Read Guarayu JUAN 12 Bible Online

JUAN 12 - Guarayu bible

JUAN 12

¹Ñepëi ova arɨ ipane vɨtese Pascua pieta agwä, Jesús oso tekwa Betania ve, a'eve sekoi Lázaro, a'e semimbokweragwer.

²A'eve okaru yuvɨreko Jesús mboeteisave; Marta i'añeko sese; Lázaro evokoiyase okaru yuvɨnoi ipɨri.

³Evokoiyase María gweru chi'ïmi ñepëi mba'e rɨru pɨpe sɨäkwä va'e senoseprɨ ndoyeseai va'e ɨvɨra nardo sui, a'e sepɨ iteanga va'e omondo mba'e sɨäkwä va'e Jesús pɨ rese; ipare oikɨtɨ o'a pɨpe ichui. Iyavei opakatu oɨ pɨpe ichïgwer sɨäkwä iteanga opɨta.

⁴Evokoiyase Judas Iscariote, a'e akoi omondo va'erä Jesús ava yamotare'ɨ̇mbar upe, aipo e'i:

⁵— ¿Ma'erä vo nimondosai ko mba'e sɨäkwä va'e mboravɨkɨ repɨrä trescientos arɨ rupi ava iparaɨsu va'e pɨtɨ̇vɨï agwä?

⁶Judas rumo nda'ei ava iparaɨsu va'e raɨsupave aipo e'i, esepia a'e imondarai va'e tëi, a'e avei sekoi gwarepochi rärösar, oñomiño ite yapokatuprɨ yepi.

⁷Jesús aipo e'i chupe: — Egwë tëiño, toyapoño esepia a'e oyapokatu mba'e sɨäkwä va'e che mano agwä renondeve cheu.

⁸Ava iparaɨsu va'e perekoño itera pe pa'ü rupi yepi; che rumo ndache rerekoi chietera pe pa'üve peye.

⁹Seta iteanga judío oyandu yuvɨreko Jesús sekoise Betania ve, iyavei yuvɨraso a'eve, nda'ei rumo Jesús repia gweraño Lázaro repia avei, a'e akoi Jesús ombogwerayevɨ va'ekwer.

¹⁰Evokoiyase pa'i eta rerekwar, oñemoigätu avei Lázaro yuka pota agwä yuvɨreko,

¹¹esepia a'e ichui tëi ni'ä seta iteanga judío oyepepɨ yuvɨreko Jesús reroya agwä.

¹²Seta iteanga ava yuvɨraso tekwa Jerusalén ve Pascua pieta repia. A'ere arayi'ive, oikwa voi Jesús yepota agwä a'e tekwave yuvɨreko.

¹³Evokoiyase oyasɨa pindo ipare yuvɨnosë sovaïchi agwä, osapukai yuvɨreko chupe: — ¡Imboeteiprɨ! ¡Sovasaprɨ tasekoi ou va'e yande Yar Tüpä rer pɨpe a'e mborerekwar ɨvate katu va'e Israel pendar!

¹⁴Jesús oyosɨ ñepëi gwariku ipare oyeupi sese, inungar aipo e'i Ikwachiaprɨ pɨpe:

¹⁵“Pesɨkɨyei rene, tekwa Sión pendar; pesepia pe Rerekwar ɨvate katu va'e oyeupi ñepëi gwarikumi arɨve ou.”

¹⁶Yɨpɨndar, semimbo'e eta ndosendukwai ete ko mba'e imombe'uprɨ yuvɨreko; koiye katu rumo, Jesús oike gweko mboeteisa pɨpe, a'ese oyemoma'endu'a opakatu mba'e sembiapokwer rese Ikwachiaprɨ pɨpe aipo e'i ete sesendar ñe'ësa.

¹⁷Ava yuvɨrekoi va'e aipo Jesús rupi avɨyeteramo tëi a'e oñe'ëse Lázaro upe suvɨpave ipare rumo ombogwerayevɨ, a'e evokoiyase omombe'upa mba'e osepia va'ekwer yuvɨreko.

¹⁸Sese ava eta yuvɨnosë voi sovaïchi ipɨsɨ agwä, esepia oikwa ite mba'e poromondɨisa oyapose yuvɨreko.

¹⁹Evokoiyase fariseo eta aipo e'i tëi oyeupe yuvɨreko: — Pema'ekwaru ndayaikatu iri ete mba'e apo agwä chupe. Pesepia ru, ¡opakatu ava yuvɨrogwata kurïtëi yuvɨreko supi!

²⁰Yuvɨraso va'e ava re'ɨi pa'ü rupi Jerusalén ve oyerure agwä pieta pɨpe, a'eve avei oime aipo movɨrö griego yuvɨrekoi va'e.

²¹A'e oyemboya Felipe rese Betsaida pendar, tekwa Galilea pɨpendar, ipare oporandu aipo e'i yuvɨreko chupe: — Nde mbɨa, orosepia potamo Jesús.

²²Felipe evokoiyase oso imombe'u Andrés upe, ichui yuvɨraso ñuvɨrïo voi Jesús upe imombe'u.

²³Evokoiyase Jesús aipo e'i chupe: — Oyepota arɨ cheundar che, ava ɨvate katu va'e Ra'ɨrɨ mboetei agwä.

²⁴Supiete aipo a'e akoi trigo rä'ɨi nañotɨ̇saise ndi'ai chietera, a'e ndasorɨi chietera no; akoi ñotɨ̇sase rumo a'e i'a vai etera o'ä.

²⁵Akoi osaɨsu va'e gwekokwer, a'e omokañɨ tëietera; akoi ndosaɨsui va'e gwekokwer ko ɨvɨ pɨpe sereko, a'e vɨrekora tekovesa ndopai va'e.

²⁶Akoi che mboyeroya pota va'e, togwata che rupi yuvɨreko; che asosave a'eve avei yuvɨrekoira che mboyeroyasar. Akoi che mboyerosar oime va'e, che Ru avei omboeteira sereko.

²⁷“¡Kurïtëi rumo ayandu ite mba'e-mba'e tëi oime va'erä! ¿Marä a'era pi'ä evokoiyase? ¿Aipo a'era: ‘Che Ru, che renose katu eve ko mba'e-mba'e tëi sui’? ¡Che rumo ayu a'e gwä ite ko ɨvɨ pɨpe!

²⁸Che Ru, emboyekwa nde pirätäsa nderer porañetesa mboetei agwä.” A'ese oyeendu ɨva sui ñepëi ñe'ësa, aipo e'i va'e: “Opa ni'ä amboetei sereko yepi, ayevɨ iri etera rumo imboetei agwä.”

²⁹A'eve ava yuvɨrekoi va'e sendusar, aipo e'i osunu va'e tëi e'i yuvɨreko viña; ambuae eta rumo aipo e'i yuvɨreko: — Ñepëi mbigwai ɨva pendar oñe'ë chupe.

³⁰Jesús aipo e'i: — Nda'ei cheundar ñe'ësa pesendu, a'e rumo peündar ite.

³¹Ko kurïtëi osupitɨ ite oime va'erä ñemoɨrösa ko ɨvɨ pɨpe, iyavei imombosara akoi oporokwai va'e ko ɨvɨ pɨpe sui.

³²Akoi che rupise ɨvate yuvɨreko ko ɨvɨ sui, a'ese opakatu ava arura che yeupi narä.

³³Aipo ñe'ësa pɨpe omboyekwa tuprɨ ite marä e'ira omano kuri.

³⁴Ava eta omboyevɨ yuvɨreko chupe: — Porokwaita ikwachiaprɨ pɨpe oroikwa ite Poropɨsɨrösar sekoira tekovesa apɨre'ɨ̇ pɨpe. ¿Ma'erä ru akoi nde aipo ere ava ɨvate katu va'e Ra'ɨrɨ a'e supisara kuru rese ɨvate ere? ¿Uma vo aipo ava ɨvate katu va'e Ra'ɨrɨ sekoi?

³⁵Jesús aipo e'i ava upe: — Sekoi vɨtera tesapesa pe pa'üve, a'e rumo sekoira movɨrö arɨ rupi tëi. Pegwata katu ko tesapesa oime vɨte seve, avɨyeteramo pe resapɨ'a tëira pɨ̇tümimbi va'e, esepia akoi ogwata va'e pɨ̇tümimbisa rupi, ndoikwai kerupi ogwata oiko.

³⁶Peroya katu ko tesapesa kurïtëi pereko vɨteseve, peiko va'erä tesapesa pɨpe yepi. Ko mba'e mombe'u pare, Jesús oso ava re'ɨi pa'ü sui ndoyemboyekwa iri ete ava eta upe.

³⁷Yepe Jesús seta iteanga oyapo tuvicha va'e poromondɨisa ava re'ɨi rovake viña, a'e rumo ndovɨroyai ñoite yuvɨreko;

³⁸esepia ni'ä imboavɨyesa rane itera Tüpä ñe'ë mombe'usar Isaías rembikwachiagwer pɨpe aipo e'i va'e: “Che Yar, ¿ava pi'ä vɨroya yande ñe'ë yuvɨreko? ¿Uma upe pi'ä yande Yar omboyekwa gweko pirätäsa?”

³⁹Sese ndovɨroyai ete yuvɨreko, esepia ni'ä Isaías rembikwachiagwer pɨpe aipo e'i:

⁴⁰“Tüpä nomboesapɨso iri ete ava nombopɨ'añemoñeta tuprɨ iri avei, ndosepia iri va'erä ite mba'e yuvɨreko ndosendukwa iri va'erä aveino; ndoyevɨ iri va'erä ite cheu, iyavei che nambogwera iri va'erä ite yuvɨreko.”

⁴¹Isaías omombe'u mba'e ko nungar esepia ni'ä osepia ite Jesús reko porañetesa, oñe'ë avei sese.

⁴²Koiye katu, seta ite judío vɨroya va'e Jesús, seko ɨvate katu va'e avei. A'e rumo nomboyekwai ete seroyasa yuvɨreko fariseo sui osɨkɨyepave omombo e'ɨ̇ agwä oɨ judío ñemonu'äsa sui yuvɨreko.

⁴³Esepia a'e oipota katu ava tëi suindar yemboeteisa Tüpä suindar yemboeteisa sui yuvɨreko.

⁴⁴Jesús oñe'ë pirätä aipo e'i: “Akoi che reroyasar, nda'ei che gweraño che reroya, che Ru avei che mbousar vɨroya yuvɨreko.

⁴⁵Akoi che repiasar, osepia avei che mbousar.

⁴⁶Che aiko tesapesa. Ayu ko ɨvɨ pɨpe ava che reroyasar yuvɨrekoi e'ɨ̇ va'erä pɨ̇tümimbisave.

⁴⁷Akoi osendu va'e che ñe'ë iyavei ndoyapoi mba'e semimbotar, nda'ei che amokañɨrä; esepia ndayui ava ko ɨvɨ pɨpendar mokañɨ agwä, che rumo ayu ipɨsɨrö agwä.

⁴⁸Akoi ava che reroɨrö va'e ndovɨroyai avei che ñe'ë, oime rumo imokañɨ agwä: ko che ñe'ësa supiete va'e chupe oyemokañɨ ukara arɨ ipa va'e pɨpe yuvɨreko.

⁴⁹Esepia che nañe'ëi ete cheyesui tëi; che Ru, che mbousar rumo chekwai che ñe'ë agwä, che porombo'e agwä avei.

⁵⁰Che aikwa ko cheundar porokwaita gweru tekovesa apɨre'ɨ̇ ava upe. Sese ni'ä, amombe'u che Ru chekwaisa.”