Read Guarayu JUAN 19 Bible Online

JUAN 19 - Guarayu bible

JUAN 19

¹Evokoiyase Pilato oporokwai Jesús nupä uka agwä.

²Ichui sundao eta omonde Jesús akä rese yu pɨaprɨ yuvɨreko, ipare omboyemonde turukwar piräumbɨ va'e pɨpe.

³Ipare oyemboya yuvɨreko sese aipo e'i: — ¡Imboeteiprɨ tasekoi judío eta Rerekwar! Ichui osovapete-pete yuvɨreko.

⁴Pilato evokoiyase osë iri, aipo e'i ava eta upe: — Pesepia aru ko'ave, peikwa va'erä che ndayosɨi ete ñepëi mba'e sembiavɨ.

⁵A'ese Jesús vɨñose seru oakä rese yu pɨaprɨ iyemondesa turukwar piräumbɨ va'e avei. A'ese Pilato aipo e'i: — ¡Ndo ko akoi a'e mbɨa!

⁶Osepiase rumo pa'i eta rerekwar iyavei sundao eta tüpäro rärösar, omboɨpɨ gwasë yuvɨreko: — ¡Tayatɨkasa! ¡Tayatɨkasa! Pilato aipo e'i ava eta upe: — Peraso peyatɨka pe ae, esepia che ndayosɨi ete ñepëi mba'e sembiavɨ naporäi va'e.

⁷Judío eta rerekwar omboyevɨ yuvɨreko chupe: — Ore rumo orovɨreko ñepëi mborokwaita, iyavei aipo e'i ore mborokwaita pɨpe omanoño itera, esepia oyeapo a'e ae tëi Tüpä Ra'ɨrɨ nungar.

⁸Aipo ñe'ësa renduse, Pilato oyembosɨkɨye katu iri.

⁹Koiye oike iri mborerekwar oɨ ñemonu'äsa pɨpe aipo e'i oporandu Jesús upe: — ¿Ke pendar ite vo nde ereiko? Jesús nomboyevɨ iri ete iñe'ë chupe.

¹⁰Pilato aipo e'i chupe: — ¿Evokoiyase nderemboyevɨi chietera ñe'ësa cheu? ¿Ndereikwai vo che mborerekwar aiko nde atɨka uka agwä, mba'e tëi sui nde renose agwä avei?

¹¹A'ese Jesús omboyevɨ chupe: — Ani ndererekoi chietera ñepëi nde mborerekwasa che arɨve, iyavei Tüpä nomondoise ndeu mba'e apo agwä viña; evokoi rumo, che mondosar ndeu a'e oyemboangaipa katu itera ndesui.

¹²A'e ramo seve, Pilato oseka iri tëi Jesús renose agwä; judío eta rumo säse pirätä ñoite yuvɨreko chupe: — ¡Akoi eremosese ko mbɨa, nda'ei chietera nde mborerekwar ɨvate katu va'e mborɨpar ereiko! ¡Iyavei oyemomborerekwa tëi va'e, a'e yuvɨrekoi mborerekwar ɨvate katu va'e amotare'ɨ̇mbar tëi!

¹³Pilato, osenduse aipo ñe'ësa, a'ese vɨnose uka Jesús okarve, ipare ogwapɨ mborerekwar ɨvate katu va'e rendave, a'eve aipo hebreo ñe'ë pɨpe aipo e'i Gabatá Ita Apoprɨ oya.

¹⁴Ipane vɨtese ñepëi arɨ Pascua pieta agwä, vɨrovɨse aipo mbɨter arɨ. A'ese Pilato aipo e'i judío eta upe: — ¡Ndo ko pe rerekwar sekoi!

¹⁵A'e rumo säse pirätä yuvɨreko: — ¡Töse! ¡Töse! ¡Tayatɨkasa kurusu rese! Pilato oporandu ava eta upe: — ¿Peipota vo yatɨkasa kurusu rese pe rerekwar ɨvate katu va'e? Iyavei pa'i eta rerekwar omboyevɨ yuvɨreko chupe: — ¡Ore ndorovɨreko iri ete ambuae mborerekwar ɨvate katu va'e Roma pendar sui!

¹⁶A'ese Pilato omondo Jesús ava eta upe yatɨka uka agwä kurusu rese, ipare rumo a'e vɨraso yuvɨreko.

¹⁷Jesús vɨnose kurusu seraso, “Ava Akä kangwer” serer va'e save (a'e serer hebreo ñe'ë pɨpe Gólgota).

¹⁸A'eve oyatɨka kurusu rese yuvɨreko, seseve avei oyatɨka ñuvɨrïo ava yuvɨreko, ñepëi-pëi yɨke ɨvɨi, evokoiyase Jesús opɨta mbɨterve.

¹⁹Pilato oikwachia ñepëi ikwachiaprɨ imondo kurusu rese aipo e'i: “Jesús Nazaret ɨgwar, judío Rerekwar ɨvate katu va'e.”

²⁰Seta iteanga judío oyerokɨ ko ikwachiaprɨ rese yuvɨreko, esepia Jesús atɨkasa namombrɨimi ete tekwa sui, ikwachiasa hebreo, latín iyavei griego ñe'ë pɨpe.

²¹Sese pa'i eta rerekwar judío, aipo e'i Pilato upe yuvɨreko: — Ani ereikwachia: ‘Judío Rerekwar ɨvate katu va'e’, iya rumo ereikwachia: ‘A'e ae tëi oyeapo pota va'e judío Rerekwar gwä’.

²²Pilato omboyevɨ ava eta upe: — Ko aikwachia va'e, egwë e'iño itera opɨta öi.

²³Koiye rumo sundao eta Jesús atɨka pare, omonu'äpa iturukwar yuvɨreko ipare omboya'o-ya'o oyakatu ñepëi-pëi irugätu sundao yuvɨrekoi va'e. Oipɨsɨ avei iturukwar yo'asa i'arɨ pendar ñepëi reseve puku nimbovɨvɨsai va'e,

²⁴sundao eta aipo e'i oyeupe yuvɨreko: — Ani yamondoro; iya yandegwayɨño sese, ikwa agwä uma pi'ä oipɨsɨra. Egwë e'i yavɨye Ikwachiaprɨ pɨpe aipo e'i va'e: “Omboya'o-ya'o che turukwar oyeupe narä igwayɨ tëi avei che turukwar arɨ pendar rese yuvɨreko.” Ko oyapo va'e sundao yuvɨreko.

²⁵Jesús atɨkasave sekoi ichɨ, iyavei ichɨ kupɨ'ɨrɨ, María, Cleofás rembireko, María Magdalena avei.

²⁶Osepiase rumo Jesús osɨ, iyavei ñepëi gwemimbo'e osɨ ɨpɨve a'e sembiaɨsu katu va'e yepi, a'ese aipo e'i osɨ upe: — Itöi, evokoi erereko nde membrɨ.

²⁷Ipare aipo e'i gwemimbo'e upe: — Evokoi erereko nde sɨ. Ichuive tuprɨ, semimbo'e vɨraso ichɨ gwëtäve.

²⁸Ko ipare rumo, Jesús oikwa ite opakatu mba'e imombe'uprɨ yavɨyepase, iyavei yavɨye rane itera Ikwachiaprɨ pɨpendar, aipo e'i va'e: — Che usei.

²⁹A'eve oime ñepëi mba'e rɨru savapɨpo tuprɨ uva rɨgwer sai va'e öi. Ipare omoakɨ̇ ñepëi mba'e saviyu va'e uva rɨkwer pɨpe yuvɨreko, oñapɨ̇chi ñepëi ɨvɨra rese imondo iyuru rese.

³⁰Jesús oɨ'u uva rɨkwer sai va'e aipo e'i: — Opakatu ite mba'e yavɨye. Ipare voi ñakäɨvɨso omano.

³¹Ipanese ñepëi arɨ Pascua pieta agwä, a'ese judío eta ndoipotai ete opɨta va'erä ava retekwer kurusu rese mbɨtu'usa arɨ pɨpe yuvɨreko, esepia a'e mbɨtu'usa arɨ pɨpe imboeteisa gwasu va'e ite yepi. Sese Pilato upe oporandu yuvɨreko a'e oyokwai va'erä kurusu rese yatɨkaprɨ retɨ̇ma mopë agwä iyavei setekwer vɨroyɨ va'erä kurusu sui yuvɨreko.

³²A'ese sundao yuvɨraso yɨpɨndar chini va'e retɨ̇ma mopëpa yuvɨreko, ambuae yatɨkaprɨ Jesús rese yuvɨnoi va'e avei.

³³Oyemboyase rumo Jesús rese, omano ite e'i sepiase yuvɨreko chupe. Sese nomopëi ete setɨ̇ma yuvɨreko.

³⁴Ñepëi sundao pa'ü pendar oyɨke kutu ñepëi mba'e sakwävi va'e pɨpe, a'e ramoseve voi osë suvɨ ɨ reseve ichui.

³⁵Ko asepia va'e ite amombe'u peü, pe seroya agwä; che aikwa ite sese amombe'u mba'e supiete va'e, egwë peye aveira pe seroya agwä.

³⁶Esepia ko mba'e oime va'e yavɨye rane itera Ikwachiaprɨ pɨpe aipo e'i va'e: “Nomopëi chietera ñepëi ikangwer yuvɨreko.”

³⁷Iyavei ambuae pɨpe, Ikwachiaprɨ aipo e'i: “Osepiara ava eta ikutuprɨ yuvɨreko.”

³⁸Ko ipare José, tekwa Arimatea pendar, oporandu Pilato upe Jesús re'ögwer reraso agwä rese. Esepia ni'ä José Jesús rupindar avei. Ndoyekwa ukai rumo osɨkɨyepave mborerekwar judío eta upe. Pilato evokoiyase avɨye e'i chupe, ipare José vɨraso se'ögwer.

³⁹Nicodemo avei ñepëi pɨ̇tü oso oñe'ë Jesús rese, oyepota oso treinta sa'ämbrɨ rupindar mba'e sɨäkwä va'e imboyese'aprɨ mirra, iyavei áloe rese.

⁴⁰A'ese, José iyavei Nicodemo vɨraso Jesús re'ögwer oimama tuprɨ turukwar imoakɨ̇prɨ mba'e sɨäkwä va'e pɨpe. Egwë e'i ete judío rekokwer omano va'e ñotɨ̇ agwä yuvɨreko yepi.

⁴¹A'eve Jesús oyatɨka yuvɨreko oime ñepëi mba'e mitɨ̇ rëtä, ipɨpeve avei oime ñepëi tuvɨpa ndiporusai va'e a'eve nomondo vɨtei ete te'ögwer ipɨpe yuvɨreko.

⁴²A'e ipɨpe omondo Jesús re'ögwer yuvɨreko, esepia tuvɨpa köimi ete ichui vɨrovɨ avei arɨ mbɨtu'usa judío eta upe yuvɨreko.