Read Guarayu ROMANOS 16 Bible Online

ROMANOS 16 - Guarayu bible

ROMANOS 16

¹Ko yande reindrɨ Febe serer va'e, a'e oipɨtɨ̇vɨï tekwa Cencrea pendar Cristo reroyasar oiko.

²Peipɨsɨ tuprɨ katu yande Yar rer pɨpe, a'e ni'ä yande kwaita Cristo reroyasar yande rekose, iyavei peipɨtɨ̇vɨïño mba'e chupe ipane va'e rese, esepia a'e seta ite oporopɨtɨ̇vɨï che avei ete che pɨtɨ̇vɨï no.

³Pemombe'u che ma'endu'asa Prisca upe Áquila upe avei, a'e ni'ä che pɨtɨ̇vɨï mboravɨkɨ Jesucristo rekokwer rese yuvɨreko.

⁴A'e avei ni'ä mba'e tëi pɨpe omondo gwekokwer che repɨkave yuvɨreko, nda'ei chupeño avɨye a'e, opakatu nda'ei va'e judío Jesús reroyar upe avei.

⁵Pemombe'u avei che ma'endu'asa Prisca Áquila rëtäve oñemonu'ä va'e upe yuvɨreko. Pemombe'u avei che ma'endu'asa che rembiaɨsu Epéneto upe, a'e rane ni'ä yɨpɨndar ɨvɨ Asia pendar Cristo reroyasar sekoi.

⁶Pemombe'u avei che ma'endu'asa María upe. A'e ni'ä oporavɨkɨ iteanga va'e pe rekokwer rese oiko.

⁷Pemombe'u avei che ma'endu'asa che mu Andrónico iyavei Junias upe, a'e ni'ä che mboetasa yuvɨrekoi che rokendasave; a'e avei Jesús ñe'ë mombe'usar remimboyeroya yuvɨrekoi, a'e rane avei yɨpɨndar Cristo reroyasar yuvɨrekoi che sui.

⁸Pemombe'u avei che ma'endu'asa che rembiaɨsu Ampliato upe yande Yar rese sekosa pɨpe.

⁹Pemombe'u avei che ma'endu'asa Urbano upe, a'e ni'ä yande ndugwer oporavɨkɨ va'e Cristo rekokwer rese, che mborɨpar Estaquis upe avei.

¹⁰Pemombe'u avei che ma'endu'asa Apeles upe, a'e ni'ä gwekoa'äsa sui osë tuprɨ va'e Cristo rese oyeroyasa pɨpe; iyavei pemombe'u che ma'endu'asa ava Aristóbulo rëtä pɨpendar yuvɨrekoi va'e upe avei.

¹¹Pemombe'u avei che ma'endu'asa che mu Herodión upe, ava Narciso rëtä pɨpendar yande Yar reroyasar upe avei.

¹²Pemombe'u avei che ma'endu'asa Trifena iyavei Trifosa upe; a'e ni'ä oporavɨkɨ va'e yande Yar upe narä yuvɨreko, iyavei yande rembiaɨsu yande reindrɨ Pérsida, a'e avei ni'ä oporavɨkɨ ite yande Yar upe narä.

¹³Pemombe'u avei che ma'endu'asa Rufo upe, a'e ni'ä ikwaprɨ ite Jesús reroyasar seko rese. Iyavei ichɨ, a'e che sɨ nungar ite sekoi.

¹⁴Pemombe'u avei che ma'endu'asa Asíncrito upe, Flegonte upe, Hermes upe, Patrobas upe, Hermas upe iyavei opakatu ambuae yande rɨvrɨ eta supi yuvɨrekoi va'e upe.

¹⁵Pemombe'u avei che ma'endu'asa Filólogo upe iyavei Julia upe, Nereo upe iyavei seindrɨ upe, Olimpas upe, opakatu yande rɨvrɨ yande Yar rese yuvɨrekoi va'e ipɨrindar upe avei.

¹⁶Peyeovaupɨte katu pe reko maräne'ɨ̇sa pɨpe che ma'endu'asa mombe'use peyeupe. Opakatu Cristo reroyasar ko'ave omondo avei oma'endu'asa yuvɨreko peü.

¹⁷Che rɨvrɨ eta, peikwa katu pe pa'ü pendar oporomboya'o pota serai va'e sui oime ava egwë e'i va'e oitɨ uka va'e ava mba'e tëi pɨpe, esepia a'e nda'ei ete ko ñe'ësa pe yembo'esa rupi yuvɨrekoi. Sese evokoi nungar ava sui peyepepɨño itera,

¹⁸esepia a'e ava nda'ei yande Yar Cristo upe narä oyapo mba'e yuvɨreko, egwë e'i rumo a'e oyeupe narä tëi oipotarai mba'e yuvɨreko iyavei ombopa ava ndayarakwa tuprɨi va'e; oñe'ë tuprɨai anga'u oporomo'äpɨsɨ aisa pɨpe tëi yuvɨreko.

¹⁹Opakatu ite ikwasa pe poreroyasa. Sese che avɨ'arete vichiko, che rumo aipota pemboyekwa va'erä pe mba'ekwasa mba'e avɨye va'e apo agwä, nda'ei mba'e tëi apo agwä;

²⁰egwë e'i pɨ'aivira Tüpä Karugwar rekopɨpa gweko katuprɨsa pɨpe, pe avei evokoiyase pesekoreroyɨra. A'ese yande Yar Jesús perovasara perereko.

²¹Omondo avei oma'endu'asa Timoteo peü, a'e che pɨtɨ̇vɨï che poravɨkɨsa rese yepi; iyavei che mu Lucio, Jasón, Sosípater, a'e avei ima'endu'a yuvɨreko pe rese.

²²Che Tercio, aikwachia va'e ko ñe'ësa peü, che avei che ma'endu'asa amondo yande Yar reroyasa pɨpe peü.

²³Omondo avei oma'endu'asa Gayo peü. A'e sëtäve ite ni'ä ake yepi, ipɨri avei ambuae Jesús reroyasar oñemonu'ä yuvɨreko yepi. Iyavei Erasto omondo oma'endu'asa opakatu peü, a'e tekwa mba'e gwarepochi apokatusar, yande rɨvrɨ Cuarto avei omondo oma'endu'asa peü.

²⁴Avɨye, yande Yar Jesucristo upe taperovasa opakatu. Amén.

²⁵Yamboetei Tüpä sereko, a'e ni'ä oikatu pe movɨräkwä ko ñe'ësa ñepɨsɨrösa resendar amombe'u va'e rupi iyavei ko porombo'esa Jesucristo rekokwer resendar rupi avei. A'e oyoya tuprɨ ite Tüpä omboyekwa ramo va'e cheu ko ɨvɨ apoe'ɨ̇ suive mba'e ndikwasai va'e rese,

²⁶kurïtëi rumo oyekwa uka oñe'ë mombe'usar rembikwachia pɨpe Tüpä apɨre'ɨ̇ va'e porokwaita rupi. A'e Tüpä ñe'ësa ndikwasai va'e omboyekwa uka opakatu ava upe, opakatu vɨroya va'erä yuvɨreko.

²⁷¡Tüpä gweraño imba'ekwa va'e yepi, egwë te'i a'e yande Yar Jesucristo rer pɨpe imboeteiprɨ tasekoi! Amén.