osepia ñepëi mbɨa gwarepochi rerokwasar Roma pendar upe narä. A'e serer Leví, iyavei ogwapɨ gwarepochi rerokwasave öi. Jesús aipo e'i chupe: — Erio che rupi.

²⁸Evokoiyase Leví opü'a, oseya opakatu oporavɨkɨsa oso Jesús rupi.

²⁹Ipare koiye katu, Leví oyapo pieta gwasu gwëtäve Jesús upe narä; a'eve seta avei gwarepochi rerokwasar Roma pendar upe narä, ambuae ava avei yuvɨrekoi a'eve, yuvɨrogwapɨ yuvɨnoi karusa rendave ipɨri.

³⁰Fariseo eta rumo iyavei oporombo'e va'e Moisés porokwaita rese, a'e omboɨpɨ Jesús remimbo'e upe iñe'ë marä aipo e'i yuvɨreko chupe: — ¿Ma'erä vo pekaru iyavei peɨ'u gwarepochi rerokwasar rese iyavei ambuae yangaipa gwasu va'e rese tëi?

³¹Jesús omboyevɨ aipo e'i chupe: — Ava nimaräi va'e ndosekai ete oporoposano va'e; imba'easɨ va'eño ite rumo osekara yuvɨreko.

³²Che ndayui ava seko katuprɨ va'e reka, che rumo ayu ava yangaipa va'e reka Tüpä uve iyevɨ agwä.

³³Aipo e'i Jesús upe yuvɨreko: — Juan rupindar yuvɨrekoi va'e iyavei fariseo eta rupindar oyekwaku iyavei oyerure yuvɨreko yepi, nde remimbo'e eta rumo yuvɨrokaru, yuvɨroɨ'uño avei.

³⁴Jesús mboyevɨ a'e yuvɨrekoi va'e upe: — ¿Peikatura pi'ä icho'oprɨ mboyekwaku mendasave imer oikove vɨteseve ipa'üve viña?

³⁵Oimerä rumo arɨ imer reraso agwä ichui; oyepotase a'e arɨ, a'ese ramo oyekwakura yuvɨreko.

³⁶Iyavei oporombo'e ambuae mba'e mboyoyasa rese: — Ndipoi ete oyasɨa va'e ñepëi turukwar pɨasu popɨ ambuae turukwar kwakwami va'e apete agwä. Oyapose evokoi nungar okañɨ tëira turukwar ipɨasu va'e; iyavei turukwar ipɨasu va'e apɨrer, naporäi chietera turukwar kwakwa va'e rese.

³⁷Ndiyai avei ñoñasa uva rɨkwer ipɨasu va'e mba'e pirer kwakwa va'e pɨpe, esepia ni'ä egwë e'ise uva rɨkwer pɨasu evokoiyase opara ombopu mba'e pirer kwakwa va'e, egwë e'ira oyepɨyerepa, mba'e pirer avei evokoiyase okañɨ tëira viña.

³⁸Sese uva rɨkwer ipɨasu va'e ñoñasara mba'e pirer ipɨasu va'e pɨpe avei.

³⁹Iyavei ndipoi ete ava oɨ'u va'e uva rɨkwer kwakwa va'e ipare rumo oɨ'u potara ipɨasu va'e, esepia aipo e'i: ‘Ko uva rɨkwer kwakwa avɨye katu va'e yepi.’