Read Guarayu JUAN 5 Bible Online

JUAN 5 - Guarayu bible

JUAN 5

¹Koiye katu rumo, judío omboetei opieta gwasu yuvɨreko, ipare oyevɨ Jesús Jerusalén ve oso.

²Jerusalén rokendɨpɨ rerovɨka sui oime Ovesa serer va'e, a'eve oime ñepëi ɨvɨkwar ɨ vɨreko va'e, serer hebreo ñe'ë pɨpe Betzatá. A'e vɨreko poyandepo tuprɨ okendɨpɨ oyese,

³a'eve yuvɨrekoi seta imba'easɨ va'e, ndasesapɨsoi va'e, ndogwatai va'e, ndipɨndugwei va'e avei a'e ɨvɨ rupi päve tëi ikwai.

⁴Esepia amove tëi mbigwai ɨva pendar ogweyɨ ɨvɨkwarve ɨ movɨi agwä, akoi a'e rane okui va'e ɨ ñemovɨi seve okwera voi ete omba'erasɨsa sui.

⁵A'eve oime ñepëi mbɨa ipa'ü pendar vɨreko va'e omba'erasɨsa treinta y ocho aravɨter rupi.

⁶Jesús rumo osepiase a'eve supave tuise oikwa voi ete vɨreko pukuse omba'erasɨsa oyese, a'e oporandu chupe: — ¿Ereipota vo nde kwera agwä?

⁷Imba'easɨ va'e omboyevɨ chupe: — Che Yar, ndipoi ete ñepëi ava che mongui va'erä ɨ pɨpe oñemomɨise. Asä'a tëi ndaikatui rumo, ambuae rane yuvɨrokuiño yuvɨreko che sui.

⁸Jesús aipo e'i imba'easɨ va'e upe: — Epü'a, esupi nde rupa egwata.

⁹A'e ramoseve a'e mbɨa okwera tuprɨ, osupi vupa ichui omboɨpɨ ogwata oiko. A'e mbɨtu'usa arɨ pɨpe tuprɨ egwë e'i,

¹⁰evokoiyase judío aipo e'i okwera va'ekwer upe yuvɨreko: — Ko pɨpe rumo mbɨtu'usa arɨ, nande kwaitai nde rupa rese ndevosɨi agwä.

¹¹A'e mbɨa rumo omboyevɨ chupe: — Che mbogwerasar aipo e'i cheu: ‘Esupi nde rupa egwata’

¹²A'e rumo oporandu yuvɨreko chupe: — ¿Uma vo aipo e'i ndeu: ‘Esupi nde rupa egwata’?

¹³A'e mbɨa rumo ndoikwa iri ombogwerasar, esepia Jesús avɨyeteramo tëi ndoyekwa iri ava re'ɨi pa'üve.

¹⁴Koiye Jesús osepia tüpäro pɨpe, aipo e'i chupe: — Ereikwa ko nde kwerasa kurïtëi, ani ereyemboangaipa iri, mba'e tëi pɨpe nde vɨapi e'ɨ̇ iri agwä.

¹⁵A'e mbɨa evokoiyase oso opa omombe'u judío eta upe evokoi Jesús ni'ä che mbogwera oya.

¹⁶Sese judío osakɨkwei moña Jesús yuvɨreko, esepia a'e oyapo mbɨtu'usa arɨ pɨpe porombogwerasa.

¹⁷Jesús rumo aipo e'i chupe: — Che Ru ni'ä oporavɨkɨño va'e ite, che egwë a'e tuprɨ avei aporavɨkɨ.

¹⁸Aipo iñe'ë rese, judío eta oipota ite yuka agwä yuvɨreko, esepia nda'ei mbɨtu'usa arɨ gweraño nomboyeroyai, a'e rumo oyeapo tëi Tüpä nungar Tüpä che Ru e'i tëi oiko.

¹⁹Jesús aipo e'i: “Supiete aipo a'e Tüpä Ra'ɨrɨ ndoikatui ete mba'e apo oyesui tëi; a'e oyapo mba'e osepia va'e Vu rembiapo yepi. Opakatu oyapo va'e iyesupa, egwë e'i tuprɨ avei Ta'ɨrɨ yapo.

²⁰Esepia Iyesupa osaɨsu ite Gwa'ɨrɨ omboyekwa avei opakatu mba'e gwembiapo chupe; omboyekwa vɨte aveira mba'e poromondɨisa tuvicha katu va'e, a'e ndapembovɨ'ai chira pe rereko.

²¹Esepia inungar che Ru ombogwerayevɨ omano va'e iyavei omondo tekovesa chupe. Egwë e'i avei Ta'ɨrɨ omondo tekovesa ava upe gwemimbotar rupi.

²²Iyavei che Ru ndoporandui chietera mba'e rese peü, esepia a'e ombou Gwa'ɨrɨ upe opakatu pirätäsa ava upe mba'e rese porandu agwä,

²³egwë e'ira opakatu Che mboetei agwä inungar omboetei che Ru yuvɨreko. Akoi ndache mboetei va'e, egwë e'i avei che Ru mboetei e'ɨ̇, a'e ni'ä che mbousar.”

²⁴“Supiete aipo a'e peü akoi oyapɨsaka va'e che ñe'ë rese iyavei vɨroya va'e che mbousar, a'e vɨrekora tekovesa apɨre'ɨ̇; iyavei nda'ei chietera imokañɨpɨ̇ra, esepia osë a'e manosa sui oipɨsɨ tekovesa apɨre'ɨ̇.

²⁵Supiete aikwa uka peü oura arɨ imombe'uprɨ, iyavei kurïtëiete ko arɨ oyepota, omano va'ekwer osendura Tüpä Ra'ɨrɨ ñe'ë yuvɨreko; iyavei osendu va'e yuvɨrekove ñoitera.

²⁶Esepia inungar tuprɨ che Ru vɨreko tekovesa oyese, egwë e'i tuprɨ avei imbou Che areko va'erä tekovesa che yese,

²⁷ombou avei che mborerekwarä ava rekokwer rese porandu agwä, esepia che ava ɨvate katu va'e Ra'ɨrɨ aiko.

²⁸Peyepɨ'ämondɨi rene aipo che esa sui, esepia oyepotara arɨ imombe'uprɨ a'ese opakatu ava omano va'ekwer osendura che ñe'ë yuvɨreko

²⁹iyavei yuvɨnosepara tuvɨpa sui. Oyapo tuprɨ va'e mba'e yuvɨreko, a'e okwerayevɨra tekovesa apɨre'ɨ̇ rereko agwä; akoi oyapo va'e mba'e naporäi va'e, a'e okwerayevɨra yuvɨreko ñemoɨrösa pɨsɨ agwä tëi.”

³⁰“Che ndaikatui mba'e apo cheyesui tëi. Che ayapo mba'e che Ru remimbotar rupi, iyavei mba'e che porandusa supi va'e ite, esepia ndayapoi mba'e che remimbotar tëi che Ru remimbotar rupi ete ayapo vichiko, a'e ni'ä che mbousar sekoi.

³¹Akoi añe'ëse che yese tëi, a'ese añe'ë va'e ndape royai chietera.

³²Oime rumo ambuae che mombe'usar, a'e supiete che mombe'u pe seroya agwä.

³³Pe ni'ä, pemondo ava Juan upe imboporandu mba'e rese. A'e semimombe'u ni'ä supi tuprɨ va'e ite.

³⁴Yepe a'e supiete viña, che rumo ndayeroyai ava tëi che mombe'usa rese. Che rumo aipota peñepɨsɨrö agwä sese aipo a'e peü.

³⁵Juan ni'ä inungar tataendɨ, egwë e'i omboyekwa mba'e supiete va'e. Sese peyembovɨ'a raimi tëi iporombo'esa tesapesa nungar pɨpe peiko.

³⁶Che rumo areko che yekwa ukasar avɨye katu va'e Juan sui. A'e ni'ä ko mba'e ayapo va'e yepi. A'e sese che Ru chekwai yapo agwä. Ko mba'e ayapo va'e omboyekwa ite che Ru Tüpä che mbousar.

³⁷Che Ru avei ete chekwa ukasar, a'e iñe'ë rumo ndapesendui va'e ite, iyavei ndapesepiai ete,

³⁸iñe'ëngagwer ikwachiaprɨ avei ndoikei ete pe rese, ipɨpe ni'ä ndache reroyai ete peye che Ru che mbouse.

³⁹Peyembo'e tuprɨ ite Ikwachiaprɨ rese, ipɨpe sui revo tekovesa apɨre'ɨ̇ yarekora peye viña; ko rumo Ikwachiaprɨ che mombe'u va'e,

⁴⁰pe rumo ndapeyu potai ete cheu ko tekovesa apɨre'ɨ̇ rereko agwä.”

⁴¹“Ndaipɨsɨi ete ava che mboeteisa tëi.

⁴²Opokwa avei Tüpä ndapesaɨsuise.

⁴³Che ni'ä ayu che Ru rer pɨpe, pe rumo ndache reroyai ete peye; ouse rumo ambuae ava oyesui tëi oñe'ë va'e, evokoi nungar tëi peroyara.

⁴⁴¿Ndapeikatui ete che reroya agwä peye, esepia pe ae tëi peyemboetei; ndapesekai ete Tüpä ñepëi va'e suindar yemboeteisa?

⁴⁵Ndapepɨ'a ñemoñetai chira che pe rekokwer mombe'u agwä rese che Ru rovai; Moisés peroya va'e ite ni'ä oikwachia pe Tüpä reroya e'ɨ̇sa chupe imombe'u agwä.

⁴⁶Peroyase rumo Moisés ñe'ë viña, che avei che reroyara peye viña, esepia Moisés ni'ä oikwachia che resendar ñe'ësa.

⁴⁷Ndaperoyaise a'e sembikwachia, ¿marä peyera vo evokoiyase che amombe'u va'e reroya agwä viña?”