Read Guarayu JUAN 4 Bible Online

JUAN 4 - Guarayu bible

JUAN 4

¹Fariseo eta oyandu yuvɨreko Jesús vɨreko katuse ava oyeupi ogwata va'e oporoapirämo katuse avei Juan sui

²(yepe nda'ei ete Jesús oporoapirämo; semimbo'e tëi rumo egwë e'i yuvɨreko).

³Jesús oikwase aipo nungar osë Judea sui, oyevɨ iri agwä Galilea ve.

⁴Ogwatasa rupi, osasara ɨvɨ Samaria oso.

⁵Egwë e'i oyepota ñepëi tekwa Samaria ve oso a'e serer Sicar, a'e tekwa rerovɨkave oime ɨvɨ Jacob omondo va'ekwer gwa'ɨrɨ José upe araka'e.

⁶A'eve oime ɨvɨkwar Jacob ɨgwagwer. Jesús okweraise perɨ rupi ogwapɨ ɨgwa popɨve öi. Vɨrovɨse mbɨter arɨ.

⁷Semimbo'e eta rumo opakatu yuvɨraso tekwave mba'e tembi'u rerokwa. A'eseve ñepëi kuña Samaria pendar oyepota ɨgwave ɨ renose agwä, a'ese Jesús aipo e'i chupe: — Emboumi chi'ï nde ɨ taɨ'u.

⁸

⁹Esepia judío noñe'ëi va'e Samaria pendar rese oyeupe yuvɨreko yepi, a'e kuña rumo omboyevɨ chupe: — ¿Ma'erä vo aipo nde, embou ɨ taɨ'u ere cheu nde rumo judío ereiko, che Samaria pendar aiko?

¹⁰Jesús omboyevɨ chupe: — Ereikwase Tüpä porerekosa ndeundar viña iyavei ereikwase a'e ava ndeu ɨ rese oporandu va'e, nde evokoiyase ereporandura sese chupe, a'e evokoiyase omondora ɨ ndopai va'e ndeu viña.

¹¹A'e kuña aipo e'i chupe: — Evokoiyase nde, mba'e pɨpe vo ɨ erenoserä, iyavei ko ɨgwa ipɨkuku iteanga: ¿kesui vo aipo eremboura ɨ ndopai va'e cheu?

¹²Esepia ko ɨgwa ore ramoi Jacob oseya oreu, ko'ave suiño ni'ä oɨ'u ta'ɨrɨ avei oɨ'u yuvɨreko iyavei opakatu seimba. ¿Nde pi'ä ɨvate katu ereiko ichui?

¹³Jesús omboyevɨ chupe: — Opakatu ava oɨ'u va'e ko ɨ, i'useiño itera yuvɨreko;

¹⁴akoi ava oɨ'u va'e rumo ɨ che remimondo, ndi'use iri chietera. Esepia che amondo va'e ɨ ndopai va'erä ite a'e omboura tekovesa ndopai va'e ava upe.

¹⁵A'e kuña aipo e'i chupe: — Nde ava, emboumi a'e ɨ cheu, ndache usei irie'ɨ̇ agwä, tayevɨ iri eme ko'ave ɨ renose.

¹⁶Jesús aipo e'i chupe: — Eso tereñe'ë nde mer upe ipare eyevɨ ko'ave.

¹⁷A'e kuña omboyevɨ chupe: — Ndarekoi rumo che mer. Jesús aipo e'i chupe: — Supiete aipo ere ndererekoi ete nde mer;

¹⁸esepia, poyandepo tuprɨ erereko nde mer kurïtëi erereko va'e nda'ei avei nde mer. Supiete aipo ere.

¹⁹Aipo osenduse, a'e kuña aipo e'i chupe: — Nde ava, avɨye moko Tüpä ñe'ë mombe'usar ereiko cheu.

²⁰Ore ramoi eta, Samaria ɨgwar omboetei Tüpä ko'ave yuvɨreko yepi, ko ka'a ɨvɨtrɨ rese; pe rumo judío peiko va'e aipo peye, Jerusalén ve ñoite yamboeteira Tüpä.

²¹Jesús omboyevɨ chupe: — Che reroya eve kuña, vɨrovɨ arɨ peü peso iri e'ɨ̇ agwä Tüpä mboetei ko ka'a ɨvɨtrɨ rese iyavei Jerusalén ve.

²²Pe ndapeikwai ete ava upe peyerure; ore rumo oroikwa ava upe oroyerure, esepia pɨsɨrösa ou judío sui ete.

²³Oyepota rumo arɨ ipapaprɨ, iyavei a'e ite ko kurïtëi, akoi oyerure supiete va'e Tüpä upe imboeteisave yuvɨreko opɨ'a katuprɨsa pɨpe, Tüpä rembiapo katuprɨsa Espíritu rupi. Supiete Tüpä oipota yaposa ko rupi imboetei agwä.

²⁴Esepia Tüpä ni'ä Espíritu sekoi, sese akoi omboetei va'e oyapora Tüpä Espíritu pɨpe supi tuprɨ va'e ite yuvɨreko.

²⁵A'e kuña aipo e'i chupe: — Che aikwa Poropɨsɨrösar yu agwä (a'e Cristo); iyavei akoi a'e ouse, omombe'u tuprɨra opakatu mba'e oreu.

²⁶Jesús aipo e'i chupe: — Che ni'ä a'e aiko, a'e avei ko oñe'ë nderese.

²⁷A'eseve semimbo'e eta oyevɨ yugweru, ndoyembovɨ'ai tëi yuvɨreko Jesús oñe'ëse kuña rese. Ndipoi ete rumo oporandu va'e chupe mba'e vo evokoi oipota, mba'e rese vo eremoñeta evokoi kuña e'i va'e chupe.

²⁸A'e kuña oseya tuprɨño okambuchi oso tekwave, aipo e'i ava eta upe:

²⁹— Perio, tapesepia pe ñepëi ava opakatu tuprɨ omombe'u mba'e che rembiapokwer cheu. ¿Nda'ei pi'ä a'e Poropɨsɨrösar?

³⁰Evokoiyase ava re'ɨi yuvɨnosë tekwa sui, yuvɨraso Jesús rekosave.

³¹Semimbo'e eta aipo tëi yuvɨreko chupe: — Porombo'esar, ekarumi tëi rane.

³²A'e rumo aipo e'i: — Che areko ambuae mba'e che movɨräkwä agwä, a'e pe ndapeikwai va'e.

³³Semimbo'e eta aipo i'ese oporandu-randu tëi oyeupe yuvɨreko: — ¿Oime pi'ä ava gweru va'e mba'e semi'urä?

³⁴Evokoiyase Jesús aipo e'i: — Che movɨräkwäsa rumo che mbousar porokwaita a'e ayapora iyavei amboavɨye rane itera iporavɨkɨ.

³⁵Pe aipo peye: ‘Ipane vɨte irugätu yasɨ mba'e mitɨ̇ a monu'ä agwä’; che rumo aipo a'e peü pema'e kwa mba'e mitɨ̇ rese, esepia a'e yavɨyepa ite imonu'ä pɨrä.

³⁶Akoi oporavɨkɨ va'e mba'e monu'äsa rese a'e oipɨsɨra seprɨ, iyavei mba'e semimonu'äprɨ a'e imonu'äsa tekovesa apɨre'ɨ̇ upe narä, evokoiyase mba'e mitɨ̇ ñotɨ̇sar iyavei imonu'äsar rese oyoya oyembovɨ'a retera yuvɨreko.

³⁷Supiete ko ñe'ësa aipo e'i va'e, ‘Ñepëi oma'etɨ̇ va'e ambuae evokoiyase imonu'äsar sekoi.’

³⁸Che opokwai mba'e mitɨ̇ monu'ä agwä a'e mboravɨkɨ pe ndapeyapoi va'e; ambuae rumo oporavɨkɨ ite yuvɨreko sese, pe evokoiyase peipɨsɨ tëi iporavɨkɨ agwer.

³⁹Seta ava tekwa Samaria pendar vɨroya Jesús yuvɨreko kuña ñe'ë sui: “Opakatu tuprɨ omombe'u mba'e che rembiapo cheu.”

⁴⁰Evokoiyase oyepota atɨ Samaria pendar yugweru epɨta orepɨri Jesús e'i yuvɨreko chupe. A'e opɨta a'eve ñuvɨrïo arɨ,

⁴¹iyavei seta katu iri ava vɨroya va'e iñe'ë osenduse yuvɨreko.

⁴²Ichui aipo e'i kuña upe yuvɨreko: — Kurïtëi orovɨroya ite, nda'ei nde ñe'ë sui gweraño, esepia ore ite orosendu iñe'ë, oroikwa avei a'e supiete Poropɨsɨrösar sekoi ɨvɨ pendar.

⁴³Ñuvɨrïo arɨ pare, Jesús osë ɨvɨ Samaria sui ipare oso ɨvɨ Galilea ve.

⁴⁴Esepia a'e ite aipo e'i, Tüpä ñe'ë mombe'usar ndasaɨsusai iɨvɨ rese yuvɨreko yepi.

⁴⁵Oyepotase Galilea ve oso, a'e pendar ava oipɨsɨ tuprɨai yuvɨreko, esepia seta avei yuvɨraso Pascua pieta repia Jerusalén ve iyavei osepia opakatu mba'e sembiapokwer yuvɨreko a'eve.

⁴⁶Evokoiyase Jesús oyevɨ oso tekwa Caná Galilea ɨvɨ rese, a'eve akoi ɨ oyapo va'e uva rɨkwer. Iyavei a'eve oime ñepëi sundao rerekwar ɨvate katu va'e mborerekwar ɨvate katu va'e ɨvɨrindar, a'e vɨreko Cafarnaúm ve gwa'ɨrɨ imba'easɨ va'e.

⁴⁷Oyanduse ko sundao rerekwar Jesús yepota Judea sui ɨvɨ Galilea ve, a'e ramoseve oso voi seka, toso che rëtäve tombogwerami che ra'ɨrɨ omano pota va'e cheu oyapave.

⁴⁸Jesús omboyevɨ chupe: — Pe ndache reroyai ete peye, ndapesepiaise mba'e poromondɨisa che rembiapo.

⁴⁹Sundao rerekwar aipo e'i chupe: — Che Yar, eyu poyavañomi tëi, omano tëira che ra'ɨrɨ.

⁵⁰Evokoiyase Jesús aipo chupe: — Eyevɨ nde rëtäve eso; kurïtëi nde ra'ɨrɨ okwera ite. A'e mbɨa vɨroya ite aipo e'ise Jesús chupe, ipare oso gwëtäve.

⁵¹Oyevɨse oso gwëtäve, sembigwai ñuvɨnose voi sovaïchi aipo e'i yuvɨreko chupe: — ¡Nde ra'ɨrɨ okwera kurïtëi!

⁵²A'e rumo oporandu mba'e arɨ pɨpe tuprɨ vo omboɨpɨ okwera che ra'ɨrɨ, a'e omboyevɨ yuvɨreko chupe: — Irapɨpe ka'aruse, mbɨter arɨ paremi, ndaso'ɨ iri ete.

⁵³A'ese iyesupa ipɨ'añemoñeta a'e arɨ rupi tuprɨ Jesús aipo e'i va'ekwer rese chupe: “Nde ra'ɨrɨ okwera ite kurïtëi”; a'ese a'e mbɨa opakatu omu eta reseve vɨroya Jesús yuvɨreko.

⁵⁴Ko imoñuvɨrïosa poromondɨisa oyapo Jesús, gwekokwer kwa uka agwä ɨvɨ Judea sui oyevɨse Galilea ve.