Read Guarayu HECHOS 9 Bible Online

HECHOS 9 - Guarayu bible

HECHOS 9

¹Saulo rumo, oñemoɨrö iteanga vɨteño ite yande Yar reroyasar upe oiko. Oyukapa potaño ite, sese oso pa'i rerekwar ɨvate katu va'e upe,

²ipare oporandu porokwaita kwachiar rese chupe oso agwä oɨ judío ñemonu'äsa Damasco ve, oseka va'erä yuvɨrekoi va'e Tekokwer Pɨasu rupi, kuimba'e iyavei kuña, ichui seraso pɨrä sokenda agwä Jerusalén ve.

³Vɨrovɨse yuvɨraso tekwa Damasco ve, avɨyeteramo tëi osesape gwasu ɨva sui yɨvɨi chupe yuvɨreko.

⁴A'ese Saulo ovɨapi oso ɨvɨve, ipare osendu ɨva pendar ñe'ësa aipo e'i va'e: “Saulo, Saulo, ¿ma'erä vo che reka eiko eve?”

⁵Saulo oporandu: “¿Ava vo nde ereiko Yar?” Ñe'ësa ɨva pendar omboyevɨ chupe: “Che aiko Jesús, a'e akoi nde ereseka va'e sereko.

⁶Epü'a, ipare eike eso tekwa ve; a'eve omombe'ura mba'e ereyapo va'erä yuvɨreko ndeu.”

⁷Yuvɨraso va'e Saulo rupi osɨkɨye iteanga osenduse ñe'ësa ɨva suindar yuvɨreko, esepia ndosepiai ete ava oñe'ë va'e ɨvate yuvɨreko.

⁸Ipare, Saulo opü'a ɨvɨ sui; oma'e tëi ndoikatui rumo mba'e repia. Ichui supindar oipɨsɨ iyɨva rese seraso Damasco ve yuvɨreko.

⁹A'eve mbosapɨ arɨ ndasesapɨsoi, ndokarui ndoɨ'ui avei oiko.

¹⁰Ñepëi mbɨa sekoi va'e Damasco ve Jesús reroyasar serer va'e Ananías, a'e chupe oyemboyekwa Yar ikerve aipo e'i: “¡Ananías!” A'e omboyevɨ chupe: “Ko aiko, che Yar.”

¹¹Yar aipo e'i chupe: “Epü'a ipare eso evokoi okar serer va'e I'ɨ̇vi tuprɨ va'esa rupi, eporandu Judas rëtäve ñepëi mbɨa serer va'e Saulo Tarso pendar rese. A'e rumo oyerure ñoite öi,

¹²ipare okerve osepia ñepëi mbɨa serer va'e Ananías omondose opo i'arɨve omboesapɨso iri agwä.”

¹³Ko osenduse, Ananías aipo e'i: “Che Yar, seta rumo evokoi mbɨa rekokwer omombe'u yuvɨreko cheu mba'e tëi oyapo va'e nde reroyasar reko maräne'ɨ̇ upe Jerusalén ve.

¹⁴Kurïtëi ou rutei ko'ave, a'e mbɨa pa'i rerekwar porokwaita rupi, opakatu nde rer rese oyeroya va'e rokendapa agwä.”

¹⁵Yande Yar rumo aipo e'i chupe: “Eso, esepia aiporavo evokoi mbɨa che rekokwer rese oñe'ë va'erä ambuae tekwa pendar upe, iyavei serekwar ɨvate katu yuvɨrekoi va'e upe, Israel pendar upe avei.

¹⁶Che amboyekwara seta mba'e tëi chupe oiporara va'erä che remimbotar mboavɨye agwä oiko.”

¹⁷A'ese Ananías oso Saulo rekosave. Oikese oɨ pɨpe, omondo opo Saulo rese aipo aipo e'i chupe: — Che rɨvrɨ Saulo, yande Yar Jesús oyemboyekwa va'e ndeu perɨ rupi nde yuse, a'e che mbou nde mboesapɨso iri agwä toike avei katu Espíritu Maräne'ɨ̇ nde rese.

¹⁸A'ese voi ete pira pirer nungar mba'e ovɨapipa sesa sui, a'ese voi sesapɨso iri. Ichui opü'a ipare voi ñapirämosa.

¹⁹Okaru pare a'ese ramo ite ipirätä, ipare movɨrö arɨ tëi opɨta iri Jesús reroyasar pɨri Damasco ve.

²⁰Ipare Saulo omboɨpɨ imombe'u Jesús rekokwer oɨ judío ñemonu'äsave Tüpä Ra'ɨrɨ sekoise.

²¹Ava opakatu osendu va'e iñe'ë ndoyembovɨ'ai tëi, aipo e'i yuvɨreko: — ¿Nda'ei vo akoi ko mbɨa Jerusalén ve Jesús reroyasar marä-marä tëi vɨreko va'e? ¿Nda'ei vo akoi ko avei ou ko'ave ava pɨsɨ agwä iyavei serasopa pɨrä pa'i eta rerekwar upe viña?

²²Saulo rumo omombe'u tuprɨ katu Jesús rekokwer, osekopɨ opakatu omu Damasco pendar, omboyekwa katu oiko Jesús sekoise Poropɨsɨrösar.

²³Seta arɨ pare, judío ombogwai yuka agwä Saulo yuvɨreko viña.

²⁴A'e rumo oikwa voi ete. Ombogwaisar pɨ̇tü arɨ osärö va'e yuka agwä tekwa ächisa rokendɨpɨve yuvɨreko,

²⁵evokoiyase Jesús reroyasar rumo pɨ̇tü pɨpe tekwa ächisa oyere tuprɨ va'e rese, ikupe rupi ombogweyɨ ɨruova gwasu pɨpe imoñemi imondo yuvɨreko.

²⁶Koiye Saulo oyepota Jerusalén ve, a'eve oyemboya pota tëi Jesucristo reroyasar rese; opakatu osɨkɨyeño yuvɨreko ichui, esepia ndovɨroyai ete yuvɨreko a'e vɨroyase Jesucristo.

²⁷Ipare rumo, Bernabé vɨraso Saulo Jesús ñe'ë mombe'usar yuvɨrekoi va'e upe. A'eve Bernabé omombe'upa chupe aipo e'i ko mbɨa Saulo osepia yande Yar perɨ rupi, iyavei yande Yar oñe'ë chupe, ichui ko Saulo oñe'ë osɨkɨye e'ɨ̇sa pɨpe Damasco ve, Jesús rekokwer rese.

²⁸Evokoiyase Saulo opɨta Jerusalén ve, ogwata avei Jesús ñe'ë mombe'usar rupi, omombe'u avei yande Yar rekokwer osɨkɨye e'ɨ̇sa pɨpe.

²⁹Oiñe'ëpoepɨ avei sekokwer rese judío griego pɨpe oñe'ë va'e yuvɨreko; ichui rumo oyuka potaño yuvɨreko.

³⁰Oikwase rumo Jesucristo reroyasar, vɨraso voi ete Saulo Cesarea ve, ichui omondo Tarso ve yuvɨreko.

³¹Evokoiyase opakatu Jesús reroyasar, yuvɨrekoi va'e Judea rupindar, Galilea rupindar iyavei Samaria rupindar, chupe oime mba'e tuprɨ. Iyavei oyemovɨräkwä tuprɨ katu yuvɨreko yande Yar mboeteisa pɨpe, Espíritu Maräne'ɨ̇ oipɨtɨ̇vɨï iyemboeta katu agwä.

³²Pedro, ogwata opakatu rupi oso Jesucristo reroyasar repia, a'e oso osepia avei tekwa Lida pendar ñe'ësa vɨroya va'e.

³³A'eve osepia ñepëi mbɨa serer va'e Eneas, a'e ndogwatai va'e, vupave tëi tui va'e mbosapɨ ova aravɨter rupi.

³⁴Pedro aipo e'i chupe: — Eneas, Jesucristo nde mbogwera. Eñarapü'a emoigätu nde rupa. Eneas a'e ramo seve voi ete oñarapü'a.

³⁵Osepiase opakatu Lida pendar Sarón pendar avei ko ndogwatai va'ekwer gwatase, ipare vɨroyapa ite yande Yar yuvɨreko.

³⁶A'e aravɨter pɨpe Jope ve kuña serer va'e Tabitá sekoi, griego ñe'ë pɨpe rumo Dorcas serer. A'e Jesucristo reroyasar sekoi a'e sekokwer avɨye va'e oporopɨtɨ̇vɨï yepi.

³⁷A'e arɨ rupi, Dorcas imba'easɨ gwasu ou ichui omano. Ipare ava se'ögwer oyosei, ichui vɨroyeupi oɨ ɨvate va'esave seraso yuvɨreko.

³⁸Jope namombrɨi Lida sui, evokoiyase oyanduse Jesús reroyasar Jope pendar Pedro Lida ve sekoise, a'ese omondo ñuvɨrïo mbɨa seru poyava agwä Jope ve yuvɨreko.

³⁹Evokoiyase Pedro oso supi. Oyepotase yuvɨraso a'eve vɨroyeupi oɨ ɨvate va'esave seraso te'ögwersave yuvɨreko; iyavei opakatu kuña imer mano va'ekwer oyere atɨ voi, oyase'o Pedro ɨvɨi yuvɨreko omboyekwa avei oturukwar i'arɨ pendar reseve Dorcas rembiapokwer yuvɨreko chupe.

⁴⁰Ipare Pedro omosepa rane opakatu ava okarve, ipare oñenopɨ'ä oyerure Tüpä upe; ichui oma'e kuña omano va'e rese aipo e'i chupe: — ¡Tabitá, eñarapü'a! Aipo oyeupe ese, Tabitá omboi gwesa, Pedro repiase, oñarapü'a öi.

⁴¹A'ese oipopɨsɨ imoñarapü'a; ipare oñe'ë opakatu Jesús reroyasar kuña imer mano va'ekwer upe avei aipo e'i, pesepia ko okwerayevɨse.

⁴²Seräkwä oyanduse opakatu Jope rupi, seta ava yande Yar vɨroya yuvɨreko.

⁴³Evokoiyase Pedro opɨta seta arɨ a'e tekwave, mbɨa mba'e pirer mopɨ̇tasar rëtäve Simón serer va'e pɨri.