Read Guarayu HECHOS 10 Bible Online

HECHOS 10 - Guarayu bible

HECHOS 10

¹Oime ñepëi mbɨa tekwa Cesarea ve serer va'e Cornelio, a'e sundao rerekwar sekoi, a'e sundao yembo'esa serer Italiano.

²A'e mbɨa omboetei Tüpä opakatu gwa'ɨrɨ, gwembireko reseve yepi, iyavei omondoño ite judío pɨtɨ̇vɨï agwä gwarepochi, oyerure avei Tüpä upe yuvɨreko yepi.

³Ñepëi arɨ pɨpe, ka'aruarɨ yemombɨtesa rupi, ikerai ou: A'ese osepia ñepëi mbigwai ɨva pendar Tüpä suindar oikese oso aipo e'i chupe: “¡Cornelio!”

⁴Cornelio oma'egätuño ou mbigwai ɨva pendar rese, ipare osɨkɨye pɨpe tëi oporandu chupe: “¿Mba'e vo ereipota eiko, che Yar?” Mbigwai ɨva pendar aipo e'i chupe: “Tüpä oipɨsɨ nde yeruresa; osepia avei nde poroparaɨsuerekosa.

⁵Emondo ñepëi mbɨa Jope ve Simón reka, a'e serer avei akoi Pedro.

⁶A'e sekoi ambuae Simón mba'e pirer mopɨ̇tasar rëtäve, a'e chini paragwasu popɨve.”

⁷Osose mbigwai ɨva pendar akoi oñe'ë va'ekwer sese, a'ese Cornelio oñe'ë ñuvɨrïo gwembigwai upe iyavei ñepëi sundao Tüpä mboeteisar upe sese oyeroya va'e ite yepi,

⁸ichui mba'e opakatu mombe'ure, omondo Jope ve.

⁹A'ere arayi'ive, vɨrovɨse ka'aru tekwa Jope yuvɨraso, Pedro oyeupi oso oyerure agwä a'e oɨ pɨtu'usa yapoprɨ va'esave.

¹⁰Ndasɨepoi ete oiko iyavei okaru pota ite viña, omoigätu vɨteseve semi'urä yuvɨreko, a'ese ikerai ou:

¹¹a'ese osepia ɨva oyemboise iyavei ogweyɨse inungar turukwar tuvicha va'e, ñapɨ̇chimbrɨ ipopɨ yakatu rupi ou.

¹²A'e turukwar pɨpe osepia opakatu ma'embiar, iyavei mboi vɨräi.

¹³A'ese osendu ñepëi ñe'ësa aipo e'i va'e, “Pedro; epü'a, eyuka evokoi ichui e'u.”

¹⁴Pedro omboyevɨ chupe: “Ani, che Yar, che rumo nda'ui va'e ite ko mba'e ro'o ava remimbotare'ɨ̇ ndi'usai va'e yepi.”

¹⁵A'ese osendu iri ñe'ësa, aipo e'i chupe: “Akoi Tüpä remimbokatuprɨ upe, ava remimbotare'ɨ̇ ndi'usai va'e nderei chietera.”

¹⁶Ko egwë e'i mbosapɨ yupagwer rupi, ipare turukwar oyevɨ ɨvave oso.

¹⁷Pedro ipɨ'añemoñeta tëi oke raisa rese marä oyapave pi'ä egwë e'i, a'eseve Cornelio remimondo oporandu-randu pare, oyepota Simón rëtä rokendɨpɨve yuvɨreko.

¹⁸Oyepotase yuvɨraso, oporandu oñe'ë pirätä oɨ pɨpendar upe ave vo sekoi Simón, a'e serer va'e avei Pedro.

¹⁹Ipɨ'añemoñeta vɨteseve Pedro mba'e oyemboyekwa va'ekwer rese, Espíritu Maräne'ɨ̇ aipo e'i chupe: “Esendu, mbosapɨ mbɨa nde reka yuvɨreko.

²⁰Eyemoigätu, egweyɨ eso yuvɨreko supi, esepia che ambou evokoi mbɨa nde reka.”

²¹Pedro ogweyɨ ipare aipo e'i mbɨa upe: — Che a'e aiko, peseka va'e; ¿ma'erä vo peyu?

²²A'e omboyevɨ yuvɨreko chupe: — Ore oroyu sundao rerekwar Cornelio orekwaisa pɨpe a'e mbɨa seko tuprɨ va'e, Tüpä mboeteisar opakatu judío osaɨsuai yuvɨreko. Ñepëi mbigwai ɨva pendar Tüpä suindar oyokwai nde rese, ereso va'erä sëtäve, a'e osendura mba'e eremombe'u va'e.

²³Evokoiyase Pedro omoingepa oɨ pɨpe, opɨta ipɨri a'e pɨ̇tü yuvɨreko. A'ere arayi'ive Pedro oso supi, yuvɨraso avei supi movɨrö Jope pendar yuvɨreko.

²⁴Ipare a'ere arayi'ive oyepota Cesarea ve yuvɨraso, a'eve Cornelio osärö opakatu omu eta reseve yuvɨreko, omborɨparete gwembiso'o reseve avei.

²⁵Oyepotase Pedro sëtäve oso, Cornelio osë voi ete sovaïchi, iyavei oñenopɨ'ä sovai imboeteisa pɨpe.

²⁶Pedro rumo omopü'a, aipo e'i chupe: — Epü'a, che ni'ä nde nungar avei aiko.

²⁷Evokoiyase a'e omoñeta seroike seraso oɨ pɨpe, a'eve ava oñemonu'ä atɨ yugweru.

²⁸Pedro aipo e'i ava upe: — Peikwa ni'ä judío porokwaita aipo e'i va'e peikei rene nda'ei va'e judío rëtäve, anichira pemborɨ evokoi ava peiko. Tüpä rumo omombe'u ava remimbotare'ɨ̇ peiko erei rene ambuae ava upe e'i cheu.

²⁹Sese, pemondose che reka, che evokoiyase ndacheate'ɨ̇i ete che yu agwä peü. Sese che aikwa pota, ma'erä vo che reru uka peye.

³⁰Cornelio omboyevɨ chupe: — Opa irugätu arɨ, ka'aruarɨ yemombɨtesa rupi tuprɨ avei, aikose ko'ave che rëtäve, che yerure agwä, a'ese oyemboyekwa ñepëi mbɨa iturukwar sendɨyai va'e.

³¹A'e aipo e'i cheu: ‘Cornelio, Tüpä osendu nde yeruresa oikwa avei nde ereipɨtɨ̇vɨïse ava iparaɨsu va'e eiko.

³²Emondo ñepëi mbɨa Jope ve Simón Pedro serer va'e reka. A'e oikove ambuae Simón rëtäve, a'e mba'e pirer mopɨ̇tasar a'e sekoi paragwasu popɨve.’

³³Sese amondo voi ete nde reka agwä, iyavei ereyu ite nde poreroyasa pɨpe ko'ave. Kurïtëi opakatu yaiko ko'ave Tüpä rovai, iyavei orosendu pota ite yande Yar omombe'u va'e opakatu mba'e ndeu.

³⁴Evokoiyase Pedro omboɨpɨ oñe'ë, aipo e'i: — Kurïtëi aikwa ite, Tüpä ndaya nde mboya'oi yande raɨsu oiko,

³⁵sese opakatu ambuae ɨvɨ pɨpendar omboetei va'e, oyapo va'e avei mba'e tuprɨ yuvɨreko, a'e oipɨsɨra Tüpä.

³⁶Araka'e Tüpä oñe'ë avei Israel suindar upe, omombe'u ñe'ësa tuprɨ yeamotare'ɨ̇sa resendar Jesucristo rembiaporä sui, a'e opakatu ava ko ɨvɨ pɨpendar yuvɨrekoi va'erä Yar rese.

³⁷Peikwa tuprɨ ite ko mba'e oime va'e opakatu judío ɨvɨ rupi, a'e omboɨpɨ Galilea ve, Juan omombe'u ñeapirämosa resendar oiko.

³⁸Peikwa Tüpä omondose pirätäsa iyavei Espíritu Maräne'ɨ̇ Jesús Nazaret pendar upe, ipare Jesús ogwata opakatu rupi mba'e tuprɨ apo oiko, ombogwera avei opakatu ava iparaɨsu va'e karugwar povrɨve yuvɨrekoi va'e, esepia Tüpä sekoi ete sese,

³⁹iyavei yande yaikwa ite opakatu Jesús rembiapokwer Judea ɨvɨ rupi, tekwa Jerusalén pɨpe avei. A'eve oyatɨka uka kurusu rese yuka yuvɨreko.

⁴⁰Tüpä rumo ombogwerayevɨ imombosapɨsa arɨ pɨpe, ipare omboyekwa iri oreu.

⁴¹Nomboyekwai rumo opakatu ava upe, omboyekwa ore sembiporavo oroiko va'e upeño. Ore pɨri ni'ä okaru oɨ'u avei okwerayevɨ pare.

⁴²Iyavei a'e orekwai oromombe'u va'erä tekwa rupi ñe'ësa ava upe, ko Tüpä Rembiporavo sekoi, opakatu ava rekokwer rese porandu agwä oikove va'e omano va'e upe avei.

⁴³Opakatu Tüpä ñe'ë mombe'usar oñe'ë ite Jesús rekokwer rese yuvɨreko araka'e, iyavei aipo e'i yuvɨreko akoi seroyasar oipɨsɨra ñeröisa angaipa rese yuvɨreko.

⁴⁴Pedro ñe'ë vɨteseve, avɨyeteramo tëi Espíritu Maräne'ɨ̇ ogweyɨ ou opakatu ava ñe'ësa osendu va'e arɨve.

⁴⁵Iyavei judío rupi yuvɨrogwata va'e iyembo'esa rese a'e avei yugweru pedro rupi, ndoyembovɨ'ai rumo yuvɨreko Espíritu Maräne'ɨ̇ ogweyɨse ou nda'ei va'e judío arɨve,

⁴⁶osendu avei oñe'ëse ambuae ñe'ësa ndikwasai va'e iyavei Tüpä omboetei ipɨpe yuvɨreko.

⁴⁷Evokoiyase Pedro aipo e'i: — ¿Iyara pi'ä ndayaipotai va'erä ko ava ñeapirämo agwä yande pa'ü pendar, esepia ko oipɨsɨ Espíritu Maräne'ɨ̇ yuvɨreko inungar yande?

⁴⁸Iyavei omondo ñapirämo uka agwä Jesucristo rer pɨpe. Ipare oporandu Pedro upe opɨta vɨte va'erä movɨrö arɨ ipɨri yuvɨreko.