Read Guarayu ROMANOS 10 Bible Online

ROMANOS 10 - Guarayu bible

ROMANOS 10

¹Che rɨvrɨ eta, che aipota che pɨ'a pɨpe ite iyavei ayerure Tüpä upe Israel ɨgwar rese iñepɨsɨrö agwä yuvɨreko.

²Supiete ikere'ɨ̇ Tüpä upe mboravɨkɨ apo agwä yuvɨreko viña; okere'ɨ̇sa sui rumo oyavɨ sendukwa e'ɨ̇sa pɨpe yuvɨreko.

³Esepia ndoikwa potai yuvɨreko marä e'i Tüpä ava reko mo'ɨ̇vi, iyavei oyesui tëi oyeeko mo'ɨ̇vi pota yuvɨreko viña; ipɨpe sui nomboyeroyai ete Tüpä remimbotar gweko mbokatuprɨ agwä yuvɨreko.

⁴Esepia Cristo rekokwer pɨpe imboavɨyesa tuprɨ porokwaita, ipɨpe sui opakatu vɨreko va'e yeroyasa a'e seko katuprɨra yuvɨreko.

⁵Ko yande reko katuprɨ agwä porokwaita pɨpe sui, Moisés aipo e'i ikwachia: “Akoi ava omboavɨye tuprɨ va'e opakatu ko porokwaita, ipɨpe sui yuvɨrekovera.”

⁶Poreroyasa resendar pɨpe, aipo e'i: “Ani pe pɨ'a ñemoñeta: ‘¿Uma pi'ä oyeupira ɨvave?’ — Cristo ogweyɨra ɨva sui oyapave aipo e'i — ;

⁷anise ‘¿Uma pi'ä ogweyɨra mba'e-mba'e porarasave?’ ” — Cristo oyeupira omano va'e pa'ü sui oyapave aipo e'i.

⁸¿Marä oyapave pi'ä aipo e'i?: “Ko ñe'ësa avɨye va'e namombrɨi ete sekoi ndesui, ndeyuru sui, nde pɨ'a sui aveino.” Ko ñe'ësa avɨye va'e oromombe'u oroiko peü.

⁹Supiete nde yuru pɨpe tëi ereikwase nde Yar Jesús, iyavei ereroyase nde pɨ'a pɨpe Tüpä ombogwerayevɨse, a'ese ereikora pɨsɨrösa pɨpe.

¹⁰Supiete yande pɨ'a pɨpe yaroyase a'ese yaikora mba'e tuprɨ pɨpe, iyavei yande yuru pɨpe yaikwase Jesucristo a'ese yaikora pɨsɨrösa pɨpe.

¹¹Ikwachiaprɨ pɨpe aipo e'i: “Akoi oyeroya va'e sese, a'e nimbopasai chietera.”

¹²Judío rekokwer oyoya tuprɨ ava nda'ei va'e judío rekokwer rese; esepia yande Yar opakatu Yar sekoi ɨvɨ pɨpendar upe, iyavei omondo mba'e tuvicha va'e opakatu gwenoisar upe.

¹³Esepia ko Ikwachiaprɨ pɨpe aipo e'i: “Akoi opakatu osenoi va'e yande Yar rer, a'e ipɨsɨröprɨ yuvɨrekoira.”

¹⁴Evokoiyase ¿Marä e'ira pi'ä serer renoi viña, esepia ni'ä ndovɨroyai ete yuvɨreko? ¿Marä e'ira pi'ä seroya, esepia ndosendui ete ñe'ësa sesendar yuvɨreko? ¿Marä e'ira pi'ä sendukwa yuvɨreko, esepia ndipoi ete omombe'u va'erä ne'ësa avɨye va'e yuvɨreko chupe?

¹⁵¿Marä e'ira pi'ä ñe'ësa avɨye va'e mombe'u yuvɨreko, esepia nda'ei ete imbouprɨ yuvɨrekoi? Inungar Ikwachiaprɨ pɨpe aipo e'i: “¡Avɨyeai ete akoi ava gweru va'e ñe'ësa avɨye va'e pɨsɨrösa resendar!”

¹⁶Nda'ei rumo opakatu vɨroya ko ñe'ësa avɨye va'e yuvɨreko. Esepia Isaías aipo e'i araka'e: “Che Yar, ¿uma pi'ä vɨroya ore ñe'ë yuvɨreko?”

¹⁷Egwë e'i, oime yande yeroyasa yasenduse ñe'ësa avɨye va'e, iyavei ñe'ësa avɨye va'e ou Cristo sui ete.

¹⁸Che rumo aporandu: ¿Avɨyeteramo ndosendui ñe'ësa avɨye va'e yuvɨreko? ¡Supiete osendu yuvɨreko! Esepia Ikwachiaprɨ pɨpe aipo e'i: “A'e iñe'ë yuvɨreko opa ite ikwasa opakatu ɨvɨ rupi, iyavei opakatu ɨvɨ rupi osendu iñe'ë yuvɨreko.”

¹⁹Iyavei che aporandu iri: ¿Ndosendukwai pi'ä Israel ɨgwar yuvɨreko? Yɨpɨndar, Moisés aipo e'i va'e: “Perekate'ɨ̇ra che porovasasa rese oipɨsɨse ava nda'ei va'e judío iyavei peñemoɨröra ayapose mba'e avɨye va'e akoi ava, ndayarakwai va'e upe.”

²⁰Ipare omombe'u tuprɨ ite Isaías osɨkɨye e'ɨ̇save Tüpä ñe'ë aipo e'i va'e: “Akoi ava ndache rekai va'e, a'e che repia ite yuvɨreko; iyavei ayemboyekwa ite ava che rese ndoporandui va'e upe.”

²¹Iyavei Isaías oñe'ë Israel ɨgwar rekokwer rese, aipo e'i: “Arɨ rupi añe'ë tëi ava che reroyasare'ɨ̇ upe vichiko.”