Read Guarayu JUAN 18 Bible Online

JUAN 18 - Guarayu bible

JUAN 18

¹Ko imombe'u pare, Jesús osë gwemimbo'e eta reseve yuvɨraso va'erä ɨembɨ Cedrón rovai. A'eve oime ñepëi mba'e mitɨ̇ ñachimbrɨ, a'eve Jesús oike gwemimbo'e eta reseve.

²Iyavei Judas, a'e akoi omondo pota va'e yambotare'ɨ̇mbar upe sereko, oikwa avei sekosa, esepia ni'ä seta yupagwer Jesús oñemonu'ä gwemimbo'e eta rese a'eve yepi.

³Egwë e'i Judas oyepota oso sundao re'ɨi reseve iyavei tüpäro rärösar pa'i eta rerekwar fariseo eta remimondo rese avei. A'e yuvɨrekoi oyeepɨsa rese, iyavei opakatu vɨraso gwataendɨ yuvɨreko.

⁴Jesús rumo oikwa ite mba'e opakatu mba'e oime va'erä oyeupe, ichui osë oporandu ava re'ɨi upe: — ¿Ava vo peseka?

⁵A'e omboyevɨ yuvɨreko chupe: — Jesús Nazaret pendar. Jesús aipo e'i: — Che ni'ä a'e aiko. Iyavei Judas imondosar sekoi yamotare'ɨ̇mbar pa'üve.

⁶A'ese aipo e'i Jesús chupe: “Che ite a'e aiko”, a'ese oyevɨpa gwakɨkwei kotɨ ichui rumo opa ovɨ'api ɨvɨve yuvɨreko.

⁷Jesús oporandu iri ava re'ɨi upe: — ¿Ava ite vo peseka? Ipare a'e omboyevɨ iri yuvɨreko chupe: — Jesús Nazaret pendar.

⁸Jesús aipo e'i iri a'e yuvɨrekoi va'e upe: — Amombe'u akoi peü che ni'ä a'e aiko. Che ite che rekase peye, pepokoi rene katu ko yuvɨrekoi va'e rese toyuvɨrasoño.

⁹Ko egwë e'i yavɨye rane itera Jesús remimombe'ugwer aipo e'i va'e: “Che Ru akoi erembou va'e cheu, ndipoi ete ñepëi okañɨ va'e.”

¹⁰Evokoiyase Simón Pedro, vɨreko va'e kɨse, vɨnose ipare oyasɨ'a Malco serer va'e nambi yasu kotɨndar, a'e akoi pa'i eta rerekwar ɨvate katu va'e rembigwai.

¹¹Jesús aipo e'i Pedro upe: — Emboyevɨ kɨse sɨru pɨpe. Che Ru ni'ä ko ombou mba'e yavai va'e cheu, ¿ma'erä vo nañemosaï chira chupe viña?

¹²Evokoiyase sundao re'ɨi gwerekwar reseve, iyavei judío tüpäro rärösar, oipɨsɨ Jesús oipokwa-pokwa yuvɨreko.

¹³Yɨpɨndar vɨraso Anás rëtäve yuvɨreko, esepia a'e Caifás rovayar, a'e aravɨter pɨpe sekoi pa'i rerekwar ɨvate katu va'e.

¹⁴Ko Caifás aipo e'i va'e judío eta upe avɨye katura yandeu omanose ñepëi mbɨa tekwa repɨrä.

¹⁵Simón Pedro iyavei ambuae Jesús remimbo'e yuvɨrasoño ite sakɨkwei. Ambuae semimbo'e rumo oikwa va'e ite pa'i rerekwar ɨvate katu va'e, sese oikeño ite Jesús rupi oɨ pɨpe.

¹⁶Pedro rumo opɨtaño ite okarve okendɨpɨve o'ä. Sese ñepëi Jesús remimbo'e oikwa va'e pa'i rerekwar ɨvate katu va'e osë oñe'ë okendɨpɨ rärösar rese, Pedro moinge agwä rese.

¹⁷Okendɨpɨ rärösar oporandu Pedro upe: — ¿Nda'ei vo nde avei ereiko evokoi ava remimbo'e? Pedro omboyevɨ chupe: — Ani, nda'ei che a'e aiko.

¹⁸A'e Pɨ̇tü pɨpe so'ɨ̇sa iteanga, mbigwai eta iyavei tüpäro rärösar oyatapɨ yuvɨreko, a'eve oyepe'e atɨ yugweru. Pedro avei sekoi ipa'üve, oyepe'e tata ɨpɨve o'ä.

¹⁹Pa'i rerekwar ɨvate katu va'e omboɨpɨ oporandu Jesús upe semimbo'e rese iporombo'esa rese avei.

²⁰Jesús aipo e'i chupe: — Che añe'ë peü opakatu rupi iyavei opakatu ava rovake; esepia aporombo'eño va'e ite oɨ judío ñemonu'äsa rupi iyavei tüpäro pɨpe, a'eve oñemonu'ä judío eta yuvɨreko yepi; egwë a'e nañemi ete mba'e mombe'u.

²¹¿Ma'erä vo cheu tëi peporandu? Peporandu katu che ñe'ë rendusar upe, iyavei a'e tomombe'u mba'e amombe'u va'ekwer. A'e rumo oikwa ite che ñe'ë agwer yuvɨreko.

²²Aipo i'e rese, ñepëi tüpäro rärösar osovapete, aipo e'i chupe: — ¿Aipo ere rutei pa'i rerekwar ɨvate katu va'e upe imboyevɨ?

²³Jesús omboyevɨ chupe: — Akoi añe'ë raise mba'e rese, emombe'u cheu ayavɨse; iyavei akoi añe'ë tuprɨse, ¿ma'erä vo evokoiyase che rovapete eve?

²⁴Evokoiyase Anás oipokwa tuprɨ imondo, Caifás pa'i rerekwar ɨvate katu va'e upe.

²⁵A'ese Pedro ndosɨrɨi ete, oyepe'eño ite tataɨpɨve o'ä. Ipare oporandu yuvɨreko chupe: — ¿Nda'ei vo nde avei ereiko evokoi mbɨa remimbo'e? Pedro ndaikwai va'e, e'iño chupe: — Ani, nda'ei che a'e aiko.

²⁶Ipare oporandu ñepëi pa'i rerekwar ɨvate katu va'e rembigwai chupe, a'e imu akoi Pedro oinambi asɨa va'e aipo e'i: — ¿Avɨye akoi nde ite oroepia va'e mba'e mitɨ̇ rëtä pɨpe supi?

²⁷Pedro ndaikwai va'e e'i iri ete, a'e ramoseve voi takura oñe'ë.

²⁸Ipare vɨraso Jesús Caifás rëtä sui yuvɨreko mborerekwar Roma pendar ñemonu'äsave. Esepia ko'ë ite ou, judío eta rumo ndoyuvɨroikei ete mborerekwar ɨvate katu va'e ñemonu'äsave, yuvɨroikese ndovɨroyai chietera porokwaita yuvɨreko viña iyavei ndoyuvɨro'ui tembi'u Pascua resendar yuvɨreko viña.

²⁹Sese Pilato osë oñe'ë. Aipo e'i ava upe: — ¿Mba'e vo ko mbɨa rembiapo oime naporäi va'e?

³⁰Nda'eise oporapichi va'e viña — ndorogwerui chietera revo ndeu viña — , e'i yuvɨreko chupe.

³¹Pilato aipo e'i ava eta upe: — Peraso, pe ae peyapo mba'e sese peündar mborokwaita rupi. Judío eta rerekwar omboyevɨ yuvɨreko chupe: — Ore oroiko va'e judío ndipotasai ete ñepëi ava yuka agwä.

³²Egwë e'i yavɨye Jesús ñe'ë agwer imano agwä resendar.

³³Pilato oike iri mborerekwar ñemonu'äsave, oñe'ë Jesús upe aipo e'i oporandu chupe: — ¿Nde ite vo ereiko judío Rerekwar ɨvate katu va'e?

³⁴Jesús aipo e'i chupe: — ¿Ndeyesui ete vo aipo ereporandu cheu, anise tie oime ambuae omombe'u va'e che rekokwer ndeu?

³⁵Pilato omboyevɨ chupe: — ¿Che vo judío aiko? Nde rekwa pendar iyavei pa'i eta rerekwar nde reru yuvɨreko cheu. ¿Mba'e vo ereyapo?

³⁶Jesús omboyevɨ chupe: — Che mborerekwasa nda'ei ko ɨvɨ pɨpendar. Egwë e'ise viña, arekora ava ovava va'erä judío upe che repɨsave yuvɨreko viña. Che mborerekwasa nda'ei ko'a pendar.

³⁷Evokoiyase Pilato oporandu iri chupe: — ¿Nde ite katu mborerekwar ɨvate katu va'e ereiko? Jesús omboyevɨ chupe: — Nde ite ni'ä aipo ere cheu: che ni'ä mborerekwar ɨvate katu va'e. Che ayesu iyavei ayu ko ɨvɨ pɨpe amombe'u va'erä mba'e supi va'e ete. Iyavei opakatu vɨroya va'e ñe'ësa supi va'e ite, a'e osenduño avei che ñe'ë yuvɨreko.

³⁸Pilato aipo e'i chupe: — ¿Mba'e vo aipo supiete va'e? Ko rese porandu pare, Pilato osë iri oñe'ë va'erä judío eta rese, aipo e'i: — Che ndayosɨi ete ñepëi mba'e ko mbɨa rembiavɨ.

³⁹Pe rumo peikwa amosese ñepëi ava sokendaprɨ Pascua pieta pɨpe yepi: ¿Peipota vo amose va'erä judío Rerekwar ɨvate katu va'e?

⁴⁰Opakatu säse gwasuño yuvɨreko: — ¡Evokoi ani! ¡Barrabás katu emose! Barrabás rumo imondarai va'e sekoi.