Read Guarayu LUCAS 6 Bible Online

LUCAS 6 - Guarayu bible

LUCAS 6

¹Ñepëi mbɨtu'usa arɨ pɨpe, Jesús yuvɨrogwata gwemimbo'e eta rese mba'e mitɨ̇ pa'ü rupi. Semimbo'e eta evokoiyase oipo'o-po'o trigo yuvɨreko, ipare oyekɨi opo pɨpe sa'ɨ̇i yuvɨro'u va'erä.

²Evokoiyase fariseo pa'ü pendar oporandu yuvɨreko chupe: — ¿Ma'erä vo peyapo pe mba'e ko ndayaposai va'e mbɨtu'usa arɨ pɨpe peiko?

³Jesús rumo omboyevɨ chupe: — ¿Ndapeyerokɨivo peiko David rembiapokwer rese a'e iyavei ondugwer reseve ndasɨepoise yuvɨreko?

⁴A'e ni'ä oike ite Tüpä rëtä pɨpe oipɨsɨ mboyape sovasaprɨ Tüpä upendar, o'u iyavei omondo ondugwer upe, evokoi pa'i upe gweraño ite ipotasa mboyape i'u agwä yepi.

⁵Iyavei aipo e'i iri chupe: — Che ava ɨvate katu va'e Ra'ɨrɨ areko ite mborerekwasa opakatu arɨ mbɨtu'usa rese.

⁶Ambuae mbɨtu'usa arɨ pɨpe, Jesús oike oɨ judío ñemonu'äsave omboɨpɨ oporombo'e oiko. A'eve oime ñepëi mbɨa yasu kotɨ ipo novɨi va'e;

⁷Moisés porokwaita rese oporombo'e va'e fariseo eta avei oma'egätu Jesús rese yuvɨreko ombogwerara pi'ä ko mbɨa mbɨtu'usa arɨ pɨpe oyapave ichui yaiñe'ëngapo anga'u tëi e'i yuvɨreko chupe.

⁸A'e rumo, oikwaño ite ipɨ'a ñemoñetasa, aipo e'i a'e mbɨa ipo novɨi va'e upe: — Epü'a iyavei eyu ko'ave e'ä ava pa'üve. A'e mbɨa evokoiyase opü'a opɨta a'eve o'ä,

⁹ipare Jesús aipo e'i ambuae eta upe: — Aporandura mba'e rese peü: ¿Mba'e vo yaposara mbɨtu'usa arɨ pɨpe yepi: mba'e tuprɨ anise tie mba'e naporäi va'e? ¿Yaipɨsɨröra pi'ä ava rekokwer anise yamokañɨ ukara tie?

¹⁰Ichui oma'egätu opakatu oyere tuprɨ va'e oɨvɨrindar rese, aipo e'i imba'easɨ va'e upe: — Eicho'o nde yɨva. A'e mbɨa evokoiyase oicho'o oyɨva, ipare ipo okwera tuprɨ ite.

¹¹Ambuae eta yuvɨrekoi va'e rumo oñemoɨrö iteanga ichui omboɨpɨ oñemoñeta Jesús rese yuvɨreko.

¹²A'e arɨ rupi Jesús oso ñepëi ɨvɨtrɨsave oyerure agwä, pɨ̇tü momba tuprɨ oyerure Tüpä upe:

¹³Ko'ëse, oñe'ë gwemimbo'e eta upe, ichui oiporavo ipa'ü pendar oñe'ë mombe'u agwä.

¹⁴Ko yuvɨrekoi va'e: Simón, a'e akoi Pedro avei serer; Andrés, Simón rɨvrɨ; Santiago, Juan, Felipe, iyavei Bartolomé,

¹⁵Mateo, Tomás, Santiago, Alfeo ra'ɨrɨ; Simón, ava gwekwa rese sekate'ɨ̇ va'e pa'ü pendarer,

¹⁶Judas, Santiago ra'ɨrɨ, iyavei Judas Iscariote, a'e omondo va'e Jesús yamotare'ɨ̇mbar upe.

¹⁷Jesús ogweyɨ ɨvɨtrɨ sui yugweru gwemimbo'e reseve ipare opɨta ɨvɨ yoya tuprɨsave. A'eve ambuae supindar eta iyavei ava re'ɨi opakatu ɨvɨ Judea rupindar, Jerusalén rupindar iyavei Tiro Sidón ɨke kotɨndar.

¹⁸A'e oyepota yuvɨreko Jesús ñe'ë rendu potasave iyavei ombogwera va'erä imba'erasɨsa sui. Akoi mba'erasɨ omombaraɨsu va'e espíritu naporäi va'e, a'e avei opa okwera yuvɨreko.

¹⁹Evokoiyase opakatu ava opoko pota Jesús rese yuvɨreko, esepia ni'ä a'e ombogwera opakatu ava gweko pirätäsa pɨpe oiko.

²⁰Jesús oma'e gwemimbo'e eta rese, aipo e'i chupe: “Perorɨvete katu pe iparaɨsu va'e, esepia ni'ä Tüpä mborerekwasa peü narä ite sekoi.

²¹Perorɨvete katu kurïtëindar ndasɨepoi va'e, esepia ni'ä pe'ɨtaröra peiko kuri. Perorɨvete katu pe akoi ava kurïtëi oyase'o va'e, esepia ni'ä pevɨ'aretera koiye peiko.

²²Perorɨvete katu pe akoi ava pe amotare'ɨ̇se, pe mboyepepɨñose avei, iñe'ë-ñe'ë tëise avei akoi vɨroɨröse pe rer mba'e tëi pɨpe yuvɨreko, che ava ɨvate katu va'e Ra'ɨrɨ sui tëi.

²³Peyembovɨ'año, perorɨvete katuñora a'e arɨ pɨpe peiko, esepia ni'ä ipare peipɨsɨra porerekosa tuvicha va'e ɨvave; egwë e'i tuprɨ avei evokoi ava araka'endar marä-marä tëi Tüpä ñe'ë mombe'usar sereko yuvɨreko.

²⁴Pe ¡mba'e yar peiko va'e peparaɨsu katu ite kurïtëi, esepia ni'ä pemboavɨye pe rorɨvetesa peiko!

²⁵¡Peparaɨsu katu akoi pe i'ɨ̇tarö va'e kurïtëi, esepia ni'ä ndaperɨepoi chira peiko koiye! ¡Peparaɨsu katu akoi pepukaete ete va'e kurïtëi, esepia peyase'ora pe vɨ'are'ɨ̇sa pɨpe koiye!”

²⁶“¡Peparaɨsu katu akoi peipɨsɨ va'e pe mboeteisa opakatu ko ɨvɨ pɨpendar sui tëi, esepia egwë e'i tuprɨ avei ava araka'endar yuvɨreko Tüpä ñe'ë mombe'usar anga'u tëi va'e upe!”

²⁷“Peyapɨsaka va'e che ñe'ë rese aipo a'e peü: Pesaɨsu ava pe amotare'ɨ̇mbar, peyapo tuprɨ mba'e avɨye va'e ava ndape ambotai va'e upe,

²⁸peporandu porovasasa rese ava peü iñe'ë-ñe'ë tëi va'e upe narä, peyerure avei peü mba'e tëi oyapo va'ekwer rese.

²⁹Akoi nde amotare'ɨ̇mbar nde rovapetese, ko kotɨndar avei eremondoñora chupe; iyavei ava vɨrokwaño tëise nde yeaosa ndesui, emondoño avei nde yemondesa chupe.

³⁰Akoi oporanduse nde mba'e rese ndeü, emondoño avei chupe, iyavei ava vɨrokwaño tëise nde mba'e ndesui, anichira emboyevɨ cheu erera chupe.

³¹Peyapo mba'e peipota va'e ambuae ava rese egwë e'i tuprɨ aveira oyapo yuvɨreko pe rese.

³²Akoi ava pe raɨsupar gweraño tëi pesaɨsu katuse, ¿mba'e vo avɨye ipɨpe? Ava yangaipa gwasu va'e avei egwë e'i yuvɨreko yepi.

³³Iyavei peyapose mba'e avɨye va'e akoi peü mba'e tuprɨ aposar upe gwerañose, ¿mba'e vo evokoiyase oime avɨye va'e ipɨpe? Esepia ni'ä, ava angaipa viyar avei egwë e'i yuvɨreko yepi.

³⁴Akoi pemondoño tëise mba'e ava upe tomboyevɨ mba'e cheu pe esave, ¿mba'e vo evokoiyase oime avɨye va'e ipɨpe? Esepia ni'ä ava yangaipa gwasu va'e avei egwë e'i yuvɨreko.

³⁵Pe rumo pesaɨsu katura ava pe amotare'ɨ̇sar, iyavei peyapoñora mba'e avɨye va'e chupe, pemondoño aveira mba'e, ndapesäröi chira imboyevɨ agwä. Egwë peyese peipɨsɨra porerekosa tuvicha va'e, iyavei a'ese peikora Tüpä seko ɨvate katu va'e ra'ɨrɨ, a'e avɨye eteprɨ va'e ava nima'endu'ai va'e rese ava naporäi va'e upe avei.

³⁶Pereko katu poroaɨsusa, inungar pe Ru Tüpä vɨreko poraɨsusa yepi.”

³⁷“Ndiyai oyavɨ ite mba'e peye voiño tëi ambuae ava upe, Tüpä avei oyavɨ mba'e nde'i chira peü. Pemokañɨ uka tëi rene ambuae ava, Tüpä avei ndape mokañɨ tëi chira. Peñeröiño katu, Tüpä avei a'ese iñeröira peü.

³⁸Pemondo mba'e ambuae upe, Tüpä avei omondora mba'e avɨye va'e peü. A'e omondora pe mba'e rɨru pɨpe peü ñepëi sa'ämbrɨ tuprɨ avɨye va'e, imbotɨprɨ tuprɨ, imbovavaprɨ imoatäprɨ tuprɨ avei. Egwë e'ira mba'e mondo peü inungar pe pemondo ambuae upe, Tüpä rumo omboyevɨra peü.”

³⁹Ipare Jesús omombe'u ko porombo'esa: “¿Oikatu pi'ä ñepëi ndasesapɨsoi va'e ambuae ndasesapɨsoi va'e rerogwata? ¿Ndovɨapichira pi'ä ñuvɨrïo voi ɨvɨkwar pɨpe yuvɨreko viña?

⁴⁰Ñepëi yepe ni'ä ava oyembo'e va'e nda'ei ete ɨvate katu ombo'esar sui: akoi omboavɨyese rumo oyembo'esa a'e osupitɨra ombo'esar.

⁴¹¿Ma'erä erema'e eiko nde rɨvrɨ rembiavɨ rese tëi, nderema'eï ete rumo mba'e nderembiapo erereko va'e rese?

⁴²Iyavei mba'e nderembiavɨ tuvicha va'e nderesepiai vo nderesa pɨpe, ¿marä erera evokoiyase nde rɨvrɨ upe: ‘Che rɨvrɨ, eseya cheu amoigätu va'erä mba'e nderembiapo erereko va'e’? ¡Pe inungar ava oñe'ë ñotëi va'e tekokwer rese yuvɨreko yepi! Penose uka rane pe rembiavɨ tuvicha katu va'e peyesui, a'ese ramo ambuae ava rembiavɨ ta'ɨmi va'e moigätu peikatura.”

⁴³“Ndipoi ɨvɨra avɨye va'e ombou va'erä o'a naporäi va'e, iyavei ɨvɨra naporäi va'e nomboui chiaveira o'a avɨye va'e.

⁴⁴Ñepëi-pëi ɨvɨra ikwasa i'a rese: ndipo'osai chira higo ɨvɨra sächi atɨ va'e sui, iyavei uva ndipo'o saichira yu pa'ü sui.

⁴⁵Ava seko katuprɨ va'e omombe'u mba'e avɨye va'e esepia vɨreko mba'e tuprɨ opɨ'a pɨpe, iyavei akoi ava ndasekoporäi va'e omombe'u mba'e naporäi va'e avei esepia vɨreko mba'e tëiete opɨ'a pɨpe. Esepia pe pɨ'a pɨpe sui tëi osë peñe'ë agwä.”

⁴⁶“¿Ma'erä vo peñe'ë cheu, ‘Che Yar, che Yar’, ipare rumo ndapeyapoi ete mba'e che remimombe'u?

⁴⁷Amombe'ura rumo mba'e peü uma nungar tuprɨ ite akoi ava ou va'e cheu che ñe'ë rese oyapɨsaka va'e iyavei oyapo ite mba'e che remimombe'u:

⁴⁸a'e inungar tuprɨ akoi ava oyapo va'e gwëtära yɨpɨndar rumo oyo'o pɨkuku rane ite, ipare omondo ita arɨve imopü'a agwä. Oyepota ɨrɨgwasu ou, oinupa pirätä tëi oɨ, nomboyerokwai ete rumo, esepia ni'ä vɨreko ite ovɨräkwäsa avɨye va'e.

⁴⁹Akoi ava che ñe'ëngagwer rese ndoyapɨsakai va'e, a'e ndoyavɨi akoi ñepëi ava oyapo va'e gwëtära ɨvɨ arɨve tëi, nomondoi va'e ivɨräkwä agwä; ipare ouse ɨrɨgwasu oinupa pirätä a'e oɨ, opaño omonduru iyavei okañɨ tëiete.”