Read Guarayu ROMANOS 8 Bible Online

ROMANOS 8 - Guarayu bible

ROMANOS 8

¹Egwë e'i ete, kurïtëi rumo ndipo iri ñemoɨrösa yandeu Cristo Jesús rese yaikose,

²esepia ni'ä, Cristo Jesús rese yaikose, yande kwaisar Espíritu tekovesa mondosar yande renose angaipa povrɨ sui manosa sui avei.

³Esepia Tüpä oyapo ndoikatui va'e Moisés porokwaita yapo, supiete ndoikatui yapo ava angaipa pɨpe sui: Sese Tüpä ombou Gwa'ɨrɨ yande nungar tuprɨ ite iyavei angaipa repɨrä, egwë e'i imokañɨ opakatu yande angaipa yandesui, yande remimbotarai avei.

⁴A'e egwë e'i yande yamboavɨye va'erä porokwaita, esepia ndayaiko iri yande remimbotar tëi pɨpe, yaiko rumo Espíritu avɨye va'e rese.

⁵Esepia akoi yuvɨrekoi va'e gwemimbotar tëi pɨpe, gwekokwerai reseño tëi ipɨ'añemoñeta yuvɨreko; yuvɨrekoi va'e Espíritu semimbotar rupi, a'e ipɨ'añemoñeta Espíritu rembiapo rese yuvɨreko.

⁶Iyavei akoi gwemimbotarai rese tëi ipɨ'añemoñeta va'e, a'e omano tëietera yuvɨreko; ipɨ'añemoñeta va'e rumo Espíritu suindar mba'e rese vɨrekora tekovesa apɨre'ɨ̇ va'e mba'e tuprɨ pɨpe yuvɨreko.

⁷Akoi gwekokwerai reseño tëi ipɨ'añemoñeta va'e, a'e Tüpä amotare'ɨ̇mbar yuvɨrekoi, esepia ndoipotai ete ndoikatui avei porokwaita mboyeroya agwä.

⁸Egwë e'i ete, akoi yuvɨrekoi va'e gwemimbotarai pɨpe, ndoikatui ete Tüpä remimbotar apo agwä yuvɨreko.

⁹Pe rumo ndapeiko iri pe remimbotarai pɨpe, peiko Espíritu rese, esepia Tüpä Espíritu sekoi perese. Akoi ndovɨrekoi va'e Espíritu Cristo suindar oyese, a'e nda'ei ete Cristo suindar.

¹⁰Supiete Cristo sekoi pe rese, Espíritu avei oikove pe rese, esepia Tüpä, pereko mo'ɨ̇vi ete, yepe peretekwer imondosa ite manosa pɨpe angaipa repɨrä viña.

¹¹Iyavei akoi Espíritu ombogwerayevɨ va'e Jesús a'e sekoi pe rese, a'e avei akoi ombogwerayevɨ va'e Cristo, omondora tekovesa pɨasu pe retekwer upe narä ipɨpe sui Espíritu Tüpä suindar sekoi pe rese.

¹²Egwë e'i che rɨvrɨ eta, yareko yande kwaita, nda'ei rumo yande remimbotarai pɨpe yande reko agwä.

¹³Esepia peikoño vɨtese pe remimbotarai pɨpe, a'ese pekañɨ tëira; pemombopase rumo Espíritu rer pɨpe mba'e naporäi va'e peyesui, a'ese perekora tekovesa apɨre'ɨ̇.

¹⁴Esepia opakatu ava Tüpä Espíritu remimbo'e, a'e Tüpä ra'ɨrɨ ite yuvɨrekoi.

¹⁵Supiete pe ndapeipɨsɨi Espíritu mba'e-mba'e tëi resendar pereraso iri va'erä sɨkɨyesa pɨpe, Espíritu pemoingo Tüpä ra'ɨrɨ nungar ete. Sese Espíritu yande reraso Tüpä upe, aipo e'i: “¡Abbá! ¡Che Ru!”

¹⁶Ko Espíritu avei oikwa uka yande espíritu upe Tüpä ra'ɨrɨ yande rekose.

¹⁷Iyavei yande ta'ɨrɨ ite yaiko, egwë ya'e aveira Tüpä porerekosa pɨsɨ, a'e Cristo reseve yamboya'ora ipɨsɨ, esepia yaiko ite paraɨsusa pɨpe supive egwë ya'e aveira yaiko ipɨri seko porañetesave kuri.

¹⁸Kurïtëi rumo yande paraɨsusa ndoyoyai ete teko porañetesa yande rese ou va'erä rese.

¹⁹Opakatu ava ɨvɨ pɨpendar osärö vɨte ite okere'ɨ̇sa pɨpe yuvɨreko, osepia pota avei teko porañete Tüpä ta'ɨrɨ yande rekose yuvɨreko.

²⁰Esepia ava ɨvɨ pɨpendar nda'e iri ete yɨpɨndar nimaräi va'e nungar, nda'ei rumo oyesui tëi egwë e'i, esepia Tüpä ite egwë e'i sereko; mba'e sembiapokwer rumo osäröño ite

²¹tekokwer opa tëi va'erä sui ñepɨsɨrö agwä, teko porañete va'e Tüpä ra'ɨrɨ vɨreko va'e rupitɨ agwä kuri.

²²Yande ni'ä yaikwa araka'e suive opakatu ava ɨvɨpendar oiporara mba'e rasɨkwer yuvɨreko inungar kuña imembɨ rasɨ va'e.

²³Nda'ei rumo a'e gweraño iparaɨsu yuvɨreko, yande avei egwë ya'e, yande yareko ite Espíritu a'e yɨpɨndar va'e yaipɨsɨ va'erä ichui kuri. Yayemombaraɨsu yasärö vɨte yande kere'ɨ̇sa pɨpe Tüpä ra'ɨrɨ ite yande rereko agwä, ipɨpe sui yande retekwer opara sekuñarösa kuri.

²⁴Esepia ni'ä yañepɨsɨrö ite yande remiarö reroya pɨpe. Sese akoi yasepia va'e mba'e yande remiarö ndayasärö iri, supiete ¿Uma pi'ä osärö vɨtera mba'e osepia va'ekwer?

²⁵Akoi mba'e yande remiarö ndayasepia vɨteise rumo, yasärö vɨte yande ñemosasa pɨpe sereko.

²⁶Egwë e'i avei, Espíritu yande pɨtɨ̇vɨï ndayaikatu irise. Esepia ndayaikwai ete marä ya'era yayerure, ko Espíritu rumo oporandu ite Tüpä upe yande rese, oyemopoäsesa pɨpe.

²⁷Iyavei Tüpä, a'e oikwa va'e opakatu yande pɨ'añemoñetasa, oikwa avei Espíritu mba'e omombe'u pota va'e oyeupe, esepia Espíritu oporandu Tüpä upe semimbotar rupi, yande seroyasar yaiko va'e rese.

²⁸Yaikwa ite ni'ä Tüpä omoigätuse opakatu mba'e vɨroyasar raɨsusave, a'e chupe oñe'ë gwemimbotar rupi ete.

²⁹Esepia yɨpɨve Tüpä yande kwapa oiko, yande poravo Gwa'ɨrɨ nungar ite yande reko agwä a'e tasekoi tenonde opakatu upe ambuae vɨvrɨ eta sui oya.

³⁰Iyavei Tüpä yɨpɨsuive yuvɨrekoi va'e oiporavo, chupe oñe'ë oyeupe narä seko agwä, ipare oseko mo'ɨ̇vi tuprɨ; oseko mo'ɨ̇vi pare omondo teko porañetesa chupe.

³¹¿Marä ya'e irira vo chupe? ¡Tüpä ni'ä yande repɨsar sekoi, sese ndoikatu iri ete yande amotare'ɨ̇mbar yuvɨreko!

³²Tüpä ni'ä ombou ite Gwa'ɨrɨ imano agwä opakatu yande rekokwer repɨrä, ¿ma'erä evokoiyase nomboui chira opakatu mba'e yandeu yande pɨtɨ̇vɨï agwä Gwa'ɨrɨ rese yande rekose viña?

³³¿Uma pi'ä oikatura mba'e tëi pɨpe mondo agwä Tüpä rembiporavo? Esepia Tüpä oseko mo'ɨ̇vi opakatu vɨroyasar.

³⁴¿Uma pi'ä oikatura imokañɨ? Esepia Cristo Jesús omano yande angaipa repɨrä; iyavei okwerayevɨ kurïtëi Tüpä akato kotɨ chini, oyerure yande rekokwer rese oiko.

³⁵¿Uma pi'ä oikatura yande mboyepepɨ Cristo yande raɨsusa sui? ¿Ke yande paraɨsusa, mba'e yavai va'e yandeu, yande momarä-marä tëisa, tɨepore'ɨ̇, anise yande turukwarä ndipoise, mba'e tëise yandeu, yande yuka potase tie yuvɨreko?

³⁶Inungar Ikwachiaprɨ pɨpe aipo e'i: “Ndesui tëi oremondo manosa pɨpe yuvɨreko; inungar ovesa serasosa yukapɨrä mba'e mɨmba yukasave yepi.”

³⁷Opakatu rumo ko mba'e oimese yandeu, yasekopɨpa ite a'e yande raɨsusar rekokwer pɨpe sui.

³⁸Che aroya ite ndipoi chietera yande mboyepepɨsar Tüpä poroaɨsusa sui: manosa, ani chiaveira tekovesa, ani chiaveira mbigwai ɨva pendar, ani chiaveira pirätäsa ndayasepiai va'e, ani chiaveira kurïtëi mba'e oime va'e, anise mba'e oime va'erä kuri,

³⁹ani chiaveira mba'e ɨva pendar, ani chiaveira ɨvɨkwar ipɨkuku va'e, ani chiaveira ambuae mba'e Tüpä rembiapokwer. ¡Ndipoi chietera yande mboyepepɨ va'e Tüpä poroaɨsusa sui omboyekwa va'e yande Yar Cristo Jesús rekokwer rupi yandeu!