Read Guarayu HECHOS 8 Bible Online

HECHOS 8 - Guarayu bible

HECHOS 8

¹Iyavei Saulo a'eve sekoi, osepia ite Esteban oyukase yuvɨreko. A'e arɨ pɨpeve omboɨpɨ Jesús reroyasar reka Jerusalén ve yuvɨreko. Opakatu tuprɨ, Jesús ñe'ë mombe'usar gweraño opɨta yuvɨreko, opa oyemboya'o-ya'o ɨvɨ Judea rupi Samaria rupi avei.

²Oime ava ipɨ'añemoñeta tuprɨai va'e vɨraso Esteban re'ögwer ñotɨ̇ yuvɨreko iyavei oyase'o iteanga yuvɨreko sese.

³A'e pɨpeve avei aipo Saulo omombaraɨsu ava Jesús reroyasar yuvɨrekoi va'e seroya uka e'ɨ̇ agwä viña, yuvɨroike-ikeño tëi aipo oɨ yakatu rupi kuimba'e iyavei kuña mbotɨrɨrɨ senose sokenda agwä yuvɨreko.

⁴Ava oñemosaï va'ekwer rumo Jerusalén sui omombe'uño ite ñe'ësa avɨye va'e yuvɨrasosa rupi yuvɨreko.

⁵Felipe, ipa'ü pendar, oso tekwa gwasu Samaria rupi, ichui omboɨpɨ oñe'ë Cristo rekokwer rese oiko.

⁶Ava oñemonu'ä atɨ Felipe ñe'ë rendu agwä iyavei oyapɨsaka tuprɨ yuvɨreko sese, osepia avei poromondɨisa sembiapo yuvɨreko.

⁷Iyavei seta imbogwerasa ava karugwar rerekosar, karugwar yuvɨnosë ava sui säse yuvɨreko; iyavei seta ava setekwer novɨi va'e ndogwatai va'e avei ombogwera.

⁸Evokoiyase ovɨ'arete a'e tekwa pɨpendar yuvɨreko.

⁹A'eve oime ñepëi mbɨa Simón serer va'e, yɨpɨve ipayeai va'e, iyavei ombopa-mbopa ava Samaria pendar oyeroya inungar ava seko ɨvate va'e.

¹⁰Evokoiyase opakatu ava, kwakwa va'e iyavei chi'ïvä'e katu va'e, oyapɨsaka tuprɨ iñe'ë rese iyavei aipo e'i yuvɨreko: “Ko ni'ä oñe'ë Tüpä pirätäsa tuvicha va'e upe.”

¹¹Iyavei omboyeroya ite sereko yuvɨreko, esepia opayesa pɨpe yɨpɨndar seta aravɨter rupi ombopa ava oiko yepi.

¹²Vɨroyase ñe'ësa avɨye va'e Felipe remimombe'u Tüpä mborerekwasa resendar Jesucristo rekokwer resendar avei, a'ese ava re'ɨi vɨroya yuvɨreko, ipare oñeapirämo kuimba'e iyavei kuña yuvɨreko.

¹³A'e Simón avei vɨroya, ipare oñeapirämo uka ichui ogwata Felipe rupi, osepia poromondɨisa tuvicha va'e iyavei Tüpä suindar ndayasepiai va'e rese oyepɨ'amondɨi tëi.

¹⁴Jerusalén ve Jesús ñe'ë mombe'usar yuvɨrekoi va'e oyandu Samaria ve seta ava oipɨsɨse Tüpä ñe'ëngagwer yuvɨreko, evokoiyase omondo a'eve omboetasa Pedro iyavei Juan yuvɨreko.

¹⁵Oyepotase Samaria ve yuvɨreko, oyerure opakatu ava Jesús reroyasar rese Espíritu Maräne'ɨ̇ pɨsɨ agwä yuvɨreko.

¹⁶Esepia Espíritu Maräne'ɨ̇ ndogweyɨ vɨtei ete sese yuvɨreko; oñeapirämoño tëi vɨte yande Yar Jesús rer pɨpe yuvɨreko.

¹⁷Evokoiyase Pedro iyavei Juan omondo opo ava arɨve yuvɨreko, a'ese oipɨsɨ Espíritu Maräne'ɨ̇ yuvɨreko.

¹⁸Simón, osepiase Espíritu Maräne'ɨ̇ ogweyɨse Jesús ñe'ë mombe'usar omondose ava arɨve opo yuvɨreko, a'ese omondo pota gwarepochi sepɨrä chupe yuvɨreko,

¹⁹ipare rumo aipo e'i chupe: — Cheu avei pemboumi tëi evokoi pirätäsa, amondose che po ava arɨve toipɨsɨ avei Espíritu Maräne'ɨ̇ yuvɨreko.

²⁰Evokoiyase Pedro omboyevɨ chupe: — ¡Tokañɨpa nde gwarepochi nde reseve esepia nde pɨ'añemoñeta ko Tüpä ombou va'e rese, ererokwa pota va'e nde gwarepochi pɨpe viña!

²¹Ndeu ndiyai ko nungar mba'e apo agwä, esepia nde pɨ'añemoñetasa nda'ei i'ɨ̇vi va'e Tüpä rovai.

²²Sese epoi nde mba'e aposa raisa sui, iyavei eporandu Tüpä upe, avɨyeteramo iñeröira nde pɨ'añemoñetasa rese ndeu.

²³Esepia aikwa ite nde ereikose mba'e naporäi va'e pɨpe iyavei nde pɨ'añemoñeta raisa pɨpe vɨte ereiko.

²⁴Simón omboyevɨ chupe: — Peyerure katu yande Yar upe che rese, tipo eme mba'e-mba'e tëi akoi pe mombe'u va'e cheu.

²⁵Opase omombe'u yande Yar rese ñe'ësa, a'ese Jesús ñe'ë mombe'usar omombe'u ko ñe'ësa avɨye va'e Samaria ɨvɨ pendar upe, ipare oyevɨpa Jerusalén ve yuvɨreko.

²⁶Ko ipare, ñepëi mbigwai Yar suindar aipo e'i Felipe upe: “Epü'a iyavei eso iro'ɨ kotɨ nde yepota agwä evokoi perɨ oso va'e Jerusalén sui Gaza ve.” Evokoi perɨ osasa va'e ɨvɨ iporupɨre'ɨ̇sa rupi oso.

²⁷A'ese Felipe opü'a ipare oso; a'e perɨ rupi osovaïchi ñepëi mbɨa Etiopía pendar. A'e seko ɨvate va'e gwarepochi apokatusar Etiopía pendar kuña mborerekwar upe narä yepi, a'e mbɨa oso va'e Jerusalén ve Tüpä upe oyerure agwä.

²⁸Oyevɨse gwekwave oso, ogwapɨ tuprɨ öi vɨru karëto pɨpe iyavei oyerokɨ kwachiar Tüpä ñe'ë mombe'usar Isaías rembikwachiagwer.

²⁹A'ese Espíritu aipo e'i Felipe upe: “Eyemboya evokoi karëto rese.”

³⁰Oyemboyase Felipe oso sese, osendu etiope oyerokɨse Isaías rembikwachiagwer öi; a'ese oporandu chupe: — ¿Eresendukwa vo aipo ereyerokɨ va'e eï?

³¹Etiopía pendar mbɨa omboyevɨ chupe: — ¿Marä a'era vo che sendukwa viña, ndipoise imombe'u tuprɨsar cheu? Ipare aipo e'i Felipe upe eyeupi, teregwapɨ ko'ave che pɨri.

³²A'e iyerokɨsa pɨpe Ikwachiaprɨ aipo e'i: “Serasosa inungar ovesa yuka agwä mba'e mɨmba yukasave; inungar ovesa membrɨ nasasëi va'e ite yepɨ egwë e'i avei oyukasar rovai, egwë e'i tuprɨ avei a'e mbɨa noñe'ëi ete.

³³Osekomomini yuvɨreko, iyavei ndipoi ete sepɨsar; ¿uma pi'ä oikatura oñe'ë ichuindar rekokwer rese? Esepia ava ko ɨvɨ pɨpendar oyuka ite yuvɨreko.”

³⁴Oyerokɨ pare a'e Etiopía pendar oporandu Felipe upe: — Emombe'umi cheu, ¿uma rese pi'ä aipo ko Tüpä ñe'ë mombe'usar oñe'ë: oyese ae pi'ä anise ambuae ava rese tie?

³⁵Evokoiyase Felipe, ko Ikwachiaprɨ sui omombe'u ñe'ësa avɨye va'e Jesús rekokwer resendar Etiopía pendar upe.

³⁶Koiye katu, oyepotase ɨ oimesave yuvɨreko, a'ese gwarepochi rese ñangarekwar aipo e'i: — Esepia ko'ave oime ɨ; ¿Ndiyai vo che apirämomi tëi eve viña?

³⁷Felipe aipo e'i chupe: — Ereroyase nde pɨ'a pɨpe, a'ese ereikatura. Ipare a'e mbɨa omboyevɨ chupe: — Aroya ite Jesucristo Tüpä Ra'ɨrɨ sekoise.

³⁸Evokoiyase omombɨta uka vɨru karëto; ichui ogweyɨ ɨve yuvɨraso, ipare Felipe oñapirämo.

³⁹Yuvɨnosëse ɨ sui, yande Yar Espíritu vɨraso Felipe, ipare gwarepochi rese ñangarekwar ndosepia iri ete; egwë e'iño vorɨvete oso perɨ rupi.

⁴⁰Felipe rumo oyemboyekwa Azoto ve, ichui oso tekwa yakatu rupi oiko omombe'u ñe'ësa avɨye va'e, egwë e'i oyepota Cesarea ve oso.