Read Guarayu ROMANOS 12 Bible Online

ROMANOS 12 - Guarayu bible

ROMANOS 12

¹Sese che rɨvrɨ eta, che Tüpä poroparaɨsuerekosa pɨpe aipota pe yemondo ite pe rekoveseve chupe narä, inungar mba'e Tüpä upe seropove'ëprɨ ite, a'e avɨye itera chupe. A'e ni'ä pe kwaita pe pɨ'a pɨpe sui ete peyapo va'erä chupe.

²Peiko iri eme ko ɨvɨ pɨpendar pɨ'añemoñetasa tëi rupi; iyakatu rumo, pesekuñarö pe pɨ'añemoñetasa ipɨpe sui opakatu pe rekokwer oñekuñaröra, egwë peyese peikwara Tüpä remimbotar a'e mba'e avɨye va'e, semimbotar supi tuprɨ va'e ite.

³Tüpä ni'ä oporovasasa pɨpe che kwai, sese aipo a'e peü pepɨ'añemoñeta eme pe yemboɨvateai agwä rese. Iyakatu rumo peikwa tuprɨ pe pɨ'añemoñetasa peyesendar Tüpä peü mba'e imbougwer rupi sese pe yeroyasa pɨpe.

⁴Inungar yande rete ñepëiño ite, sesendar rumo seta, iyavei nda'oyoyai mba'e sembiapo yuvɨreko,

⁵egwë ya'e avei yande, yepe yande retara viña, Cristo rese yayemboyase rumo, ñepëi va'e nungar yaiko, evokoiyase yande ñepëi-pëi opakatu upendar yaiko.

⁶Tüpä ni'ä omboyeavɨratɨ mba'ekwasa imbou oporoaɨsusa pɨpe ñepëi-pëi upe. Evokoiyase, Tüpä ombouse oñe'ë mombe'u agwä yandeu, yamombe'ura ñepëi-pëi iñe'ë sese yande yeroyagwer rupi;

⁷akoi ombouse mba'ekwasa ambuae ava pɨtɨ̇vɨï agwä yandeu, yaipɨtɨ̇vɨï tuprɨ aveira. Akoi oipɨsɨ va'e porombo'esa arakwasa resendar, sese toporombo'e tuprɨ oiko;

⁸iyavei akoi oipɨsɨ va'e porombo'esa arakwasa resendar ambuae ava mongere'ɨ̇ katu agwä, tasekoi katu ava mongere'ɨ̇ agwä. Akoi iporereko va'e, toyapo gweko mbegwemisa pɨpe; akoi oipɨsɨ va'e mboravɨkɨ, toyapoño okere'ɨ̇sa pɨpe; iyavei akoi iparaɨsu va'e pɨtɨ̇vɨïsar, toipɨtɨ̇vɨïño avei vorɨvetesa pɨpe.

⁹Iyavei peyeaɨsu tuprɨra peiko. Ndapesepiai chira rumo mba'e naporäi va'e iya rumo peikora mba'e avɨye va'e pɨpe.

¹⁰Peyeaɨsu katu ñepëi-pëi oyeɨvrɨ nungar tuprɨ pe rekosa pɨpe, pe ae peyemboetei rägwer sui pemboetei katura ambuae ava.

¹¹Peyemongere'ɨ̇ katu, ani ndapekere'ɨ̇i chira iyavei peyapo yande Yar upe mba'e opakatu pe rekoete pɨpe.

¹²Peikoño pe vɨ'aretesave mba'e ɨva pendar rärösa pɨpe; peñemosaño mba'e rasɨkwer peiporarase; iyavei anichira pepoi pe yeruresa sui yepi.

¹³Peipɨtɨ̇vɨïra ava tekwa pendar iporeroya va'e ipanese mba'e chupe; pemo'äpɨsɨra ava oyepota va'e pe pɨri.

¹⁴Peyerure pe amotare'ɨ̇mbar rese. Peporandu porovasasa rese a'e ava upe narä; ani pe avei peñe'ë marä chupe.

¹⁵Peyembovɨ'a akoi ava oyembovɨ'a va'e rupive; peyase'o avei ava oyase'o va'e rupive.

¹⁶Peiko tuprɨ oyoya gwasu ñepëi-pëi oyese pe yeaɨsusa pɨpe. Anichira peyeekomboɨvateai, iyakatu rumo peyemoigätu ava seko mbegwemi va'e mborɨ agwä. Anichira peiko imba'ekwa vai va'e nungar.

¹⁷Ani peü mba'e tëi aposar upe pemboyevɨra mba'e tëi avei. Peyapo katu mba'e tuprɨ opakatu ava rembiepiave.

¹⁸Peikatu va'e rupi peseka pe reko tuprɨ agwä opakatu ava rese.

¹⁹Che rɨvrɨ eta, ani pe ae pemboyevɨ mba'e tëi pɨpe pe reko momaräsar, peseyaño Tüpä upe a'e oikwara chupe; esepia Ikwachiaprɨ pɨpe aipo e'i: “Che aikwara ava mba'e tëi aposar upe; che amboepɨra e'i yande Yar.”

²⁰Aipo e'i avei: “Akoi nde amotare'ɨ̇mbar ndasɨepoise, emondo mba'e ito'u; iyavei akoi i'useise, eremondora itoɨ'u; esepia egwë peyese pe amotare'ɨ̇mbar upe, ochïra pe sui.”

²¹Ani mba'e tëi upe peyeekopɨ uka. Iyakatu rumo pesekopɨra mba'e-mba'e tëi, mba'e tuprɨ aposa pɨpe.