Read Guarayu JUAN 15 Bible Online

JUAN 15 - Guarayu bible

JUAN 15

¹“Che aiko uva ɨ nungar supiete va'e, che Ru evokoiyase i'añeko va'e ñotɨ̇mbrɨ rese.

²Akoi ñepëi che remitɨ̇ räkä ndi'aise cheu; a'e oyasɨara vɨrokwara säkä ichui omoatɨrö tuprɨ katu aveira sereko, ti'a katu oyapave.

³Che ñe'ë amombe'u va'e pɨpe sui kurïtëi peiko ite ñemoatɨrösa pɨpe.

⁴Akoi peikose ite che rese, inungar avei che aikora pe rese yepi. Ñepëi uva ɨ räkä rumo ndi'ai chietera oyesui ae tëi, esepia ni'ä a'e ndoyai ete o'ɨ rese; egwë peye aveira, pe ndapeikatui chietera mba'e avɨye va'e apo agwä, ndapeikoise cherupi yepi.”

⁵“Che ni'ä uva ɨ nungar ite aiko, pe evokoiyase säkä nungar peiko. Akoi sekoi va'e che rese, che avei aiko sese, a'e i'a vai etera o'ä; che pore'ɨ̇ rumo ndapeikatui chietera mba'e apo agwä yepi.

⁶Akoi ndasekoi va'e che rese, a'e imombosara okarve ipare rumo ipirura inungar akoi ɨvɨra räkä imonu'äsa va'e sapɨ pɨrä tatave yepi.

⁷Akoi supiete peikose che rese, iyavei ndaperesaraise che porombo'esa sui, peporanduse rumo mba'e pe remimbotar rese a'e imondosaño itera peü.

⁸Ko rese oyemboyekwa ite che Ru mboeteisa, esepia peyapo ite mba'e avɨye va'e iyavei peikora che remimbo'e supi tuprɨ va'e yepi.

⁹Che opoaɨsu ite pe rereko inungar che Ru che raɨsu che rereko yepi; sese peikoño katu che poroaɨsusa pɨpe.

¹⁰Akoi peroyase che porokwaita, peikora che poroaɨsusa pɨpe, inungar che aroya che Ru porokwaita iyavei aikoveño ite iporoaɨsusa pɨpe vichiko.”

¹¹“Añe'ë aipo peü peyembovɨ'a agwä che rese iyavei pevɨ'asa yavɨye rane itera.

¹²Ko che porokwaita pɨpe aipo e'i: Peyeaɨsu katu ñepëi-pëi inungar che opoaɨsu pe rereko yepi.

¹³Ko poroaɨsusa gwasu vɨreko va'e oyese a'e inungar akoi omondo va'e gwekokwer omborɨpar repɨrä.

¹⁴Pe ni'ä che mborɨpareta peiko, akoi peyapose mba'e che remimbotar opokwaise.

¹⁵Mbigwai nda'e iri chira peü, esepia mbigwai ndoikwai ete mba'e gwerekwar rembiapo yepi. Che mborɨpar a'era peü, esepia aikwa uka ite peü opakatu ñe'ësa che Ru omombe'u va'e cheu.

¹⁶Pe ndache poravoi ete peye, che rumo opoporavo vichiko amombe'u avei peü pemombe'u va'erä ñe'ësa avɨye va'e, a'e ñe'ësa tokañɨ tëi eme katu. Egwë e'ise che Ru omondora opakatu mba'e peporanduse che rer pɨpe peü.

¹⁷Ko rese che opokwai: Peyeaɨsu katu ñepëi-pëi.”

¹⁸“Akoi ko ɨvɨ pɨpendar ndapeambotaise, peikwara rumo cheu rane ite yipɨndar egwë e'i yuvɨreko.

¹⁹Peikose ko ɨvɨ pɨpendarse viña, a'ese ava ko ɨvɨ pɨpendar pe raɨsuai etera viña, inungar a'e osaɨsuai oyesuindar yuvɨreko yepi. Che rumo opoporavo ko ɨvɨ pɨpendar pa'ü sui, sese ni'ä ko ɨvɨ pɨpendar ndapeambotai ete yuvɨreko, esepia ni'ä nda'e iri ete peiko ko ɨvɨ pɨpendar.

²⁰Peyemoma'endu'ara ko amombe'u va'ekwer rese kuri: ‘Ndipoi ete ñepëi mbigwai ɨvate katu va'e gwerekwar sui.’ Iyavei che amotare'ɨ̇mbar yuvɨrekoi va'e, pe avei pe amotare'ɨ̇ra yuvɨreko; iyavei pemboyeroyase che ñe'ë, egwë e'i tuprɨ aveira pe mboyeroya ambuae yuvɨreko.

²¹Ko opakatu mba'e che rekokwer sui tëi egwë e'ira yuvɨreko peü, esepia ndoikwai ete ni'ä che mbousar yuvɨreko.”

²²“Che ndayuise añe'e chupe, ndoikwai chietera angaipa yuvɨreko viña. Kurïtëi suive rumo ndovɨrekoi chietera ñeröisa oangaipa rese yuvɨreko;

²³akoi ndache ambotai va'e, che Ru avei oyamotare'ɨ̇ yuvɨreko.

²⁴A'e ndovɨrekoi chietera angaipa yuvɨreko viña, inungar che ndayapoi va'e mba'e ipa'üve yuvɨreko chupe, ambuae rumo ndoyapoi ete ko nungar yepi; kurïtëi rumo osepia ite ko opakatu mba'e yuvɨreko, yepe a'e yuvɨrekoi va'e, ndacheambotai ete che Ru avei evokoiyase oyamotare'ɨ̇ yuvɨreko.

²⁵Ko mba'e oime va'e imboavɨyesa rane itera ñe'ësa ikwachiaprɨ porokwaita pɨpe vɨreko va'e yuvɨreko: ‘Che amotare'ɨ̇ avei che rembiapo e'ɨ̇ pɨpe yuvɨreko.’ ”

²⁶“Akoi ouse rumo Poropɨtɨ̇vɨïsar che Ru suindar a'e che amboura, Espíritu supiete va'e che Ru sui ou va'e, a'e omombe'ura che rekokwer.

²⁷Iyavei pemombe'ura peiko che rekokwer, esepia yɨpɨsuive tuprɨ ite peiko che rupi.”