Read Guarayu JUAN 8 Bible Online

JUAN 8 - Guarayu bible

JUAN 8

²ipare a'ere arayi'ive ko'ëse, oyevɨ tüpärove ou. A'ese ava oyemboya yuvɨreko sese, ichui a'e ogwapɨ öi omboɨpɨ oporombo'e.

³Moisés porokwaita rese oporombo'e va'e iyavei fariseo eta a'ese vɨraso ñepëi kuña, osesapɨ'a va'e iyemboagwasase yuvɨreko. Omondo opakatu ava re'ɨi avɨterve imo'ä yuvɨreko.

⁴Aipo e'i Jesús upe yuvɨreko: — Porombo'esar, ko kuña osesapɨ'a yuvɨreko iyemboagwasase ñepëi kuimba'e rese.

⁵Ko porokwaita pɨpe, Moisés orekwai ko nungar kuña yuvɨrekoi va'e yuka agwä ita pɨpe yepi. ¿Nde marä ere vo katu?

⁶A'e oporandu yuvɨreko chupe sekoa'äsave tëi, ipare yamondo anga'u mba'e tëi pɨpe sereko oyapave. Jesús rumo oyaɨvɨ omboɨpɨ omba'ekwachia ɨvɨ rese okwä pɨpe.

⁷Ipare oporandu-randuño itese yuvɨreko chupe, a'ese sovaɨva aipo e'i: — Akoi ñepëi pe pa'ü pendar ndovɨrekoi va'e angaipa, a'e rane yɨpɨndar toyapi ita pɨpe.

⁸Ichui oyaɨvɨ i ri omba'ekwachia iriño ite ɨvɨ rese öi.

⁹Osenduse aipo nungar yuvɨreko, omboɨpɨ ñepëi-pëi oyeakɨkwei yuvɨnosë yuvɨnoi, ava kwakwa rane gätu oyapo yɨpɨndar evokoi nungar. A'ese Jesús opɨta a'e ae kuña rese a'eve yuvɨreko,

¹⁰sovaɨva aipo e'i oporandu chupe: — Kuña, ¿kevo yuvɨrekoi? ¿Ndipoi ete ñepëi nde mokañɨ potasar yuvɨrekoi va'e?

¹¹A'e kuña omboyevɨ chupe: — Ndipoi ete che Yar. Jesús aipo e'i chupe: — Che avei ndoromokañɨ chira; sese kurïtëi eso iyavei ereyemboangaipa iri eme.

¹²Jesús oñe'ë iri ava upe, aipo e'i: — Che aiko tesapesa ɨvɨ pɨpendar; akoi che rupi sekoi va'e vɨrekora tesapesa omondo va'e tekovesa chupe, iyavei ndogwata iri chietera pɨ̇tümimbisa vrɨrupi.

¹³Fariseo eta aipo e'i yuvɨreko chupe: — Nde ereñe'ë ndeyese ae tëi: evokoi nde ñe'ësa ndaseroyaprɨi ete.

¹⁴Jesús rumo omboyevɨ chupe: — Che ñe'ë rumo supi va'e ite, yepe cheyese ae añe'ë viña. Esepia che aikwa kesui ayu iyavei ke'asora; evokoiyase, pe rumo ndapeikwai ete.

¹⁵Pe, pemokañɨ ava peiko pɨ'añemoñeta ɨvɨ pɨpendar rupi tëi. Che rumo namokañɨi ete ñepëi ava;

¹⁶esepia amokañɨse ava, mba'e che rembiapo rumo supi va'e ite, esepia nda'ei che gweraño mba'e ayapo, che Ru che mbousar avei ni'ä oyapo mba'e che rupi.

¹⁷Porokwaita peü ikwachiaprɨ pɨpe aipo e'i oimese ñuvɨrïo ava mba'e mombe'usar oyoyatuprɨ va'e, a'e mba'e semimombe'u seroyasaprɨ ite.

¹⁸Supiete, che ae ite ni'ä aikwa mba'e amombe'u va'e che yesendar, che Ru che mbousar a'e avei oikwa opakatu mba'e che rembiapo.

¹⁹Oporandu yuvɨreko chupe: — ¿Ke vo nde yesupa sekoi? Jesús omboyevɨ chupe: — Pe ndache kwai ete peye, ndapeikwai avei che Yesupa; chekwase rumo peye viña, che Yesupa avei peikwara viña.

²⁰Jesús omombe'u ko mba'e oporombo'ese tüpäro pɨpe oiko, gwarepochi rɨru porerekosa rovai. Ndipoi ete rumo osokenda va'erä, esepia ni'ä ndoyepota vɨtei ete i'arɨ chupe.

²¹Jesús rumo aipo e'i iri: — Che asose, pe che reka tëira peye, pemanopara pe angaipa pɨpe. Che asosave ndapeikatui chietera peso va'erä.

²²Judío eta aipo e'i yuvɨreko chupe: — ¿Ipɨ'añemoñeta pi'ä oyeyuka va'erä, iyavei sese pi'ä aipo e'i ndayaikatui chietera yaso agwä sekosave?

²³Jesús aipo e'i chupe: — Pe rumo peiko ko'ave ɨvɨ pendar, che rumo ɨvatendar aiko; iyavei peiko ko ɨvɨ pɨpendar tëi, che nda'ei ete ko ɨvɨ pɨpendar aiko.

²⁴Sese ni'ä akoi aipo a'e peü pemanopa itera angaipa pɨpe; esepia ndache reroyaise peye Che Aikose, pemanopa itera angaipa pɨpe.

²⁵Evokoiyase oporandu yuvɨreko chupe: — ¿Uma ite vo nde ereiko? Jesús omboyevɨ chupe: — Yɨpɨndar, ¿ma'erä vo añe'ëra pe rese vichiko?

²⁶Seta iteanga areko che ñe'ë agwä peü iyavei mba'e pe rembiavɨ rese, akoi che mbousar a'e omombe'u mba'e supi va'e ite, iyavei che amombe'u va'e ɨvɨ pɨpendar yuvɨrekoi va'e upe a'e tuprɨ avei ni'ä asendu iñe'ë vichiko.

²⁷A'e rumo ndosendukwai ete Vu rese iñe'ëse yuvɨreko.

²⁸Sese aipo e'i chupe: — Pesupise rumo ava ɨvate katu va'e Ra'ɨrɨ, a'ese voi peikwara Che a'e Aikose, ndayapoi avei mba'e che remimbotar rupi tëi; che rumo amombe'u mba'e che Ru che mbo'esa rupi gweraño ite.

²⁹Esepia che mbousar ni'ä che rupive ite sekoi; che Ru ndache reyai va'e ite che ae, esepia che ayapoño ite mba'e semimbotar yepi.

³⁰Ko Jesús omombe'use, seta iteanga ava vɨroya va'e yuvɨreko.

³¹Jesús aipo e'i vɨroyasar judío eta upe: — Peroyase che ñe'ëngagwer, a'ese peikora che remimbo'e supiete va'e;

³²peikwa aveira mba'e supiete va'e, iyavei mba'e supiete va'e perenoserä mba'e katuprɨsa pɨpe.

³³A'e omboyevɨ yuvɨreko chupe: — Ore rumo oroiko Abraham suindar ite, ndoroikoi va'e ava rembigwai tëi; ¿ma'erä vo aipo ere oreu pesëra mbigwai nungar pe rekosa sui?

³⁴Jesús rumo aipo e'i chupe: — Supiete aipo a'e peü akoi opakatu oyemboangaipa va'e, a'e yuvɨrekoi angaipa povrɨve tëi.

³⁵Ñepëi mbigwai ndiyai ete sekoi va'erä omu pɨri; ñepëi ta'ɨrɨ rumo sekoi etera omu pɨri yepi.

³⁶Sese, Ta'ɨrɨ pe renosese mbigwai tëi pe rekosa sui, supiete ndapeiko iri chietera mbigwai nungar.

³⁷Aikwa ni'ä Abraham suindar peikose; pe rumo che yuka potaño peye esepia ndaperoyai ete che ñe'ë yepi.

³⁸Che amombe'u che Ru mba'e omboyekwa va'e cheu; pe egwë peye aveira, peyapo mba'e pe Yesupa remimombe'u.

³⁹A'e aipo e'i yuvɨreko chupe: — ¡Ore yesupa rumo Abraham! Ipare Jesús omboyevɨ chupe: — Abraham ra'ɨrɨ ite peikose viña, peyapora mba'e sembiapo nungar viña.

⁴⁰Evokoiyase, amombe'u mba'e supiete va'e Tüpä che mbo'e va'e rese, pe rumo che yuka potaño ite peye. ¡Abraham rumo ndoyapoi ete ko nungar mba'e!

⁴¹Pe avei peyapo mba'e inungar tuprɨ oyapo peyesupa yuvɨreko. A'e aipo e'i yuvɨreko chupe: — ¡Ore rumo nda'ei imboyesuprɨ tëi oroiko; orovɨreko ñepëiño ite ore Yesupa, a'e Tüpä!

⁴²Jesús omboyevɨ chupe: — Supiete Tüpä ite pe yesupase, pe evokoiyase che raɨsura peye viña, esepia che ayu Tüpä sui iyavei sese kurïtëi aiko ko'ave. Ndayui che remimbotar tëi, Tüpä ni'ä che mbou.

⁴³¿Ma'erä pi'ä ndapesendukwa katui ete mba'e che remimombe'u? Esepia ndapeyapɨsaka potai ete che ñe'ë rese.

⁴⁴Peyesupa a'e karugwar tëiete; inungar tuprɨ avei peiko, peyapo mba'e semimbotar tëi avei. Esepia karugwar oporoyuka va'e yɨpɨsuive ite oiko. Ndasekoi va'e mba'e supi tuprɨ va'e pɨpe, noñe'ëi avei mba'e supiete va'e rese. Omombe'use temirä, oñe'ë inungar supiete va'e; esepia semiräñeteai va'e ite iyavei a'e ni'ä temirä yesupa tëi sekoi yepi.

⁴⁵Che rumo amombe'use mba'e supi tuprɨ va'e, ndache reroyai ete peye.

⁴⁶¿Uma pi'ä pe pa'ü pendar oikwa che aikose angaipa pɨpe? Iyavei amombe'use mba'e supi tuprɨ va'e, ¿ma'erä vo evokoiyase ndache reroyai ete peye?

⁴⁷Akoi ava Tüpä suindar, a'e osendu Tüpä ñe'ë; pe rumo nda'ei ete Tüpä suindar peiko, ndapesendu potai ete iñe'ë.

⁴⁸Evokoiyase judío eta aipo e'i yuvɨreko: — Supiete ore aipo oro'e nde ereiko Samaria ɨgwar, iyavei erereko karugwar ndeyese.

⁴⁹Jesús rumo omboyevɨ chupe: — Che ndarekoi ete karugwar cheyese. Che ayapo mba'e che Ru mboeteisa pɨpe ite yepi, pe rumo ndache mboetei ete peye.

⁵⁰Iyavei che ndasekai ava che mboetei agwä. Oime rumo ñepëi oipota va'e. A'e ni'ä omondora ava rembiapo reprɨ chupe.

⁵¹Supiete akoi vɨroya va'e che ñe'ë, a'e nomanoi chietera.

⁵²Judío eta omboyevɨ yuvɨreko aipo e'i chupe: — Kurïtëi oroikwa ite nde ererekose karugwar ndeyese. Esepia Abraham iyavei opakatu Tüpä ñe'ë mombe'usar omanopa ite yuvɨreko, iyavei nde aipo ere: ‘Akoi che ñe'ë reroyasar, nomanoi chietera.’

⁵³¿Nde tie ɨvate katu ereiko ore yesupa Abraham sui? Esepia a'e omano ite, ambuae Tüpä ñe'ë mombe'usareta omanopa avei yuvɨreko. ¿Ma'erä vo ereyeroya ndeyeseae tëi eiko?

⁵⁴Jesús rumo omboyevɨ chupe: — Che ae tëi ayemboeteise mba'e che rembiapo pɨpe, che mboeteisa evokoiyase ndaseroyaprɨi ete. Akoi che mboeteisar a'e che Ru gweraño ite, a'e chupe tuprɨ avei akoi ore Tüpä peye yepi.

⁵⁵Pe rumo ndapeikwai. Che rumo aikwa ite; iyavei ndaikwai a'ese peü, che avei evokoiyase semirañeteai va'e aikora inungar peiko yepi. Che supiete aikwa, aroya avei iñe'ë yepi.

⁵⁶Pe ramoi Abraham araka'endar, oyembovɨ'arete ite esepia ni'ä osepiara che arɨ oiko; ipare rumo osepia ite, ichui ovɨ'arete opɨ'a pɨpe.

⁵⁷Judío eta aipo e'i Jesús upe yuvɨreko: — Nderereko vɨtei cincuenta aravɨter, ¿marä erera aipo Abraham repia viña?

⁵⁸Jesús omboyevɨ chupe: — Supiete aipo a'e yɨpɨsuive ite che ayesu Abraham yesue'ɨ̇ vɨteseve.

⁵⁹Evokoiyase osupi ita yapi-yapi agwä yuvɨreko; Jesús rumo oñemi osë tuprɨño tüpäro pɨpe sui.