Read Guarayu ROMANOS 14 Bible Online

ROMANOS 14 - Guarayu bible

ROMANOS 14

¹Akoi ava ndoyeroya tuprɨ vɨtei va'e yande Yar rese oikese pe pɨri, peipɨsɨ tuprɨra; ani peiñe'ë poepɨra ipɨ'añemoñetasa nda'oyoyaise pe pɨ'añemoñeta rese.

²Esepia, oime ava ipɨ'a ñemoñeta o'u va'erä opakatu mba'e, ambuae evokoiyase, ipɨ'añemoñeta nipirätäi va'e, a'e yuvɨro'u ka'aro tëi.

³Supiete, akoi ava opakatu mba'e o'u va'e, tovɨroɨrö eme ava ndo'ui va'e opakatu mba'e; iyavei akoi ndo'ui va'e opakatu mba'e, a'e tovɨroɨrö eme akoi o'u va'e opakatu mba'e, esepia evokoi nungar ava yuvɨrekoira Tüpä poraɨsusa pɨpe ite.

⁴¿Uma vo nde ereiko ereroɨrö va'erä ambuae ava rembigwai eiko? Esepia sekoi tuprɨse anise sekorai tëise, a'ese serekwar oikwara chupe. Sekoira mba'e tuprɨ pɨpe, esepia yande Yar vɨreko ite pirätäsa osekomoigätu agwä.

⁵Oime aipo e'i va'e: Amove ava ñepëi arɨ omboetei katu yuvɨreko ambuae arɨ sui, oime avei ava vɨroya va'e opakatu arɨ oyoya tuprɨse. Ñepëi-pëi ava yuvɨrekoira opɨ'a ñemoñetagwer rupi.

⁶Akoi oyekwaku va'e ñepëi arɨ, yande Yar mboeteisa pɨpe tomboeteiño ite. Iyavei akoi o'u va'e opakatu mba'e, yande Yar mboeteisave avei egwë e'i, avɨye ndeu e'i Tüpä upe; iyavei akoi ndo'ui va'e opakatu mba'e, yande Yar mboeteisave egwë e'i, avɨye ndeu e'i avei Tüpä upe.

⁷Ndipoi ete yande pa'ü pendar sekoi va'e oyeupe narä tëi nomano tëi avei oyeupe narä.

⁸Supiete yaikovese, yande Yar upe narä ite yaikove; iyavei yamanopase, yande Yar upe narä ite yamanopara. Yaikose tekovesa pɨpe anise manosa pɨpe, yande Yar upe narä ite rumo yaikove.

⁹Sese ni'ä Cristo omano ipare okwerayevɨ: Yar sekoi va'erä opakatu ava oikove va'e upe omano va'ekwer upe avei.

¹⁰¿Ma'erä vo evokoiyase, ereroɨrö nde mboetasa? ¿Iyavei nde, ma'erä evokoiyase ndereyambotai? Esepia opakatu yasora Tüpä rovai, a'e evokoiyase opara oporandu yande rekokwer rese yandeu.

¹¹Esepia Ikwachiaprɨ pɨpe aipo e'i: “Supiete che reko pɨpe aipo a'e, aipo e'i yande Yar, opakatu ava oñenopɨ'ära che rovai iyavei opakatu Tüpä omboeteira yuvɨreko.”

¹²Evokoiyase, yande ñepëi-pëi yamombe'ura yande rekokwer Tüpä upe.

¹³Sese, yande ndiya iri yañereroɨrö yaiko. Iyakatu rumo, ñepëi reseve pereko tuprɨ ambuae pe rɨvrɨ, angaipa pɨpe sereko uka e'ɨ̇ agwä, iyeroyasa momarä e'ɨ̇ agwä avei.

¹⁴Che aikwa ndipoi ete tembi'u yande reko momarä va'e; inungar che aroya yande Yar Jesús, sese che ayeroya ite yuvɨreko. Oime rumo ava ipɨ'a ñemoñeta va'e kokotɨ tëi tembi'u rese, a'e chupeño evokoiyase ndiyai ete i'u agwä.

¹⁵Iyavei kurïtëi, akoi ere'u va'e mba'e nde mboetasa rovai a'e evokoiyase sekoira poreroɨrösa pɨpe, a'ese nde rekokwer ndaseko iri chira mba'e avɨye va'e pɨpe. ¡Ko mba'e ere'u va'e sui tokañɨ tëi eme yuvɨreko esepia Cristo omano ite sepɨrä!

¹⁶Anichira pemondo ava upe, iñe'ë-ñe'ë tëi agwä perekokwer avɨye va'e rese.

¹⁷Esepia Tüpä mborerekwasave ndikwasai mba'e ya'u va'e yaɨ'u va'e avei, a'e rumo oipota yande reko tuprɨ agwä, mba'e avɨye va'e pɨpe iyavei Espíritu Maräne'ɨ̇ rese yande reko agwä.

¹⁸Egwë ya'ese Cristo mboeteisave, avɨye aira Tüpä upe opakatu ava rembiepiave aveino.

¹⁹Sese, iya yaseka opakatu mba'e avɨye va'e yande rerogwata agwä yepɨtɨ̇vɨïsa ikatuprɨ va'e rupi.

²⁰Ani pemokañɨ uka tëi ava rekokwer Tüpä remipɨsɨrö tembi'u sui tëi. Opakatu tembi'u avɨye va'e ite; ndiyai ete rumo ya'u tembi'u ambuae ava Cristo reroyasar pɨ'añemoñetasa momarä agwä.

²¹Avɨye katu ndaya'uise mba'e ro'o, ndayaɨ'uise avei uva rɨkwer, iyavei ambuae mba'e ndayayapoise, ambuae ava Cristo reroyasar angaipa pɨpe seitɨ uka iri e'ɨ̇ agwä.

²²Nde pɨ'a ñemoñetasa erereko va'e, ererekoño itera ndeyeupe narä Tüpä rovai. ¡Sorɨvete katura ava oyapo va'e mba'e gweko tuprɨsa pɨpe!

²³Akoi ava ndoyeroya vɨtei va'e oyese mba'e o'u va'erä rese, ipare rumo o'use a'e oyemboangaipa ipɨpe, esepia ndo'ui oyeroyasa pɨpe; iyavei opakatu mba'e yapoprɨ nda'ei va'e yeroyasa pɨpe, a'e angaipa ite.