Read Guarayu ROMANOS 2 Bible Online

ROMANOS 2 - Guarayu bible

ROMANOS 2

¹Oimese pe pa'ü pendar ko oyapo mba'e tëi; tokañi o'esave ambuae upe, a'ese a'e ae oyemokañɨ tëi uka, esepia a'e inungar tuprɨ avei.

²Yaikwa rumo Tüpä omokañɨse evokoi nungar mba'e tëi aposar rekokwer, a'e evokoiyase oyapo mba'e supi tuprɨ va'e.

³Pe opase ava rekokwer pesenoi, pe avei rumo egwë peye tuprɨ peiko. Pe avei ete evokoiyase ndapeñemi chietera Tüpä ñemoɨrösa sui.

⁴Nde ereroɨrö Tüpä rembiapo mba'e ndopai va'e iñemosasa resendar avei, nande pɨ'añemoñetai rumo mba'e sembiapo avɨye va'e rese, ipɨpe sui tosekuñarö gwekokwer oyapave egwë e'i ndeu.

⁵Nde rumo, ndepɨ'arätäsa pɨpe sui ndereyevɨ potai ete Tüpä upe, eremonu'ä atɨ tëi ndeangaipa ndeyese sereko arɨ poronupasa ipa va'e yepotase narä kuri, a'ese Tüpä omboyekwara gweko pirätäsa oimese porandusa opakatu mba'e tembiapokwer rese kuri

⁶a'ese opara omboepɨ ñepëi-pëi yande rembiapokwer rupi yandeu.

⁷Omboura tekovesa apɨre'ɨ̇ va'e yandeu, yasekase teko orɨ Tüpä suindar poromboeteisa, iyavei mba'e apɨre'ɨ̇ va'e yande mba'e tuprɨ aposa pɨpe;

⁸ombou aveira oñemoɨrösa ava ndiporomboyeroyai va'e upe, a'e akoi, ko ñe'ësa supiete va'e reroya rägwer sui vɨroya va'e mba'e tëi.

⁹Judío opakatu mba'e-mba'e tëi aposar ranegätu oiporarara mba'e rasɨkwer yuvɨreko, iparera nda'ei va'e avei judío.

¹⁰Tüpä rumo, opakatu seko katuprɨ va'e upe omondora imboetei agwä, toipɨsɨ teko orɨ iyavei toyuvɨrekoi mba'e tuprɨsa pɨpe oyapave, yɨpɨndar rumo judío eta upe rane omondora, iparera nda'ei va'e judío upe.

¹¹Esepia Tüpä ndayande mboyoavɨratɨi yande rereko.

¹²Opakatu oyemboangaipa va'e Moisés porokwaita ndovɨrekoi va'e oyese yuvɨreko, a'e oñemokañɨ tëira evokoi porokwaita pore'ɨ̇ yuvɨreko, iyavei oyemboangaipa va'e Moisés porokwaita rerekosa pɨpe yuvɨreko, a'e porokwaita pɨpe avei opara okañɨ tëi porandusave koiye.

¹³Esepia osenduño tëi va'e porokwaita nda'ei seko katuprɨ va'e Tüpä rovai yuvɨreko, vɨroya va'e ite rumo porokwaita a'e seko katuprɨ va'e yuvɨrekoi.

¹⁴Esepia akoi nda'ei va'e judío yuvɨrekoi va'e yepe ndovɨrekoi ko porokwaita yuvɨreko viña, a'e rumo ko porokwaita rupi tuprɨ oyapose mba'e, a'e evokoiyase inungar porokwaita vɨreko va'e yuvɨreko.

¹⁵Esepia gwembiapo katuprɨ pɨpe omboyekwa porokwaita vɨrekose opɨ'a pɨpe. Opɨ'añemoñeta pɨpe avei oyandu porokwaita mboavɨyesa, a'e ipɨpe avei oyandu mba'e gwembiavɨ, ichui avei oyemongere'ɨ̇ mba'e avɨye va'e apose

¹⁶a'e arɨ kañɨ pɨpe Tüpä oyokwai ukara opakatu ava rembiapo kwae'ɨ̇sa reprɨ pɨsɨ agwä Jesucristo upe, ko ñe'ësa pɨsɨrösa resendar amombe'u va'ekwer rupi tuprɨ egwë e'ira kuri.

¹⁷Nde judío ereiko, sese ereyeroya rai Moisés porokwaita rese, ipɨpe sui ereyeeko mboɨvateai nde Tüpä rese ereikose.

¹⁸Peikwa semimbotar, a'e porokwaita pe mbo'e avei mba'e avɨye katu va'e poravo agwä.

¹⁹Peyeroya ite perogwata va'erä ava ndasesapɨsoi va'e, peiko pota avei tesapesa nungar pɨ̇tümimbisa rupi ava yuvɨrogwata va'e upe;

²⁰peikatu avei ava ndosendukwai va'e mboarakwa iyavei ava seko mbegwemi va'e nungar mbo'e agwä, esepia ko mborokwaita pereko opakatu mba'ekwasa iyavei mba'e supi tuprɨ va'e.

²¹Esepia akoi pembo'ese ambuae ava, ¿ma'erä ru ndereyembo'ei nde ae? Pemombe'u avei ni'ä monda e'ɨ̇ agwä resendar, ¿ma'erä ru pe avei pemonda no?

²²Ndiyai ete peagwasa peye ava upe; ¿ma'erä ru peteiete egwë peye? Ndapesepia potai ete mba'e ra'anga; ¿ma'erä ru opa peñomi mba'e sepɨ va'e itüpäro pɨpe sui?

²³Peyeekomboɨvateai ko mborokwaita rerekosa rese; ndapemboetei rumo Tüpä ipɨpe a'e mborokwaita mboavɨye e'ɨ̇ pɨpe.

²⁴Supiete Ikwachiaprɨ araka'endar pɨpe aipo e'i: “Pe sui tëi ava ndoikwai va'e Tüpä iñe'ë-ñe'ë tëi serer maräne'ɨ̇ rese yuvɨreko.”

²⁵Supiete Moisés porokwaita vɨroya va'e, circuncisión resendar a'e avɨye angara peü; ndaperoya tuprɨise rumo, pe evokoiyase inungar ndapeyembocircuncidai va'e peiko.

²⁶Akoi ava ndoyembocircuncidai va'e, a'e rumo vɨroyase porokwaita, a'e seroyaprɨ inungar imbocircuncidaprɨ yuvɨrekoi.

²⁷Akoi ndoyembocircuncidai va'e, oyapose rumo mborokwaita yuvɨreko, a'e evokoiyase omombe'ura pe kañɨ agwä yuvɨreko, esepia yepe pereko porokwaita viña, pe rumo ndapemboavɨyei ete.

²⁸Esepia judío supiete va'e yaikose, nda'ei chira yande rekokwer rupi gweraño egwë ya'era, iyavei circuncisión supiete va'e nda'ei yande retekwer rese gweraño tëi avei.

²⁹Judío ete ite, yuvɨrekoi va'e rumo opɨ'a pɨpe vɨroya Tüpä: iyavei circuncisión supiete va'e, Espíritu rembiapo yande pɨ'a pɨpe, nda'ei porokwaita ikwachiaprɨ rembiapo tëi. Akoi egwë e'i va'e, a'e oipɨsɨra omboeteisa Tüpä suindar ite, nda'ei chira ava tëi suindar.