Read Guarayu HECHOS 3 Bible Online

HECHOS 3 - Guarayu bible

HECHOS 3

¹Ñepëi arɨ pɨpe, Pedro iyavei Juan yuvɨraso tüpärove oyerure agwä ka'aruarɨ yemombɨtesa rupi yuvɨreko.

²A'eve, tüpäro rokendɨpɨve, ñepëi mbɨa ndogwatai va'e oyesu suive, a'e vɨraso arɨ yakatu rupi yuvɨreko yepi omondo okendɨpɨve serer Porañetesa va'esave, oporandu va'erä porerekosa rese yuvɨroike va'e upe tüpäro pɨpe yepɨ.

³A'e ndogwatai va'e osepia Pedro iyavei Juan yuvɨroike potase tüpäro pɨpe, a'ese oporandu porerekosa rese chupe yuvɨreko.

⁴A'e rumo oma'egätu yuvɨreko sese, ipare Pedro aipo e'i chupe: — Ema'e ore rese.

⁵Evokoiyase a'e mbɨa oma'egätu sese, omboura revo mba'e cheu e'i viña.

⁶A'ese Pedro aipo e'i chupe: — Che ndarekoi gwarepochi iyavei oro, ko areko va'e gweraño amondora ndeu: Jesucristo Nazaret pendar, rer pɨpe epü'a iyavei egwata.

⁷Evokoiyase oipɨsɨ ipo yasu kotɨndar imopü'a, a'e ramoseve opa tuprɨ ipɨ iyavei ipɨñu'ä ovɨräkwä.

⁸Evokoiyase ndogwatai va'e opü'a ichui omboɨpɨ ogwata; ipare oike oso tüpärove supi, opo-opo vorɨvetesave iyavei osapukai Tüpä upe.

⁹Opakatu ava osepia yuvɨreko igwatase iyavei Tüpä upe isapukaise,

¹⁰iyavei ava ndoyembovɨ'ai avɨyeteramo tëi ikwerase yuvɨreko esepia evokoi ava oikwapa tüpäro rokendɨpɨ Porañete serer va'esave chinise mba'e rese iporanduse yuvɨreko yepi.

¹¹Ndogwatai va'ekwer ndoyepepɨ potai Pedro iyavei Juan sui. Yuvɨnoña atɨ, oyepɨ'amondɨi ava sepiase tüpäro rokendɨpɨ Salomón serer va'esave a'eve yuvɨrekoise.

¹²Pedro, mba'e repiare, aipo e'i ava upe: “¿Ma'erä vo peyemondɨi ko mba'e repiase, pe Israel ɨgwar? ¿Ma'erä vo ore repia atɨ peye ndoyavɨi ko ore pirätäsa pɨpe tëi iyavei Tüpä rese ore pɨ'añemoñeta tuprɨsa pɨpe tëi orombogwera va'e ko mbɨa peü viña?

¹³Tüpä, a'e akoi Abraham, Isaac iyavei Jacob vɨroya yuvɨreko araka'e opakatu yande ramoi eta aveino, a'e ni'ä omondo gweko pirätäsa tuvicha katu va'e Gwa'ɨrɨ Jesús upe, pe rumo akoi pemondoño mborerekwar povrɨve, akoi omose potase, pe evokoiyase ndapeipotaiño imose agwä chupe.

¹⁴Pe ndapeporandui ete evokoi seko maräne'ɨ̇ katuprɨ va'e rese, pe rumo peporandu ava oporapichi va'e rekokwer rese tëi imose uka agwä.

¹⁵Iyavei akoi egwë peye tekovesa ombou va'e yandeu yuka peiko. Tüpä rumo ombogwerayevɨ omano va'e pa'ü sui. A'e ko oromombe'u oroiko peü.

¹⁶Ko Jesús rer rese yeroya pɨpe ni'ä oipɨsɨ pirätäsa ko mbɨa ndogwatai va'ekwer opakatu pesepia va'e iyavei peikwa va'e. Jesús rese yeroyasa pɨpe ite ni'ä ko pe rembiepiave okwera tuprɨ.”

¹⁷“Che mu eta, che aikwa akoi peipɨtɨ̇vɨï va'e pe rerekwar Jesús yuka uka agwä pe ikwa tuprɨ e'ɨ̇ pɨpe kwese.

¹⁸Egwë e'i Tüpä imboavɨye araka'endar opakatu oñe'ë mombe'usar upe gwemimombe'ugwer: Poropɨsɨrösar oiporarara mba'e-mba'e tëi rasɨkwer omano oiko.

¹⁹Sese, peyevɨ pe Tüpä upe iyavei peñekuñarö, ipɨpe sui a'e omokañɨra pe angaipagwer pe sui

²⁰a'ese Tüpä omboura Jesús pe pɨsɨrö agwä, a'e Iporavoprɨ sekoi peü narä.

²¹Kurïtëi rumo Jesucristo ɨvave vɨte sekoi akoi Tüpä opase voi omoigätu opakatu mba'e iyevɨ agwä, aipo e'i akoi imoñe'ë uka araka'endar oñe'ë mombe'usar ndaseko maräi va'e.

²²Moisés yande ramoi yuvɨrekoi va'e upe aipo e'i imombe'u: ‘Yande Yar Tüpä oiporavora pe pa'ü sui ñepëi oñe'ë mombe'usar inungar che aiko. Pemboyeroyara sereko opakatu mba'e omombe'u va'e rese peü,

²³esepia ndovɨroyai va'e Tüpä ñe'ë mombe'usar yuvɨreko, a'e opakatu ite imokañɨsara tekwa pɨpe sui.’ ”

²⁴“Iyavei opakatu Tüpä ñe'ë mombe'usar, Samuel suive tuprɨ omombe'u yuvɨreko araka'e, ko arɨ yasepia va'e kurïtëi.

²⁵Peü kurïtëi omboavɨye ite omombe'u va'ekwer Tüpä oñe'ë mombe'usar rupi, iyavei kurïtëi oyapo va'e pe ramoi eta upe oiko, Tüpä rumo aipo e'i Abraham upe: ‘Opakatu tekwa ɨvɨ pɨpendar sovasaprɨ itera ndesuindar yuvɨreko.’

²⁶Akoi Tüpä Gwa'ɨrɨ ombogwerayevɨse, peü rane ombou, pe rovasa agwä, toseyapa ñepëi-pëi gwekokwerai yuvɨreko oyapave.”