Read Guarayu ROMANOS 3 Bible Online

ROMANOS 3 - Guarayu bible

ROMANOS 3

¹Evokoiyase, ¿mba'e vo ko avɨye judío yande reko agwä anise yande yembocircuncidasa pɨpe pi'ä avɨyera?

²Seta yupagwer oime mba'e tuvicha va'e. Esepia yɨpɨndar, Tüpä omondo oñe'ë judío eta upe imboavɨye agwä.

³¿Mba'e evokoiyase avɨyera? ¿Tüpä pi'ä opoira gweko tuprɨsa sui, ambuae ava ndaseko tuprɨi va'e rekokwer sui tëi tie?

⁴¡Ani nda'ei ete supi! Esepia, Tüpä omboyekwa ite mba'e supi tuprɨ va'e gwembiapo, yepe opakatu ava semirä ñeteai va'e yuvɨreko; esepia Ikwachiaprɨ araka'endar pɨpe aipo e'i: “Supi tuprɨ va'e Tüpä e'ira nde ñe'ë rese yuvɨreko, iyavei ereikese ava porandusave eresë tuprɨñora ichui.”

⁵Yande rekorai pɨpe tëi yamboyekwase Tüpä reko tuprɨsa, ¿marä ya'era vo evokoiyase? ¿Tüpä nda'ei supi tuprɨ va'e ya'e yande nupase yande reko raisa sui? (Che rumo añe'ë inungar ava ko ɨvɨ pɨpendar tëi.)

⁶¡Ani nda'ei ete supi! Esepia Tüpä nda'eise supi tuprɨ va'e viña, ¿marä e'ira oporandu tekokwer rese ko ɨvɨ pɨpendar upe viña?

⁷Che remirä pɨpe sui tëi omboetei katura Tüpä yuvɨreko, ¿ma'erä pi'ä evokoiyase angaipa viyar nungar tëi che rereko yuvɨreko?

⁸Evokoiyase, ¿ma'erä vo ndayayapoi mba'e naporäi va'e mba'e tuprɨ reime agwä? Ko pɨpe sui ni'ä oime ava kokotɨ tëi oporombo'e e'i va'e yuvɨreko cheu; a'e ava iya ite oipɨsɨra kañɨsa yuvɨreko.

⁹¿Marä e'i evokoiyase? ¿Yande judío yaiko va'e, nda'ei ete ɨvate katu yande rekokwer opakatu ambuae ava-ava tëi sui? ¡Ani nda'ei ete supi! Esepia opa yamboyekwa opakatu rovake, angaipa viyar yande judío yaiko va'e nda'ei va'e avei judío,

¹⁰supiete Ikwachiaprɨ pɨpe aipo e'i: “¡Ndipoi ete ava seko katuprɨ va'e ñepëi angara viña!

¹¹Ndipoi ete ava osendukwa tuprɨ va'e mba'e. Ndipoi avei Tüpä oseka va'e yuvɨreko.

¹²Opakatu ava ogwata mba'e naporäi va'e pɨpe; opakatu avei sekokwer kokotɨ tëi yuvɨreko. ¡Ndipoi ete ava mba'e tuprɨ aposar! ¡Ndipoi avei ñepëi angara viña!

¹³Iñe'ësa mba'e tëiete inungar tuvɨpa ndasovapɨsai va'e, oñe'ësa pɨpe oporombopa yuvɨreko, a'e ñe'ësa evokoiyase inungar mboi naporäi va'e oporomokañɨ tëi va'e,

¹⁴ipɨpe oñe'ërai opɨ'avɨräkwä pɨpe yuvɨreko.

¹⁵Ndayɨpɨtɨi oporapichi agwä yuvɨreko;

¹⁶seta ava omomarä, omombaraɨsu avei ogwatasa rupi yuvɨreko,

¹⁷iyavei ndoikwai ete gweko tuprɨ agwä yuvɨreko.

¹⁸Ndipɨ'añemoñetai ete Tüpä sui osɨkɨye agwä yuvɨreko.”

¹⁹Yande yaikwa ite opakatu aipo e'i va'e porokwaita pɨpe, ko aipo e'i porokwaita pɨpe yuvɨrekoi va'e upe, opakatu ava ɨvɨ rupindar tikiriri Tüpä ñemoɨrösa pɨsɨ agwä yuvɨreko oyapave;

²⁰esepia ndipoi chietera ñepëi seko avɨye va'e Tüpä rovake ko porokwaita mboavɨye pɨpe, a'e mborokwaita rumo oikwa uka yande angaipa viyar yande reko.

²¹Kurïtëi rumo, porokwaita pore'ɨ̇, Tüpä omboyekwa ite yande rekokwer moigätu agwä omombe'u avei porokwaita rupi iyavei Tüpä ñe'ë mombe'usar rupi:

²²Jesucristo rese yande yeroyasa pɨpe, Tüpä oseko mo'ɨ̇vi ete opakatu ava vɨroyasar. Nomboyoavɨi ete rumo oporoaɨsusa sereko:

²³opakatu ite oyemboangaipa, sese ndosupitɨi ete Tüpä reko porañetesa yuvɨreko.

²⁴Tüpä rumo oporoaɨsusa pɨpe ovɨ'asa pɨpe avei, omoigätu yande rekokwer mba'e tuprɨ pɨpe narä, Cristo Jesús mano agwer sui yaiko pɨsɨrösa pɨpe kurïtëi.

²⁵Tüpä rumo ombou Gwa'ɨrɨ Cristo oipɨyere va'erä vuvɨ yande angaipa rese ñerö agwä. Ko poropɨsɨrösa yareko yande yeroyasa pɨpe. Na e'i pota Tüpä yande rekokwer moigätu agwä: ipɨpe sui iñeröira yande angaipa yayavɨ va'ekwer upe,

²⁶esepia a'e oñemosaño va'e ite. A'e omboyekwa pota ite ava kurïtëindar upe marä e'ira yande rekokwer mo'ɨ̇vi oiko; supiete inungar a'e seko ɨ̇vi tuprɨ va'e, egwë e'i aveira Jesús reroyasar rekokwer mo'ɨ̇vi tuprɨ oiko.

²⁷¿Kevo evokoiyase, opɨta ava yemboɨvateaisa Tüpä rovai? ¡A'e imokañɨprɨ tëi sekoira! ¿Mba'e sui pi'ä? Nda'ei porokwaita reroya e'ɨ̇sa pɨpe, a'e egwë e'i oporeroyasa pɨpe ite.

²⁸Egwë ya'e kurïtëi mba'e mboavɨye yaiko: Tüpä oseko mo'ɨ̇vi tuprɨ ava vɨroyasar, nda'ei rumo porokwaita mboavɨyesa sui tëi.

²⁹¿Judío Tüpä gweraño pi'ä Tüpä sekoi? ¿Nda'ei pi'ä opakatu ɨvɨ pɨpendar Tüpä avei? ¡Supiete ni'ä opakatu ava ɨvɨ pɨpendar Tüpä sekoi,

³⁰supiete oime ñepëiño ite Tüpä: a'e Tüpä akoi oseko mo'ɨ̇vi va'e vɨroyasar, ndoporandui chira imbocircuncidaprɨ rese ani chiaveira ndoipɨsɨi va'e rese!

³¹Evokoiyase, ¿Jesús reroyasa pɨpe pi'ä yaseko reroyɨ porokwaita yaiko? ¡Ani nda'ei ete supi! Ipɨpe yamboyekwa ite porokwaita rekokwer sereko.