Read Guarayu HECHOS 6 Bible Online

HECHOS 6 - Guarayu bible

HECHOS 6

¹A'e aravɨter pɨpe aipo, oyemboetase Jesús reroyasar yuvɨreko, griego pɨpe oñe'ë va'e oñe'ërai oyeupe hebreo pɨpe oñe'ë va'e rese yuvɨreko, ni'añeko tuprɨi ore mu imer mano va'ekwer rese arɨ yakatu mba'e poropɨtɨ̇vɨïsa imondosase chupe e'i oñe'ë yuvɨreko.

²Evokoiyase opayandepo yovaive ñuvɨrïo tuprɨ yuvɨrekoi va'e Jesús ñe'ë mombe'usar omonu'äpa uka opakatu Jesús reroyasar, a'eve aipo e'i yuvɨreko chupe: — Ndiyai rumo ore oropoi tëi Tüpä ñe'ëngagwer mombe'usa sui mba'e poropɨtɨ̇vɨïsa mondo agwä rese tëi.

³Sese ore rɨvrɨ eta, peiporavo ñuvɨrïo ova mbɨa seko avɨye va'e pe pa'ü sui, yarakwa va'e iyavei Espíritu Maräne'ɨ̇ vɨroya va'e ite opɨ'a pɨpe, a'e mbɨa ti'añeko ko mboravɨkɨsa rese yuvɨreko.

⁴Ore evokoiyase oroyerureñora iyavei oroporombo'eño itera Tüpä ñe'ëngagwer rese.

⁵Opakatu oipotaño yuvɨreko ñe'ësa oyeupendar, ichui osenoi Esteban yuvɨreko, a'e oyeroya ite Tüpä rese iyavei vɨroya ite Espíritu Maräne'ɨ̇ opɨ'a pɨpe, ichui oiporavo Felipe, Prócoro, Nicanor, Timón, Pármenas iyavei Nicolás evokoi mbɨa Antioquía pendar a'e vɨroya va'ekwer judío arakwasa.

⁶Ichui vɨrasopa Jesús ñe'ë mombe'usar upe yuvɨreko, a'e omondo opo i'arɨve oyerure yuvɨreko sese.

⁷A'ese Tüpä ñe'ëngagwer oyemosai katu tekwa pɨpe, ichui oyemboeta katu iri avei Jesús reroyasar yuvɨreko Jerusalén ve. Seta avei judío pa'i vɨroya iñe'ëngagwer yuvɨreko.

⁸Esteban, vɨreko ite Tüpä pirätäsa iyavei iporovasasa oyese, oyapo avei mba'e poromondɨisa yavai va'e opakatu tekwa rupi.

⁹Evokoiyase Jerusalén ve oime oɨ judío ñemonu'äsa Mbigwaigwer serer va'e, a'e pendar tekwa Cirene ɨgwar, Alejandría ɨgwar, Cilicia ɨgwar iyavei Asia ɨvɨrindar yuvɨrekoi va'e reseve omboɨpɨ oiñe'ë poepɨ-epɨ Esteban yuvɨreko;

¹⁰ndoikatui rumo iñe'ë rekopɨ agwä yuvɨreko, esepia a'e oñe'ë mba'ekwasa Espíritu Maräne'ɨ̇ omondo va'e pɨpe.

¹¹Evokoiyase omboepɨ ambuae ava upe semira tëi agwä sese yuvɨreko. Ore orosendu ko mbɨa oñe'ëse mba'e naporäi va'e rese Moisés amotare'ɨ̇save, Tüpä amotare'ɨ̇save avei aipo peyera peñe'ë.

¹²Evokoiyase a'e ava oyamotare'ɨ̇ uka opakatu ava mborerekwar reseve iyavei judío porokwaita rese oporombo'e va'e upe avei yuvɨreko; ichui oipɨsɨ yesapɨ'a Esteban seraso mborerekwar upe Porandusa ɨvate katu Va'esave yuvɨreko.

¹³Iyavei oseka mbɨa semira tëi va'e oñe'ë va'erä sese, a'e aipo e'i yuvɨreko: — Ko mbɨa oñe'ë-ñe'ë tëi yande tüpäro imaräne'ɨ̇ va'e amotare'ɨ̇save, Moisés porokwaita amotare'ɨ̇save avei.

¹⁴Ore orosendu iñe'ë Jesús Nazaret pendar omokañɨra tüpäro Moisés yande mbo'esa avei aipo osekuñaröra.

¹⁵A'ese opakatu mborerekwar oñemonu'ä va'e yuvɨnoi a'eve oma'e Esteban rese yuvɨreko, oma'ese aipo yuvɨreko sese, ndoyavɨi sepiaka mbigwai ɨva pendar rova.