Read Guarayu JUAN 6 Bible Online

JUAN 6 - Guarayu bible

JUAN 6

¹Ko ipare, Jesús osasa ambuae ɨpa Galilea ve oso, a'e serer avei Tiberias.

²Ava re'ɨi yuvɨraso sakɨkwei, esepia osepia ite yuvɨreko oyapose mba'e poromondɨisa imba'easɨ va'e mbogwerase.

³Evokoiyase Jesús oyeupi ñepëi ɨvɨtrɨ rese, a'eve ogwapɨ opakatu gwemimbo'e eta reseve yuvɨnoi.

⁴Vɨrovɨ ite judío pieta Pascua resendar.

⁵Jesús oma'ese ava re'ɨi oyeupindar rese, a'ese aipo e'i Felipe upe: — ¿Ke sui vo yarokwara mba'e tembi'u ko opakatu ava upe narä?

⁶Ko aipo e'i mba'e pi'ä omboyevɨra Felipe oyapave tëi, esepia Jesús oikwa ite mba'e gwembiaporä.

⁷Evokoiyase Felipe omboyevɨ chupe: — Doscientos arɨ rupindar gwarepochi ndosupitɨi chietera mboyape rerokwa agwä oipɨsɨ va'erä chi'ï-chi'ïmi rupi ava yuvɨreko viña.

⁸Evokoiyase Andrés, a'e ambuae semimbo'e iyavei Simón Pedro rɨvrɨ, aipo e'i chupe:

⁹— Ko'ave oime ñepëi chi'ïvä'e vɨreko poyandepo mboyape, iyavei ñuvɨrïo pira, ¿iyakatura pi'ä ko ava retakwer?

¹⁰Jesús omboyevɨ: — Pemombe'u opakatu upe togwapɨpa yuvɨreko. Kapi'i reimesave opa ogwapɨ yuvɨreko, setakwer cinco mil kuimba'e.

¹¹Evokoiyase Jesús oipɨsɨ opove poyandepo mboyape, avɨye ndeu o'e pare Tüpä upe, opa ombo'i-mbo'i imondo ava re'ɨi upe. Egwë e'i tuprɨ avei pira upe, imondopa semimbotar rupi.

¹²Opase ava i'ɨ̇tarö, Jesús aipo e'i gwemimbo'e eta upe: — Pemonu'äpa sumbɨrer, iyemombuka e'ɨ̇ agwä.

¹³A'e opa omonu'ä, iyavei omboapɨpo opayandepo yovaive ñuvɨrïo ɨruova sumbɨrer mboyape poyandepo va'e sui yuvɨreko.

¹⁴Evokoiyase ava, ko poromondɨisa gwasu Jesús rembiapo repiase, aipo e'i yuvɨreko: — Supiete ko Tüpä ñe'ë mombe'usar sekoi ou va'evɨ ko ɨvɨ pɨpe.

¹⁵Jesús rumo oikwa voi ete opɨ'a pɨpe vɨraso pota agwä mborerekwar ɨvate katu va'e gwereko agwä, oyepepɨ ichui a'ese oyeupi iri oso ɨvɨtrɨ ɨvate katu va'e save, a'e ae gweko agwä.

¹⁶Pɨ̇tü ramose, Jesús remimbo'e eta ogweyɨ yuvɨraso ɨpave,

¹⁷yuvɨro'a ɨarusu pɨpe omboɨpɨ sasa tekwa Cafarnaúm ve yuvɨraso. A'ese pɨ̇tü ite. Jesús rumo ndoyevɨ vɨtei ete.

¹⁸A'ese, ɨvɨtu omboɨpɨ oipeyu pirätä iyavei ɨ o'ɨtu pirätä gwasu-gwasu ite.

¹⁹Yuvɨraso pukuse cinco mil rupi i'amombrɨgwer, a'ese osepia Jesús yuvɨreko, osupitɨ senise ɨarusu a'e ɨ arɨ rupi ogwata oso chupe, evokoiyase osɨkɨye tëi yuvɨreko ichui.

²⁰A'e rumo aipo e'i: — ¡Che Jesús aiko, pesɨkɨyei rene!

²¹Evokoiyase sorɨvete yuvɨreko ɨarusu pɨpe sero'a, ipare oyepota yuvɨraso yuvɨrasosave.

²²A'ere arayi'ive ava re'ɨi opɨta va'e sovai, oikwa voi ete yuvɨreko semimbo'e eta rumo yuvɨraso ñepëi ɨarusu pɨpe a'eve tui va'e, iyavei Jesús ndosoi ete gwemimbo'e rupi.

²³A'eseve ambuae ɨarusu vɨroyepota seru tekwa Tiberias sui, akoi ñepëi save Yar ava remi'urä mboyape reroyerokɨ agwer rerovɨkave.

²⁴Egwë e'i, Jesús iyavei semimbo'e eta ndipoise a'eve yuvɨreko, ava re'ɨi avei yuvɨro'a ɨarusu pɨpe ichui yuvɨraso Cafarnaúm ve seka.

²⁵Oyepotase ava re'ɨi ɨpa rovai, a'eve osepia Jesús oporandu yuvɨreko chupe: — Porombo'esar, ¿maräse vo ereyepota ko'ave?

²⁶Jesús aipo e'i chupe: — Supiete aipo a'e peü pe che reka peye esepia pekaru peɨ̇taröpa ite, iyavei nda'ei ko poromondɨisa reroyasave peiko pota che rupi.

²⁷Peporavɨkɨi rene katu tembi'u ndasekosei va'e rese, iyakatu rumo peporavɨkɨ tembi'u sekose va'e rese omondo va'e tekovesa apɨre'ɨ̇. Ko tembi'u che ava ɨvate katu va'e Ra'ɨrɨ amondora peü, esepia Tüpä, a'e che Ru omboyekwa ite che ichuindar aikose.

²⁸A'e oporandu chupe yuvɨreko: — ¿Mba'e mboravɨkɨvo oroyapora Tüpä upe?

²⁹Jesús rumo omboye chupe: — Tüpä oipota che reroyara peye semimbou che rekose.

³⁰Evokoiyase oporandu yuvɨreko chupe: — ¿Mba'e poromondɨisa vo eremboyekwa irira oreu, orosepia va'erä nde reroya tuprɨ katu agwä? ¿Uma vo mba'e nderembiapo?

³¹Ore ramoi eta yuvɨro'u tembi'u ɨva sui ou va'e ɨvɨ iporupɨre'ɨ̇sa rupi araka'e, aipo e'i Ikwachiaprɨ pɨpe: ‘Omondo mboyape ɨva pendar semi'urä.’

³²Jesús rumo omboyevɨ chupe: — Supiete amombe'u peü nda'ei Moisés omondo mboyape ɨva pendar peü, a'e che Ru omondo mboyape ɨva pendar peü supi va'e ite.

³³Esepia ko mboyape ombou va'e Tüpä a'e ogweyɨ va'e ɨva sui ou iyavei omondora tekovesa ɨvɨ pɨpendar upe narä.

³⁴A'e oporandu yuvɨreko chupe: — Ore Yar, embouño katu ko pɨpe suive aipo mboyape oreu.

³⁵Jesús rumo aipo e'i chupe: — Che ite aiko a'e mboyape tekovesa mondo agwä. Akoi ou va'e cheu ndiyumbɨasɨ iri chietera; iyavei akoi che reroyasar, ndi'use iri chietera.

³⁶Aipo a'e ni'ä akoi peü, ndache reroyai ete peye, yepe che repia tëi peye viña.

³⁷Opakatu ombou va'e ava che Ru cheu, cheu ni'ä yugwerura; akoi yugweru va'e cheu aipɨsɨra; namomboi chietera che yesui.

³⁸Esepia che ndagweyɨi ɨva sui ayapo va'erä mba'e che remimbotar, ayu rumo ayapo va'erä mba'e che Ru remimbotar rupi, a'e ni'ä che mbousar.

³⁹Iyavei che mbousar ndoipotai ete ñepëi ava ombou va'e cheu amokañɨrä, a'e oipota ambogwerayevɨra arɨ ipa va'e pɨpe kuri.

⁴⁰Esepia che Ru remimbotar oipota opakatu ava oma'e va'erä Tüpä Ra'ɨrɨ rese iyavei vɨroya itera, vɨreko va'erä tekovesa apɨre'ɨ̇ yuvɨreko; supiete ambogwerayevɨra arɨ ipa va'e pɨpe kuri.

⁴¹Evokoiyase judío eta iñe'ë-ñe'ë tëi Jesús rese yuvɨreko, esepia aipo e'i ete: “Che mboyape aiko agweyɨ va'e ɨva sui.”

⁴²Iyavei aipo e'i yuvɨreko: — ¿Nda'ei vo akoi ko Jesús, José ra'ɨrɨ? Yande yaikwa ite iyesupa ichɨ avei. ¿Ma'erä ru agweyɨ va'e ɨva sui e'i no?

⁴³Evokoiyase Jesús aipo e'i: — Pepoiño peñe'ë ñe'ë tëisa sui.

⁴⁴Ndipoi chietera oikatu va'e ou cheu, nomongere'ɨ̇ise che Ru che mbousar; a'e ambogwerayevɨra arɨ ipa va'e pɨpe kuri.

⁴⁵Tüpä ñe'ë mombe'usar ikwachiaprɨ pɨpe aipo e'i: ‘Tüpä pe mbo'era opakatu mba'e rese.’ Egwë e'i akoi osendu va'e che Ru ñe'ë oyembo'e va'e avei sese, evokoi nungar yugwerura cheu.

⁴⁶“Ndipoi ete ñepëi ava osepia va'e che Ru; akoi ichui ou va'eño ite a'e gweraño tuprɨ osepia Tüpä.

⁴⁷Supiete aipo a'e peü akoi che reroya va'e vɨrekora tekovesa apɨre'ɨ̇.

⁴⁸Che mboyape nungar aiko amondo va'e tekovesa.

⁴⁹Araka'e pe ramoi eta ni'ä yuvɨro'u ite tembi'u ɨva sui ou va'e ɨvɨ iporupɨre'ɨ̇sa rupi, a'e rumo opa iriño avei ete omano yuvɨreko;

⁵⁰che rumo añe'ë mboyape ɨva sui ogweyɨ va'e rese; akoi ava o'u va'e ichui, a'e nomanoi chietera.

⁵¹Che a'e aiko mboyape oikove va'e ogweyɨ va'e ɨva sui; akoi o'u va'e ko mboyape, a'e oikovera tekovesa apɨre'ɨ̇ pɨpe. Ko mboyape amondo va'erä a'e che rete ite. A'e amondora ava rekokwer ɨvɨ pɨpendar rese.”

⁵²Judío eta rumo oyeekopɨ-kopɨño yuvɨreko: — ¿Marä e'ira vo aipo ko imbou tëi gwetekwer yande to'u viña?

⁵³Jesús rumo aipo e'i chupe: — Supiete aipo a'e akoi pe ndape'uise ava ɨvate katu va'e Ra'ɨrɨ retekwer iyavei ndapeɨ'uise suvɨ, ndaperekoi chietera tekovesa.

⁵⁴Akoi o'u va'e che retekwer iyavei oɨ'u va'e che ruvɨ, a'e vɨrekora tekovesa apɨre'ɨ̇; iyavei che ambogwerayevɨra arɨ ipa va'e pɨpe kuri.

⁵⁵Esepia che retekwer supiete va'e tembi'u sekoi, che ruvɨ avei supiete va'e ɨgwa sekoi.

⁵⁶Akoi o'u va'e che retekwer iyavei oɨ'u va'e che ruvɨ, a'e sekoi che rese ite, iyavei che aikove a'e sese.

⁵⁷Che Ru, che mbousar, a'e vɨreko ite tekovesa, ichui avei che aikove; egwë e'i aveira, akoi o'u va'e che retekwer oikovera che rese.

⁵⁸Añe'ë mboyape ɨva sui ogweyɨ va'e rese. Ko mboyape nda'ei tembi'u ɨva sui ou va'e pe ramoi eta yuvɨro'u va'e nungar, esepia a'e yuvɨro'u tëi opaño ite rumo omano yuvɨreko. Akoi o'u va'e che retekwer, oikovera apɨre'ɨ̇sa pɨpe ite.

⁵⁹Jesús oporombo'e ko mba'e rese judío ñemonu'äsave Cafarnaúm ve.

⁶⁰Osenduse ko yembo'esa, seta Jesús rupi ogwata va'e aipo e'i yuvɨreko: — Ko aipo e'i va'e yavai ete seroya agwä yandeu; ¿ava vo vɨroya tëira viña?

⁶¹Jesús rumo oikwa voi ete iñe'ë-ñe'ë tëise ko mba'e rese yuvɨreko, evokoiyase oporandu chupe: — ¿Pemboasɨño tie ñe'ësa?

⁶²¿Marä peyera pi'ä che repiase peye che, ava ɨvate katu va'e Ra'ɨrɨ ayeupise che reko agwerve vicho viña?

⁶³Espíritu ni'ä omondo tekovesa; yande retekwer rumo egwë e'i tëi va'e. Iyavei ko amombe'u va'e peü a'e espíritu iyavei tekovesa.

⁶⁴Oime rumo amove pe pa'ü pendar ndovɨroya vɨtei va'e yuvɨreko. Esepia ni'ä Jesús oikwa ite yɨpɨsuive uma ndovɨroya vɨtei va'e, oikwa avei uma ava omondora yamotare'ɨ̇mbar upe.

⁶⁵Ipare aipo e'i iri: — Sese ni'ä akoi aipo a'e peü ndipoi chietera ava ou va'erä cheu, che Ru nomongere'ɨ̇ise imbou.

⁶⁶Ichuive tuprɨ, ava re'ɨi ogwata va'e Jesús rupi oseyapa yuvɨreko, ndoyuvɨrogwata iri avei supi.

⁶⁷Jesús oporandu opayandepo yovaive ñuvɨrïo va'e gwemimbo'e upe: — ¿Pe avei vo chereyapa pota peye?

⁶⁸Simón Pedro omboyevɨ chupe: — Che Yar, ¿ava upe vo oroso irira? Nde gweraño ite ni'ä erereko ñe'ësa tekovesa apɨre'ɨ̇ va'e.

⁶⁹Ore rumo oroyeroya ite nde rese, iyavei oroikwa ite nde ndaseko maräi va'e Tüpä suindar ereikose.

⁷⁰Jesús rumo omboyevɨ chupe: — ¿Nda'ei vo che opoporavo opayandepo yovaive ñuvɨrïo tuprɨ peiko va'e? Oime rumo ñepëi pe pa'ü pendar a'e karugwar ite sekoi.

⁷¹Evokoiyase aipo e'ise, Jesús oñe'ë Judas rekokwer rese, a'e Simón Iscariote ra'ɨrɨ, esepia ni'ä Judas omondora ava yamotare'ɨ̇mbar upe, yepe opayandepo yovaive ñuvɨrïo semimbo'e pa'ü pendar sekoi va'e viña.