Read Guarayu HECHOS 4 Bible Online

HECHOS 4 - Guarayu bible

HECHOS 4

¹Pedro iyavei Juan oñe'ë vɨteseve ava re'ɨi upe, a'ese pa'i eta tüpäro rärösar sundao rerekwar saduceo avei yugweru yuvɨreko chupe.

²Oñemoɨrö ite yuvɨreko esepia Pedro iyavei Juan ombo'e ava yuvɨreko ipare aipo e'i omano va'e kwerayevɨsa a'e oyemboyekwa ite Jesús rese.

³Ichui oipɨsɨ seraso sokenda yuvɨreko, ayi'ive voi yanosëra mba'e rese porandu agwä o'esa pɨpe esepia ka'arutëi osokenda yuvɨreko.

⁴Seta iteanga iñe'ë rendusar vɨroya va'e yuvɨreko; iyavei kuimba'e seroyasar retakwer, seni cinco mil tuprɨ.

⁵A'ere arayi'ive mborerekwareta oñemonu'ä yuvɨreko Jerusalén ve, judío rerekwar, pa'i eta rerekwar, Moisés porokwaita rese oporombo'e va'e avei.

⁶Pa'i rerekwar ɨvate katu va'e Anás, Caifás, Juan, Alejandro, iyavei opakatu omu reseve.

⁷Evokoiyase gweru ukase Pedro iyavei Juan opa'üve, oporandu yuvɨreko chupe: — ¿Ava pe kwaita pɨpe vo, anise uma rer pɨpe vo ko mba'e peyapo peiko?

⁸Evokoiyase Pedro, Espíritu Maräne'ɨ̇ pirätäsa pɨpe, aipo e'i imboyevɨ chupe: — Pe mborerekwareta ko tekwa pɨpendar pe avei pa'i rerekwar:

⁹peporandu ni'ä ko ava imba'easɨ va'e ndogwata katui va'e, mbogwera agwer rese oreu.

¹⁰Evokoiyase tapeikwapa opakatu pe Israel suindar peiko va'e okwera ko ava ndogwata katui va'ekwer Jesucristo Nazaret pendar rer pɨpe, a'e ni'ä peyatɨka uka va'ekwer kurusu rese Tüpä rumo ombogwerayevɨ iri omano va'e pa'ü sui.

¹¹Ko Jesús pe remieroɨrö, a'e rumo yande vɨräkwäsa. Pe evokoiyase inungar oɨ mopü'asar omomboño va'e ita avɨye katu va'e oɨ movɨräkwäsa rägwer yepi.

¹²Ndipoi ambuae ava sui poropɨsɨrösa, Jesús gweraño ite oikatu oporopɨsɨrö. Esepia Tüpä nomboui ambuae ava tëi ko ɨvɨ pɨpe yande pɨsɨrö agwä.

¹³Mborerekwar osepiase iyembosɨkɨye e'ɨ̇sa yuvɨreko, marä e'i pi'ä ko mbɨa ava tëi ndoyembo'ei va'e ni'ä e'i yuvɨreko chupe, ichui oikwa Jesús remimbo'egwer sekose yuvɨreko.

¹⁴Iyavei akoi ava semimbokweragwer supive ite sekoise, sese ndoikatui chupe oñe'ë marä agwä yuvɨreko.

¹⁵Ipare pesë okarve e'i mborerekwareta yuvɨreko chupe, a'e gweraño evokoiyase opɨta oɨ pɨpe oñemoñeta yuvɨreko sese.

¹⁶Aipo e'i yuvɨreko: — ¿Marä ya'era vo ko ava rereko? Esepia opakatu ava Jerusalén pendar oikwa ko mba'e poromondɨisa oyapose yuvɨreko, ndiyai ete egwë nde'i ya'era chupe.

¹⁷Yambosɨkɨye yuvɨreko Jesús rer rese iñe'ë iri e'ɨ̇ agwä, ipɨpe sui ava tosendu iri eme Jesús pirätäsa resendar ñe'ësa yuvɨreko.

¹⁸Aipo o'e pare, perio e'i yuvɨreko chupe pesendu, ko pɨpe suive peñe'ë iri eme tuprɨ pembo'e iri eme avei ava Jesús rer pɨpe e'i yuvɨreko chupe.

¹⁹Pedro iyavei Juan omboyevɨ yuvɨreko chupe: — Marä e'i pe pɨ'ave ¿uma pi'ä avɨye katu Tüpä rovai pe porokwaita tie orovɨroya katura Tüpä orekwaisa sui?

²⁰¡Ndiyai rumo mba'e ore rembiepia, mba'e orosendu va'e avei mombe'u e'ɨ̇ agwä oreu!

²¹Aipo i'ese mborerekwar ombosɨkɨye katu tëi yuvɨreko. Ichui rumo omose tuprɨño esepia ava omboetei gwasu Tüpä yuvɨreko ko imba'easɨ va'e mbogwera repiase, sese ndoikatui ete mba'e apo yuvɨreko chupe.

²²Evokoi ava oipɨsɨ va'e Tüpä poromondɨisa okwera agwä, a'e otɨ̇arö katu cuarenta aravɨter vɨreko va'e sui.

²³Yuvɨnosese Pedro iyavei Juan, oyevɨ yuvɨraso omboetasa pɨri a'eve oñemonu'äsave opa omombe'u pa'i rerekwar oyeupe ñe'ë marä-marä tëisa yuvɨreko.

²⁴Aipo rendu pare, oyoya gwasu oyerure yuvɨreko Tüpä upe, aipo e'i: “Ore Yar, nde ni'ä Tüpä opakatu ɨva, ɨvɨ, paragwasu, opakatu ipor reseve aposar ereiko,

²⁵nde Espíritu Maräne'ɨ̇ pɨpe aipo eremombe'u uka, nde rembigwai mborerekwar David upe araka'e: ‘¿Ma'erä vo opakatu tekwa oyamotare'ɨ̇ yuvɨreko? ¿Ma'erä pi'ä ipɨ'a ñemoñetarai tëi yuvɨreko?

²⁶Mborerekwar ɨvate katu va'e iyavei ambuae mborerekwar ko ɨvɨ pɨpendar oñemonu'äpa yuvɨreko Yar Tüpä iyavei sembiporavo Poropɨsɨrösar amotare'ɨ̇ agwä.’ ”

²⁷“Egwë e'i ete oñemonu'äse Herodes Poncio Pilato avei, ava nda'ei va'e judío, judío eta reseve yuvɨreko ko tekwa Jerusalén ve, esepia oñemonu'ä yuvɨreko nde rembigwai araka'eve nde rembiporavo Poropɨsɨrösar Jesús, seko maräne'ɨ̇ va'e amotare'ɨ̇ agwä.

²⁸Egwë e'i, yapo opakatu nde pɨ'añemoñeta araka'endar rupi tuprɨ yuvɨreko.

²⁹Iyavei kurïtëi, ore Yar, ema'e ore amotare'ɨ̇sar rese embou nde pirätäsa nde rembigwai oroiko va'e upe sɨkɨye e'ɨ̇sa pɨpe nde ñe'ëngagwer mombe'u vɨte agwä.

³⁰Ipare nde pirätäsa pɨpe, embogwera imba'easɨ va'e iyavei eyapo mba'e poromondɨisa yavai va'e nde rembigwai Jesús rer maräne'ɨ̇ pɨpe.”

³¹Iyerure pare, Tüpä omborɨrɨi opakatu mba'e iñemonu'äsave yuvɨreko chupe; a'ese Espíritu Maräne'ɨ̇ opa oike yuvɨreko sese, sese osɨkɨye e'ɨ̇sa pɨpe omombe'u tuprɨ Tüpä ñe'ëngagwer yuvɨreko.

³²Seta iteanga Jesús reroyasar yuvɨreko, opakatu oyoya tuprɨ ipɨ'añemoñeta yuvɨreko, ndipoi ete ko gweraño ko che mba'e e'i va'e, opakatu seroyasar mba'e rumo opakatu mba'e.

³³Jesús ñe'ë mombe'usar omombe'u vɨte ipirätäsa pɨpe ikwerayevɨ agwer yuvɨreko, ipɨpe sui Tüpä osovasa katu sereko.

³⁴Ndipoi ete ipa'ü pendar mba'e ndovɨrekoi va'e, esepia vɨreko va'e ɨvɨ anise oɨ, a'e omondo ite yuvɨreko, iyavei a'e gwarepochi

³⁵seprɨ omondo Jesús ñe'ë mombe'usar upe yuvɨreko yepi, a'e evokoiyase omboya'o-ya'o opakatu upe mba'e ipane va'e rupi-rupi yuvɨreko.

³⁶Egwë e'i ava judío ramoi Leví suindar Chipre pendar José serer va'e, Jesús ñe'ë mombe'usar osero Bernabé e'i yuvɨreko chupe (“porombovɨ'asar Ra'ɨrɨ” oya aipo e'i).

³⁷A'e mbɨa vɨreko va'ekwer ɨvɨ, ipare omondo gwarepochi repɨrä, ichui opa omondo seprɨ Jesús ñe'ë mombe'usar upe.