Read Guarayu JUAN 13 Bible Online

JUAN 13 - Guarayu bible

JUAN 13

¹Pascua pieta renonde iyavei Jesús oikwa ite o'arɨ yepota ko ɨvɨ reya agwä oso va'erä Vu pɨri. A'e osaɨsu va'e ite ava oyeupendar ko ɨvɨ pɨpe yepi, egwë e'i saɨsu arɨ ipa va'e rupi.

²Karugwar oike ite Judas pɨ'a pɨpe, Simón Iscariote ra'ɨrɨ rese, imondo agwä Jesús yamotare'ɨ̇mbar upe. Jesús rumo oikwa ite ouse Tüpä sui, oikwa avei oyevɨ iri agwä Tüpä pɨri iyavei Tu omondo opakatu omborerekwasa chupe; sese okaruse öi opü'a karusa renda sui, osekɨi oturukwar yo'asa ipare omonde ambuae turukwar vumbɨkwasa rese.

⁵Ipare omondo ɨ yepoisa rɨru pɨpe ichui oyosei gwemimbo'e eta pɨ omombiru turukwar yeovakɨtɨsa pɨpe vɨreko va'e vumbɨ rese.

⁶Oyosei potase Simón Pedro pɨ, a'e aipo e'i chupe: — Che Yar, ¿nde evokoiyase ereyoseira che pɨ?

⁷Jesús omboyevɨ chupe: — Nde rumo nderesendukwai mba'e che rembiapo kurïtëi, ipare rumo eresendukwara.

⁸Pedro aipo e'i chupe: — ¡Che rumo ndaipotai chietera che pɨsei agwä eve! Jesús omboyevɨ chupe: — Ndayoseise rumo nde pɨ, evokoiyase nda'ei chietera che rupindar ereiko.

⁹Simón Pedro aipo e'i chupe: — ¡Evokoiyase che Yar, ani katu che pɨ gweraño ereyosei, eyosei avei che po iyavei che akä!

¹⁰Jesús omboyevɨ chupe: — Akoi oyasupa ramo va'e, a'e ipɨño tëi yoseisara, esepia opakatu ite imoatɨröprɨ sekoi. Iyavei pe ndapekɨ'ai ete peiko, yepe nda'ei opakatu tuprɨ egwë peye.

¹¹A'e aipo e'i: “Nda'ei opakatu tuprɨ ndapekɨ'ai”, esepia oikwa ite uma omondora yamotare'ɨ̇mbar upe.

¹²Gwemimbo'e eta pɨ yosei pare, Jesús omonde iri oturukwar yo'asa, ogwapɨ iri karusa rendave aipo e'i gwemimbo'e eta upe: — ¿Peikwa vo mba'e ayapo va'e peü?

¹³Pe ni'ä, Porombo'esar iyavei ore Yar peye cheu, supiete esepia a'e ite che aiko.

¹⁴Supiete che Porombo'esar Yar avei aiko, che ayosei pe pɨ, egwë peye aveira ñepëi-pëi peyakatu peyosei pe pɨ.

¹⁵Che amboyekwa ite ñepëi mba'e peikwa va'erä, peyapo va'erä avei inungar mba'e che ayapo va'e yepi.

¹⁶Supiete aipo a'e ndipoi ete ñepëi mbigwai ɨvate katu va'e gwerekwar sui, egwë e'i avei imbouprɨ nda'ei chira ɨvate katu sekoira ombousar sui.

¹⁷Pesendukwase ko nungar mba'e iyavei peyapo tuprɨse, a'ese pevɨ'arete katura peiko.

¹⁸“Nañe'ëi ete aipo pe opakatu peiko va'e rese; che rumo aikwa uma opa aiporavo yuvɨreko. Ko rumo imboavɨyesa rane itera aipo e'i va'e Ikwachiaprɨ pɨpe öi: ‘Akoi okaru va'e che pɨri, a'e oyemboyere che amotare'ɨ̇ kurïtëi.’

¹⁹Amombe'ura aipo peü oime va'erä renondeve, a'ese che reroyara peye Che a'e Aikose.

²⁰Supiete aipo a'e peü akoi che remimondo oipɨsɨ tuprɨ va'e, a'e che pɨsɨ tuprɨ ite; akoi che pɨsɨ tuprɨ va'e, a'e oipɨsɨ tuprɨ avei che mbousar no.”

²¹Ko mba'e mombe'u pare, Jesús ndoyembovɨ'ai tëiete oiko, ipare rumo koiye omombe'u tuprɨ iri ete: — Supiete aipo a'e ñepëi pe pa'ü pendar che mondora che amotare'ɨ̇mbar upe.

²²Semimbo'e eta evokoiyase omboɨpɨ oma'ë-ma'ë tëi oyese yuvɨreko, ndoikwai ete rumo uma rese oñe'ë.

²³Ñepëi sekoi va'e ipa'ü pendar, a'e Jesús rembiaɨsu katu yɨpɨve chini, okaru vɨte seve yuvɨnoi,

²⁴ipare Simón Pedro aipo e'i chupe eporandu ikwa agwä uma rese pi'ä oñe'ë oiko.

²⁵A'e oyemboya katu ite oso Jesús rese, aipo e'i oporandu chupe: — Che Yar, ¿uma ite vo aipo a'e?

²⁶Jesús omboyevɨ chupe: — Amoakɨ̇ra ko ñepëi mboyape imbo'i-imbo'iprɨ, akoi chupe amondo va'e, a'e ite che mondora. Ipare voi ete omoakɨ̇ mboyape mbo'i-mbo'iprɨ, ichui omondo Judas upe, a'e Simón Iscariote ra'ɨrɨ.

²⁷Ipare rumo Judas oipɨsɨ voi ete mboyape, a'ese Karugwar oike voi ete ipɨ'a pɨpe. Jesús aipo e'i chupe: — Akoi ereyapo pota va'e eiko, eyapo voi ete kurïtëi.

²⁸Ndipoi ete rumo karusa rendave yuvɨrokaru va'e yuvɨnoi osendukwa va'e yuvɨreko iñe'ë marä oyapave aipo e'i chupe.

²⁹Esepia Judas sekoi gwarepochi rɨru rärösar ite yepi, oime rumo ipɨ'añemoñeta va'e Jesús oyokwai revo mba'e rerokwa agwä Pascua pietase narä e'i yuvɨreko chupe, anise omondora revo ava iparaɨsu va'e upe mba'e e'i yuvɨreko viña.

³⁰Oipɨsɨ pare Judas mboyape osë voi ete. A'e pɨ̇tü pɨpeve oso.

³¹Ipare koiye katu Judas së pare, Jesús aipo e'i: — Kurïtëi oyekwara che, ava ɨvate katu va'e Ra'ɨrɨ reko porañetesa, Tüpä reko porañetesa avei oyekwara che rese.

³²Iyavei supiete akoi ava ɨvate katu va'e Ra'ɨrɨ amboyekwara Tüpä reko porañetesa, egwë e'i aveira Tüpä omboyekwara che reko porañetesa oiko, a'e oyapo itera evokoi nungar kuri.

³³Che ra'ɨreta che rembiaɨsu, ndaiko puku iri chira rumo pe rese. Pe rumo che reka tëira peye; inungar akoi amombe'u va'e judío eta upe a'e tuprɨ avei aipo amombe'u kurïtëi peü: Ndapei katui chietera peso va'erä che asosave.

³⁴Ko amondo porokwaita ipɨasu va'e peü: Peyeaɨsu va'erä ñepëi-pëi peiko. Inungar che opoaɨsu pe rereko yepi.

³⁵Supiete peyeaɨsuse ñepëi-pëi peiko va'e, opakatu tuprɨ ite ava oikwara yuvɨreko pe che remimbo'e eta peikose.

³⁶Simón Pedro oporandu Jesús upe: — Che Yar, ¿ke ite vo eresora? — Kevo che asora — e'i Jesús omboyevɨ chupe — , kurïtëi ndiyai ete peso va'erä che rupi; koiye katu rumo pesora che rupi.

³⁷Pedro aipo e'i chupe: — Che Yar, ¿ma'erä vo kurïtëi ndiyai ete aso va'erä nde rupi? ¡Che añemoigätu amondo va'erä che rekokwer nde repɨrä!

³⁸Jesús omboyevɨ chupe: — ¿Supiete vo ereyemoigätu eremondo va'erä nde rekokwer che rese? Supiete amombe'ura aipo ndeu takura ñe'ë renondeve, mbosapɨ yupagwer rupi ndaikwai va'e erera cheu.