Read Guarayu JUAN 7 Bible Online

JUAN 7 - Guarayu bible

JUAN 7

¹Ko ipare, Jesús ogwata ɨvɨ Galilea rupi. Ndosopotai ete ɨvɨ Judea rese, esepia a'eve judío eta oseka ite yuka agwä yuvɨreko.

²Vɨrovɨse pieta teyupa ka'a rakä apoprɨ agwä, a'e judío pieta yuvɨreko yepi,

³tɨvɨreta aipo e'i yuvɨreko chupe: — Erepɨtai rene ko'ave; eso ɨvɨ Judea ve, a'e pendar nde rupi ogwata va'e avei tosepia mba'e nde rembiapo yuvɨreko.

⁴Esepia akoi oyemboyekwa pota va'e, noñomi ete mba'e gwembiapo. Ereyapo ni'ä mba'e ko nungar eiko, eyapo opakatu ava rovake ɨvɨ pɨpendar upe.

⁵Seroya e'ɨ̇save tëi avei tɨvɨreta aipo e'i yuvɨreko chupe.

⁶Jesús rumo aipo e'i chupe: — Nde'i vɨtei rumo arɨ cheu, peü rumo opakatu arɨño tëiete avɨye va'e yepi.

⁷Ɨvɨpendar yuvɨrekoi va'e ndiyai ete peamotare'ɨ̇ra a'e che amotare'ɨ̇ yuvɨreko, esepia ni'ä che amboyekwa ite mba'e sembiapo naporäi va'e.

⁸Pesoño pe pieta repia; che ndasoi chira, esepia ndosupitɨ vɨtei ete arɨ imombe'uprɨ cheundar.

⁹Aipo e'i pare rumo chupe, opɨtaño Galilea ve.

¹⁰Opase yuvɨraso tɨvɨreta, Jesús avei oso pietasave, ndoyemboyekwai ete rumo ava upe, inungar oñemi va'e sekoi.

¹¹Judío eta rumo oseka tëi pietasave, aipo e'i tëi yuvɨreko: — ¿Ke pi'ä akoi mbɨa sekoi?

¹²Opakatu ava oñemoneta atɨ yuvɨreko sese. Amove aipo e'i: “A'e mbɨa avɨye va'e”; ambuae rumo aipo e'i: “Nda'ei avɨye va'e; a'e rumo ombopa tëi va'e ava oiko.”

¹³Iyavei rumo, ndipoi ete ava oyemboyekwa va'e oñe'ë sese, osɨkɨyepave judío eta sui yuvɨreko.

¹⁴Pieta mbɨterse rumo, Jesús oike oso tüpäro pɨpe omboɨpɨ oporombo'e.

¹⁵Judío eta ovɨ'are'ɨ̇sa pɨpe aipo e'i tëi yuvɨreko: — ¿Marä e'i rutei vo omba'ekwa rutikatu, ndoyembo'ei va'e ni'ä?

¹⁶Jesús omboyevɨ chupe: — Che porombo'esa nda'ei cheyesuindar tëi, a'e rumo che mbousar suindar.

¹⁷Akoi ñepëi ikere'ɨ̇ va'e oyapo va'erä Tüpä remimbotar, oikwara che porombo'esa nda'ei va'e che suindar a'e Tüpä suindar ite anise añe'ë cheyesui tëi vichiko.

¹⁸Akoi oñe'ë va'e oyesui tëi, a'e oseka mboeteisa oyeupe narä tëi; oseka va'e rumo che mbousar sui mboeteisa gwasu, a'e supiete mba'e omombe'u; ndipoi ete porombopasa iporombo'esa rese.

¹⁹“¿Nda'ei vo supiete Moisés omondo mborokwaita peü? Iyavei, ñepëi pe pa'ü pendar ndipoi ete omboyeroya va'e. ¿Ma'erä vo che yuka pota peye?”

²⁰Ava omboyevɨ yuvɨreko chupe: — ¡Nde erereko karugwar ndeyese! ¿Ava vo nde yuka pota?

²¹Jesús aipo e'i chupe: — Opakatu peiko va'e ndapeyembovɨ'ai ete ñepëi mba'e akoi ayapose mbɨtu'usa arɨ pɨpe.

²²Evokoiyase, Moisés omondo mba'e apo agwä circuncisión resendar (yepe nda'ei va'e ou Moisés suindar viña, a'e ou yɨpɨndar ava ɨvate katu va'e sui ete), pemocircuncida avei ni'ä ñepëi mbɨa mbɨtu'usa arɨ pɨpe yepi.

²³Supiete kurïtëi, Moisés porokwaita mboavɨye agwä pemocircuncida chi'ïvä'e mbɨtu'usa arɨ pɨpe yepi, ¿ma'erä vo evokoiyase peñemoɨrö cheu ambogwerase ñepëi mbɨa mbɨtu'usa arɨ pɨpe?

²⁴Ndape ñemoñetai chira ambuae ava rembiapokwer rese. Peñemoñetase ava rese, peyapo katu mba'e supi tuprɨ va'e yepi.

²⁵Oime yuvɨrekoi vɨte va'e Jerusalén ve a'e omboɨpɨ oporandu yuvɨreko chupe: — ¿Nda'ei vo akoi ko oseka tëi va'e yuka agwä yuvɨreko?

²⁶A'e ni'ä ko sekoi, oñe'ë ava pa'üve rupi, iyavei ndipoi ete marä e'i va'e yuvɨreko chupe. ¿Omo'ä pi'ä mborerekwa eta ko mbɨa supietese Poropɨsɨrösar seko agwä yuvɨreko?

²⁷Yande rumo yaikwa ite kesui turi ko mbɨa; koiye rumo, ouse Poropɨsɨrösar, ndipoi chietera oikwa va'e yuvɨreko.

²⁸Jesús oporombo'e vɨteseve tüpäro pɨpe oiko, aipo renduse rumo, oñe'ë pirätä aipo e'i: — ¡Evokoiyase, pe chekwa ite peye peikwa avei kesui ayu! Che rumo ndayui che remimbotar tëi, che imbouprɨ ite aiko ñepëi sekokwer avɨye va'e seroyaprɨ sui, iyavei a'e pe ndapeikwai va'e ite.

²⁹Che aikwa ite esepia ichui ayu, iyavei a'e ite che mbou.

³⁰Evokoiyase oipɨsɨ pota yuvɨreko sokenda agwä viña, ndipoi ete rumo ikere'ɨ̇ va'e esepia ndoyepota vɨtei arɨ ipapaprɨ chupe.

³¹Seta iteanga rumo ava vɨroya va'e, iyavei aipo e'i yuvɨreko: — Koiye ouse Poropɨsɨrösar, ¿oyapora pi'ä seta katu poromondɨisa avɨye va'e ko mbɨa sui?

³²Fariseo eta osendu ava ñe'ësa Jesús resendar; iyavei pa'i eta rerekwar oyokwai sundao tüpäro rärösar ipɨsɨ agwä yuvɨreko.

³³Evokoiyase Jesús aipo e'i: — Che aikovera movɨrö arɨ rupive tëi pe pa'üve, ipare ayevɨra vicho che mbousar pɨri.

³⁴Che reka tëira peye, ndapeikatui chietera rumo che reka agwä, esepia ndapeikatui chira peso va'erä che rekosave.

³⁵Evokoiyase judío eta omboɨpɨ oporandu-randu oyeupe yuvɨreko: — ¿Ke pi'ä osora ko mbɨa ndayaikatui va'erä seka agwä viña? ¿Osora tie judío oñemosaï va'e pa'ü rupi oiko, iyavei nda'ei va'e ava judío mbo'e agwä pi'ä?

³⁶¿Marä oya pi'ä aipo e'i ‘Che reka tëira peye, ndapeikatui chietera rumo che reka agwä, esepia ndapeikatui chira peso va'erä che rekosave’?

³⁷Pieta ipa arɨ pɨpe imboeteisa katu va'e yepi. A'e arɨ pɨpe Jesús oñe'ë pirätä o'ä aipo e'i: — Akoi i'usei va'e, a'e touño cheu, iyavei akoi ava che yeroyasar, a'e touño avei cheu. Inungar Ikwachiaprɨ pɨpe aipo e'i, a'e ɨpɨ'a pɨpe sui osëra inungar ɨai ndopai va'e yepi.

³⁸

³⁹Ko rese, Jesús aipo e'i seroyasar oipɨsɨra Espíritu yuvɨreko kuri; iyavei Espíritu ndou vɨtei ete, esepia Jesús ndoike vɨtei gweko porañetesa pɨpe.

⁴⁰Oime aipo ava pa'ü rupi osendu va'e ko ñe'ësa aipo e'i yuvɨreko: — Supiete revo ko mbɨa Tüpä ñe'ë mombe'usar sekoi.

⁴¹Ambuae aipo e'i yuvɨreko: — Ko Poropɨsɨrösar ite. Ambuae rumo aipo e'i avei yuvɨreko: — Ani, esepia Poropɨsɨrösar nosëi chietera Galilea sui.

⁴²Ikwachiaprɨ pɨpe aipo e'i Poropɨsɨrösar oura mborerekwar ɨvate katu va'e David sui, iyavei a'e osëra Belén sui, a'e David rekwa avei araka'e.

⁴³Evokoiyase ava oyemboya'o-ya'o yuvɨreko Jesús rekokwer sui tëi.

⁴⁴Oime aipo vɨraso pota tëi sokenda uka agwä viña; ndipoi ete rumo oyapo va'e mba'e yuvɨreko chupe.

⁴⁵Sundao eta tüpäro rärösar oyevɨpa yuvɨreko fariseo rekosave pa'i eta rerekwar avei, a'e oporandu yuvɨreko chupe: — ¿Ma'erä vo evokoiyase ndaperui?

⁴⁶Sundao eta rumo omboyevɨ yuvɨreko: — ¡Ndipoi ete ñepëi mbɨa oñe'ë va'e inungar!

⁴⁷Evokoiyase fariseo eta aipo e'i yuvɨreko: — ¿Pe avei vo peyembopa uka chupe?

⁴⁸¿Oime vo vɨroya va'e ñepëi ore pa'ü pendar ore rerekwar, anise fariseo eta avei?

⁴⁹Ko ava, a'e ndoikwai porokwaita yuvɨreko, a'e yuvɨrekoira ñemoɨrösa pɨpe tëiete.

⁵⁰Nicodemo, a'e fariseo oso Jesús pɨri mba'e kwa agwä, aipo e'i chupe:

⁵¹— Yandeundar porokwaita pɨpe aipo e'i, ndiyai ete ñepëi mbɨa yamondo mba'e tëisa pɨpe yɨpɨndar rumo yasendu rane itera iñe'ë mba'e sembiapokwer resendar.

⁵²A'e rumo omboyevɨ yuvɨreko chupe: — ¿Nde avei vo ereiko Galilea pendar? Eyembo'e Ikwachiaprɨ pɨpe iyavei eresepiara ndipoi ete ñepëi Tüpä ñe'ë mombe'usar ou va'e Galilea sui. [

⁵³Ipare opa yuvɨraso ñepëi-pëi gwëtä rupi.