Read Guarayu JUAN 9 Bible Online

JUAN 9 - Guarayu bible

JUAN 9

¹Osëse Jesús osepia ogwatasa rupi ñepëi mbɨa o'asa suive ndasesapɨsoi va'e.

²Semimbo'e eta oroporandu yuvɨreko chupe: — Porombo'esar, ¿ma'erä pi'ä ko mbɨa ndasesapɨsoi ete o'a? ¿Oyesupa angaipa sui pi'ä, anise oangaipa sui ae tie?

³Jesús rumo omboyevɨ chupe: — Nda'ei ete oangaipa sui, nda'ei avei oyesupa angaipa sui no; ko rumo egwë e'i yapo Tüpä omboyekwa va'erä gwembiapo sese.

⁴Oime vɨteseve arɨ, yayapora mboravɨkɨ che mbousar porokwaita rupi; esepia pɨ̇türa, a'ese ndipoi chietera oporavɨkɨ va'e.

⁵Aikove vɨte seve ko ɨvɨ pɨpe, che aiko tesapesa ɨvɨ pɨpendar.

⁶Aipo mombe'u pare, Jesús ondɨvɨ ɨvɨ rese, gwendɨ pɨpe ɨvɨ omoakɨ̇ va'e omondo ndasesapɨsoi va'e resa rese.

⁷Ipare aipo e'i chupe: — Eso tereyovai ɨgwa Siloé ve (a'e serer “Imbouprɨ”). Ndasesapɨsoi va'e evokoiyase oso oyovai, ichui oyevɨse oma'e tuprɨ ite.

⁸Sëtä kotɨndar iyavei yɨpɨndar sepiasar oporanduse gwarepochi rese aipo e'i yuvɨreko: — ¿Nda'ei vo akoi ko ogwapɨ öi gwarepochi rese oporandu yepi?

⁹Amove ambuae ava aipo e'i: — A'e ite ni'ä. Ambuae rumo aipo e'i yuvɨreko: — Nda'ei a'e, yepe oyoya tuprɨ ite sese viña. A'e mbɨa aipo e'i: — Supiete, che a'e aiko.

¹⁰Evokoiyase oporandu yuvɨreko chupe: — ¿Marä ere vo ko kurïtëi esareko?

¹¹A'e rumo omboyevɨ: — Akoi mbɨa serer va'e Jesús omoakɨ̇ ɨvɨ, omondo che resa rese, ipare aipo e'i cheu: ‘Eso ɨgwa Siloé save, ichui eyovai.’ Che aso a'eve, ayovaise a'ese ama'e tuprɨ ite.

¹²Evokoiyase oporandu yuvɨreko chupe: — ¿Ke vo sekoi a'e mbɨa? Ipare rumo a'e aipo e'i: — Ndaikwai.

¹³Mbɨtu'usa arɨ pɨpe aipo Jesús omoakɨ̇ gwendɨ pɨpe ɨvɨ ndasesapɨsoi va'e mbogwera agwä. Sese vɨraso ndasesapɨsoi va'ekwer fariseo eta rovai yuvɨreko,

¹⁵a'e oporandu yuvɨreko chupe marä ere ite vo ko esareko. Ipare a'e omboyevɨ: — Omondo ɨvɨ gwendɨ pɨpe omoakɨ̇ va'e che resa rese ichui ayovai, ipare kurïtëi asareko.

¹⁶Oime fariseo pa'ü pendar aipo e'i yuvɨreko: — Akoi oyapo va'e ko nungar mba'e nda'ei ete Tüpä suindar, esepia ni'ä nomboetei ete mbɨtu'usa arɨ. Ambuae rumo aipo e'i yuvɨreko: — ¿Marä e'ira pi'ä poromondɨisa apo viña, angaipa viyar tëi gwekose? Esepia oyeavɨratɨ tëi ipɨ'añemoñetasa yuvɨreko,

¹⁷iyavei oporandu iri yuvɨreko ndasesapɨsoi va'ekwer upe: — Akoi ndemboesareko va'ekwer rese, ¿marä e'i nde pɨ'añemoñeta a'e mbɨa rese? A'e aipo e'i imboyevɨ: — Che aipo a'e Tüpä ñe'ë mombe'usar ite sekoi.

¹⁸Judío eta rumo ndovɨroya potai ete ndasesapɨsoise iyavei kurïtëi osareko tuprɨ ite, ipare oicho'o uka iyesupa yuvɨreko

¹⁹ichui oporandu yuvɨreko chupe: — ¿Ko ite vo pe ra'ɨrɨ? ¿Pemombe'u ndasesapɨsoi ete vo o'a? ¿Marä e'i vo kurïtëi oikatu osareko?

²⁰Iyesupa omboyevɨ yuvɨreko chupe: — Oroikwa ite ko ore ra'ɨrɨ sekoise, iyavei ndasesapɨsoi ete o'a;

²¹ore rumo ndoroikwai marä e'i kurïtëi osareko, ndoroikwai avei ava vo katu omboesapɨso. Peporanduño chupe; esepia okwakwa ite ni'ä; iyavei a'e ae omombe'ura peü.

²²Iyesupa rumo osɨkɨyepave tëi aipo e'iño yuvɨreko, esepia judío eta opa ite oyemoigätu yuvɨreko imombo agwä oɨ judío ñemonu'äsa sui ava vɨroya va'e Jesús Poropɨsɨrösar sekoise e'i va'e.

²³Sese iyesupa aipo e'iño yuvɨreko: “Peporanduño chupe, esepia ni'ä okwakwa ite.”

²⁴Judío eta oyevɨ iri oñe'ë akoi ndasesapɨsoi va'ekwer upe, aipo e'i yuvɨreko chupe: — Emombe'u oreu mba'e supi tuprɨ va'e Tüpä rovai. Esepia ore oroikwa ite evokoi mbɨa angaipa viyar sekoise.

²⁵A'e rumo omboyevɨ chupe: — Che ndaikwai ete angaipa viyar sekoise. Ko gweraño katu che aikwa che ndasesapɨsoi va'ekwer aiko; iyavei kurïtëi asareko tuprɨai ete.

²⁶Evokoiyase oporandu iri yuvɨreko chupe: — ¿Mba'e ite vo oyapo ndeu? ¿Mba'e vo oyapo nde mboesareko agwä?

²⁷A'e rumo aipo e'i: — Amombe'u ni'ä akoi peü, pe rumo ndache reroyai ete peye. ¿Ma'erä vo peipota iri amombe'u vɨte va'erä peü? ¿Pe avei vo pegwata pota supi?

²⁸Evokoiyase a'e oñe'ërai yuvɨreko chupe aipo e'i: — Nde evokoiyase ereikora a'e mbɨa rupindar; ore rumo orogwata va'e Moisés rupi.

²⁹Iyavei oroikwa ite Tüpä oñe'ëse Moisés upe, evokoi mbɨa rumo ndoroikwai ete kesui osë ou.

³⁰A'e mbɨa rumo omboyevɨ chupe: — ¡Marä peye rutei vo! Pe evokoiyase ndapeikwai kesui osë ou, che rumo che mbosareko ite.

³¹Ore oroikwa tuprɨ ite Tüpä ndosendui ete ava angaipa viyar ñe'ë; ava omboeteisar iyavei vɨroyasar ñe'ë gweraño ni'ä osendu.

³²Ndasendusai ete aipo nungar ñe'ësa yepi ombosareko va'e ñepëi mbɨa o'a va'ekwer ndasesapɨsoi va'e.

³³Ko mbɨa ndouise Tüpä suindarse viña, ndoikatui chietera mba'e apo viña.

³⁴Evokoiyase aipo e'i yuvɨreko chupe: — Nde evokoiyase ereyesu tëi va'e angaipa pɨpe, ¿ore mbo'e pota mba'e rese eve? Ipare omombo oɨ judío ñemonu'äsa pɨpe sui yuvɨreko.

³⁵Jesús oyanduse ndasesapɨsoi va'ekwer mombose; ipare osepiase rumo oporandu chupe: — ¿Ereroya vo nde ava ɨvate katu va'e Ra'ɨrɨ?

³⁶A'e aipo e'i chupe: — Che Yar, emombe'umi cheu, ayeroya katu va'erä rese.

³⁷Jesús omboyevɨ aipo e'i chupe: — Erema'e sese: che a'e aiko, a'e sese ni'ä ereñemoñeta ë'a.

³⁸Evokoiyase a'e mbɨa oñenopɨ'ä Jesús rovai oso, aipo e'i chupe: — Orovɨroya ite che Yar.

³⁹Ipare Jesús aipo e'i chupe: — Che ayu ko ɨvɨ pɨpe mba'e supi tuprɨ va'e apo agwä, ava ndasesapɨsoi va'e oma'e tuprɨra iyavei sesapɨso va'e oyevɨra tesapɨso e'ɨ̇sa pɨpe yuvɨreko.

⁴⁰Oime fariseo yuvɨrekoi va'e supi, osenduse aipo ñe'ësa, oporandu yuvɨreko chupe: — ¿Ore avei vo ndasesapɨsoi va'e nungar oroiko?

⁴¹Jesús omboyevɨ chupe: — Pe ndaperesapɨsoise, ndaperekoi chietera angaipa peyese viña. Inungar aipo oroma'e peye, sese peyavɨ ite mba'e.