Read Guarayu LUCAS 7 Bible Online

LUCAS 7 - Guarayu bible

LUCAS 7

¹Jesús oñe'ë pare ava upe oso Cafarnaúm ve.

²A'eve sekoi ñepëi sundao rerekwar Roma ɨgwar vɨreko va'e ñepëi gwembigwai a'e sembiaɨsu ite, a'e imba'easɨ iyavei omano pota ite ou.

³Sundao rerekwar oyanduse Jesús reräkwä, omondo mborerekwar judío tekwa pɨpendar yuvɨrekoi va'e, oporandu agwä chupe oso va'erä sembigwai mbogwera.

⁴A'e yuvɨraso Jesús upe, iyavei oporandu aipo e'i yuvɨreko chupe: — Ko sundao rerekwar avɨye ite ereipɨtɨ̇vɨïrä,

⁵esepia ni'ä ososaɨsu ore rekwa, iyavei omopü'a uka ite oɨ judío ñemonu'äsa oreu.

⁶Jesús oso a'e yuvɨrekoi va'e rupi, vɨrovɨse rumo sëtä yuvɨraso, sundao rerekwar oyokwai omborɨpar imondo aipo e'i: “Che Yar, ereyemoɨröi rene, esepia ni'ä ndiyai ete nde reike agwä che rëtäve;

⁷sese ni'ä che teiete ndaikatui aso va'erä nde reka. Emondo mborokwaita, a'ese che rembigwai okwerara.

⁸Esepia che avei ni'ä aiko mborokwaita ɨvate katu va'e povrɨve, iyavei areko sundao che povrɨve. Aipo a'ese ñepëi ipa'ü pendar upe eso, a'e oso voi ete; ambuae upe aipo a'ese erio, a'e ou voi ete iyavei ayokwaise che rembigwai oyapo va'erä mba'e, a'e oyapo ite.”

⁹Jesús ndoyembovɨ'ai tëi o'ä aipo renduse, ipare oma'egätu ava vupindar rese aipo e'i: — Supiete Israel ve ndipoi ete ko mbɨa nungar vɨreko va'e yeroyasa che rese.

¹⁰Oyevɨpase yuvɨraso sundao rerekwar rëtäve, yokwaiprɨ osepia yuvɨreko imboakwaprɨ okwera tuprɨse.

¹¹Ko ipare, Jesús oso ñepëi tekwave Naín serer va'esave. Yuvɨraso supi semimbo'e eta iyavei ava re'ɨi.

¹²Vɨrovɨse tekwa yuvɨraso, osepia ñepëi te'ögwer vɨrasose ñotɨ̇ agwä yuvɨreko, a'e kuña membrɨ sekoi ñepëimi va'e ite, a'e kuña sekoi imer mano va'ekwer. Ava re'ɨi avei yuvɨraso supi tekwa pɨpendar.

¹³A'e kuña repiase, yande Yar oiparaɨsuereko aipo e'i chupe: — Ereyase'oi rene.

¹⁴Ipare voi oyemboya oso sese opoko te'ögwer rɨru rese, iyavei serasosar vɨropɨtaño voi ete yuvɨreko. Jesús aipo e'i omano va'e upe: — Mbɨa chi'ïvä'e, che aipo a'e ndeu: ¡Eñarapü'a!

¹⁵Evokoiyase omano va'ekwer ogwapɨ öi ipare omboɨpɨ oñe'ë, ichui Jesús omondo ichɨ upe.

¹⁶Osepiase ko mba'e, opakatu tuprɨ ava oyembosɨkɨye ipare omboɨpɨ Tüpä mboetei aipo e'i yuvɨreko: — Ñepëi Tüpä ñe'ë mombe'usar gwasu oyemboyekwa yande pa'üve. Aipo e'i avei yuvɨreko: — Tüpä ni'ä ou gwekwa pɨtɨ̇vɨï agwä oiko.

¹⁷Iyavei opakatu ɨvɨ Judea rupi, yɨvɨrindar avei Jesús rembiapo oikwapa tuprɨ yuvɨreko.

¹⁸Juan avei oyandu opakatu ko mba'e oime va'e, esepia supindar omombe'u yuvɨreko chupe. Evokoiyase oñe'ë ñuvɨrïo vupindar upe

¹⁹ipare omondo yande Yar upe, oporandu agwä a'e pi'ä ou va'erä anise ñasäröra tie ambuae yaiko.

²⁰Juan remimondo evokoiyase oyemboya Jesús rese yuvɨraso, aipo e'i yuvɨreko chupe: — Juan Oporoapirämo va'e orembou oroporandu va'erä ndeu, nde ite vo ereiko imombe'uprɨ ereyu va'erä, anise tie orosäröra ambuae oroiko.

²¹A'e arɨ pɨpeve voi Jesús ombogwera seta ava imba'erasɨsa sui, ava karugwar rerekosar sui aveino. Ombogwera avei seta ava ndasesapɨsoi va'e.

²²Ipare rumo omboyevɨ chupe: — Peso pemombe'u Juan upe mba'e pesepia va'e pesendu va'e avei. Pemombe'u chupe ndasesapɨsoi va'e osareko tuprɨ kurïtëi, ipäri-päri va'e ogwata tuprɨ, iyavei mba'erasɨ vai rerekosar okwerapa tuprɨ, ndayapɨsai va'e avei yapɨsapa, omano va'e opa okwerayevɨ yuvɨreko iyavei ava iparaɨsu va'e upe imombe'usa ñe'ësa avɨye va'e.

²³¡Iyavei ovɨ'aretera ava oyeroyaño va'e che rese yuvɨreko!

²⁴Juan rupindar yuvɨraso pare, Jesús omboɨpɨ imombe'u ava upe Juan rekokwer aipo e'i: “¿Mba'evo pesepia pe ɨvɨ iporue'ɨ̇sa rupi? ¿Kapi'iata ɨvɨtu ombova-mbova va'e nungar pi'ä?

²⁵Anise, ¿mba'evo evokoiyase pesepia? ¿Pesepia tie ava iturukwar porañeteai va'e? Peikwa ite ava oyemboeteai va'e gweko porañetesa pɨpe sekoi va'e, a'e rumo mborerekwar ɨvate katu va'e rëtä pipe yuvɨrekoi yepi.

²⁶Evokoiyase ¿mba'e ite vo pesepia? ¿Tüpä ñe'ë mombe'usar tie? Supiete ko mbɨa ɨvate katu va'e Tüpä ñe'ë mombe'usar sui sekoi.

²⁷Ko Juan rese ite akoi ñe'ësa Ikwachiaprɨ araka'endar pɨpe aipo e'i: ‘Amondora che ñe'ë mombe'usar nde renondeve, nde raperä moigätu agwä.’

²⁸Amombe'u aipo, ko opakatu yuvɨrekoi va'e ava ndipoi ete ɨvate katu va'e Juan sui; ava seko mbegwemi va'e rumo, Tüpä mborerekwasave a'e seko ɨvate katu ite ichui.

²⁹Opakatu osendu va'e Juan ñe'ë, iyavei gwarepochi monu'äsar Roma pendar upe narä, a'e avei oñeapirämo uka yuvɨreko chupe, egwë e'i Tüpä porokwaita mboavɨye yuvɨreko;

³⁰fariseo eta rumo iyavei Moisés porokwaita rese oporombo'e va'e noñeapirämo uka potai va'e Juan upe, vɨroɨröño ite Tüpä remimbotar oyeupendar yuvɨreko.”

³¹“¿Mba'e rese pi'ä amboyoyara ava rekokwer kurïtëindar? ¿Mba'e rese pi'ä oyoyara sekokwer?

³²Inungar chi'ïvä'e igwayɨ tëi ogwapɨ okarusuve öi ipare säse puku-puku omborɨpar upe: ‘Oromoñe'ë tëi mimbɨ, pe rumo ndapepɨvoi ete; iyavei orosapukai tëi sapukaisa vɨ'are'ɨ̇sa resendar, pe rumo ndapeyase'oi ete.’

³³Esepia ou Juan Oporoapirämo va'e, a'e ndo'ui va'e mboyape ndoɨ'ui va'e avei uva rɨkwer, pe evokoiyase aipo peye chupe vɨreko va'e karugwar oyese.

³⁴Koiye che ayu, ava ɨvate katu va'e Ra'ɨrɨ, akaru iyavei aɨ'u, ipare pe aipo peye ikaru gwasuai va'e iɨ'u gwasuai va'e avei peye cheu, ava angaipa viyar mborɨpar tëi iyavei gwarepochi rerokwasar Roma pendar upe narä mborɨpar tëi peye cheu.

³⁵Tüpä mba'ekwasa pɨpe ikwasara opakatu mba'e sembiapokwer.”

³⁶Ñepëi fariseo oñe'ë Jesús upe, okaru va'erä ipɨri, ipare Jesús oso sëtäve. Ogwapɨ öi karusa rendave,

³⁷a'ese ñepëi kuña angaipa viyar, sekoi a'e tekwa pɨpeve avei ipare oyanduse Jesús osose fariseo rëtäve okaru, vɨroyepota mba'e seraso sɨäkwä va'e savapɨpo tuprɨ va'e sɨru pɨpe chupe.

³⁸A'eve oyase'o iteanga oñenopɨ'ä Jesús pɨve oso ichui opa tuprɨ gwesaɨ pɨpe omoakɨ̇. Ipare opa omombiru o'a pɨpe ichui, iyavei oipɨrupɨte, oipɨyere avei mba'e sɨäkwä va'e ipɨ rese.

³⁹Fariseo vɨraso va'ekwer Jesús gwëtäve, osepiase ipɨ'a ñemoñeta tëi aipo e'i: “Supiete ko mbɨa Tüpä ñe'ë mombe'usar ite sekoise viña, oikwaño itera ko kuña opokose sese viña: esepia kuña angaipa viyar tëi.”

⁴⁰Evokoiyase Jesús aipo e'i fariseo upe: — Simón, amombe'u pota ñepëi mba'e ndeu. A'ese fariseo omboyevɨ chupe: — Emombe'u cheu, Porombo'esar.

⁴¹Jesús aipo e'i iri: — Ñuvɨrïo mbɨa vɨrokwa yuvɨreko ñepëi gwarepochi mondosar sui. Quinientos tuprɨ, ambuae evokoiyase cincuenta tuprɨ vɨrokwa;

⁴²ipare ndoikatu irise imboyevɨ agwä yuvɨreko chupe, evokoi mbɨa gwarepochi mondosar iñeröiño ite ñuvɨrïo upe. Emombe'u cheu, ¿uma pi'ä osaɨsu katura sereko?

⁴³Simón omboyevɨ chupe: — Cheu ndoyavɨi ava gwarepochi vɨrokwa katu va'e ichui. Jesús aipo e'i chupe: — Supiete aipo ere.

⁴⁴Evokoiyase Jesús oma'e kuña rese, aipo e'i Simón upe: — ¿Erema'e vo ko kuña rese? Aikese akoi nde rëtä pɨpe, nderembouimi ete ɨ che pɨsei agwä; ko kuña rumo gwesaɨ pɨpe oyosei che pɨ ipare omombiru o'a pɨpe.

⁴⁵Iyavei nde ndache rovaupɨtei eve avɨrave apose, ko kuña rumo, akoi nde rëtä pɨpe che reike ramosuive che pɨrupɨte voi ete.

⁴⁶“Nderemondoi ete mba'e sɨäkwä va'e che akä rese; ko kuña rumo oipɨyere mba'e sɨäkwä va'e che pɨ rese.

⁴⁷Sese aipo a'e ndeu ko angaipa gwasu vɨreko va'e kuña oipɨsɨ ite ñeröisa, esepia vɨreko ite poroaɨsusa tuvicha va'e che rese; akoi ava upe nañeröisa tuprɨi va'e, a'e ndoporoaɨsu tuprɨi avei.

⁴⁸Ipare aipo e'i kuña upe: — Nde angaipa rese oime ñeröisa ndeu.

⁴⁹Evokoiyase ambuae ava icho'oprɨ ogwapɨ va'e yuvɨnoi a'eve, aipo e'i oyeupe yuvɨreko: — ¿Uma pi'ä ko mbɨa iñeröi va'e ite angaipa upe?

⁵⁰Jesús rumo aipo e'i iri kuña upe: — Nde yeroyasa che rese erereko va'e pɨpe ereipɨsɨ pɨsɨrösa. Sese eso tuprɨño eiko.”