Read Guarayu JUAN 16 Bible Online

JUAN 16 - Guarayu bible

JUAN 16

¹“Amombe'u akoi peü ndapemokañɨi va'erä pɨ'a ñemoñetasa che rese.

²A'ese pe mombora oɨ judío ñemonu'äsa sui yuvɨreko, iyavei osupitɨse arɨ peyuka agwä yuvɨreko a'e rumo Tüpä upe narä ite egwë yae yaiko e'i yuvɨreko viña.

³Ko oyapora yuvɨreko, esepia ni'ä ndoikwai ete che Ru che avei ndachekwai ete yuvɨreko no.

⁴Amombe'u aipo peü akoi osupitese arɨ, a'ese peyemoma'endu'ara che remimombe'ugwer rese.” “Namombe'ui ete ko mba'e yɨpɨsuive peü, esepia che aikove vɨte ite perese.

⁵Kurïtëi rumo asora che mbousar pɨri, iyavei ndipoi ete ñepëi pepa'ü pendar oporandu va'e kevo aipo eresora e'i va'e cheu;

⁶pe rumo ndapeyembovɨ'aiño, aipo mba'e amombe'use peü.

⁷Supiete aipo a'e peü: avɨye katura che asose pe sui. Esepia ndasoise viña, Poropɨtɨ̇vɨïsar ndoui chietera sekoi va'erä pepɨri; asose rumo che amboura peü narä.

⁸Akoi a'e ouse, opa itera mba'e omboyekwa opakatu ava ɨvɨpɨpendar upe uma angaipa viyar sekoi, iyavei uma ava ndoyavɨi va'e mba'e yuvɨreko, iyavei uma oipɨsɨra Tüpä poromokañɨsa kuri.

⁹Uma pi'ä angaipa viyar sekoi: a'e akoi ndachereroyai va'e yuvɨreko;

¹⁰uma pi'ä ndoyavɨi va'e ite mba'e yepi: che ñoite, esepia asora che Ru rekosave, iyavei a'ese ndache repia iri chietera peye;

¹¹uma pi'ä oipɨsɨra Tüpä poromokañɨsa kuri: a'e akoi oporokwai va'e ko ɨvɨ pɨpe, a'e imondosa itera oiporara va'erä mba'e-mba'e tëi.”

¹²“Areko vɨte ite seta mba'e amombe'u va'erä peü, kurïtëi rumo ndiyai ete sendukwa agwä peü.

¹³Akoi ouse Espíritu supi va'e ite, a'e pembo'era opakatu mba'e supiete va'e rese; esepia noñe'ëi chira a'e oyesui tëi, a'e rumo omombe'ura opakatu mba'e senduprɨ gweraño ite, iyavei oikwa ukara mba'e oime va'erä koiye peü.”

¹⁴A'e omboyekwara che mboeteisa, esepia oipɨsɨra che areko va'e mba'e iyavei a'e oikwa ukara peü.

¹⁵Opakatu mba'e vɨreko va'e che Ru a'e avei cheundar; sese akoi aipo a'e Espíritu oipɨsɨra che areko va'e mba'e, a'e evokoiyase oikwa ukara peü

¹⁶“Ndasetai arɨ rupi, ndache repia iri chira peye, koiye katumi rumo cherepia irira peye.”

¹⁷Evokoiyase oime semimbo'e oporandu-randu oyeupe ae yuvɨreko: — ¿Marä oyapave pi'ä aipo e'i? Ndayasepia iri chira sereko seta arɨ rupi ko'ave, ipare koiye katumi yasepia irira, esepia ni'ä aipo osora Oyesupa rekosave.

¹⁸¿Marä oyapave pi'ä aipo e'i ‘kuri katumi rumo peikwara’? Ndayasendukwai ete rumo mba'e rese oñe'ë yandeu.

¹⁹Jesús rumo oikwa voi ete mba'e rese oyeupe porandu agwä, sese aipo e'i gwemimbo'e upe: — Che akoi aipo a'e peü ndache repia iri chira seta arɨ rupi peye, ipare koiye katumi rumo che repia irira peye a'e akoi peü. ¿Sese vo akoi peporandu peyeupe?

²⁰Supiete aipo a'e peyase'ora iyavei ndapevɨ'ai chira, ava evokoiyase ko ɨvɨ pɨpendar oyembovɨ'aretera yuvɨreko. Yepe ndapevɨ'ai chira viña, pevɨ'are'ɨ̇sa rumo vɨ'aretesa pɨpe oyevɨra koiye.

²¹Inungar akoi ñepëi kuña imembɨrapotase, tasɨ chupe esepia osopitɨ ite arɨ imembɨra agwä; pitani o'a pare rumo, sesarai ovɨ'aretesa pɨpe tasɨkwer sui pitani gweruse ko ɨvɨ pɨpe.

²²Egwë peye aveira kurïtëi ndape yembovɨ'ai chira; che rumo ayevɨ irira perepia, iyavei a'ese pe pɨ'a rorɨvetera, a'e torɨvetesa ndipoi chietera vɨrokwa va'e yuvɨreko pesui.

²³“A'e arɨ pɨpe ndapeporandu iri chietera mba'e rese cheu. Supiete che Ru omboura opakatu mba'e peporanduse che rer pɨpe peü.

²⁴Kurïtëi rumo, ndapeporandu vɨtei ete mba'e rese che rer pɨpe; peporandu katu a'ese peipɨsɨra, ipɨpe sui peikora torɨvetesa avɨye va'e pɨpe.”

²⁵“Amombe'u ni'ä akoi ko tekokwer mboyoyasa peü; oyepotara rumo arɨ a'ese namboyoya iri chira ambuae mba'e rese ko tekokwer, a'ese aikwa uka mba'e peü che Ru rekokwer resendar.

²⁶A'e arɨ pɨpe, peporandura che rer pɨpe mba'e rese; iyavei che aporandura che Ru upe pe rese nda'ei akoi peü,

²⁷esepia che Ru avei peraɨsu pe rereko. Peraɨsu ite esepia ni'ä pe cheraɨsu ite peye, iyavei peroya che ayuse Tüpä sui.

²⁸Äse vɨtu che Ru rovai sui aiko va'erä ko ɨvɨ pɨpe, kurïtëi aseyara ko ɨvɨ ayevɨ va'erä che Ru pɨri vicho.”

²⁹Evokoiyase aipo e'i semimbo'e eta yuvɨreko chupe: — Indo aipo supiete ereñe'ë tuprɨ katu ite, nderemboyoya iri ambuae mba'e rese imombe'u oreu.

³⁰Kurïtëi orosepia ite opakatu mba'e ereikwase iyavei ndiya iri chira revo oporandu iri va'erä mba'e rese yuvɨreko ndeu. Sese ore orovɨroya ite nde ereyuse Tüpä sui.

³¹A'ese Jesús omboyevɨ gwemimbo'e eta upe aipo e'i: — ¿Evokoiyase peroya ite kurïtëi?

³²Osupitɨ ite arɨ, iyavei ko pɨpeve sui ete, opara peyeñomosai ñepëi-pëi peremimbotar rupi che sui, iyavei che reyara che ae peye. Ndaikoi rumo che ae tëi, esepia che Ru sekoi ete che rese.

³³Amombe'u ko opakatu mba'e peü, peiko va'erä che rese mba'e tuprɨ pɨpe pe reko agwä. Ko ɨvɨ pɨpe, pe paraɨsura peiko, peyemongere'ɨ̇ño katu: esepia che opa ite asekopɨ mba'e-mba'e tëi ko ɨvɨ pɨpe.